Ti bu laj yichʼ lokʼesel li stakʼobiltak li ta Jkuxlejaltik xchiʼuk Kabteltik sventa Dios, programa xchiʼuk bu chijtsʼibaj
7-13 YUʼUN OKTUVRE
KʼUSITIK KʼUPIL SBA TA VIVLIA | SANTIAGO 3-5
«Kakʼtik ta ilel li spʼijilal Diose»
cl paj. 221, 222 par. 9, 10
¿Mi ch-abtej ta jkuxlejaltik «li pʼijilal ta toyole»?
9 «Toj lek sak». Li adjetivo ta griego sventa li jpʼel kʼop «sak» xie, jaʼ skʼan xal ti muʼyuk yikʼobal o xchopolil ta yut xchiʼuk ta spat xokone. Li Vivliae chal ti te snitojbe sba skʼoplal li pʼijilal xchiʼuk li oʼontonale, pe taje mu xichʼ tael li matanal chakʼ Dios mi oy kʼusi chopol chichʼ nopel o mi oy kʼusi chopol tskʼan yoʼonton li jun krixchanoe (Pr 2:10; Mt 15:19, 20). Pe mi sak li koʼontontik ti bu kʼalal xuʼ kuʼuntik ta skoj ti jmulavil krixchanoutike, ta jchʼak jbatik lokʼel ta stojolal li kʼusi chopole xchiʼuk jaʼ ta jpastik li kʼusi leke (Sl 37:27; Pr 3:7). ¿Mi mu jechuk ti oy lek srasonal sventa jaʼ baʼyel xichʼ albel skʼoplal li sakilal ti jaʼ jtos talelal ti te likem tal li ta pʼijilale? Ta melel, ¿kʼuxi xuʼ xkakʼtik ta ilel li yan talelaletik mi muʼyuk bu sak li jkuxlejaltike xchiʼuk mi muʼyuk bu sakutik ta mantale?
10 «Jech xtok lek yoʼonton». Li pʼijilal likem tal ta vinajele tstij koʼontontik sventa jsaʼtik li jun oʼontonale, ti jaʼ jtos yabtel li chʼul espiritue (Gal 5:22). Jaʼ yuʼun, chkakʼtik persa «sventa jmojuk» oyutik li ta steklumal Jeovae (Ef 4:3). Jech xtok, chkakʼbetik yipal ti bu kʼalal xuʼ kuʼuntik sventa jchapan li jkʼoptike. ¿Kʼu yuʼun tsots skʼoplal ti jechuk jpastike? Yuʼun xi chal li Vivliae: «Jechuk-o [...], junuk avoʼonton kuxianik-o; te oy-o ta atojolalik li Dios ti chkʼanvane xchiʼuk ti chakʼ jun oʼontonale» (2Ko 13:11). Jech oxal chaʼa, mi jun koʼonton chijkuxiutike, te me oy-o ta jtojolaltik li Dios ti chakʼ jun oʼontonale. Ti kʼu yelan chkil jbatik xchiʼuk li kermanotaktike te me tsakal skʼoplal ti kʼu yelan chkil jbatik xchiʼuk li Diose. ¿Kʼuxi chkakʼtik ta ilel ti ta jsaʼtik li jun oʼontonale? Kalbetik junuk skʼelobil.
cl paj. 223 par. 12
¿Mi ch-abtej ta jkuxlejaltik «li pʼijilal ta toyole»?
12 «Oy srason». ¿Kʼusi chakʼ kaʼitik li adjetivo taje? Jech kʼuchaʼal chal li buchʼutik lek chanemike, li jpʼel kʼop ta griego ta Santiago 3:17, tsots ta jelubtasel. Yan Vivliaetike xi sjelubtasojike: «oy ta coʼnton jchiʼiltic», «mu jtoy jbatic» xchiʼuk «ta jbicʼtajes jbatic». Li ta Traducción del Nuevo Mundo chal ta tsʼib ta yok vun ti kʼusi skʼan xale jaʼ ti «xuʼ» xie. ¿Kʼuxi chkakʼtik ta ilel ti ch-abtej ta jtojolaltik li talelalil taje?
cl paj. 224, 225 par. 14, 15
¿Mi ch-abtej ta jkuxlejaltik «li pʼijilal ta toyole»?
