Katʼestik o jmaltatik li sbekʼ tsʼunobal sventa xchʼie
1. ¿Kʼu yuʼun skʼan xkatʼestik o jmaltatik li sbekʼ tsʼunobal ta mantale?
1 Kʼalal ta jtsʼuntik jtosuk sbekʼ tsʼunobale skʼan xichʼ atʼesel o maltael sventa xvokʼ tale. Jaʼ jech skʼan jpastik kʼalal ta jtsʼunbetik ta yoʼonton mantal li krixchanoetik bu ta jcholtik mantale (1 Cor. 3:6). Jaʼ yuʼun skʼan jchaʼvulaʼantik, vaʼun jaʼ jech ta xkatʼestik o ta jmaltatik li ta Skʼop Dios ti jaʼ li voʼ sventa kuxlejale. Mi jech ta jpastike chakʼ lek yibel, ta xchʼi, xchiʼuk chakʼ lek sat.
2. ¿Kʼuxi xuʼ jchapantik komel sventa xuʼ xijchaʼsut ta yan veltae?
2 Iktabo junuk sjakʼobil. Kʼalal yakal ta jchapantik junuk skʼelobil cholmantale, lek me ti jsabetik junuk sjakʼobil ti bu xuʼ xtijbat-o yoʼonton li krixchanoe xchiʼuk ti xuʼ kechel xkiktabetik sventa jaʼ to jtakʼtik li ta yan velta chbat jvulaʼantike. Jakʼo junuk sjakʼobil kʼalal skʼan toʼox xlaj li aloʼile, vaʼun albo ti chasut ta yan kʼakʼal sventa chatakʼbee. Oy ep jcholmantaletike toj lek kʼusi kʼotem ta pasel yuʼunik kʼalal tstunesik junuk sjakʼobil li ta livro Chchanubtasvane, ti xuʼ te slikesik-o junuk chanubtasel ta Vivliae.
3. Mi oy junuk krixchano ti chakʼ ta ilel ti oy ta yoʼonton li mantale, ¿kʼusi stakʼ jtsʼibatik ta vun?
3 Tsako lek ta vun. Kʼalal mi tsuts li aloʼilik ta sba velta xchiʼuk li jun krixchanoe, tsako noʼox ta vun li sbie, bu xkom li snae, li kʼusi kʼakʼalil xchiʼuk jayib ora la avulaʼane, ti kʼusi laj avalbeik skʼoplale xchiʼuk kʼusi vunal la aviktabe, mi oy la xchʼam komele. Jech noxtok, lek me ti jtsaktik ta vun mi oy junuk srelijion, mi oy yutsʼ yalal xchiʼuk mi oy kʼusi ta svul-o yoʼontonik o mi oy kʼusi tskʼan tsnabeik skʼoplal. Li kʼusi chatsak ta vun taje, jaʼ me xuʼ xa skoltaot sventa xachapan aba lek mi bat avulaʼan ta yan veltae. Mu me xchʼay ta ajol xatsʼiba li kʼusi ora laj aval ti chachaʼsute xchiʼuk li sjakʼobil laj aviktae.
4. ¿Kʼu yuʼun skʼan mu xi jlubtsaj mi ta jkʼantik xchʼi ta yoʼontonik mantal li krixchanoetike?
4 Mu me xalubtsaj. Li Satanase chakʼ persa «ta sloqʼuesbe ta yoʼntonic li scʼop Dios» ti te tsʼunbil ta yoʼonton li krixchanoetike (Mar. 4:14, 15). Mi muʼyuk te la ata ta sna li buchʼutik lek laj yaʼiik mantal kʼalal chachaʼsute, mu xalubtsaj. ¿Mi xuʼ van xaviktabe komel junuk tsʼibabil vun o junuk karta? Jun prekursorae la slikes jun chanubtasel ta Vivlia xchiʼuk jun ants ta stiʼ sna, pe kʼalal muʼyuk xa la sta kʼalal sut skʼele; la stakbe batel jun karta. Kʼalal la sta ta mas tsʼakale, li antse laj yal ti toj lek laj yil li karta ti ta slekil yoʼonton itakbat batele. Mi chkatʼestik o ta jmaltatik li sbekʼ tsʼunobal ta mantale ta me xkiltik ti chvokʼe, ta xchʼi xchiʼuk chkiltik «chacʼ sat. Oy ta xacʼ lajuneb xchaʼvinic (30) ta bej; oy ta xacʼ oxvinic (60) ta bej; oy ta xacʼ voʼvinic (100) ta bej» (Mar. 4:20).