Lekubuk batel mas ti kʼu yelan xijtojob ta cholmantale: kʼuxi xuʼ jcholtik mantal ta interfono

Kʼu yuʼun tsots skʼoplal. Xuʼ van chijxiʼutik tajek kʼalal ta jcholtik mantal ta interfonoe. Ta skoj taje, ¿kʼuxi xuʼ mu xchʼay ta koʼontontik yalel batel li kʼusi leke? Teuk ta joltik ti kʼalal ta jcholtik mantal ta interfonoe, xuʼ me jaʼ noʼox te xaʼiik lekil aʼyej li jlom krixchanoetike (Rom. 10:14). Oy loʼiletik ti chakʼ ta ilel ti xuʼ lek kʼusi chkʼot ta pasel kʼalal ta jcholtik mantal ta interfonoe (kʼelo li Anuario 2011, paj. 65, 66 xchiʼuk li Anuario 2000, paj. 54, par. 3). Jkʼeltik batel li kʼusitik xuʼ jpastike.

Kʼuxi ta pasel:

Chapano jsetʼuk slikeb aloʼil xchiʼuk tsʼibao ta vun sventa xakʼelbe li yajval na kʼalal chakʼopon ta interfonoe. Mi jech ta jpastike mas me jun koʼonton chkaʼi jbatik. Kʼalal mi takʼav li yajval nae, baʼyel kalbetik smelolal kʼu yuʼun ti ta jvulaʼantike. Mi te tsʼibabil sbi li krixchano li ta interfonoe, kʼopono me ta sbi. Mi tsuts li aloʼile, albo ti chaviktabe jlikuk revista o yan vunetik sventa stabe mas yaʼyejal li kʼusi laj avalbe skʼoplale, ti xuʼ xtal stsak o xaviktabe ta stiʼ snae.
Lekuk kʼusi xanop. Teuk xa avilojbe sat yileluk li krixchanoe, tseʼetan noʼox xchiʼuk bakʼeso li akʼobe.
Junuk noʼox me avoʼonton xchiʼuk jechuk xakʼopoj kʼuchaʼal nopem xavaʼie. Mu me toj kʼunuk li yechʼomal avee xchiʼuk jamaluk ta aʼiel. Jech xtok, mu me toj sujomuk xakʼopoj xchiʼuk mu me xapajilan mi mu toj persauke.
Oyuk me lek apʼijil. Li ta mukʼtikil naetike, xuʼ van oy jun interfono ti yichʼoj ep timbreetike. Ta skoj taje xuʼ van jaʼ mas lek ti chib o oxib noʼox xatije xchiʼuk ti xatsak ta vun ti butik xa laj atije, vaʼun batan ta yan na. Yuʼun mi jal te oyutik sventa jtijtik skotole, xuʼ oy kʼusi chopol snopik li buchʼutik te nakajtike.

Paso jech sjunul u liʼe:

Kʼalal chapas li yichʼel ta mukʼ Jeova ta avutsʼ avalale, chanilanik skʼelobil cholmantal ti muʼyuk akʼelojbeik sat li buchʼu chachiʼinik ta loʼile.