¿Kʼusi skʼan jpastik sventa xijkuxi li ta achʼ balumile?

Li ta xchanobiltak echʼe, la jchantik ti jutuk xa skʼan slajesbe skʼoplal Dios li chopol krixchanoetike xchiʼuk li vokoliletik chakʼe. Jpʼel ta koʼontontik ti chkʼot ta pasele. ¿Kʼu yuʼun? Yuʼun xi jamal chal li Vivliae:

«Ta xjelav li balumile» (1 JUAN 2:17).

Jchʼunojtik lek ti oy buchʼutik kuxul chkomike, yuʼun xi to chal batel li tekstoe:

«Te chkom-o sbatel osil li buchʼu tspas kʼusi tskʼan yoʼonton Diose».

Jaʼ yuʼun, sventa kuxul xijkomutike skʼan jchʼunbetik smantal li Diose. Pe sventa jchʼunbetik smantale, skʼan baʼyel xkojtikintik.

KOJTIKINTIK DIOS SVENTA KUXUL XIJKOM

Lokʼoletik: 1. Lubem xa tajek xchiʼuk tsvul yoʼonton jun enfermera, vaʼun chchotan sba ta spisoal ospital. 2. Kʼalal jaʼo yorail chkuxike chakʼ venta ti xmuyubaj noʼox li jun xchiʼil ta abtel ti yakal tskʼel jlik revistae. 3. Yakal chkʼelbat jun versikulo ta Vivlia yuʼun li xchiʼil ta abtele xchiʼuk chakʼbe komel jun tarjeta ti chalbe skʼoplal li jw.org.

Xi laj yal li Jesuse: «Jaʼ skʼoplal kuxlejal sbatel osil liʼe: ti ta xojtikinikote, li jun noʼox melel Diosote» (Juan 17:3). Sventa kuxul xijkomutik li ta slajebal balumile xchiʼuk ti xijkuxiutik sbatel osile, skʼan xkojtikintik li Diose. Mu baluk noʼox ti jnaʼtik ti oye o ti xkojtikintik jutuke, yuʼun skʼan xijkʼot ta yamigo. Kʼalal oy buchʼu chkamigointike, ta jchʼakbetik yorail sventa xkojtikintik, jaʼ jech skʼan jpastik ta stojolal li Dios eke. Jkʼeltik junantik chanubtaseletik ta Vivlia ti jaʼ tskoltautik yoʼ xkojtikintik li Diose xchiʼuk ti jechuk-o lekuk xkil jba jchiʼuktike.

Li kʼusi chal ta melel li Vivliae

Li Diose oy ta yoʼonton ti xijkuxi ta jun paraisoe.

Kʼalaluk la spas baʼyel krixchanoetik li Diose, li Adan xchiʼuk Evae, te laj yakʼ ta jun kʼupil sba nichimaltik ti jaʼ sbi Edene. Tukʼil krixchanoetik toʼox xchiʼuk akʼbatik yuʼun Dios li kʼusitik chtun yuʼunik sventa xmuyubajikuk noʼoxe. Kuxiik sbatel osil jechuk ti lajuk yamigoinik-o li Diose, pe kʼux ta aʼyel, muʼyuk la xchʼunbeik smantal li Diose akʼo mi muʼyuk tsots ta chʼunel.

Ti kʼu yuʼun chkil jvokoltike.

Ta ox xkuxiik sbatel osil li Adane, pe ta skoj ti muʼyuk la xchʼunbeik smantal li Diose, chʼay yuʼunik. Pe maʼuk noʼox stuk chʼay yuʼun, yuʼun chʼay yuʼun li snitilultak eke. Xi chal li Vivliae: «Jech kʼuchaʼal ta jun noʼox vinik och talel li mulil ta balumile, jech ta skoj mulil och talel ek li lajelale, jaʼ yuʼun chcham skotol krixchanoetik» (Romanos 5:12). Jaʼ jech kʼuchaʼal jun olol ti chkuchbe xchopol talelal li stot smeʼe, li snitilulalutik Adan eke la jkuchinbetik li smule, jaʼ yuʼun jkotoltik chijmalub, chijmeʼelub xchiʼuk chijchamutik.

Li Diose oy xa kʼusi spasoj sventa skoltautike.

