Ti bu laj yichʼ lokʼesel li stakʼobiltak li ta Jkuxlejaltik xchiʼuk Kabteltik sventa Dios, programa xchiʼuk bu chijtsʼibaj
7-13 YUʼUN DISIEMBRE
KʼUSITIK KʼUPIL SBA TA VIVLIA | LEVITIKO 10, 11
«Jaʼuk mas jkʼantik li Jeovae maʼuk li kutsʼ kalaltike»
it-1 paj. 1200 par. 4
Muʼyuk akʼbilik permiso
Muʼyuk akʼbilik permiso stunesel li kʼokʼ xchiʼuk li pome. Li ta Levitiko 10:1, li jpʼel kʼop ta ebreos zar xie, jaʼ chichʼ albel skʼoplal li kʼokʼ ti muʼyuk akʼbilik permiso spasel jeche. Pe jaʼuk li xnichʼnabtak Aaron, Nadab xchiʼuk Abiue la spasbaik ta mantal stukik, jaʼ yuʼun li Jeovae la xchikʼanan ta kʼokʼ (Le 10:2; Nu 3:4; 26:61). Ta mas tsʼakale, li Jeovae xi laj yalbe li Aarone: «Sventa mu xachamike, mu me xavuchʼik vino o yan jtosukal pox kʼalal cha-ochik ta karpana sventa tsobobbaile mi jaʼuk xuʼ xuchʼik li anichʼnab te achiʼuke. Jaʼ jun mantal sbatel osil avuʼunik xchiʼuk li jaykʼol kuxlejal chtal avuʼunik ta tsʼakale. Taje jaʼ sventa xichʼ naʼel li kʼusi akʼbil ta stojolal Diose xchiʼuk li kʼusi maʼuke xchiʼuk jaʼ sventa xichʼ naʼel li kʼusi ibal sbae xchiʼuk li kʼusi sake. Jech xtok, jaʼ sventa xichʼik chanubtasel ta smantaltak Jeova li j-israeletik ti laj yal ta stojolal li Moisese» (Le 10:8-11). Yaʼeluk li Nadab xchiʼuk Abiue yakubemik ta skoj taje la spasik li kʼusi mu xuʼ spasike. Ti bakʼin la spasike, ti bu la spasike xchiʼuk ti kʼu yelan la spasike muʼyuk akʼbilik permiso jech tspasik o maʼuk van la stunesik li pom ti kʼu yelan albil skʼoplal ta Eksodo 30:34, 35. Taje mu xuʼ spoj-o sbaik li kʼusi la spasik ta skoj ti yakubemike.
¿Mi ochemot xa li ta kux oʼonton xchiʼuk Diose?
16 Li Aarón, xchiʼil ta vokʼel li Moisese, jech la snuptan ek ta sventa li chaʼvoʼ xnichʼnabtake, Nadab xchiʼuk Abiú. Ta skoj ti jaʼ toʼox jun tsatsal mulil ti laj yakʼik pom kʼalal maʼuk jech oy ta sbaik spasele, li Jeovae laj yakʼbe stoj smulik; ichamik. ¡Toj kʼux van laj yaʼi stotik ta skoj ti muʼyuk xa chil o tskʼoponan li xnichʼnabe! Pe maʼuk noʼox taje. Li Aarón xchiʼuk li yan xnichʼnabtake i-albatik ti akʼo mu jechuk spasik kʼuchaʼal onoʼox nopemik kʼalal oy buchʼu chchame, xi albatike: «Mu me jecheʼuc spispun li ajolique, xchiʼuc mu me xaliʼ acʼuʼic ta scoj meʼnal, yuʼun jech mu xachamic, xchiʼuc jech mu xʼilin Mucʼul Dios ta stojol li jchiʼiltactic ta israelale» (Le 10:1-6). Oy me kʼusi xuʼ jchantik li kʼusi ikʼot ta pasel taje: jaʼ mas skʼan jkʼantik li Jeovae, jaʼuk xkom to li kutsʼ kalaltike, mas to mi mu sutes yoʼontonike.
Jsaʼtik lek li kʼusitik kʼupil sba ta Vivliae
Skʼan chʼulukutik ta skotol li kʼusi ta jpastik ta jkuxlejaltike
18 Sventa chʼulukutik-o ta sat li Jeovae, skʼan jkʼeltik lek li Vivliae xchiʼuk ti jpastik li kʼusi tskʼanbutik li Diose. Jchaʼalbetik skʼoplal li Nadab xchiʼuk Abihú ti laj yichʼik milel yuʼun Jeova ta skoj ti «la stsanic yan cʼocʼ ta stojol Mucʼul Dios ti cʼalal muʼyuc albilic jech tspasique», taje xuʼ van jaʼo jech la spasik kʼalal chyakubike (Le 10:1, 2). Jkʼeltik kʼusi laj yalbe Dios li Aarón kʼalal jaʼo kʼot ta pasel taje (kʼelo Levitiko 10:8-11). ¿Mi jaʼ van skʼan xal ti skʼan mu xkuchʼtik pox kʼalal jaʼo oy jtsobajeltike? Jnopbetik skʼoplal jlikeluk. Li voʼotike mu xa persauk jchʼuntik kʼusi chal li Mantaletik yuʼun Moisese (Ro 10:4). Jech noxtok, li kʼusi chal Vivlia ti chopole jaʼ ti ep xkuchʼtik li poxe xchiʼuk ti xijyakube, pe muʼyuk kʼusi chal mi ta smelol noʼox chichʼ uchʼele (1Kor 6:10; 1Tim 3:8). Jech kʼuchaʼal liʼe, li ta kʼin Koltaele chuchʼik chanib kopa vino. Xchiʼuk kʼalal laj yal Jesús ta sba velta ti skʼan xichʼ pasel li Snaʼobil slajel Cristoe, laj yalbe jtakboletik ti akʼo xuchʼik vino ti jaʼ skʼan xal li xchʼichʼele (Mt 26:27). Melel onoʼox ti jelel li kuxlejaletik ta jujun lume. Ta junantik lume oy ermanoetik ti chuchʼik jutuk pox kʼalal chveʼik ti skʼan toʼox xbatik ta tsobajeletike. Pe ta skoj li sjol yoʼontonike oy buchʼu tsnop ti skʼan mu xuchʼik mi jutebuk pox kʼalal tspasik kʼusuk abtelal ta sventa mantale. Li kʼusi skʼan jpastike jaʼ ti jnaʼtik stʼujel li «cʼusitic tucʼ, cʼusi muc tucʼuc» sventa jnaʼtik kʼusi xmuyubaj-o li Diose xchiʼuk ti chʼulukutik ta skotol li kʼusitik ta jpastike.
it-1 paj. 142 par. 4
Chonbolometik
Li mantaletik laj yichʼ akʼbel li Moisese tʼujbil noʼox stakʼ slajesik li chonbolometike, yuʼun xi ta xal li Levitiko 11:8: «Ibaluk sba xavilik», jaʼ xkaltik, skʼan jech xilik li j-israeletike. Pe kʼalal laj yakʼ xkuxlejal li Jesuse, te laj sbalil li mantal akʼbat Moisese. Vaʼun, li krixchanoetike jaʼ xa skʼan stsakik ta venta li mantal laj yichʼik akʼbel kʼalaluk echʼ xa ox li nojelal ta voʼe (Kol 2:13-17; Je 9:3, 4).
14-20 YUʼUN DISIEMBRE
KʼUSITIK KʼUPIL SBA TA VIVLIA | LEVITIKO 12, 13
«¿Kʼusi chakʼ jchantik li Mantal akʼbat Moises ta sventa li leprae?»
wp18.1 paj. 7, rekuadro
¿Mi yaloj xa onoʼox li kʼusi muʼyuk toʼox nabile?
• Chichʼik chʼakel lokʼel li buchʼutik ipike
Li Smantal Moisese chal ti skʼan chʼakel lokʼel li buchʼutik ipik ta kʼaʼemal chamel sventa mu x-ipaj li yantike. Pe jaʼ to jech laj yichʼ pasel kʼalal tal li tsatsal chameletik ta Edad Media (ti tetik van ta sjabilal 500 kʼalal ta 1500 ta jkʼakʼaliltike). Li avi kʼakʼale toj jtunel-o ti jech chichʼ pasele (kapitulo 13 xchiʼuk 14 li ta slivroal Levitiko).
¿Mi anaʼoj xa?
Li ta skʼakʼalil Vivliae oy jtos kʼaʼemal chamel ti chiʼik-o tajek yuʼun li judaetike. Li xibal sba chamel taje chlajesbat li sbekʼtal jun krixchano ti muʼyuk xa smelol chkom yuʼun li jbekʼtaltike. Ta skoj ti mu toʼox snabeik xpoxil li kʼaʼemal chamele, ta xchʼakik lokʼel li buchʼutik ipike. Li stukik eke skʼan xalbe yantik ti ip chaʼike (Le 13:45, 46).
it-2 paj. 210 par. 5
Lepra
Li ta kʼuʼil pokʼiletike xchiʼuk li ta naetike. Li leprae xuʼ sokes li kʼuʼil pokʼiletik ti pasbil ta tsots, ta lino xchiʼuk li kʼusitik pasbil ta nukule. Li leprae xuʼ xchʼay batel mi laj yichʼ pokel o sapele, vaʼun chichʼ chakʼel lokʼel kʼuk sjalil, pe mi kʼonkʼontik o yoxyoxtik o tsoj tajeke, jaʼ me chopol lepra, vaʼun skʼan chikʼel (Le 13:47-59). Mi kʼonkʼontik o mi tsojtsojtik xa xvinaj li spakʼbal jpʼej nae, li palee skʼan xal ti skʼan xokobtasik komele. Xuʼ van xichʼ alel ti skʼan spitsik lokʼel li tonetik ti xkuchoj li chamele, ti akʼo xjuxik lek li spakʼbal yut nae, ti xichʼ jipel lokʼel li tonetike xchiʼuk li smesklail ti laj yichʼ lokʼesele akʼo yichʼ jipel ta spat li jteklume. Mi chaʼsut talel li chamele, ibal sba chkom li nae, vaʼun ta xichʼ jinesel te chbat yichʼ jipel ti bu ibal sbae. Pe kʼalal mi sak xa ox li pʼej nae ta xichʼ lekubtasel jech kʼuchaʼal chal li Mantale (Le 14:33-57). Li lepra chichʼ alel ti ta sokes li kʼuʼiletik xchiʼuk li nae xuʼ van jaʼ kʼalaluk ta xkuxine, pe mu stakʼ naʼel lek mi jaʼ.
Jsaʼtik lek li kʼusitik kʼupil sba ta Vivliae
w04 15/5 paj. 23 par. 1
Li kʼusi mas tsotsik skʼoplal ta slivroal Levitikoe
12:2, 5. ¿Kʼu yuʼun «ibal sba» chkom li jun ants mi vokʼ yole? Li yalajeb jun antse jaʼ sventa xakʼbe xkuxlejal jun krixchano ti lek tukʼe. Jaʼ yuʼun chaʼa, ta skoj ti jmulavil krixchanoutike maʼuk xa tukʼil krixchano ta xakʼ, yuʼun jmulavil krixchano xa chvokʼ yuʼun. Kʼalal chil yol o chil u li jun antse o chlokʼ yaʼlel skʼunil li jun vinike, ibal me sba chkom kʼuk sjaliluk, taje jaʼ te tsvules ta joltik ti jmulavilutike (Le 15:16-24; Sl 51:5; Ro 5:12). Li mantaletik laj yichʼ akʼel sventa xichʼ sakubtasel li kʼusitike jaʼ chkoltaatik li j-israeletik sventa xakʼik venta ti tsots skʼoplal ti oyuk buchʼu xakʼ xkuxlejal yoʼ xichʼik pojel lokʼel ta mulil li krixchanoetike xchiʼuk ti staik li tukʼilale. Jaʼ yuʼun, li Mantale chal ti jaʼ chbeiltasvan li Kristoe (Gal 3:24).
wp18.1 paj. 7, rekuadro
¿Mi yaloj xa onoʼox li kʼusi muʼyuk toʼox nabile?
• Kʼalal chichʼik sirkunsisione
Li Smantal Diose chal ti skʼan xichʼ sirkunsision li ololetik kʼalal oy xa ox ta xvaxakibal kʼakʼal svokʼele (Le 12:3). Sventa lek xa sikub xchʼichʼel li jun olole jaʼ to mi echʼ xa ox jun xemana svokʼele. Li ta skʼakʼalil Vivliae, jaʼ to chichʼ sirkunsision li jun olol mi echʼem xa ox mas ta jun xemanae, taje jaʼ sventa muʼyuk kʼusi snuptan li olole.
21-27 YUʼUN DISIEMBRE
KʼUSITIK KʼUPIL SBA TA VIVLIA | LEVITIKO 14, 15
«Sakukotik me kʼalal chkichʼtik ta mukʼ li Diose»
it-1 paj. 282 par. 18
Pokel, atinel
Oy jayibuk srasonaltak ti kʼu yuʼun skʼan spok sbaik ta voʼ li j-israeletike. Li buchʼu jaʼ to chkol ta leprae, mi la sta ta pikel li buchʼu spikoj ti oy kʼusi chlokʼ yuʼune, jun vinik ti chlokʼ yaʼlel sbekʼtale, jun ants ti jaʼ to laj yil ue o ti laj yil alchʼichʼe o kʼusiuk noʼox ti jaʼ to la xchiʼin sbaik ta vayele. Skotol taje ibal me sba chkom, jaʼ yuʼun skʼan xichʼ pokel o atintasel (Le 14:8, 9; 15:4-27). Buchʼuuk noʼox ti te oy xchiʼuk jun anima ta snae o ti la sta ta pikele ibal me sba ta xkom, jaʼ yuʼun skʼan xichʼ atintasel ta voʼ. Mi oy buchʼu mu skʼan xchʼun li Mantal taje, persa ta xichʼ milel li ta tsobobbaile yuʼun la sokesbe skʼoplal li bu chʼul ti jaʼ yuʼun li Jeovae (Nu 19:20). Kʼalaluk chichʼ pokele, jaʼ chakʼ ta aʼiel ti lek xa sak chkom ta stojolal Jeovae (Sl 26:6; 73:13; Is 1:16; Ese 16:9). Kʼalal ta jpok jbatik xkaltik li ta Skʼop Jeova ti xkoʼolaj ta voʼe, lek xa me sak ta xijkomutik (Ef 5:26).
it-2 paj. 365 par. 8
Chil u
Jaʼ noʼox jech ek, ibal me sba li ants mi chil ue o mi «chjalij ep kʼakʼal li yorail chil xchamele». Jech xtok, ibal me sba chkom ti bu ta xvaye, ti bu ta xchotie o li jun krixchano mi la sta ta pikele. Mi paj xa ox li xchʼichʼele, akʼo echʼuk vukub kʼakʼal vaʼun lek xa chkom. Li ta xvaxakibal kʼakʼale skʼan xichʼ batel chaʼkotuk tortola o chaʼkotuk paloma, vaʼun chakʼbe li palee, taje jaʼ sventa sta perton li antse, li jkote jaʼ sventa chakʼ ta matanal ta skoj li smule xchiʼuk li jkote jaʼ sventa chikʼbil matanal (Le 15:19-30; kʼelo LIMPIO, LIMPIEZA).
it-2 paj. 256 par. 3
Ti bu chʼule
2. Li karpana sventa tsobobbaile, ta mas tsʼakale laj yichʼ ojtikinel kʼuchaʼal templo. Skotol li kʼusitik ti te oye ti te tsakal skʼoplal li yamakʼil axibalna xchiʼuk li yamakʼil temploe toj chʼulik (Eks 38:24; 2Kr 29:5; Ech 21:28). Li kʼusitik toj tsotsik skʼoplal ti te oy ta amakʼe jaʼ li skajleb xchikʼobil matanale xchiʼuk li perol ta kovree. Li kʼusitik taje toj chʼulik. Li yochebal axibalnae jaʼ noʼox xuʼ te oyik li krixchanoetik ti sakubtasoj sbaike, taje jech chichʼ pasel ek li ta temploe. Muʼyuk buchʼu xuʼ x-och ta yamakʼiltak mi ibal sbae. Jech kʼuchaʼal liʼe, li ants ti ibal sbae mu xuʼ spik li kʼusitik chʼule xchiʼuk mi jaʼuk stakʼ x-och ti bu chʼule (Le 12:2-4). Mi ibal sba kʼotik li j-israeletike, xuʼ me xikʼubtasik li axibalnae (Le 15:31). Li buchʼu chakʼik matanal ti jaʼ to kolik li ta leprae te noʼox chiktaik komel li ta yochebal karpanae (Le 14:11). Li jun krixchano mi ibal sbae mu xuʼ slajes li matanal chichʼ akʼel sventa jun oʼontonal ta temploe o li ta axibalnae, mi jech la spase ta xichʼ milel (Le 7:20, 21).
Jsaʼtik lek li kʼusitik kʼupil sba ta Vivliae
it-2 paj. 528 par. 2
Chikinil
Kʼalaluk laj yichʼ vaʼanel li paleetik ta Israele, albat Moises ti akʼo stsakbe jutebuk xchʼichʼel li chij ti chtun sventa chichʼ vaʼanel li paleetike xchiʼuk laj yichʼ akʼbel li ta sbatsʼi velvelul xchikin Aarone xchiʼuk li ta sbatsʼi velvelul xchikintak xnichʼnabtake. Jech xtok, laj yichʼ akʼbel li ta sbatsʼi kʼobike xchiʼuk li ta sbatsʼi okike. Taje skʼan jech chvinaj ti kʼu yelan chaʼiike, ti kʼusi tspasike xchiʼuk ti kʼu yelan tspas stalelalike (Le 8:22-24). Li ta smantal Moisese, laj yichʼ alel ti oy kʼusi skʼan spas li pale ta stojolal li buchʼu yakal chkol ta leprae, li palee skʼan tsakbe jutebuk xchʼichʼel li matanal sventa skʼanel pertone, vaʼun tsbonbe ta svelvelul sbatsʼichikin, ja jech skʼan spas ek ta sventa li aseitee (Le 14:14, 17, 25, 28). Taje jaʼtik jech chichʼ pasbel ek li jun mosoil mi tskʼan te chkom-o xchiʼuk li yajvale, vaʼun te ta xichʼ vaʼanel ta smarkoal tiʼ na sventa xichʼ jombel li xchikine. Ti lek xvinaj ti jombil xchikin li mosoile, jaʼ chakʼ ta ilel ti oy ta yoʼonton chchʼunbe-o smantal li yajvale (Eks 21:5, 6).
¿Kʼu yuʼun skʼan chʼulukutik?
7 Kʼalal vaʼanatik li buchʼutik chtunik ta paleal ta Israele, li Moisese laj yakʼbe xchʼichʼel chij ta sbatsʼichikin, ta smeʼ sbatsʼikʼob xchiʼuk ta smeʼ sbatsʼi-ok li Aarone, li mero bankilal palee, jaʼ jech laj yichʼik akʼbel li xnichʼnabtak eke (kʼelo Levítico 8:22-24). Taje jaʼ chakʼ ta ilel ti chchʼunik mantale xchiʼuk ti tspasik persa ta spasel li yabtelike. Li Jesús eke, li Mero Bankilal Pale kuʼuntike, toj lek kʼusi xuʼ xchanbeik li buchʼutik tʼujbil chbatik ta vinajele xchiʼuk li yan chijetike. Yuʼun la xchikinta li beiltasel akʼbat yuʼun Jeovae, li skʼobtake jaʼ la spas-o batel li kʼusi tskʼan yoʼonton Diose, li yoktake muʼyuk bu stselpʼuj li ta lekil bee (Jn 4:31-34).
g 1/06 paj. 14, rekuadro
Li xkuxile: Kamigotik xchiʼuk jkontratik
¿MI JAʼ VAN XKUXIL?
