¿Kʼuxi xuʼ xatoj ta vokol li pojelale?

1, 2. ¿Kʼusi tstij koʼontontik spasel mi la jnopbetik skʼoplal li pojelale, xchiʼuk kʼu yuʼun? (2 Korintios 5:​14, 15; kʼelo xtok li lokʼole).

NOPO noʼox avaʼi ti oy buchʼu ay skoltaot lokʼel kʼalal te netʼel lakom ta sjinemal jpʼej mukʼta nae. ¿Mi mu tauk van xatojbe tajek ta vokol li buchʼu ay skoltaot lokʼele? Maʼuk noʼox van atuk ti jech laj avichʼ koltaele, pe mu van xlaj atojbe-o ta vokol ti la skoltaot o ti la spojot lokʼele xchiʼuk muʼyuk chchʼay-o ta ajol li kʼusi la spas ta atojolale.

² Jech kʼuchaʼal la jchantik li ta xchanobil echʼe, laj kiltik ti skʼan oy buchʼu spojutik lokʼel li ta mulil jkuchojtike. Li Jeovae la spojutik lokʼel kʼalal laj yakʼ ta matanal li Xnichʼone. Li pojelale 1) xuʼ xchʼay jmultik, 2) xuʼ xijpas ta tukʼil krixchano ta jelavel xchiʼuk 3) xuʼ lek xkil jbatik yan velta xchiʼuk li Diose. Ta skoj li pojelale, xuʼ xijkuxi sbatel osil li ta achʼ balumil chakʼ Jeovae. Li Jesuse skʼanojutik xa onoʼox tajek kʼalal muʼyuk toʼox talem ta balumile, pe mas to laj yakʼ ta ilel ti skʼanojutik kʼalal laj yakʼ xkuxlejale (Prov. 8:​30, 31). Li jtakbol Pabloe xi laj yale: «Jaʼ tsujunkutik li kʼanelal yuʼun Kristoe» (kʼelo 2 Korintios 5:​14, 15). ¿Kʼusi skʼan xal taje? Jaʼ ti skʼan jnopbetik skʼoplal li kʼanelal laj yakʼ ta ilel Jesuse. Mi jech la jpastike, jaʼ tstij koʼontontik sventa jtojtik ta vokol li pojelale xchiʼuk muʼyuk chchʼay ta joltik li kʼusi la spas ta jtojolaltike.

3. ¿Kʼu yuʼun jelajtik ti kʼu yelan ta jtojtik ta vokol li pojelale?

³ ¿Kʼuxi chavakʼ ta ilel ti chatoj ta vokol li pojelale? Yikʼaluk van jelel ti kʼu yelan chatoj ta vokol kʼuchaʼal li yantike. Kalbetik junuk skʼelobil. Jnoptik noʼox ti oy oxvoʼ krixchanoetik ti oy bu koʼol tskʼan chkʼotike, pe jelajtik ti bu oyike. Jaʼ yuʼun, jelajtik li be tstamik batele. Jaʼ noʼox jech ek, ta skoj ti jelajtik kʼu yelan oyutik ta mantale, jelajtik ti kʼu yelan ta jtojtik ta vokol li pojelale. Li ta xchanobil liʼe, ta jkʼelbetik batel skʼoplal oxtsop krixchanoetik ti jelajtik be tstamik batel sventa stojik ta vokol li pojelale: 1) li buchʼutik jaʼ to chichʼik estudioe, 2) li buchʼutik yichʼojik xa voʼe xchiʼuk 3) li buchʼutik namajemik ta stojolal Jeovae.

LI BUCHʼUTIK JAʼ TO CHICHʼIK ESTUDIOE

4. Li Jeovae, ¿kʼuxi ti chchajbe ta kʼelel yoʼonton li buchʼutik chichʼik estudioe?

⁴ ¿Mi yakal chavichʼ estudio? Taje chakʼ ta ilel ti oy ta yoʼonton Jeova ti xavamigoine xchiʼuk ti yakal tskoltaot sventa xanopaj ta stojolale (Juan 6:44; Ech. 13:48). Li Vivliae chal ti «chchaj ta kʼelel» koʼontontik li Jeovae. Taje jaʼ skʼan xal ti chakʼ venta ti yakal chavakʼ avipal sventa xavojtikine xchiʼuk xmuyubaj avuʼun kʼalal chajel akuxlejal ta skoj ti chachʼunbe li smantaltake (Prov. 17:3; 27:11). Ta skoj li pojelale, xuʼ xkʼot ta alekil amigo li Jeovae (Rom. 5:​10, 11). ¿Mi mu jechuk ti skʼan epuk sbalil xavil taje?

5. Li buchʼutik chichʼik estudioe, ¿kʼuxi xuʼ stsakik ta venta li tojobtasel ta Filipenses 3:16?

⁵ ¿Kʼuxi xuʼ xavakʼ ta ilel ti chatoj ta vokol li pojelale? Jtose jaʼ ti xatsak ta venta li tojobtasel laj yalbe batel jfilipoetik li jtakbol Pabloe: «Ti bu xa kʼalal chʼiemutike jaʼuk me jech lek xchapet jpastik batel li kʼusi jtamojtik xa batele» (Filip. 3:16). ¿Kʼusi skʼan xal taje? Jaʼ ti jechuk-o xachʼi ta mantal jech kʼuchaʼal yakal chapase, mu kʼusi xavakʼ smakot sventa teuk-o xaxanav li ta «sbelel kuxlejale» (Mat. 7:14; Luk. 9:62).

6. ¿Kʼusi xuʼ spasik li buchʼutik chichʼik estudio mi vokol chaʼiik xchʼamel junuk chanubtasel ta Vivliae? (Deuteronomio 30:​11-14; kʼelo xtok li lokʼole).

⁶ ¿Mi vokol chavaʼi xchʼamel junuk chanubtasel ta Vivlia ti jaʼ to la achane? Sabo skʼoplal xchiʼuk kʼanbo vokol Jeova ti skoltaot ta yaʼibel lek smelolale (Sal. 86:11). Mi jech-o vokol chavaʼi ta xchʼamele, xuʼ jaʼ to xakʼelbe skʼoplal ta tsʼakal, pe mu me xavikta aba ta xchanel li Vivliae. Jech xtok, mi oy kʼusi vokol chavaʼi yiktael ti spʼajoj li Jeovae, ¿kʼusi van xuʼ skoltaot? Jaʼ ti teuk ta ajol ti snaʼoj Jeova ti jpasmulilutike xchiʼuk muʼyuk onoʼox tskʼanbutik li kʼusi mu spas kuʼuntike. ¡Xuʼ avuʼun xchʼunbel li smantaltake! (kʼelo Deuteronomio 30:​11-14). Jamal yaloj ti tskoltaote (Is. 41:​10, 13; 1 Kor. 10:13). Jaʼ yuʼun, mu me xalubtsaj. Mu me teuk xanopnun-o xchiʼuk li kʼusi vokol chavaʼi yiktaele, jaʼuk xanopbe skʼoplal li kʼusitik lekik spasoj ta atojolal li Jeovae, jech kʼuchaʼal ti laj yakʼ li pojelale. Kʼalal mas to chakʼan li Jeovae, te chavakʼ venta ti «mu toj tsotsuk ta chʼunbel li smantaltake» (1 Juan 5:3).a

