XCHANOBIL 19
Tstsatsubtas xchʼunel koʼontontik li achʼ balumil chak’ Jeovae
«¿Mi muʼyuk van tspas li kʼusi [chal Jeovae?]» (NUM. 23:19).
KʼEJOJ 142 Jchʼuntik ta melel spatobil koʼntontik
LI KʼUSI TA JCHANTIKEa
1, 2. Yoʼ to mu xtal li achʼ balumile, ¿kʼusi skʼan jpastik?
XIJMUYUBAJ tajek, yuʼun li Jeovae yalojbutik ti tslajesbe skʼoplal li chopol balumil liʼe (2 Ped. 3:13). Akʼo mi mu jnaʼtik kʼusi ora tspas ta Paraiso li balumile, li kʼusi chkiltik yakal chkʼot ta pasele chakʼ ta ilel ti poʼot xae (Mat. 24:32-34, 36; Ech. 1:7).
2 ¿Kʼu yuʼun skʼan jtsatsubtas xchʼunel koʼontontik mu ventauk li kʼu xa sjalil kocheltik ta mantale? Yuʼun xuʼ xkʼunib li xchʼunel koʼontontike. Jech xtok, li jtakbol Pabloe laj yal ti kʼalal chkʼunib li xchʼunel koʼontontike chkʼot ta «mulil ti ta anil chchukutike» (Ebr. 12:1). Sventa mu jechuk xkʼot ta pasele, skʼan nopolikuk noʼox jkʼelbetik sprevailtak ti yaloj Jeova ti poʼot spas ta Paraiso li balumile (Ebr. 11:1).
3. ¿Kʼusi ta jkʼelbetik batel skʼoplal li ta xchanobil liʼe?
3 Li ta xchanobil liʼe ta jkʼelbetik batel skʼoplal oxtos li kʼusi tskoltautik sventa jchʼuntik ti ta onoʼox xakʼ tal jun achʼ balumil li Jeovae: 1) ti jnopbetik skʼoplal li pojelale, 2) jnopbetik skʼoplal li sjuʼel Jeovae xchiʼuk 3) ti jaʼuk jpastik li kʼusi tsnopajesutik ta stojolal Jeovae. Mi laje, ta jkʼeltik batel kʼuxi tstsatsubtas xchʼunel koʼontontik li kʼusi albat yuʼun Jeova li Abakuke. Pe baʼyel jkʼeltik kʼu yuʼun jchʼunojtik ti chkiltik onoʼox li achʼ balumile.
KʼU YUʼUN SKʼAN JTSATSUBTAS LI XCHʼUNEL KOʼONTONTIKE
4. ¿Bu skʼan xkakʼ ta ilel xchʼunel koʼontontik?
4 Jujun kʼakʼal skʼan xkakʼ ta ilel xchʼunel koʼontontik kʼalal oy kʼusi ta jnop ta jpastike. Jech kʼuchaʼal kʼalal ta jsaʼ kamigotaktik, kʼalal ta jchʼay koʼontontik, ta jchanuntik xchiʼuk li ta kabteltike. Jech xtok, oy kʼusitik skʼan jnoptik li ta jnupuneltike xchiʼuk kʼuxi ta jkʼeltik li kalab jnichʼnabtike. Xiuk jnoptike: «¿Kʼusi chakʼ ta ilel li kʼusi chkʼot ta nopel kuʼune? ¿Mi chakʼ ta ilel ti jchʼunoj ti poʼot chlaj li chopol balumil liʼe? O ¿mi jaʼ jech ta jnop kʼuchaʼal li yan krixchanoetik ti chalik ti chʼabal kuxlejal sbatel osile?» (Mat. 6:19, 20; Luk. 12:16-21). Mi jchʼunojtik ti ta onoʼox xakʼbutik Jeova li achʼ balumile, lek me kʼusi chkʼot ta nopel kuʼuntik.
5, 6. ¿Kʼu yuʼun skʼan tsotsuk xchʼunel koʼontontik kʼalal ta jnuptantik prevaetike? Albo junuk skʼelobil.