14 «Chapal sventa chchʼun mantal». Li jpʼel kʼop taje jaʼ no’ox jun velta te chvinaj li ta Chʼul Tsʼibetik ta Mateo kʼalal ta Apokalipsise. Jun j-al-loʼile xi chale, «jaʼ te chichʼ tunesel kʼalal chichʼik chanubtasel ta soltaroale». Jaʼ skʼan xal ti «kʼun ta jelbel snopbenale» xchiʼuk ti «chakʼ sba ta pasel ta mantale». Jech oxal chaʼa, li buchʼu chchʼun li mantal likem talel ta akʼole ta sjunul yoʼonton chakʼ sba ta pasel ta mantal yuʼun li Vivliae. Maʼuk ti mu xa sjel li kʼusi chkʼot ta nopel yuʼun kʼalal chakʼ venta ti mu lekuk li kʼusi la snope. Moʼoj, oy ta yoʼonton tsjel snopben kʼalal jamal chilbe sprevail ta Vivlia ti muʼyuk lek li stalelale o ti muʼyuk lek li kʼusi kʼot ta nopel yuʼune. ¿Mi jaʼ jech ojtikinbilutik kʼuchaʼal taje?
«Lek chkʼuxubinvan xchiʼuk lek chakʼ sat»
15 «Lek chkʼuxubinvan xchiʼuk lek chakʼ sat». Ta skoj ti «lek chkʼuxubinvan» li pʼijilal ta akʼole, skʼan me oyuk yuʼun li talelal taje. Jech xtok, te jmoj chichʼ albel skʼoplal xchiʼuk li jpʼel kʼop «lek chakʼ sat» xie, taje jaʼ chalbe skʼoplal Vivliae ti oy ta koʼontontik li jchiʼiltike, jaʼ yuʼun li xkʼuxul koʼontontike jaʼ chakʼ ti oyuk kʼusi lek jpastik ta stojolal li yantike. Jlik livro chal ti k’alal «lek chkʼuxubinvan» xie, jaʼ ti «chkaʼibetik xkʼuxul svokol li yantike, ti tstij koʼontontik ta skoltaele». Jech oxal chaʼa, li spʼijil Diose toj lek, muʼyuk bu tsots yoʼonton, maʼuk noʼox ti pʼij xa tspas sbae, moʼoj, yuʼun lek yoʼonton, snaʼ xkʼanvan xchiʼuk yichʼoj ta venta li yantike. ¿Kʼuxi xuʼ xkakʼtik ta ilel ti jnaʼ xijkʼuxubinvane?
cl paj. 226 par. 18, 19
¿Mi ch-abtej ta jkuxlejaltik «li pʼijilal ta toyole»?
18 «Mu snaʼ xtʼujvan». Li spʼijilal Diose muʼyuk tstʼuj kʼusi stsʼunbal o slumal li jun krixchanoe, jaʼ yuʼun mi chkakʼtik ti jaʼuk sbeiltasutike, chkakʼtik persa ta slokʼesel ta koʼontontik li kʼusi tstij koʼontontik ti xijtʼujvane (Snt 2:9). Maʼuk ti jaʼ xa lek chkiltik-o jun krixchano ta skoj ti lek chanunajeme, ti oy lek stakʼine o ti oy yabtel ta tsobobbaile xchiʼuk oy sbalil chkiltik li kermanotaktike, akʼo mi muʼyuk kʼusi x-ayan yuʼun. Mi skʼanojan li Jeovae, skʼan me jech jpastik ek.
19 «Mu snaʼ xloʼlavan». Li jpʼel kʼop ta griego ti «snaʼ xloʼlavan» xie, xuʼ jaʼ chalbe skʼoplal li «j-akʼ elov ta teatroe». Li ta voʼnee, li jgresia xchiʼuk jromail j-akʼ elovetike tslapik mukʼta maskaraetik. Jaʼ yuʼun, li jpʼel kʼop ta griego «snaʼ xloʼlavan» xie, jaʼ chalbe skʼoplal li buchʼu jaʼ noʼox tskuy sba ti lek xa stalelal yileluke. Li stalelal Dios taje maʼuk noʼox chkakʼtik ta ilel ta stojolal li yajtsʼaklomtak Kristoe, yuʼun skʼan jech xkaʼi ta koʼontontik xtok.
Jsaʼtik lek li kʼusitik kʼupil sba ta Vivliae
Li kʼusi mas tsotsik skʼoplal ta skarta Santiago xchiʼuk Pedro
4:5. ¿Kʼusi tekstoal laj yalbe skʼoplal li Santiagoe? Li Santiagoe muʼyuk bu yakal chalbe skʼoplal junuk teksto. Li kʼusi laj yal ti akʼbat snaʼ yuʼun Diose xuʼ van jaʼ te lokʼem talel li ta Génesis 6:5; 8:21; Proverbios 21:10 o li ta Gálatas 5:17.
w97 15/11 paj. 20 par. 8
Li xchʼunel oʼontonale chakʼ oyuk smalael kuʼuntik xchiʼuk ti jpastik-o li orasione
8 Jaʼ jun mulil ti ta jchopol kʼoptatik li kermanotaktike (Snt 4:11, 12). Akʼo mi jech, junantike chchopol loʼiltaik li xchiʼiltakik ta chʼunolajele, taje jaʼ van ta skoj ti tstoy be sba skʼoplale ti muʼyuk xa kʼusi chopol tspas yaloje, yuʼun tskʼan ti muʼyuk xa tsots skʼoplal chkom yuʼun li yantike (Sl 50:20; Pr 3:29). Li jpʼel kʼop ta griego ti chichʼ jelubtasel kʼuchaʼal chchopol kʼopoj ta stojolal xie, jaʼ chakʼ ta aʼiel ti yolbaj xa tsabe smule xchiʼuk ti tsjutbe smule o ti jecheʼ noʼox kʼusi chal ta stojolale, taje jaʼ skʼan xal ti muʼyuk xa lek kʼusi tspasbe li yermanoe. ¿Kʼu yuʼun jaʼ yakal ta jkontraintik li Smantal Dios mi jech ta jpastike? Li jchanubtasvanejetik ta Mantal xchiʼuk li jfariseoetike yolbaj xa muʼyuk chchʼunbeik li smantal Diose xchiʼuk jaʼ xa jech chchapanvanik ti kʼu yelan tskʼan stukike (Mr 7:1-13). Jaʼ yuʼun chaʼa, mi voʼotik noʼox chkaltik ti toj tsots smul li kermanotike, pe ti muʼyuk jech tsnop li Jeovae, ¿mi mu jaʼuk xa yakal chkaltik ti muʼyuk lek li smantal Diose? Mi ta jchopol kʼoptatik li kermanotaktike, muʼyuk me yakal ta jchʼuntik li mantal ti skʼan jkʼan jbatike (Ro 13:8-10).
14-20 YUʼUN OKTUVRE
KʼUSITIK KʼUPIL SBA TA VIVLIA | 1 PEDRO 1, 2
«Skʼan me chʼulukoxuk»
Li pojelale: jaʼ jun tukʼil matanal ti yakʼoj li Totile
5 Li voʼotik une, ¿kʼuxi chkakʼtik ta ilel ti jkʼanojtik tajek li sbi Jeovae? Jaʼ ti kʼu yelan ta jpas jtalelaltike. Li Jeovae tskʼan ti chʼulutikuke (kʼelo 1 Pedro 1:15, 16). Jaʼ yuʼun, jaʼ noʼox stuk chkichʼtik ta mukʼ xchiʼuk ta jchʼunbetik smantal ta sjunul koʼontontik. Akʼo mi chkichʼtik kontrainel, pe ta onoʼox xkakʼbetik yipal ti jech xijkuxi kʼuchaʼal chchanubtasutik li Jeovae. Kʼalal ta jchʼunbetik li smantale, jaʼ jech chkichʼbetik ta mukʼ li sbie (Mt 5:14-16). Jech noxtok, jaʼ jech chkakʼtik ta ilel ti toj lekik li smantaltake xchiʼuk ti jaʼ jun jutkʼop li Satanase. Melel onoʼox ti oy kʼusi chopol ta jpastik ta skoj ti jpas mulilutike. Pe ta jsutes koʼontontik xchiʼuk chkakʼbetik yipal sventa mu xa jpastik li kʼusi chikʼubtasbe sbi li Jeovae (Sl 79:9).
Kʼuxi ta tʼujel lekil chʼayob oʼontonal
6 Li jtakbol Pabloe xi laj yalbe li yajtsʼaklomtak Kristo ta Romae: «Mu me xavakʼbe abekʼtalik li [mulile]». Jech noxtok, laj yalbe ti ‹akʼo chamuk li kʼusitik tspasilan sbekʼtalike› (Ro 6:12-14; 8:13). Baʼyele, laj xaʼox yalbe skʼoplal jaytosuk «li kʼusitik tspasilan [sbekʼtalike]» xchiʼuk ti kʼutik yelan chichʼ tunesel sventa spasel li kʼusitik chopole. Ta sventa li jpasmuliletike, xi xa onoʼox laj yale: «Noj ta chopol kʼoptael li yeike». «Xpʼitetik batel ta anil sventa tsmalik chʼichʼ». «Muʼyuk bu xiʼtaojik li Diose» (Ro 3:13-18). ¿Kʼusi van chkʼot ta pasel ti tauk stunes jtosukal stsʼakbenal sbekʼtal jun yajtsʼaklom Kristo sventa tspas muliletik kʼuchaʼal taje? Yakal me tsokes sjunlej li sbekʼtale. Jech kʼuchaʼal liʼe, mi yalel tskʼel kʼusitik ibalik sbae, mi pornografia o mi tsatsal majbaile, yakal ‹me chakʼbe sbekʼtal li mulile›, vaʼun tsokes sjunul li sbekʼtale. Mu xa me xuʼ xakʼbe kʼuchaʼal lekil matanal li Diose, yuʼun maʼuk xa chʼul abtel li kʼusi yakal tspase (Dt 15:21; 1Pe 1:14-16; 2Pe 3:11). Ta skoj li chopol chʼayob oʼontonaletike, toj toyol me tstoj maʼ taje.
Jsaʼtik lek li kʼusitik kʼupil sba ta Vivliae
Li kʼusi mas tsotsik skʼoplal ta skarta Santiago xchiʼuk Pedro
1:10-12. Li anjeletike tskʼan chaʼibeik smelolal li kʼusitik toj tsotsik skʼoplal ta mantal ta sventa li stsobobbail tʼujbil jchʼunolajele, ti jaʼ la stsʼibaik ta voʼne li j-alkʼopetike. Pe li kʼusitik taje, jaʼ to laj yichʼ aʼibel smelolal kʼalal la slikes Jeova li stsobobbail yajtsʼaklom Cristoe (Ef 3:10). Jchanbetik stalelal li anjeletik taje xchiʼuk jsaʼtik li kʼusitik «cʼalal to ta yut cʼusi tsnop li Diose» (1Ko 2:10).
it-2 paj. 1075 par. 1
Jkʼelvanej
Li Mukʼul Jkʼelvaneje. Li ta 1 Pedro 2:25 li jtakbole jaʼ te la slokʼel ta Isaías 53:6 kalal xi laj yale: «Chʼayemoxuk toʼox ta be kʼuchaʼal chijetik», pe xi to chal xtoke: «Pe li avie lasutik xa talel ta stojolal li jchabichij xchiʼuk ti jaʼ jkʼelvanej avuʼunike». Li kʼusi chal taje jaʼ skʼoplal li Jeova Diose, yuʼun li buchʼutik la stsʼibabe batel li Pedroe muʼyuk bu chʼayemik ta be mi jaʼuk bu xchʼakoj sbaik ta stojolal li Kristo Jesuse, moʼoj, yuʼun jaʼ beiltasatik yuʼun sutel ta stojolal li Jeova Diose, ti jaʼ li Mukʼta Jchabichij yuʼun steklumale (Sl 23:1; 80:1; Jer 23:3; Eze 34:12). Jaʼ jkʼelvanej li Jeova eke, yuʼun tskʼel li kʼusitik oye (Sl 17:3). Li skʼelele (griego e·pi·sko·pḗ) xuʼ te tsakal skʼoplal xchiʼuk li tsatsal chapanele, jech kʼuchaʼal kʼot ta stojolal li jteklum Jerusalen li ta baʼyel siglo k’alal talem xa ox li Jesuse ti muʼyuk laj yakʼ venta kʼalal jaʼo chichʼ kʼelele (griego e·pi·sko·pḗs) (Lu 19:44). O xuʼ van oy kʼusi lek xkʼot ta pasel xchiʼuk ti tstabeik sbalile, jech kʼuchaʼal li buchʼutik «tstoybeik skʼoplal Dios kʼalal tsta yorail chtal kʼelvanuke [griego e·pi·sko·pḗs]» (1Pe 2:12).
21-27 YUʼUN OKTUVRE
KʼUSITIK KʼUPIL SBA TA VIVLIA | 1 PEDRO 3-5
«Nopaj xa tal slajeb skotol li kʼusitike»
«Bijanic me [...]; teuc me avoʼntonic ta scʼopanel li Diose»
XI LAJ yal jun vinik ti abtej ta akʼobaltike: «Batsʼi tsmutsʼ xa sba jsatik kʼalal poʼot xaʼox sakube». Jaʼ jech chalik ek li buchʼutik skʼan julavemik sjunul akʼobale. Li yajtsʼaklomutik Cristo avie jaʼ jech chkaʼi jbatik ek, yuʼun poʼot xa x-echʼ li akʼobaltik yuʼun Satanás avie, ti noj ta choplejale, pe jutuk xa skʼan sakub (Ro 13:12). ¡Toj xibal me sba ti xijvay ti jutuk xa skʼan x-echʼ li akʼobale! Jaʼ yuʼun toj tsots me skʼoplal ti jchʼuntik li mantal liʼe: «Bijanic me ta sventa li cʼusi chapasique; teuc me avoʼntonic ta scʼopanel li Diose» (1Pe 4:7).
w99 15/4 paj. 22 par. 3
Kʼuxi xuʼ xkakʼtik venta xchiʼuk kʼuxi stsal kuʼuntik kʼalal chijkʼunib ta mantale
Ta slajeb une, teuk-o me ta joltik li kʼusi ta slekil yoʼonton chalbutik li jtakbol Pedroe: «Nopaj xa tal slajeb skotol li kʼusitike. Jaʼ yuʼun oyuk me lek achʼulelik xchiʼuk vikʼiluk me lek asatik ta spasel orasion. Li kʼusi mas tsots skʼoplale jaʼ ti xakʼan abaik tajek ta jujuntale, yuʼun chpix epal muliletik li kʼanelale» (1Pe 4:7, 8). Ta skoj ti jnaʼ jsaʼ jmultik xchiʼuk ti jech li yantik eke xuʼ me x-och ta koʼontontik xchiʼuk ta jnopbentik, vaʼun xuʼ me jaʼ tsmakutik ta be. Li Satanase snaʼoj ti xuʼ xijkʼunib-o yuʼune. Jtos spetsʼ ti toj lek tunem yuʼun li Satanas jaʼ ti chchʼakutike. Jaʼ yuʼun, skʼan ta anil noʼox jchapantik ta kʼanelal mi oy kʼusi kʼot ta pasele xchiʼuk ti mu xkakʼbetik yavil li Diabloe (Ef 4:25-27).
¿Kʼu yuʼun toj tsots skʼoplal ti jnaʼuk xijchʼamvane?
