Lekubuk batel mas ti kʼu yelan xijtojob ta cholmantale: kiktatik junuk sjakʼobil yoʼ xbat jchaʼvulaʼantik li krixchanoe

Kuʼ yuʼun tsots skʼoplal. Kʼalal ta jtatik krixchanoetik ti lek chaʼiik mantale, oy ta koʼontontik tsut jchaʼvulaʼantik ta snaik yoʼ xkatʼestik o jmaltatik li tsʼunobil sventa melel ti la jtsʼuntik komele (1 Cor. 3:6). Pe yoʼ xpas kuʼuntik taje, tsots skʼoplal skʼan jnaʼtik kʼusi ora xuʼ te jtatik ta sna li krixchano kʼalal muʼyuk toʼox chijbate. Jech xtok, lek ti kechel xkiktabetik komel junuk sjakʼobil yoʼ jtakʼbetik kʼalal mi bat jchaʼvulaʼantike. Taje xuʼ xkoltaat-o li yajval na sventa oyuk mas ta yoʼonton ti jchaʼvulaʼantike. Mi te chalbe stakʼobil li ta vun chkiktabetik komele, xuʼ mas chtijbat yoʼonton ta skʼelel. Jech xtok, mi jchapojtik xa onoʼox li kʼusi ta jloʼiltatike xuʼ skoltautik sventa kʼunuk xkaʼitik svulaʼanel li yajval nae, yuʼun snaʼoj xa kʼusi ta jloʼiltatik. Kʼalal mi bat jchaʼvulaʼantike, xuʼ xkalbetik ti tal jtakʼbetik li kʼusi kechel kom kuʼuntik li ta slajeb velta li jloʼilaje.

Kʼuxi ta pasel:

Kʼalal chachapan aba ta cholmantal ta naetike, chapano xtok junuk sjakʼobil sventa chbat atakʼbe ta yan velta. Tʼujo junuk sjakʼobil li ta vun ti anopoj chavakʼ li vaʼ kʼakʼale o xuʼ xatunes li sjakʼobil ti yichʼoj tal li jvuntik sventa chkakʼtik-o chanubtasele xchiʼuk kʼalal mi la chaʼsute xuʼ xavakʼbe yil.
Kʼalal mi tsuts aloʼil xchiʼuk jun krixchano ti lek chaʼi mantale, albo ti chakʼan chachiʼin ta loʼil yan veltae xchiʼuk albo li sjakʼobil ti kechel chaviktabee. Ta junantik yosilal cholmantale, li krixchanoetike solel mu noʼox xokobik xchiʼuk mu skʼan xalik kʼusi ora xuʼ sut jkʼeltik. Mi jech ti bu chachol mantale, xuʼ xi xavalbee: «¿Mi liʼ oyot ti xtal jkʼelot jech ora kʼuchaʼal liʼe? [Akʼo stakʼ.] Ta jkʼan chtal jvulaʼanot kaʼi jlikeluk li ta yan xemana sventa chtal jtakʼbot li sjakʼobil liʼe... Mi jaʼo solel muʼyuk xokolot kʼalal mi litale mu xavul avoʼonton».
Mi laj avalbe kʼusi ora tsut akʼel li yajval nae, kʼotuk me ta pasel avuʼun (Mat. 5:37). Kʼalal mi laj xaʼox achaʼvulaʼane, albo komel li kʼusi chaloʼiltaik ta yan veltae.

Paso jech sjunul u liʼe:

Kʼalal chachapan aba ta cholmantale, chapano xtok junuk sjakʼobil sventa chbat atakʼ ta yan velta. Albo achiʼil ta cholmantal li kʼusi achapanoje.