Li Vivliae chalbe skʼoplal kʼalal chkʼot lepra ta jpʼejuk nae (Le 14:34-48). Oy buchʼutik chalik ti chopol leprae jaʼ li xkux kʼusitike, pe mu stakʼ naʼel mi jaʼ ta melel. Kʼuk xi noʼox, li smantal Diose ch-albat li yajval nae ti akʼo sjip lokʼel li tonetik ti kuxinemike, ti akʼo xjux lek li yut spakʼbal snae xchiʼuk ti akʼo sjip lokʼel li kʼusitik chkuxinik xa yaʼie. Vaʼun, akʼo te bat sjip li ta spat jteklum ti bu ibal sbae. Mi chaʼsut talel li xkuxe, ta me xichʼ alel ti ibal xa sba li nae, skʼan me xichʼ lilinel, vaʼun chichʼ jipel batel li xchʼuchʼulile. Ti lek jamal laj yal li mantaletik li Jeovae, jaʼ te chakʼ ta ilel ti skʼanoj tajek li steklumale xchiʼuk tskʼan ti lekuk oyik ta sbekʼtal stakopalike.
28 YUʼUN DISIEMBRE TA 2020- 3 YUʼUN ENERO TA 2021
KʼUSITIK KʼUPIL SBA TA VIVLIA | LEVITIKO 16, 17
«¿Kʼu yelan skʼan xkiltik li Skʼakʼalil Stael Pertone?»
Li kʼusitik chakʼ jchantik li slivroal Levitikoe
4 (Kʼelo Levitiko 16:12, 13). Jnoptik kʼusi tspas li mero bankilal palee: li vaʼ kʼakʼale, oxib velta ch-och batel li ta axibalnae. Li ta sba veltae, tstsak ochel chaʼjopuk ninal pom ti oy sperfumeale xchiʼuk tstsak ochel jun yav akʼal ti pasbil ta oro yoʼ xchikʼ li pome. Vaʼun, te chvaʼi jlikel li ta kortina ta stiʼ Batsʼi Lekil Chʼul Kuartoe. Chichʼ lek spʼijil kʼu yelan ch-och batel li mero bankilal palee xchiʼuk te chvaʼi ta yeloval li xkaxail strato Jeovae, jaʼ xkaltik, te chvaʼi li ta yeloval Jeovae. ¿Kʼusi tspas kʼalal te xa ox oy ta yute? Chlik xchikʼ li pome, vaʼun tspuk sba ta yut kuarto li yikʼ pom ti jun to smuile. Ta mas tsʼakale, ch-och yan velta li ta Batsʼi Lekil Chʼul Kuartoe xchiʼuk chichʼ ochel li xchʼichʼel chonbolometik ti laj yichʼ akʼel ta milbil matanal sventa mulile. Pe jnopbetik skʼoplal liʼe: kʼalal muʼyuk to chichʼ ochel li xchʼichʼel chonbolometike, baʼyel xa onoʼox chchikʼ li pome.
Li kʼusitik chakʼ jchantik li slivroal Levitikoe
5 ¿Kʼusi chakʼ jchantik kʼalal chichʼ toʼox chikʼel pom li ta Skʼakʼalil Stael Pertone? Li Vivliae chal ti xkoʼolaj ta chikʼbil pom kʼalal tspasik orasion li yajtuneltak Dios ti tukʼ yakʼoj sbaike (Sl 141:2; Ap 5:8). Laj kakʼtik venta ti chichʼ lek spʼijil li mero bankilal pale kʼalal chbat xchikʼ pom li ta yeloval Jeovae. Jaʼ me jech skʼan jpastik ek kʼalal ta jpastik orasione, yuʼun skʼan xkichʼ jpʼijiltik o jmeloltik. Ta melel, toj ep sbalil chkaʼitik ti xuʼ xijnopaj ta stojolal li Mukʼul Jpasmantal ta vinajel balumil jech kʼuchaʼal tspas ta stojolal stot li jun uni kʼox kereme (Snt 4:8). Pe maʼuk noʼox, yuʼun xuʼ xijkʼot ta yamigo (Sl 25:14). Mu kʼusi xkoʼolaj-o chkiltik li matanal jtaojtike, jaʼ yuʼun mu jkʼan jpastik li kʼusi chopol-o chaʼi sba kuʼuntik li Jdiostike.