5 Skʼan tsots xchʼunel koʼontontik xtok kʼalal chkichʼtik kontrainel, kʼalal tsots chij-ipaj o kʼalal oy kʼusi chchibajesutike. Yikʼaluk van ta slikebale chkaltik ti chkuch kuʼuntike, pe mi jalij li jvokoltike, skʼan me mas tsots xchʼunel koʼontontik sventa xkuch kuʼuntik xchiʼuk sventa jechuk-o xijmuyubaj xijtun ta stojolal Jeovae (Rom. 12:12; 1 Ped. 1:6, 7).
6 Kʼalal ta jnuptantik vokolile, xuʼ van ta jnoptik ti muʼyuk xa onoʼox chakʼbutik tal jun achʼ balumil li Jeovae. Kʼalal jech ta jnoptike, ¿mi yuʼun van kʼunibem li xchʼunel koʼontontike? Xuʼ van muʼyuk. Kalbetik junuk skʼelobil. Li ta yorail siktike muʼyuk van ta jnoptik ti muʼyuk xa chtal li yorail kʼepelaltike, yuʼun jnaʼojtik ti ta onoʼox xtale. Jaʼ jech kʼalal chibajemutike, xuʼ van ta jnoptik ti muʼyuk xa chtal li achʼ balumile. Pe mi tsots li xchʼunel koʼontontike, jnaʼojtik ti ta onoʼox kʼot ta pasel li kʼusi yaloj Diose (Sal. 94:3, 14, 15; Ebr. 6:17-19). Taje tskoltautik sventa jaʼuk mas tsots skʼoplal xkiltik li yichʼel ta mukʼ Jeovae.
7. ¿Kʼusi skʼan mu xlik jnoptik?
7 Sventa jcholtik mantale skʼan tsotsuk xchʼunel koʼontontik xtok. Yuʼun oy krixchanoetik muʼyuk xchʼunojik ti chakʼbutik achʼ balumil li Diose (Mat. 24:14; Esek. 33:32). Mu me jechuk xlik jnoptik ek. Sventa mu jechuk xkʼot ta pasele, skʼan jechuk-o jtsatsubtas li xchʼunel koʼontontike. Jkʼeltik batel oxtosuk kʼusi xuʼ skoltautik.
JNOPBETIK SKʼOPLAL LI POJELALE
8, 9. ¿Kʼuxi tstsatsubtas xchʼunel koʼontontik kʼalal ta jnopbetik skʼoplal li pojelale?
8 Jtos ti kʼu yelan ta jtsatsubtas li xchʼunel koʼontontike jaʼo kʼalal ta jnopbetik skʼoplal li pojelale. Yuʼun jaʼ chakʼbutik ta ilel ti chkʼot onoʼox ta pasel li kʼusi yalojbutik li Jeovae. Tsots skʼoplal ti jchʼakbetik lek yorail sventa jnopbetik skʼoplal li pojelale xchiʼuk ti kʼusi tijbat-o yoʼonton Jeova sventa xakʼe. Mi jech ta jpastike, mas to me jpʼel ta koʼontontik ti ta onoʼox xakʼbutik jun achʼ balumil li Jeovae xchiʼuk ti xuʼ xijkuxi sbatel osile. ¿Kʼu yuʼun ti jech chkaltike?
9 Jnopbetik skʼoplal li pojelal laj yakʼ Jeovae. Lokʼ ta yoʼonton la stakʼ tal li jun noʼox Xnichʼon ti lek tajek xil sba xchiʼuke sventa xtal kuxiuk li ta balumile. Kʼalal ay ta balumil li Jesuse, laj yil svokol, ep kʼusitik la snuptan xchiʼuk toj echʼ xa noʼox chopol ti kʼu yelan chame. Jamal xvinaj ti toyol tajek la stojutik li Jeovae. Akʼo mi lek tajek yoʼonton li Jeovae, muʼyuk laj yakʼ chamuk li Xnichʼon xchiʼuk ti xil tajek svokol sventa jkʼupintik noʼox uni jlikel li jkuxlejaltike (Juan 3:16; 1 Ped. 1:18, 19). Ta skoj ti toyol la stojutik li Jeovae, jaʼ sventa xuʼ xijkuxi sbatel osil ta jun achʼ balumil.
JNOPBETIK SKʼOPLAL LI SJUʼEL JEOVAE
10. Jech kʼuchaʼal chal Efesios 3:20, ¿kʼusi xuʼ spas li Jeovae?
10 Yan kʼuxi xuʼ jtsatsubtas xchʼunel koʼontontike, jaʼo kʼalal ta jnopbetik skʼoplal li sjuʼel Jeovae. Yuʼun xuʼ yuʼun spasel skotol li kʼusi yalojbutike. Ta sat krixchanoetike, mu xuʼ xijkuxi sbatel osil. Li Jeovae oy kʼusitik yalojbutik ti mu xkʼot ta pasel yileluke. Pe teuk ta joltik ti skotol xuʼ yuʼune (Job 42:2; Mar. 10:27). Jaʼ yuʼun, mu labaluk sba xkiltik kʼalal oy kʼusi chalbutik li Jeovae (kʼelo Efesios 3:20).
11. Albo skʼoplal junuk kʼusi labal sba laj yal Jeova (kʼelo li rekuadro «Kʼot ta pasel li kʼusi yaloj Jeovae»).
11 Kalbetik skʼoplal junantik kʼusi laj yalbe Jeova li yajtuneltak ta voʼne ti mu xkʼot ta pasel yileluke. Laj yalbe Abraan xchiʼuk Sara ti chil jun skeremik akʼo mi oy xa sjabilalik (Jen. 17:15-17). Jech xtok, laj yalbe ti jaʼ chichʼik li yosilal Kanaan li snitilulaltake. Pe ta epal jabiletik li snitilulal Abraan ti jaʼ li j-israeletike, laj yichʼik mosoinel ta Ejipto. Jaʼ yuʼun, laj van snopik ti muʼyuk chkʼot ta pasel li kʼusi laj yal Jeovae. Kʼalal echʼ epal jabiletike, li Jeovae laj yalbe Elisabet ti chil jun skereme akʼo mi oy xa sjabilal. Laj yalbe Maria xtok ti chil jun skerem akʼo mi tojol tseb. Taje jaʼ te kʼot ta pasel li kʼusi yaloj xa onoʼox Jeova ta nichimaltik Edene (Jen. 3:15).
12. Li Josue 23:14 xchiʼuk Isaias 55:10, 11, ¿kʼuxi chakʼ kiltik li sjuʼel Jeovae?
12 Te me chkiltik ti tsots sjuʼel Jeova kʼalal ta jnopbetik skʼoplal li kʼusitik yaloje xchiʼuk ti kʼu yelan kʼotem ta pasel yuʼune. Taje, tskoltautik sventa jpʼeluk ta koʼontontik ti ta onoʼox xakʼbutik jun achʼ balumile (kʼelo Josue 23:14; Isaias 55:10, 11). Vaʼun, xuʼ me jkoltatik-o yantik sventa xaʼibeik smelolal ti ta onoʼox xkʼot ta pasel li achʼ balumile. Xi xa onoʼox yaloj Jeova ta sventa li achʼ vinajel xchiʼuk achʼ balumile: «Tukʼ xchiʼuk melel li kʼusitik laj yichʼ alele» (Apok. 21:1, 5).
JPASTIK LI KʼUSITIK TSNOPAJESUTIK TA STOJOLAL JEOVAE
TSOBAJELETIK
Li oxtos liʼe, ¿kʼuxi tskoltautik sventa jtsatsubtas xchʼunel koʼontontik? (Kʼelo parafo 13).
13. ¿Kʼuxi stsatsubtas xchʼunel koʼontontik li tsobajeletike?
13 Yan kʼuxi xuʼ stsatsub li xchʼunel koʼontontike, jaʼo kʼalal jaʼ ta jpastik li kʼusitik tsnopajesutik ta stojolal Jeovae. Kalbetik skʼoplal ti kʼu to yelan tskoltautik tajek li tsobajeletike. Li Annab ti jeltos kʼu yelan tunem tal ta tsʼakal orae, xi chale: «Li tsobajeletike xkoʼolaj kʼuchaʼal jun ankla ti tsots-o yuʼun li xchʼunel koʼontone. Manchuk mi mu toj masuk lek xtojob li buchʼu tsjelubtas mantale, oy onoʼox kʼusi chakʼ jchan xchiʼuk tstsatsubtas xchʼunel koʼonton». Li ta tsobajeletik xtoke chkaʼitik sloʼil ermanoetik ti tstsatsubtas xchʼunel koʼontontike (Rom. 1:11, 12; 10:17).