2 Ep kʼusitik xuʼ xkoltaatik yoʼ stsʼik yuʼunik li prevae. Jtose jaʼ li kʼusi albatik yuʼun Pedro liʼe: «Chʼamo me abaik ta jujuntal» (1Pe 4:9). Kʼalal «chʼamo me abaik» xi li ta griegoe, jaʼ skʼan xal ti «oyuk slekil koʼontontik ta stojolal li buchʼutik mu xkojtikintike». Pe li jtakbol Pedroe maʼuk laj yal ti akʼo xchʼamik li buchʼutik mu xojtikinike, moʼoj, jaʼ ti xchʼam sbaik ‹ta jujuntale›, jaʼ xkaltik, ti lekuk xchʼamik li buchʼutik xojtikinik xa onoʼoxe.
3 Pe, ¿kʼuxi xuʼ xkoltaatik mi la xchʼunik li tojobtasel taje? Jaʼ ti mas to tspasatik ta jmoje. Yuʼun kʼalal chijbat ta vulaʼal ta sna junuk ermanoe, lek tajek ch-echʼ kuʼuntik xchiʼuk muʼyuk chchʼay-o ta joltik. Kʼalal voʼotik chkikʼ tal ta jnatik junuk ermano xtoke, mas to chkamigoin jba jchiʼuktik. Kʼuchaʼal chkakʼtik ventae, mas to lek chkojtikintik ermanoetik kʼalal lek jnaʼ xijchʼamvan ta jnatike. Ta skoj ti mas to tstsatsaj svokolik jujun kʼakʼal li ermanoetik ta skʼakʼalil Pedroe, mas to jtunel yuʼunik ti jmojuk oyike. Li avie ta slajebal xa kʼakʼal kuxulutik, jaʼ yuʼun, tsots tajek skʼoplal ti jmojuk oyutik eke (2Ti 3:1).
Jsaʼtik lek li kʼusitik kʼupil sba ta Vivliae
Li kʼusitik tsjakʼ jkʼelvunetike
¿Kʼusi skʼan xal ta melel kʼalal chal Vivlia ti «ay yalbe yaʼay chʼulelaletic yoʼ bu chucajtic» li Jesuse? (1Pe 3:19)
▪ Li jtakbol Pedroe laj yalbe skʼoplal chʼulelaletik ti jaʼik «li jbajmantaletic ta voʼone ti cʼalal cuxul toʼox li Noee, ti imalaatic yuʼun Dios[e]» (1Pe 3:20). Jamal ta aʼyel ti jaʼik li anjeletik ti jmoj la stoy sbaik xchiʼuk Satanase. Li Judas eke laj yalbe skʼoplal li anjeletik «ti muc xichʼic ta mucʼ li yabtel acʼbilique, ti la scomtsanic li yavil acʼbilique» xchiʼuk chukatik yuʼun Dios «ta icʼ osil sbatel osil cʼalal to tsta yorail chichʼic chapanbel smulic» (Jud 6).
¿Kʼuxi la stoy sbaik ta skʼakʼalil Noé li anjeletike? Kʼalal skʼan toʼox xtal li Nojelal ta voʼe la spas sbekʼtalik, pe mu jechuk akʼbilik yuʼun Dios (Gé 6:2, 4). Maʼuk noʼox, yuʼun la xchiʼinik ta vayel antsetik, taje mu staleluk onoʼox jech pasbilik, yuʼun maʼuk sventa jech laj yichʼik pasel (Gé 5:2). Ta me xichʼik lajesel mi kʼot yorail yuʼun Dios li jpʼajmantal anjeletik xchiʼuk ti chopolike. Jech kʼuchaʼal laj yal li Judase te oyik ta «icʼ osil» li avie, ti xkoʼolaj kʼuchaʼal oyik ta chukinabe.
