« Jmojuk oyoxuk ta skoj li chʼul espiritue»

LI JTAKBOL Pabloe xi laj yalbe batel li yajtsʼaklomtak Kristo ta Efesoe: «Tsʼikbo me abaik ta jujuntal ta skoj ti akʼanoj abaike, junuk me avoʼontonik ta jujuntal, akʼbeik me yipal ta sjunul avoʼontonik sventa jmojuk oyoxuk ta skoj li chʼul espiritue» (Efes. 4:2, 3).

Li Pabloe laj yal ti jaʼ ta skoj chʼul espiritu ti jmoj tsobolutike, jaʼ xkaltik, ti jaʼ tskoltautik li xchʼul espiritu Diose. Pe li Pablo xtoke laj yal ti skʼan xkakʼtik persa sventa jechuk-o jmoj tsobolutike. ¿Buchʼutik skʼan jech spasik? Li yajtsʼaklomutik Kristoe skʼan xkakʼtik persa ta jujuntal sventa jmojuk oyutik ta «skoj li chʼul espiritue».

Nopo noʼox avaʼi ti oy buchʼu la skʼelanbot jkotuk achʼ karroe. ¿Buchʼu van oy ta sba skʼelel? Voʼot xa oy ta aba. Jaʼ yuʼun, mi sok avuʼun ta skoj ti muʼyuk chakʼele, mu stakʼ xavakʼbe smulin li buchʼu la skʼelanbote.

Li Dios eke yakʼoj jun jmotontik: jaʼ ti jmoj tsobolutik xchiʼuk li kermanotaktike. Pe skʼan xkakʼtik persa ta jujuntal sventa mu jchʼak jbatike. Jaʼ yuʼun, mi mu lekuk xkil jbatik xchiʼuk junuk ermano o ermanae, xiuk jnopbetik skʼoplale: «¿Mi yakal chkakʼ persa sventa jechuk-o jmoj tsobolunkutik ta skoj li chʼul espiritue xchiʼuk mi yakal xa ta jchapan li jkʼopkutike?».

«AKʼBEIK ME YIPAL TA SJUNUL AVOʼONTONIK SVENTA JMOJUK OYOXUK»

Jech kʼuchaʼal laj xa kiltike, li Pabloe laj yal ti skʼan xkakʼtik persa sventa jmojuk tsobol oyutik ta skoj li chʼul espiritue. Mas to skʼan jech jpastik mi oy kʼusi chopol la spasbutik o laj yalbutik junuk ermano ta tsobobbaile. Skʼan xkakʼtik persa ti mu jchʼak jbatike. Pe ¿mi persa van skʼan xbat jchiʼintik ta loʼil li buchʼu oy kʼusi chopol la spasbutik o laj yalbutike? Mu persauk. Lek ti xiuk jnopbetik skʼoplale: «Mi la jtikʼ ta koʼonton li kʼusi kʼot ta pasele, ¿mi jaʼ chchapaj-o li jkʼopkutike o mi mas to tstsatsaj-o?». Bateltike, mas lek ti jchʼay ta joltike o ti xkakʼtik pertone (Prov. 19:11; Mar. 11:25).

Lokʼoletik ti chakʼ ta ilel jun ermano ti muʼyuk tstikʼ ta yoʼonton li kʼusi chopol ch-albate. 1. Tsʼijil chkom kʼalal jaʼo chvochʼe ta utel yuʼun jun ermanoe. 2. Tsnopbe skʼoplal li kʼusi albat yuʼun li ermanoe. 3. Tskʼel Vivlia xchiʼuk tsnopbe skʼoplal. — «Mi la jtikʼ ta koʼonton li kʼusi kʼot ta pasele, ¿mi jaʼ chchapaj-o li jkʼopkutike o mi mas to tstsatsaj-o?».

Xi tojobtasvan li Pabloe: «Tsʼikbo me abaik ta jujuntal ta skoj ti akʼanoj abaike» (Efes. 4:2). Ta sventa li tekstoe, xi jelubtasbil ta jlik livroe: «Jchʼamtik ti kʼu yelan stalelal yantike» (Carta a los Efesios, la stsʼiba Mariano Ávila Arteaga). Taje jaʼ skʼan xal ti skʼan teuk ta joltik ti koʼol jpasmulilutik xchiʼuk li kermanotaktike. Melel onoʼox ti jkotoltik chkakʼtik persa ti jlaptik li achʼ talelale (Efes. 4:23, 24). Pe muʼyuk onoʼox buchʼu ti lek xa tajek stalelale (Rom. 3:23). Mi te ta joltik taje, jaʼ tskoltautik sventa jtsʼikbe jbatik ta jujuntal xchiʼuk ti xkakʼbe jbatik pertone, vaʼun jmoj oyutik «ta skoj li chʼul espiritue».

Jujukoj kʼalal ta jchapan jkʼoptik akʼo mi ta koʼontontik noʼox ta jchapantik, jaʼ xkaltik, ti muʼyuk ta jtsaktik ta venta li kʼusi chopol laj kichʼtik pasbele, jaʼ tskoltautik sventa jmojuk oyutik. Li ta griego kʼop kʼalal «jmojuk oyoxuk» xi li ta Efesios 4:3, xi chichʼ jelubtasel li ta Kolosenses 2:19: Li «xchʼuxuviltake». Li jchʼuxuviltike lek tsotsik xchiʼuk jaʼ tsakajtik-o li jbakiltike. Jaʼ noʼox jech ek, li jun oʼontonal xchiʼuk ti kʼu yelan jkʼanoj li kermanotaktike jaʼ tskoltautik sventa jtsʼikbe jbatik kʼalal chlik jkʼoptike.

Jaʼ yuʼun, mi oy kʼusi chopol tspasbutik junuk ermano, mi tsaʼ joltik o mi chkap-o joltik ti kʼu yelan stalelale, kakʼtik ta ilel xkʼuxul koʼontontik, maʼuk jkʼelbetik li spaltaile (Kol. 3:12). Teuk ta joltik ti jpasmulilutik jkotoltike, jaʼ yuʼun oy onoʼox buchʼu chopol kʼusi kalojbetik o jpasojbetik ek. Mi te ta joltik taje, jaʼ tskoltautik sventa xkakʼtik persa ti jmojuk oyutik «ta skoj li chʼul espiritue».