7. Li kerem tsebetike, ¿kʼusi xuʼ snopbeik skʼoplal mi jaʼ stestigotak Jeova li stot smeʼike?

⁷ ¿Mi stestigotak Jeova li atot ameʼe xchiʼuk mi yakal chchanubtasoxuk tal ta mantal? Mi jaʼ jeche, yakal to me chavichʼ a-estudio ek. Li totil meʼiletike tsots skʼoplal ti jaʼuk mas xakʼ ta yoʼontonik xchanubtasel li yalab xnichʼnabike. Kerem tseb, teuk ta ajol ti xi chalbot li Vivliae: «Nopajanik ta stojolal Dios, jech chnopaj tal ta atojolalik ek» (Sant. 4:8; 1 Kron. 28:9). Mi voʼot baʼyel chanopaj ta stojolal Jeovae, ta me xnopaj tal ta atojolal ek. Li Jeovae chakʼ sat ta atojolal, pe maʼuk ta skoj ti jaʼ stestigotak Jeova li avutsʼ avalale, yuʼun jaʼ ta skoj ti tskʼan chamigoinot ta melele. ¿Kʼusi la spas Jeova sventa lekuk tajek xavil aba xchiʼuke? Jaʼ ti laj yakʼ li pojelale, jaʼ yuʼun skʼan me epuk sbalil xavil li kʼusi la spas ta atojolale (Rom. 5:​1, 2). Kʼalal skʼan toʼox sta yorail li Konmemorasione, nopbo skʼoplal kʼuxi chatabe sbalil ti cham li Jesuse. Mi jech la apase, jaʼ tstij avoʼonton sventa oyuk kʼusi xata ta mantal. Vaʼun, jaʼ jech chavakʼbe yil Jeova ti chatojbe ta vokol ti laj yakʼ Xnichʼon sventa spojote.b

LI BUCHʼUTIK YICHʼOJIK XA VOʼE

8. ¿Kʼuxi yakʼojik ta ilel li buchʼutik yichʼojik voʼ ti ep sbalil chilik li pojelale?

⁸ Mi avichʼoj xa voʼe, ep xa ta tos kʼu yelan avakʼoj ta ilel ti ep sbalil chavil li pojelale. Jech kʼuchaʼal liʼe, oy kʼusitik la apas sventa xanopaj ta stojolal Jeova xchiʼuk sventa xachʼunbe li smantaltake. Jech xtok, laj achʼun li kʼusi laj yal Jesus ti skʼan xachol mantal xchiʼuk ti xapas ta jchankʼop li krixchanoetike. Laj avakʼbe akuxlejal li Jeovae xchiʼuk laj avichʼ voʼ. Xuʼ van laj avichʼ kontrainel ta skoj ti chatun ta stojolal Diose (2 Tim. 3:12). Ti tsʼikem talel avuʼune xchiʼuk ti oy xchʼunel avoʼontone jaʼ jech chavakʼ ta ilel ti akʼanoj li Jeovae xchiʼuk ti chatoj ta vokol li pojelale (Ebr. 12:​2, 3).

9. ¿Kʼu yuʼun skʼan xkichʼ jpʼijiltik li buchʼutik kichʼojtik xa voʼe?

⁹ Pe skʼan me xkichʼ jpʼijiltik li buchʼutik kichʼojtik xa voʼe. ¿Kʼu yuʼun? Yuʼun xuʼ van ta kʼunkʼun muʼyuk xa sbalil chkiltik li pojelale. Kalbetik skʼoplal li kʼusi kʼot ta stojolal li yajtsʼaklomtak Kristo ta Efesoe. Kʼupil kʼoptaatik yuʼun Jesus ti kuchem tal yuʼunike, akʼo mi jech, xi to albatike: «Oy kʼusi chopol chkil ta atojolal, yuʼun muʼyuk xa kʼanvanemot jech kʼuchaʼal ta slikebale» (Apok. 2:​3, 4). Taje chakʼ ta ilel ti xuʼ van ta kʼunkʼun xjel ti kʼu yelan chichʼ ta mukʼ Jeova li jun yajtsʼaklom Kristoe, ti maʼuk xa ta sjunul yoʼontone. Yikʼaluk van tspas orasion, chbat ta tsobajeletik xchiʼuk chbat ta cholmantal, pe jaʼ xa noʼox jech tspas ta skoj ti jech nopem xaʼie, maʼuk xa ta skoj ti skʼanoj li Jeovae. ¿Kʼusi xuʼ jpastik mi laj kiltik ti muʼyuk xa jkʼanojtik Jeova jech kʼuchaʼal ta slikebale?

