Chanubtaso avalab anichʼnab sventa chkʼotik ta jcholmantal

1. Ta skoj li kʼusi chal Salmo 148:12, 13, ¿kʼusi chtijbat yoʼontonik spasel li totil-meʼiletike?

¹ Li ta Vivlia chalbe ololetik ti akʼo smuyubtaik li Jeovae (Sal. 148:12, 13). Jech oxal, li totil-meʼiletik yajtsʼaklom Cristoe maʼuk noʼox chchanubtasik yalab xnichʼnabik ta sventa li kʼusitik melel chal Vivliae xchiʼuk li stukʼil mantaltak Diose. Moʼoj, skʼan xchanubtasik xtok sventa xkʼotik ta jcholmantaletik. ¿Kʼuxi xuʼ kʼunkʼun spasik batel taje?

2. ¿Kʼusitik xuʼ spas alab-nichʼnabiletik ta skoj li kʼusitik chil tspas li stot smeʼike?

² Lekuk ta chanel li kʼusitik cha pase. Li mantal laj yakʼbe li oxib sien sviniktak li jchapanvanej Gedeone, jaʼ liʼe: «Qʼuelic lec avilic ti cʼu xʼelan ta jpase» (Jue. 7:17). Li ololetike stalel onoʼox ti jaʼ tskʼelik xchiʼuk ta xchanbeik li kʼusitik tspas stot smeʼike. Jun ermano ti ta akʼobaltik ch-abteje, kʼalal mi lokʼ ta yabtel ta sob sabadoe muʼyuk chbat vayuk ta sna, akʼo mi lubem tajek. Moʼoj, ta xikʼ batel ta chol mantal li xnichʼnabtake. Kʼalal jech tspase, chakʼbe yil ti tsots skʼoplal chil li chol mantale (Mat. 6:33). ¿Mi chakʼ venta avalab anichʼnab ti tsots skʼoplal chavil spasbel yabtel li Diose? Jech kʼuchaʼal spasel orasion, skʼelel Vivlia, chol mantal o kʼalal chavakʼ aloʼil ta tsobobbaile. Akʼo mi mu spas avuʼun ti lekuk xa ta chanel skotol li kʼusitik cha pase, pe mi baxbolot spasbel yabtel li Diose mas chkʼot ta yoʼonton kʼalal cha chanubtas avalab anichʼnab ta yichʼel ta mukʼ li Jeovae (Deu. 6:6, 7; Rom. 2:21, 22).

3. Totil-meʼiletik, ¿kʼusitik abtelaletik ta steklumal Dios xuʼ xa tijbeik yoʼonton stael li avalab anichʼnabike xchiʼuk kʼutik yelan xuʼ xa koltaik?

³ Kʼunkʼun xa koltaik batel. Li totil-meʼiletike mu xlubik ta xchanubtasel ta xanbal, ta kʼopojel o ta slapel skʼuʼ spokʼ li yalab xnichʼnabike. Kʼalal mi laj yilik ti oy xa kʼusi la xchan jtosuke, ta xakʼbeik kʼusi yan xchan. Mi jaʼik yajtsʼaklom Cristo li totil-meʼiletike skʼan skolta yalab xnichʼnabik sventa xakʼ ta yoʼontonik stael abtelaletik ta steklumal Dios, sventa taje skʼan tstsakik ta venta li sjabilalike xchiʼuk li kʼusitik xtojobik xa ta spasel chilike (1 Cor. 9:26). ¿Mi yakal cha chanubtas sventa xakʼ sloʼil ta skʼop stukik xchiʼuk mi cha kolta xchapanel li sparte tstaik ta Chanob vun sventa Kabteltik yuʼun Diose? (Sal. 35:18.) ¿Mi yakal cha chanubtas sventa tspas kʼusuk noʼox abtelal yuʼun Dios? ¿Mi oy xavalbe ta sventa li ichʼ voʼe xchiʼuk li spasbel yabtel Dios ta tsʼakal orae? ¿Kʼuxi yakal cha kolta sventa xchiʼin ta chol mantal li buchʼutik xmuyubajik noʼox sventa xtijbat yoʼontonik ta spasbel mas li yabtel Diose? (Pro. 13:20.)

4. ¿Kʼusi sbaliltak xuʼ stabeik avalab anichʼnabik mi ta sbikʼtalik noʼox cha koltaik sventa xlik spasbeik li yabtel Diose?

⁴ Xi laj yal jun velta li jtsʼibajom yuʼun salmoe: «Dios cuʼun, oy cʼusi lec laj achanubtasun tal ta jqueremal; yoquel to jbatsʼil yalel o li cʼusitic toj tsotsic laj apase» (Sal. 71:17). Koltaik me li avalab anichʼnabik sventa ta sbikʼtal noʼox xlik spasbeik li yabtel Diose. Mi cha tikʼbeik lek ta yoʼonton o cha koltaik ta mantal avie xuʼ me xtun-o yuʼunik mi yijik xaʼoxe (Pro. 22:6).