Jtunestik ta cholmantal li jpajinatik jw.org: «Paso ta avamigo li Jeovae»
Li ta jpajinatik jw.org ta «Vunetik xchiʼuk yan kʼusitik» xie, yichʼoj tal videoetik sventa ololetik ti xi sbie: «Paso ta avamigo li Jeovae». (Li ta españole, maʼuk noʼox oy videoetik li ta jvokʼ jpajinatik taje, yuʼun oy kʼejojetik xchiʼuk yan kʼusitik stakʼ pasel.) ¿Mi jtunesojtik xa ta cholmantal li jpajinatik taje? Mi oy yalab xnichʼnabik li buchʼutik chkakʼbetik chanubtasel ta Vivliae, ¿kʼu yuʼun mu xkakʼbetik yilik? Yuʼun xuʼ jaʼ xtijbat-o yoʼontonik sventa skʼelik yan kʼusitik li ta jpajinatik ta Internete.
Oy jun ermano ti laj yakʼbe jun ants li tratado Aʼyejetik sventa Ajvalilal yuʼun Dios numero 38, li antse oy chaʼvoʼ yalab, vaʼun lik skʼel ta anil li tratadoe. Li ololetik eke la sjakʼik kʼusi chalbe skʼoplal li vune. Vaʼun li ermanoe laj yalbe smelolal kʼusi stu xchiʼuk laj yakʼbe yil li jpajinatik ta Internet ti te chvinaj ta slajeb pajina li ta tratadoe. Ta skoj ti toj lek laj yaʼi mantal li ants xchiʼuk yalabtake, li ermanoe laj yakʼbe yil li video sventa Caleb ti te onoʼox skʼejoj batel ta selulare.
Oy jun ermana ti laj yalbe skʼoplal jpajinatik jw.org ti bu ch-abteje, li buchʼu laj yalbee jaʼ jun ants ti oy bikʼitik yalabtake. Laj yalbe ti xuʼ te sta mantaletik ti toj jtunelik sventa utsʼ alaliletike. Li ants xchiʼuk yalabtake la skʼelik li kʼusi oy ta jpajinatike. Ta tsʼakale, li antse laj yalbe li ermana ti kʼalal sutik batel ta snaike, li yalabtake tskʼejintaik la batel li kʼejoj «Predica la palabra» sbie, jaʼ noʼox oy ta español, te oy ti bu chal: «Paso ta avamigo li Jeovae».
¿Mi mu lekuk ti nopolik noʼox jkʼeltik kʼusitik jaʼ to chlokʼanuk tal li ta jpajinatik jw.org xchiʼuk ti jyalestik li videoetik, kʼejojetik xchiʼuk yan kʼusitike? Mi jech ta jpastike, chijtojobutik me lek stunesel ta cholmantal li jvokʼ jpajinatik «Paso ta avamigo li Jeovae» xchiʼuk jaʼ jech chijtunutik-o ta stojolal li Kajvaltike (Hech. 20:19).