CHOLMANTAL
Li oxtos liʼe, ¿kʼuxi tskoltautik sventa jtsatsubtas xchʼunel koʼontontik? (Kʼelo parafo 14).
14. ¿Kʼuxi stsatsubtas xchʼunel koʼontontik li cholmantale?
14 Tstsatsubtas xchʼunel koʼontontik xtok kʼalal ta jcholtik mantale (Ebr. 10:23). Xi chal Barbara ti leʼ xa van ta 70 jabil chtun tal ta stojolal Jeovae: «Jech-o tstsatsubtas xchʼunel koʼonton li cholmantale. Kakʼoj venta ti kʼalal mas chkalbe skʼoplal li Jeova xchiʼuk li kʼusitik kʼupil sba tspas ta jelavele, mas to tstsatsub li xchʼunel koʼontone».
TA JCHAN JVUNTIK
Li oxtos liʼe, ¿kʼuxi tskoltautik sventa jtsatsubtas xchʼunel koʼontontik? (Kʼelo parafo 15).
15. ¿Kʼuxi tstsatsubtas xchʼunel koʼontontik kʼalal ta jchan jvun jtuktike? (Kʼelo xtok li lokʼoletike).
15 Yan kʼusi xuʼ stsatsubtas xchʼunel koʼontontike, jaʼ ti ta jchan jvun jtuktike. Li Susane ep chkoltaat-o ti xchʼakojbe lek yorail ti kʼu yelan chchanunaje. Xi chale: «Ta jujun domingoe ta jchapan li jrevista Li Jkʼel-osil ta toyol ti chichʼ chanel ta yan xemanae. Li ta lunes xchiʼuk martese jaʼ ta jchapan jba sventa li yantik tsobajeletike. Li yantik kʼakʼaletike jchʼakojbe yorail sventa jchanbe lek skʼoplal li Vivliae». Ta skoj taje, li Susane mas to tsatsubem li xchʼunel yoʼontone. Li Irene ti jal xa te chtun li ta smeʼ nail abtelale chal ti tsatsubem-o xchʼunel yoʼonton kʼalal tskʼelbe skʼoplal li albil kʼopetik ta Vivliae, xi chale: «Labal sba chkil ti jech tajek chkʼot ta pasel li albil kʼopetik yaloj Jeovae».c
«PERSA ONOʼOX CHKʼOT TA PASEL»
16. ¿Kʼuxi jnaʼojtik ti chtun kuʼuntik li kʼusi albat Abakuke? (Ebreos 10:36, 37).
16 Junantik yajtuneltak Jeovae jal xa tajek smalaojik ti xlaj skʼoplal li choplejale. Junantike tsnopik ti leʼ xa onoʼox slajel jechuke. Li Jeovae xaʼibe smelolal li kʼusi tsnop yajtuneltake, jaʼ yuʼun xi laj yalbe li j-alkʼop Abakuke: «Li kʼusi cha-akʼbat avile jaʼ to chkʼot ta pasel ti kʼusi ora albile, anil chkʼot ta pasel, maʼuk jutbil kʼop. Akʼo mi chjalij, malao me. Yuʼun persa onoʼox chkʼot ta pasel. ¡Ta yorail noʼox chvul!» (Abak. 2:3). ¿Mi mu jechuk ti tspat koʼontontik li kʼusi albat Abakuke? Li jtakbol Pabloe jaʼ jech laj yalbe li yajtsʼaklomtak Kristo ti smalaojik chtal li achʼ balumile (kʼelo Ebreos 10:36, 37). Akʼo mi chjalij to li kʼusi yaloj Jeovae, teuk ta joltik ti «persa onoʼox chkʼot ta pasel. ¡Ta yorail noʼox chvul!».
17. ¿Kʼuxi laj yakʼ ta xkuxlejal jun ermana li kʼusi albat yuʼun Jeova li Abakuke?
