Lekubuk batel mas ti kʼu yelan xijtojob ta cholmantale: kʼalal ta jtsakbetik ta vun sbi li buchʼu lek chaʼiik mantale

«Qʼuelo me aba atuc, xchiʼuc qʼuelo me lec ti cʼu xʼelan chachanubtasvane.» (1 Tim. 4:16.) Li tojobtasel laj yakʼbe Timoteo li jtakbol Pabloe chakʼ kiltik ti skʼan xlekub ti kʼu yelan ta jcholtik mantale, mu ventauk mi voʼne xa o mi achʼ to jlikesojtik. Yoʼ spas kuʼuntik taje, li ta Kabteltik sventa Dios[e] chlik lokʼuk jun achʼ mantal ti jaʼ sbi: «Lekubuk batel mas ti kʼu yelan xijtojob ta cholmantale». Li ta jujun mantale chal kʼusitik xuʼ jpastik ti tsotsik skʼoplale xchiʼuk ti kʼu yelan ta pasele. Li ta jujun u ch-echʼe chkichʼtik albel jkotoltik ti akʼo jpastik li mantal taje. Kʼalal mi laj li ue ta xjelav jun mantal li ta Tsobajel sventa Tunelale xuʼ te xkal jloʼiltik ti kʼu yelan la skoltautike. Li avi u liʼe chkichʼtik albel ti akʼo xkakʼtik persa stsakbel sbi ta vun li buchʼu lek chaʼiik mantale.

Kuʼ yuʼun tsots skʼoplal. Yoʼ spas kuʼuntik li kabteltik ta cholmantale, maʼuk noʼox bal ti chijlokʼutik ta cholmantale. Skʼan sut jchaʼvulaʼantik li buchʼutik lek laj yaʼiik li mantale xchiʼuk ti jchanubtastike, vaʼun jech ta xkatʼestik li sbekʼ melel ti la jtsʼunbetik komel ta yoʼontonike (Mat. 28:19, 20; 1 Cor. 3:6-9). Jaʼ yuʼun skʼan xbat jchaʼkʼeltik li krixchanoetike, yoʼ jloʼiltatik li kʼusi laj kalbetik ta sba veltae xchiʼuk li kʼusi tsvul-o yoʼontonike. Jaʼ yuʼun, kʼalal mi la jtatik li buchʼu lek chaʼiik mantale, skʼan jtsakbetik ta vun sbi.