Tojobkutik batel mas li ta cholmantale: Paso revisita

¿KʼU YUʼUN TSOTS SKʼOPLAL? Ep krixchanoetik ti lek chaʼiik li aʼyejetik sventa li Ajvalilale jaʼ ta skoj ti yakal tsaʼik li kʼusi melel ta sventa Diose (Is 55:6). Sventa chchanilanik-o echʼele, skʼan ti xbatilan noʼox jkʼeltike. Li krixchanoetike jeltos li vokolil tsnuptanike, ta skoj taje skʼan jkʼeltik lek kʼu yelan xuʼ xkʼot ta yoʼontonik li mantale. Mas me lek chkʼot ta yoʼontonik mi lek ta jchapan jbatike xchiʼuk mi te oy-o ta joltik li kʼusi ta jkʼan ta jtatike, ti jaʼ ti jlikestik junuk estudio ta Vivliae.

¿KʼUXI TA PASEL?

• Akʼo persa ti sut noʼox akʼele (Mt 13:19).

• Oyuk slekil avoʼonton, ichʼvanan ta mukʼ xchiʼuk junuk noʼox avoʼonton.

• Tseʼetan kʼotel xchiʼuk ta sbiuk xakʼopon. Albo kʼu yuʼun sut akʼel yan velta: ti jaʼ sventa xa takʼbe li kʼusi tskʼan tsnaʼe, ti xavichʼbe echʼel li revista mas achʼe, ti xaloʼiltabe sventa li jpajinatik ta Internete, ti xavakʼbe yil junuk video o xavakʼbe yil kʼu x-elan chkakʼtik li estudio ta Vivliae. Pe mi oy kʼusi yan tsvul-o yoʼonton li krixchanoe, jaʼ albeik skʼoplal (Flp 2:4).

• Sventa xchʼi-o batel li mantal ta yoʼontone tuneso junuk teksto ta Vivlia o jlikuk li jvuntike (1Ko 3:6). Akʼo persa ti lekuk xakʼopon abaike.

• Oyuk kʼusi xajakʼbe sventa xbat akʼel yan velta.