10. ¿Kʼuxi xuʼ jchʼuntik li tojobtasel ta 1 Timoteo 4:13 xchiʼuk 15?

¹⁰ Li jtakbol Pabloe laj yalbe Timoteo ti snopbe skʼoplal ti kʼu yelan chichʼ ta mukʼ li Jeovae xchiʼuk ti xakʼ lek ta yoʼontone (kʼelo 1 Timoteo 4:​13, 15). ¿Kʼuxi xuʼ jchʼuntik ek li tojobtasel taje? Jnopbetik skʼoplal kʼuxi xuʼ masuk to lek xkichʼtik ta mukʼ li Jeovae xchiʼuk ti jechuk-o ta sjunul koʼonton jpastike (Rom. 12:11; kʼelo li nota de estudio ta español «Que el espíritu los llene de fervor»). Jech kʼuchaʼal liʼe, xuʼ mas to lek jtsʼet chikintatik li tsobajeletike xchiʼuk ti jchapan jbatik leke. Jech xtok, sventa masuk to jtabetik sbalil kʼalal chijchanunaj jtuktike, jkʼeltik lek ti bu xuʼ xijchanunaje xchiʼuk ti mu kʼusi xchʼay koʼontontik sventa jnopbetik skʼoplale. Mi jech la jpastike, mas to ta jtojbetik ta vokol Jeova li kʼusi spasoj ta jtojolaltike, jech kʼuchaʼal ti laj yakʼ li pojelale, taje xkoʼolaj ta kʼokʼ ti ta jchuchbetik lek skʼakʼale. Jech xtok, kʼalal junchib xa ox xemana skʼan li Konmemorasione, lek ti jnopbetik skʼoplal li kʼusitik jkʼupinojtik talel ti jaʼutik stestigo Jeovae. Taje jaʼ tskoltautik sventa masuk to ep sbalil xkiltik li pojelal ti jaʼ tsnopajesutik ta stojolal Jeovae.

11, 12. Mi oy xa kʼuk sjalil ti muʼyuk xa ta jkʼupintik spasbel yabtel Jeovae, ¿mi jaʼ van skʼan xal ti muʼyuk xa yakal chakʼbutik xchʼul espiritue? (Kʼelo xtok li lokʼole).

¹¹ Mu me xijchibaj mi laj kakʼtik venta ti oy xa kʼuk sjalil ti muʼyuk xa ta jkʼupintik ti kʼu yelan chkichʼtik ta mukʼ Jeova kʼuchaʼal ta slikebale. Mu jnoptik xtok ti muʼyuk xa yakal chakʼbutik xchʼul espiritu li Jeovae. Teuk ta joltik kʼu yelan laj yaʼi sba li jtakbol Pablo kʼalal la spasbe yabtel Jeovae, xi laj yale: «Akʼo mi maʼuk ta sjunul koʼonton ta jpas, oy onoʼox kʼusi kʼubanbilun» (1 Kor. 9:17). ¿Kʼusi la skʼan laj yal?

¹² Bateltike, li Pabloe muʼyuk xa oy ta yoʼonton chchol mantal ta skoj ti oy kʼusi vokol chaʼi stsalele. Pe akʼo mi jech laj yaʼi sba, jpʼel ta yoʼonton ti jech-o chchol mantale. Jechuk jpastik ek, kakʼ kipaltik sventa jpastik li kʼusitik leke akʼo mi muʼyuk xa ta koʼontontik spasel. Jkʼanbetik koltael Jeova ti oyuk ta koʼontontik spasbel li yabtele xchiʼuk ti xuʼuk kuʼuntik «spasel li kʼusitik lek chile» (Filip. 2:13). Jechuk-o me jpastik li kʼusitik ta mantale. Vaʼun, jaʼ tskoltautik sventa jkʼantik yan velta Jeova jech kʼuchaʼal ta slikebale xchiʼuk ti ta sjunuluk koʼontontik jpasbetik yabtel yan veltae.

