Cholbo mantal skotol li krixchanoetike
1. ¿Kʼuxi xkoʼolaj li jun lekil jcholmantal xchiʼuk jun j-abtel ti xtojob spasel jtosuk abtele?
1 Jun j-abtel ti xtojob spasel jtosuk abtele ep yabtejebtak xchiʼuk snaʼ lek xtok bakʼin xchiʼuk kʼuyelan tstunesan. Li voʼotik eke ep ta tos kabtejebtik, ti jaʼ tskoltautik ta xcholel mantale. Jech kʼuchaʼal liʼe, oy foyetoetik ti jelajtik loʼiletik yichʼoj tal sventa jcholbetik mantal «scotolic» li krixchanoetike (1 Cor. 9:22). Li stsʼakleb Kabteltik sventa Dios ti talem liʼe yichʼojbe tal jun slistail li foyetoetik taje, chal buchʼutik sventa yichʼoj pasel xchiʼuk ti kʼuxi xuʼ xkakʼtike.
2. ¿Bakʼin sta-o ti xkakʼtik foyetoetike?
2 Bakʼin xuʼ xkakʼtik li foyetoetike. Li j-abtel ti xtojob spasel jtosuk abtele jaʼ onoʼox tstunes li yabtejeb ti mas sta-o chile. Jech ek li voʼotike mi mas sta-o xkakʼtik jun foyeto chkiltike xuʼ xkakʼtik, manchuk mi maʼuk chichʼ akʼel li ta u taje. Jech kʼuchaʼal liʼe, ti mi jaʼo chichʼ pukel li livro Chchanubtasvane, pe mi muʼyuk xchʼunojik Cristo li krixchanoetik xchiʼuk muʼyuk ta yoʼontonik Vivlia li ta lum bu ta jcholtik mantale, xuʼ van mas lek ti xkakʼbetik junuk foyeto sventa baʼyel xchʼi ta yoʼonton mantale, vaʼun xuʼ ta mas tsʼakal xkakʼbetik li livroe.
3. ¿Kʼu yuʼun skʼan xijtojob lek stunesel li kabtejebtik sventa cholmantale?
3 Li Vivliae tskʼupil kʼopta li buchʼu xtojob spasel lek yabtele (Pro. 22:29). Ta melel, li «xcholel li Lequil Aʼyej yuʼun Diose» jaʼ jun abtelal toj tsots skʼoplal ti stuk noʼox jech li avie (Rom. 15:16). Skʼan jchantik lek kʼuxi ta tunesel li kabtejebtik ta cholmantal sventa jaʼuk jkʼoplaltik liʼe: «Lequil jʼabtel chacʼot; muʼyuc cʼusi chaqʼuexov o» (2 Tim. 2:15).