¿Kʼuxi xchiʼuk bakʼin ti la xcholbe mantal «chʼulelaletic yoʼ bu chucajtic» li Jesuse? Li Pedroe chal ti jech kʼot ta pasel kʼalal chaʼkuxiem xaʼox, ti yichʼoj xaʼox «achʼ sbecʼtal ta sventa Espíritu» li Jesuse (1Pe 3:18, 19). Jech xtok, laj yal ti la xcholbe mantal chʼulelaletik li Jesuse. Li jpʼel kʼop taje chakʼ ta aʼyel ti yalojbe xaʼox mantal chʼulelaletik kʼalal la stsʼiba li sbaʼyel karta Pedroe. Vaʼun chaʼa, xkaʼitik ti kʼalal oy toʼox kʼuk sjalil chaʼkuxiem li Jesuse, laj yalbe ti staik-o xichʼik lajesel li chopol kuxlejaletik ti mu xvinaj ta kʼelele. Li aʼyej laj yalbee maʼuk sventa tspatbe-o yoʼontonik, moʼoj, yuʼun jaʼ sventa chichʼik chapanel (Jon 1:1, 2). Ta skoj ti laj yakʼ ta ilel xchʼunel yoʼonton, stukʼil yoʼonton kʼalal to ti laj yichʼ milel li Jesuse xchiʼuk ti chaʼkuxie, te vinaj ti mu kʼusi xuʼ spasbat yuʼun li Diabloe, jaʼ yuʼun sta-o chbat yalbe ti chichʼik lajesele (Jn 14:30; 16:8-11).
Ta mas tsʼakale, li Jesuse ta xchuk xchiʼuk tsjip ochel ta xab li Satanás xchiʼuk li anjeletik ti muʼyuk tukʼ laj yakʼ sbaike (Lu 8:30, 31; Ap 20:1-3). Yoʼ to mu xvul li kʼakʼal taje li chʼulelaletik o li kuxlejaletik ti mu xvinaj ta kʼelel ti muʼyuk bu xchʼunik mantale oyik ta batsʼi ikʼal osil, ta onoʼox xichʼik lajesel (Ap 20:7-10).
Li kʼusi mas tsotsik skʼoplal ta skarta Santiago xchiʼuk Pedro
4:6. ¿Buchʼutik ti «chamenic» ti laj yichʼik albel lekil aʼyeje? Jaʼ li buchʼutik «chame[mik] toʼox ta scoj [x]chopolilic, ta scoj [s]mulic», jaʼ xkaltik, chamemik toʼox ta mantal (Ef 2:1). Kʼalal la xchʼamik li lekil aʼyeje, lik kuxiikuk ta mantal.
28 YUʼUN OKTUVRE-3 YUʼUN NOVIEMBRE
KʼUSITIK KʼUPIL SBA TA VIVLIA | 2 PEDRO 1-3
«Chapalukutik me ta smalael li skʼakʼalil Jeovae»
w06 15/12 paj. 27 par. 11
Tsta yorail chchapanvan li Jeovae
11 Jech kʼuchaʼal laj yal li Jesuse, ¿kʼu yelan skʼan xkaʼibetik smelolal ti chakʼ chapanel ta anil li Jeovae? Melel onoʼox ti chal Skʼop Dios ti «lek stsʼik [yuʼun]» li Jeovae, jaʼ xkaltik ti xmalaj yuʼune, akʼo mi jech chal xtok ti kʼalal mi kʼot yoraile ta anil noʼox ta xchapanvan (Lu 18:7, 8; 2Pe 3:9, 10). Kʼalal tal li Nojelal ta voʼ ta skʼakʼalil Noee, ta anil noʼox laj yichʼ lajesel li chopol krixchanoetike. Jaʼ jech kʼot ta pasel ek li ta skʼakʼalil Lote, kʼalal yal tal kʼokʼ ta vinajel sventa tslajes li jpaschoplejaletike. Xi laj yal li Jesuse: «Jaʼ jech chkʼot ta pasel ek li vaʼ kʼakʼal kʼalal chakʼ sba ta ilel ta stojolal krixchanoetik li Xnichʼon krixchanoe» (Lu 17:27-30). Jaʼ me jech chkʼot ta stojolalik li chopol krixchanoetik avie, ti «chtal ta anil ta stojolalik li [lajelale]» (1Te 5:2, 3). Jaʼ yuʼun chaʼa, xuʼ jpat koʼontontik ta stojolal Jeova, yuʼun muʼyuk bu chakʼ kuxiuk junuk kʼakʼal mas li sbalumil Satanas jech kʼuchaʼal yaloj xa onoʼoxe.
