Li voʼote xuʼ cha kuxi li ta achʼ balumil yuʼun Dios ti bu chʼabal xa vokolile

LI DIOSE laj yakʼ ta nichimaltik Edén li Adán xchiʼuk li Evae. Manchuk mi xchaʼvoʼalik muʼyuk la xchʼunik mantal xchiʼuk chamik ta tsʼakal, li Jeovae yakʼoj kʼusi chtun sventa chi jkuxiutik sbatel osil li ta Paraisoe. Li Vivliae xi ta xal ta melele: «Ti buchʼu oy slequil ti cʼusi ta spasique, ta xrextoinic ti banomile, sbatel osil ta xnaquiic tey», xi (Salmo 37:29, Ch).

Li Vivliae ta xalbutik skʼoplal jun «achʼ vinajel» xchiʼuk jun «achʼ banamil» (Isaías 65:17; 2 Pedro 3:13). Li «vinajel» ta jkʼakʼaliltike jaʼik li ajvaliletik ta balumil liʼe, pe li «achʼ vinajel[e]» jaʼ li Jesucristo xchiʼuk li buchʼutik ch-ajvalilajik xchiʼuke. Kʼalal ventainbil xa yuʼun achʼ vinajel, jaʼ xkaltik, li lekil xchiʼuk tukʼil Ajvalilal yuʼun Dios spʼejel li Balumile, ¡toj echʼ xa noʼox kʼupil sba chi jkuxiutik!

¿Kʼusi jaʼ un chaʼa li «achʼ banamile»?... Li achʼ balumile jaʼik me li lekil krixchanoetik ti skʼanojik li Jeovae. Aʼibo smelolal avaʼi liʼe, kʼalaluk li Vivlia ta xalbe sloʼilal balumile, bakʼintike jaʼ ta xalbe smelolal li buchʼutik te nakalike, maʼuk li batsʼi Balumile (1 Crónicas 16:31; Salmo 66:4; Jeremías 22:29). Jaʼ jech taje, li achʼ balumil ti jaʼ li krixchanoetike, liʼ onoʼox ta xkuxiik li ta batsʼi Balumile.

Ta skʼakʼalil taje, lajemik xaʼox-o li chopol krixchanoetik avie. Vuleso ta ajol ti Nojelal ta voʼ ta skʼakʼalil Noee, la slajes li chopol krixchanoetike. Xchiʼuk, jech kʼuchaʼal jchanojtik xae, ta xichʼ lajesel ta Armagedón li chopol balumil ti bu kuxulutike. Tana un jkʼeltik kʼu yelan li kuxlejal ta achʼ balumil yuʼun Dios kʼalal mi echʼem xaʼox li Armagedone.

¿Mi cha kʼan cha kuxi sbatel osil ta Paraiso li ta achʼ balumil yuʼun Dios ti bu chʼabal xa vokolile?... Mi junuk doktor xuʼ spas akʼo xi jkuxiutik sbatel osil. Mi jaʼuk oyuk junuk pastiya ti xuʼ xi spojutik sventa mu xi jchame. Li kʼuxi noʼox xuʼ xi jkuxi sbatel osile jaʼ ti chi jnopajutik ta stojolal li Diose. Li Mukʼta Jchanubtasvaneje ta xalbutik kʼu yelan ta pasel.

Jam jVivliatik te ta Juan, kapitulo 17, versikulo 3. Te ta jtatik li kʼusi laj yal li Mukʼta Jchanubtasvanej ti xie: «Ti jech ta xcuxiic sbatel osile, yuʼun xayotquinicot ti atuc noʼox batsʼi cuxul Diosote, xchiʼuc xotquinic noxtoc li Jesucristo laj atac tale», xi.

Jech kʼuchaʼal laj yal li Jesuse, ¿kʼusi la skʼan ta jpastik sventa chi jkuxiutik sbatel osile?... Baʼyel skʼan ta xkojtikintik li jTotik ta vinajele, li Jeovae, xchiʼuk li xNichʼon eke, li buchʼu laj yakʼ xkuxlejal ta jtojolaltike. Taje jaʼ smelolal ti skʼan ta jchantik li Vivliae. Li livro liʼe, JCHANBETIK LI MUKʼTA JCHANUBTASVANEJE, ta skoltautik ta xchanel.

¿Kʼuxi van ta skoltautik sventa chi jkuxiutik ta sbatel osil li yojtikinel Jeovae?... Veno, jech kʼuchaʼal skotol kʼakʼal skʼan chi jveʼutike, jaʼ noʼox jech ek skotol kʼakʼal skʼan ta jchantik ta sventa li Jeovae. Li Vivliae xi ta xale: «Mu ta vajuc noʼox ta xcuxi li cristianoe. Jaʼ ta xcuxi ta sventa scotol li scʼop chlocʼ ta ye Diose», xi (Mateo 4:4).

Jech xtok, skʼan ta xkojtikintik ek li Jesucristoe, yuʼun li Diose la stak tal li xNichʼon sventa tstupʼ li jmultike. Li Vivliae ta xchanubtasutik ti «muʼyuc bu yan xuʼ ta jtatic coltael[e]», xchiʼuk ta xal xtok ti «bochʼo chchʼun ti jaʼ Jcoltavanej li Nichʼonile jaʼ chcuxi sbatel osil» (Hechos 4:12; Juan 3:36). ¿Mi jchʼunojtik ta melel ti jaʼ noʼox ta stojolal Jesús xuʼ xi jkuxiutik sbatel osile? Mi jaʼ jeche, skotol kʼakʼal ta jchantik batel ta stojolal li Mukʼta Jchanubtasvaneje xchiʼuk ta jpastik li kʼusitik chale.

Ti kʼuxi xuʼ xa chan lek ta sventa li Mukʼta Jchanubtasvaneje jaʼ ti kʼalal cha chan jayibuk velta li livro liʼe. Jech xtok, kʼelo li lokʼoletike xchiʼuk nopo lek li kʼusitik smelolal taje. Akʼo persa ta stakʼel li sjakʼobiltak ti te oy ta xokone. Jech xtok, kʼelo xchiʼuk ameʼ o xchiʼuk atot li livroe. Mi muʼyuk bu te oy achiʼuk li atot ameʼe, kʼelo xchiʼuk yan mukʼtik krixchanoetik xchiʼuk yantik ololetik. Mi jaʼ jech cha pase, oyikʼal van oy buchʼu cha kolta ta xchanel ta sventa li Mukʼta Jchanubtasvaneje xchiʼuk li kʼusi skʼan tspas sventa chkuxi ta sbatel osil li ta achʼ balumil yuʼun Diose. ¿Mi mu van alakʼuk sba xa naʼ ti oy buchʼu jech cha koltae?...

Li Vivliae ta xal ti «banamile [...] ta onoʼox xlaj», pe jech xtok ta xchanubtasvan kʼuxi xuʼ xi jkuxiutik ta sbatel osil li ta achʼ balumil yuʼun Diose. Ta xalbe smelolal ti «bochʼo jaʼ tspasilan cʼusi tscʼan yoʼonton Diose jaʼ ta xcuxi sbatel osil» (1 Juan 2:17). Jech oxal chaʼa, ¿kʼusi skʼan ta jpastik sventa chi jkuxiutik sbatel osil li ta achʼ balumil yuʼun Diose?... Skʼan ta xkojtikintik li Jeovae xchiʼuk li skʼanbil Nichʼon ti jaʼ Jesuse, xchiʼuk ta jpastik li kʼusitik ta jchantike. Jmalaojkutik ti kʼalal cha chan li livro liʼe, cha skoltaot ta spasel skotol li kʼusitik taje.