Li kʼusitik chakʼ jchantik li slivroal Levitikoe
6 Laj kiltik xtok ti baʼyel chchikʼ pom li mero bankilal pale ti jaʼ tsʼakal to chakʼ li milbil matanaletike. Ti jech tspase jaʼ sventa lekuk x-ilat yuʼun li Jeovae. ¿Kʼusi chakʼ jchantik taje? Kʼalal ay ta balumil Jesus yoʼ xakʼ ta matanal li xkuxlejale, baʼyel oy kʼusi tsots skʼoplal la spas ti jaʼ mu sta li skolebal krixchanoetike. Yuʼun persa tukʼ laj yakʼ sba ta stojolal Stot sventa xchʼambat li matanal chakʼe. Vaʼun, jaʼ jech laj yakʼ ta ilel ti jaʼ mas lek ti jpastik li kʼusi tskʼan yoʼonton Jeovae xchiʼuk ti tukʼ kʼu yelan ch-ajvalilaje.
Jsaʼtik lek li kʼusitik kʼupil sba ta Vivliae
it-1 paj. 261 par. 12
Asasel
Jaʼ jech kʼuchaʼal laj yal li Pabloe, ti laj yakʼ ta matanal stukʼil kuxlejal Jesus sventa xichʼ pasbel ta perton smul li krixchanoetike, mas to lek kʼusi kʼot ta pasel yuʼun ti jaʼ mu sta «li xchʼichʼel tot vakax xchiʼuk li xchʼichʼel tot tentsune» (Ebr 10:4, 11, 12). Jaʼ yuʼun, «jaʼ la xkuch batel li kʼusitik kʼux chkaʼitike» xchiʼuk «oy kʼusi laj yichʼ pajbel ta skoj li jmultike» (Is 53:4, 5; Mt 8:17; 1Pe 2:24). La xkuchbe batel ta j-echʼel li smul li buchʼutik chakʼ ta ilel xchʼunel yoʼontonik ta stojolal li matanal laj yakʼe, vaʼun jaʼ jech laj yakʼ kʼotuk ta pasel ti tslajesbe skʼoplal ta j-echʼel mulil li Diose. Ti kʼu xa yelan laj kalbetik talel skʼoplale, li tentsun «yuʼun Asasele» jaʼ skʼoplal li matanal laj yakʼ Jesukristoe.
¿Kʼu yuʼun skʼan chʼulukutik?
10 (Kʼelo Levitiko 17:10.) Albatik yuʼun Jeova ti mu stakʼ «[stiʼik] chʼichʼ» li j-israeletike, jaʼ jech chkichʼtik albel mantal ek ti mu stakʼ jtunesbetik xchʼichʼel krixchanoetik o li chonbolometike (Ech 15:28, 29). Akʼo mi yuʼun xa chijcham jpʼel ta koʼontontik ta jchʼuntik li mantal taje, manchuk mi toj echʼ xa noʼox tsujutik li buchʼutik mu xojtikinik Jeovae xchiʼuk ti muʼyuk sbalil chilbeik li smantaltake. Yan li voʼotike jkʼanojtik li Jeovae xchiʼuk ta jkʼan ta jchʼunbetik li smantaltake. Solel mu jkʼantik ti mu xa lekuk xkil jbatik xchiʼuk li Jeovae o ti xijlokʼ li ta tsobobbaile. Akʼo mi jnaʼojtik ti oy buchʼu tslabanutik ta skoj ti muʼyuk ta jchʼamtik li chʼichʼe, jpʼel ta koʼontontik ta jchʼunbetik smantal li Jeovae (Jud 17, 18). ¿Kʼusi tskoltautik sventa «jbel scʼoplal mu [jtiʼtik]» li chʼichʼe xchiʼuk ti mu jsetʼuk bu ta jtikʼbe jbatik xtoke? (Dt 12:23, Ch).