w06 15/12 paj. 19 par. 18
«Nopol xa scʼan sta li smucʼta cʼacʼalil Mucʼul Diose»
18 ¡Jaʼ yuʼun li jtakbol Pedro xi chalbutike: «Teuk tajek ta ajolik ti liʼ xa oy li skʼakʼalil Jeovae»! ¿Kʼuxi ta pasel taje? Jtose jaʼ ti chʼuluk jtalelaltik xchiʼuk ti kichʼojtikuk lek ta mukʼ li Diose (2Pe 3:11, 12). Kʼalal jaʼ batem ta koʼontontik spasel li abtelaletik taje tskoltautik sventa ta sjunuluk koʼonton jmalatik chtal «li skʼakʼalil Jeovae». Li jpʼel kʼop ta griego ti chichʼ jelubtasel «teuk tajek ta ajolik» xie, chakʼ ta aʼiel ti «sujom noʼoxe». Melel onoʼox ti muʼyuk kʼusi xuʼ jpastik sventa xtal xa noʼox li skʼakʼalil Jeovae. Akʼo mi jech, yoʼ to ta jmalatike jaʼuk me batem ta koʼontontik spasbel li yabtel Diose, vaʼun mu me xkaʼitik chjelav li kʼakʼaletike (1Ko 15:58).
Jsaʼtik lek li kʼusitik kʼupil sba ta Vivliae
Li kʼusi mas tsotsik skʼoplal ta skarta Santiago xchiʼuk Pedro
1:16-19. ¿Buchʼu li «mucʼta cʼanal[e]»? ¿Bakʼin chlokʼ tal? ¿Kʼuxi jnaʼojtik ti kʼotem xa ta pasele? Li «mucʼta cʼanal[e]» jaʼ li Jesucristo kʼalal yichʼoj xaʼox vaʼanel ta ajvalile (Ap 22:16). Ta 1914 «[lokʼ] tal» li Jesús ta stojolal li kʼusitik pasbile, kʼuchaʼal Tʼujbil Ajvalil ti yakal chal ti poʼot xa sakube. Kʼalal la skʼatajes sba Jesús ti laj yil Pedroe, jaʼ svinajeb li smukʼulal ta tsʼakale xchiʼuk li sjuʼel ta ajvalilale, xchiʼuk laj yakʼ ta ilel xtok ti xuʼ jpat lek koʼontontik yuʼun li sKʼop Dios ti kak albile (Mr 9:1-3). Mi ta jtsʼetanbetik lek xchikinal li kʼop taje, ta me xil sak osil li koʼontontike xchiʼuk ta me jnaʼtik ti lokʼem xa tal li mukʼta Kʼanale.
Li kʼusi mas tsotsik skʼoplal ta skarta Santiago xchiʼuk Pedro
2:4. ¿Kʼusi jaʼ li «yutil icʼal osil[e]»? ¿Bakʼin laj yichʼik jipel ochel te li jtoyba anjeletike? Li ikʼal osil taje jaʼ ti oy xa noʼox spajeb kʼusi xuʼ spasik jlom kuxlejaletik ti mu xvinajik ta kʼelele, maʼuk li krixchanoetike. Jaʼ jun ikʼal osil ta snopbenik ta sventa mantal ta sventa ti kʼusi kʼupil sba tskʼan yoʼonton Diose. Ti buchʼutik jech oyik ta ikʼal osile muʼyuk me spatobil yoʼontonik ta tsʼakal. Li Diose la sjip ochel ta ikʼal osil ta skʼakʼalil Noé li jtoyba anjeletike, jech me oyik-o taje, jaʼ to me mi kʼot yorail chichʼ chapanbel smulike.