17 Ep yajtsʼaklomtak Kristo jal xa tajek smalaojik li kʼusi yaloj Jeovae. Kalbetik skʼoplal jun ermana ti Louise sbi ti lik tunuk ta stojolal Jeova ta 1939. Xi chale: «Laj kal ti muʼyuk xa ta jta 18 jabilale, yuʼun la jnop ti chtal xa noʼox li Armajedone. Pe muʼyuk kʼot ta pasel. Li kʼusi la skoltaun sventa jechuk-o jmalae jaʼ ti jchanbe sloʼilal li buchʼutik oy tajek smalael yuʼunik ti jaʼik li Noe, Abraan, Jose xchiʼuk yantik yajtuneltak Jeova ti smalaojik ti xkʼot ta pasel yuʼun Jeova li kʼusi yaloje. Ti jech la jmalae chkaʼi ti jaʼ tskoltaun sventa teuk ta jol ti jutuk xa skʼan xtal li achʼ balumile xchiʼuk jaʼ chkoltaatik-o li yantik eke». Taje jech van tsnopik epal yajtuneltak Jeova ti jal xa tunemik tale.
18. Li kʼusitik spasoj Jeovae, ¿kʼuxi tskoltautik sventa jchʼuntik ti chakʼbutik achʼ balumile?
18 Melel onoʼox ti mu to xkiltik li achʼ balumile. Pe oy kʼusitik ti xkiltike: oy kʼanaletik, teʼetik, chonbolometik xchiʼuk krixchanoetik. K’alal muʼyuk toʼox pasbil li balumile, chʼabal toʼox li kʼusitik taje. Pe li avie jnaʼojtik ti oy xae, yuʼun jaʼ la smeltsan li Jeovae (Jen. 1:1, 26, 27). Li Jeovae yalojbutik ti chakʼbutik jun achʼ balumile xchiʼuk chkʼot onoʼox ta pasel yuʼun. Vaʼun, chijkuxi sbatel osil xchiʼuk muʼyuk xa chij-ipaj. Mi kʼot ta pasel li kʼusi yalojbutik Jeovae, jaʼ to chkil ta jsatik li achʼ balumil jech kʼuchaʼal chkil ta jsatik li kʼanaletike, li teʼetike xchiʼuk li yan kʼusitike (Is. 65:17; Apok. 21:3, 4).
19. ¿Kʼuxi xuʼ jtsatsubtas li xchʼunel koʼontontike?
19 Yoʼ to mu xkʼot ta pasel li achʼ balumile, kakʼtik persa stsatsubtasel li xchʼunel koʼontontike. Jnopbetik skʼoplal li pojelal laj yakʼ Jesuse, li sjuʼel Jeovae xchiʼuk jaʼuk kakʼ ta koʼontontik spasel li kʼusitik tsnopajesutik ta stojolale. Mi jech ta jpastike, te me jkʼoplaltik xchiʼuk «li buchʼutik jaʼ chrextoinik li kʼusi albil xa onoʼox ta skoj ti oy xchʼunel yoʼontonik xchiʼuk ti oy smalael yuʼunike» (Ebr. 6:11, 12; Rom. 5:5).
KʼEJOJ 139 Jun kʼupil sba achʼ balumil
a Avie, ep buchʼutik mu xchʼunik ti chakʼ tal jun achʼ balumil li Diose. Chalik ti jaʼ noʼox jecheʼ loʼile. Pe jchʼunojtik lek ti chkʼot onoʼox ta pasel li kʼusi yaloj Jeovae. Jaʼ yuʼun, li ta xchanobil liʼe ta jkʼeltik kʼuxi xuʼ stsatsub-o batel li xchʼunel koʼontontike.
b Jelbil li jlom biiletike.
c Li ta Índice de las publicaciones Watch Tower ti bu chal: «Profecía», xuʼ te xata yan albil kʼopetik ta Vivlia. Jech kʼuchaʼal li mantal ti xi sbie: «Li kʼusi chal Jeovae ta onoʼox xkʼot ta pasel ta melel» ti lokʼ li ta revista Li Jkʼel osil ta toyol ta 1 yuʼun enero ta 2008.