Xi chal li Vivliae: «Skʼanoj tajek krixchanoetik li Diose, jaʼ yuʼun laj yakʼ li jun noʼox Xnichʼon sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta-o xkuxlejal sbatel osil» (Juan 3:16). Li Diose la stak tal ta balumil li Jesus sventa tal yakʼ xkuxlejal ta jtojolaltike. Xi laj yal jun vinik ta India ti 86 sjabilal kʼalal tsnopbe skʼoplal li kʼanelal yuʼun Diose: «Taje jaʼ chakʼ kil ti skʼanojun tajek li Jeovae.a Ta skoj taje, xuʼ jpat-o koʼonton ti chikuxi ta sbatel osile».

Xuʼ jtojbetik ta vokol li kʼusi spasoj ta jtojolaltik li Diose.

Li Vivliae chal ti xuʼ jtojtik ta vokol li kʼusi spasoj Dios «mi jech ta jchʼunbetik-o li smantaltake» (1 Juan 2:3). Li Jeova Diose ta slekil yoʼonton chchanubtasutik ta sventa li kʼusi stakʼ jpastik yoʼ jkʼupintik li jkuxlejaltik avie (Isaias 48:17, 18, tsʼib ta yok vun). Xchiʼuk mu skʼan ti xkil jvokoltike, jaʼ yuʼun jamal chalbutik mi ta jchʼuntik li kʼusi chalbutike, xkuxet noʼox koʼontontik avi xchiʼuk xuʼ xijkuxi ta sbatel osil.

JCHANTIK SKOTOL KʼAKʼAL LI VIVLIAE

Kʼalal jaʼo chkux ta yabtel li enfermerae, yakal tsnopbe skʼoplal li kʼusi la xchan ta Vivliae. — Kuxul me chijkom mi la jkʼanbetik koltael li Diose xchiʼuk mi la jpastik li kʼusi tskʼan yoʼontone.

Sventa xijkuxie skʼan xijveʼ skotol kʼakʼal. Pe xi laj yal xtok li Jesuse: «Maʼuk noʼox ta pan kuxul li krixchanoe, yuʼun jaʼ kuxul-o skotol li kʼusitik chlokʼ ta ye Jeovae» (Mateo 4:4).

Avie, te ta jtatik ta Vivlia li kʼusi chal Jeovae. Mi ta jchantik batel li chʼul livro taje, te ta jchantik li kʼusi spasoj Dios ta voʼne, kʼusi tspas avi xchiʼuk li kʼusi tspas ta jelavele.

JKʼANBETIK KOLTAEL LI DIOSE

¿Kʼusi xuʼ jpastik mi ta jkʼan ta jchʼunbetik smantal li Diose, pe ti vokol chkaʼitik yiktael li kʼusi chopol chile? Mi jaʼ jeche, jaʼ tskoltautik mi laj kojtikintik lek li Diose.

Jkʼeltik kʼusi kʼot ta stojolal jun ants ti Sandra chkakʼbetik sbie. Li stuke chmulivaj toʼox, pe kʼalal lik xchan li Vivliae te laj yaʼibe smelolal ti xi chal li Diose: «¡Jatavanik lokʼel ta stojolal li mulivajele!» (1 Korintios 6:18). Li Sandrae la skʼanbe vokol Dios, vaʼun la sjel li xkuxlejale, pe jech-o chakʼ batel persa sventa mu stsʼuj yan velta li ta mulile. Xi to chale: «Kʼalal chopolik xa kʼusi chtal ta jnopbene, ta sjunul koʼonton ta jkʼopon Jeova, yuʼun jnaʼoj ti mu xuʼ kuʼun stsalel jtuke. Li orasione skoltaojun sventa mas to nopoluk oyun ta stojolal li Jeovae». Jech kʼuchaʼal kʼot ta stojolal li Sandrae ta smiyonal xa noʼox krixchanoetik yakal chojtikinik li Diose xchiʼuk ch-akʼbat yipalik sventa sjel li xkuxlejalike xchiʼuk ti jechuk xa xkuxiik kʼuchaʼal tskʼan yoʼonton Diose (Filipenses 4:13).

Kʼalal mas chkojtikintik li Diose, mas to chojtikinutik ek xchiʼuk jaʼ slekil amigo chilutik (Galatas 4:9; Salmo 25:14). Vaʼun, jaʼ jech kuxul chijkom mi laj yichʼ lajesel li balumile xchiʼuk xuʼ xijkuxiutik li ta achʼ balumil yuʼun Diose. Pe ¿kʼu van yelan li achʼ balumile? Jaʼ chchapbutik smelolal li ta yan xchanobile.

a Li Vivliae chal ti jaʼ Jeova sbi li Diose.