¿Kʼu yuʼun skʼan xkichʼtik pojel?

1, 2. ¿Kʼu yuʼun ta jkʼantik ti oyuk buchʼu spojutike? (Romanos 7:​22-24; kʼelo xtok li lokʼole).

JNOPTIK noʼox ti chlom jpʼej mukʼta nae xchiʼuk ti oy buchʼu te netʼel chkome. Kuxul to, pe te latsʼal xchiʼuk jaʼ xa noʼox te x-avet tskʼan koltael xchiʼuk te smalaoj ti oyuk buchʼu xkʼot koltavanuk o pojatuke.

² Taje jaʼ jech chkil jvokoltik ta jujuntal ek. ¿Kʼu yuʼun ti jech chkaltike? Kʼalal la stoy sba ta stojolal Jeova li Adane, kʼot ta jpasmulil. Ta skoj ti jaʼ jnitilulaltik li Adane, jkotoltik jpasmulilutik. Xkoʼolaj ti te snetʼojutik li mulil jkuchojtike xchiʼuk ta jkʼantik ti oyuk buchʼu spojutik lokʼele. Li ta karta la stakbe batel jromaetik li jtakbol Pabloe, laj yal ti kʼu yelan chkaʼi jbatik yuʼun li mulil jkuchojtike (kʼelo Romanos 7:​22-24). Te la skʼan vokol ti oyuk buchʼu xkoltaat lokʼel li ta sbekʼtal ti «chcham xae». Solel chukul chaʼi sba ta skoj ti xkuchojbe smul li Adane xchiʼuk snaʼoj ti ta onoʼox xcham ta skoj li mulile (Rom. 6:23). Jaʼ jech chkil jvokoltik ek: jkotoltik ta jkʼantik ti oyuk buchʼu spojutike.

3. ¿Kʼusitik sbalil ta jtabetik li pojelale?

³ Kʼalal laj xa ox yal Pablo «¿buchʼu van xuʼ skoltaun lokʼel li ta jbekʼtal ti chcham xae?», laj yakʼ venta ti oy to spatobil yoʼontone, xi laj yal ta sjunul yoʼontone: «¡Koliyal Dios ta stojolal Jesukristo ti jaʼ Kajvaltike!» (Rom. 7:25). Li Pabloe jaʼ yakal chalbe skʼoplal li pojelala laj yakʼ Jesuse. Li pojelal taje 1) xuʼ xchʼay jmultik, 2) xuʼ xpoxtautik xchiʼuk xuʼ xakʼbutik jun oʼontonal xchiʼuk 3) xuʼ lek xkil jbatik yan velta xchiʼuk li Diose. Mi la jkʼelbetik batel skʼoplal ta jujutose, mas to chlik jkʼantik li «Dios ti jaʼ chakʼ spatobil [oʼontonale]» xchiʼuk mas to ta jtojbetik ta vokol Jesus ti «jaʼ ta stojolal ti kolemutik ta skoj pojelale» (Rom. 15:13; Kol. 1:14).

XUʼ XCHʼAY JMULTIK

4, 5. ¿Kʼu yuʼun skʼan xkichʼtik pojel? (Eklesiastes 7:20).

⁴ Sventa jtatik pertone, skʼan xkichʼtik pojel. Jkotoltik ta jsaʼ jmultik, xuʼ van ta jkʼopojeltik o li kʼusi ta jpastike (kʼelo Eklesiastes 7:20). Junantik mulile tsotsik tajek. Jech kʼuchaʼal liʼe, li ta Smantal Moisese, chal ti skʼan xichʼ milel li buchʼu tsmukul sati xchiʼil ta nupunele o li buchʼu chmilvane (Lev. 20:10; Num. 35:​30, 31). Junantik mulile mu toj tsotsuk, pe mulil onoʼox. Xi laj yal li Davide: «Ta jchabi jba lek sventa mu jsaʼ jmul ta kokʼ» (Sal. 39:1). Kʼuchaʼal chkakʼtik ventae, xuʼ jsaʼ jmultik akʼo mi ta ketik noʼox (Sant. 3:2).

⁵ Jnopbetik skʼoplal li kʼusitik lokʼem ta ketik xchiʼuk li kʼusitik la jpastik toʼox ta voʼnee. ¿Mi oy van kʼusi laj kaltik ti laj to jchaʼnaʼtik ta tsʼakale? ¿Mi oy kʼusi la jpastik ti xlaj to jnaʼtike? Ti melel xkaltike, jkotoltik oy onoʼox jech jpasojtik. Xi chal li Vivliae: «Mi chkaltik ti muʼyuk jmultike, yakal ta jloʼla jba jtuktik xchiʼuk muʼyuk te ta jtojolaltik li kʼusi melele» (1 Juan 1:8).

6, 7. ¿Kʼusi la spas Jeova sventa xuʼuk xakʼutik ta pertone? (Kʼelo xtok li lokʼole).

⁶ Ta skoj ti tukʼ tajek li Jeovae, oy kʼusi la spas sventa xuʼuk xakʼutik ta pertone. ¿Kʼusi la spas un? Jaʼ ti la stak talel Jesus sventa spojutike (Efes. 1:7). Ta skoj ti snaʼ x-akʼvan ta perton li Jeovae, ¿mi jaʼ van skʼan xal ti mu xa sventauk-o mi ta jsaʼ jmultike? Moʼoj, yuʼun chopol tajek chil (Is. 59:2).

⁷ Li Smantal Moisese chal ti skʼan xakʼik chikʼbil matanal li j-israeletik sventa staik pertone (Lev. 4:​27-31; 17:11). Li chikʼbil matanal laj yakʼike jaʼ noʼox yuni senyail li kʼusi tspas ta tsʼakal li Jesuse: ti chakʼ ta matanal li xkuxlejale xchiʼuk ti ta jtatik-o epal bendisione. Kʼalal cham li Jesuse, oy xa ox srasonal yuʼun Jeova sventa xchʼay li jmultike. Kʼalal la stakbe batel karta jkorintoetik li Pabloe, te la stsʼiba batel ti toj ep sbalil li matanal laj yakʼ Jesuse. Kʼalal laj xa ox yal junantik li kʼusitik chopol la spasik ta voʼnee, xi laj yalanbee: «Sakubtasbiloxuk xa, chʼultajesbiloxuk xa xchiʼuk tukʼ xa albil akʼoplalik ta sventa sbi li Kajvaltik Jesukristoe xchiʼuk ta sventa li xchʼul espiritu Jdiostike» (1 Kor. 6:​9-11).

8. ¿Kʼusi xuʼ jnopbetik skʼoplal kʼalal mu to chijbat ta Konmemorasione?

⁸ Kʼalal mu to chijbat ta Konmemorasion li avi jabile, jchʼakbetik yorail sventa jnoptik kʼuxi ta jtabetik sbalil ti chakʼutik ta perton li Jeovae. Jech kʼuchaʼal liʼe, ta skoj li pojelale, mu persauk ti te to xijnopnun ta skoj li kʼusitik la jpastik ta voʼne mi jsutesoj xa koʼontontike. Mi mu jchʼuntik ti yakʼojutik xa ta pertone, xuