Tojobkutik batel mas li ta cholmantale
1. ¿Kʼusitik skʼelobil laj yakʼik ta ilel ta baʼyel siglo ti skʼan xkakʼtik persa sventa xijtojobutik batel mas li ta cholmantale?
1 Li yajtsʼaklomutik Cristoe skʼan me xijtojobutik batel mas li ta cholmantale. Jech oxal, li Jesuse la xchapan li yajtsʼaklomtake xchiʼuk la skolta yoʼ spas lek yuʼunik li yabtel akʼbilike (Luc. 9:1-5; 10:1-11). Li Áquila xchiʼuk Priscila eke la skoltaik li Apolos sventa xaʼibe «lec smelol cʼusitic tscʼan li Diose» (Hech. 18:24-26). Jech xtok, li Pabloe la stijbe yoʼonton Timoteo ti akʼo xakʼ persa sventa xkʼot ta lekil jchanubtasvaneje, akʼo mi jal xaʼox chchol mantal, taje jaʼ sventa ‹xil skotolik ti lek chbat yuʼune› (1 Tim. 4:13-15). Mu ventauk kʼu xa sjalil chijtun ta stojolal li Kajvaltik sventa chkaltik li lekil aʼyeje, skʼan me xijtojobutik batel mas ta spasel li kabteltike.
2. ¿Kʼusitik xuʼ jpastik sventa jchantik ti kʼu yelan chcholik mantal li yantike?
2 Jchanbetik li yantike. Jtos kʼusi xuʼ skoltautik sventa xijtojob batel mas li ta cholmantale, jaʼ ti jkʼeltik kʼu yelan chcholik mantal li yantike (Prov. 27:17). Jaʼ yuʼun, kʼalal mi lijlokʼ ta cholmantale, jkʼeltik me lek kʼu yelan chchol mantal li jchiʼiltike. Jech xtok, jkʼanbetik tojobtasel li buchʼutik xtojobik lek ta cholmantale xchiʼuk jtsʼetanbetik lek xchikinal li kʼusi chalbutike (Prov. 1:5). ¿Mi toj vokol chkaʼitik ti chijchaʼvulaʼanvan, ti ta jlikestik junuk chanubtasel ta Vivlia o ta spasel jtosuk abtelal ta cholmantale? Jkʼanbetik koltael li jkʼelvanej ta grupo sventa cholmantale o junuk jcholmantal ti lek xtojobe. Teuk me ta joltik xtok ti xuʼ skoltautik ta spasel lek kabteltik li chʼul espiritue. Jaʼ yuʼun nopolik noʼox me jkʼantik ta orasion (Luc. 11:13).
3. ¿Kʼu yelan skʼan xkaʼi jbatik mi oy laj kichʼtik junuk tojobtasel ti muʼyuk la jkʼantike?
3 Mu me chopoluk xkaʼitik mi oy laj kichʼtik junuk tojobtasele, akʼo mi muʼyuk la jkʼantik (Ecl. 7:9). Jchanbetik stalelal li Apolose, bikʼituk xkakʼ jbatik, jtojtik ta vokol xchiʼuk jchʼamtik li koltaeletik chkichʼtik akʼbele. Taje jaʼ li kʼusi mas lek xuʼ jpastike (Prov. 12:15).
4. ¿Kʼusi srasonal oy kuʼuntik sventa xijtojobutik batel mas li ta cholmantale?
4 Ta jmuyubtatik-o Dios kʼalal chijtojob lek ta cholmantale. Li Jesuse oy kʼusi la stunes sventa tstijbe yoʼonton yajtsʼaklomtak yoʼ xtojobik lek li ta cholmantale. Li stuke la skoʼoltas sba ta jtekʼ tsʼusub, pe li yajtsʼaklomtak ti tʼujbilik chbatik ta vinajele xkoʼolajik la kʼuchaʼal skʼobtak tsʼusub ti chakʼ sate, jaʼuk li Totile ta sbojbe li skʼobtak tsʼusub sventa «echʼem acʼo satinuc» (Juan 15:2). Li jun yajval tsʼusube tskʼan ti yantikuk lek xakʼ sat li stsʼusube, li Jeova eke tskʼan ti kʼalal «chquichʼtic ta muqʼue» —jaʼ xkaltik, ti ta jcholtik mantale— yantikuk me x-epaj batel kuʼuntik (Heb. 13:15). ¿Kʼusitik lek chkʼot ta pasel kuʼuntik mi lijkʼotutik ta lekil jcholmantale? Xi ta stakʼbutik li Jesuse: «Me chasatinic leque, jech ichʼbil ta mucʼ chcʼot avuʼunic li Jtote» (Juan 15:8).