13. ¿Kʼuxi xuʼ jkʼeltik mi lek oy li xchʼunel koʼontontike?

¹³ Xi chal 2 Korintios 13:5: «Kʼelo-o me abaik mi lek oy li xchʼunel avoʼontonike, kʼelo-o me abaik ti buchʼuoxuk ta melele». Sventa jchʼuntik li tojobtasel taje, lek ti xiuk jakʼbe jbatik bakʼintike: «¿Mi jaʼ baʼyel kakʼoj ta jkuxlejal li Ajvalilal yuʼun Diose? ¿Mi chkakʼ ta ilel ti jpʼajoj li kʼusitik chopol kʼalal ta jtʼuj li kʼusi ta jchʼay-o koʼontone? ¿Mi ta jkolta jba sventa oyuk jun oʼontonal xchiʼuk ti jmojuk tsobolunkutik xchiʼuk li kermanotake?» (Sal. 97:10; Mat. 6:33; Efes. 4:​2, 3). Kʼalal skʼan toʼox li Konmemorasione xchiʼuk kʼalal echʼem xa oxe, lek ti jnopbetik skʼoplal taje. Kʼalal ta jnopbetik skʼoplal li kʼusitik spasoj ta jtojolaltik li Jeova xchiʼuk Jesuse, jaʼ me tstij koʼontontik sventa jtojtik ta vokol xchiʼuk ti xkakʼtik ta ilel ti kuxulutik xa ta stojolal Kristoe, ti maʼuk xa ta jventa jtuktike.c

LI BUCHʼUTIK NAMAJEMIK TA STOJOLAL JEOVAE

14. ¿Kʼu yuʼun namajemik ta stojolal Jeova junantik yajtsʼaklomtak Kristo?

¹⁴ Junantik yajtsʼaklomtak Kristoe namajemik ta stojolal Jeova akʼo mi oy xa ox jayibuk u o jayibuk jabil ti tukʼ tunemik ta stojolale. ¿Kʼu yuʼun? Yikʼaluk van jaʼ ta skoj ti tsvul tajek yoʼontonik «ta sventa li kuxlejale» (Luk. 21:34). Junantik xtoke laj van smak-o yokik ta skoj li kʼusi laj yal o la spas junuk ermanoe (Sant. 3:2). Yantik xtoke jaʼ van ta skoj ti tsots la spas smulike, vaʼun chkʼexavik ta skʼanel koltael. Mu ventauk li kʼusi la anuptane, ¿kʼusi xuʼ xapas mi namajemot ta stojolal Jeovae? ¿Kʼusi tstij avoʼonton spasel ti laj yakʼ pojelal li Jeovae?

15. ¿Kʼu yelan chil Jeova li buchʼutik namajemik ta stojolale? (Esekiel 34:​11, 12, 16).

¹⁵ Nopbo skʼoplal kʼu yelan chil Jeova li buchʼutik namajemik ta stojolale. Muʼyuk xchʼayoj ta yoʼonton, yuʼun xkoʼolaj chil ta chʼayemal chij ti yakal tsaʼe. Jech xtok, tsmakʼlin xchiʼuk tskolta sventa sut talel ta stojolal (kʼelo Esekiel 34:​11, 12, 16). ¿Mi jech van yakal tspas ta atojolal ek? ¡Jech! Mi yakal chachan li mantal liʼe, jaʼ skʼan xal ti te to ta avoʼonton li Jeovae xchiʼuk ti akʼanoj toe. Teuk ta ajol ti kʼalal laj yikʼot tal ta steklumal li Jeovae, jaʼ ta skoj ti oy kʼusi lek laj yil ta atojolale. Jaʼ jech tspas li avi eke, oy-o kʼusi lek chil ta atojolal, jaʼ yuʼun oy ta yoʼonton ti xasut tal ta stojolale.

16. ¿Kʼusi xuʼ spas li buchʼutik namajemik sventa sutik tal ta stojolal Jeovae? (Kʼelo xtok li lokʼole).

¹⁶ Li foyeto Sutan ta stojolal Jeova jamal chal ti jaʼ stuk Jeova chikʼot sutel ta stojolale. Jaʼ tskoltaot sventa xatsal li vul oʼontone, chpoxta li syayijemal avoʼontone xchiʼuk ti lekuk noʼox ajol avoʼontone. Kʼalal mas xa ox lek chavaʼi abae, jaʼ tskoltaot sventa jmoj xlik tunan yan velta ta stojolal Jeova xchiʼuk li avermanotake. Jech xtok, teuk ta ajol ti oy ta yoʼonton tskoltaoxuk li moletik ta tsobobbaile. Li stukike xkoʼolajik «kʼuchaʼal nakʼobbail kʼalal oy ikʼe, jun nakʼobbail kʼalal oy tsatsal ikʼaloʼe» (Is. 32:2). Nopbo skʼoplal kʼusitik xuʼ xapas sventa xachapan akʼop xchiʼuk li Jeovae (Is. 1:18; 1 Ped. 2:25). Jech kʼuchaʼal liʼe, xuʼ xabat jkojuk ta tsobajel, xuʼ xachiʼin ta loʼil junuk mol ta tsobobbail sventa xavalbe ti chakʼan chasut ta stojolal Jeovae. Vaʼun, li stuke yikʼaluk van skʼel buchʼu xuʼ xakʼbot chanubtasel ta Vivlia kʼuk sjalil. Jpʼeluk ta avoʼonton ti chakʼbot bendision Jeova ti chavakʼ avipal ti chatoj ta vokol li pojelale.

¿KʼUSI ANOPOJ CHAPAS?

17, 18. ¿Kʼusi xuʼ jpastik kʼalal junchib xa ox kʼakʼal skʼan li Konmemorasione?

¹⁷ Xi laj yal Jesus ta sventa li kʼusi la spas Diose: «Laj yakʼ li jun noʼox Xnichʼon sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta-o xkuxlejal sbatel osil» (Juan 3:16). Li pojelale jaʼ li kʼusi tstunes Jeova sventa spojutik lokʼel ta yok skʼob li mulil xchiʼuk lajelale. Jaʼ yuʼun, skʼan me mu xchʼay ta joltik taje (Rom. 3:​23, 24; 2 Kor. 6:1). Kʼalal junchib xa ox kʼakʼal skʼan li Konmemorasione, lek ti jnopbetik skʼoplal kʼuxi laj yakʼik ta ilel Jeova xchiʼuk Jesus ti toj echʼ xa noʼox skʼanojutike. Li kʼanelal taje jaʼ tstij koʼontontik sventa jtojtik ta vokol.

¹⁸ ¿Kʼusi tstij avoʼonton spasel mi chatoj ta vokol li pojelale? Yikʼaluk van mu xkoʼolaj kʼu yelan chatoj ta vokol jech kʼuchaʼal tspas li yantike. Pe xuʼ jpʼel ta avoʼonton ti chakʼbot bendision Jeova mi chavakʼ avipal jech kʼuchaʼal tspas li yan yajtuneltake, ti maʼuk xa ta sventa stuk kuxulike, ti jaʼ xa kuxulik «ta stojolal li buchʼu cham ta stojolalike xchiʼuk ti laj yichʼ chaʼkuxesele» (2 Kor. 5:15).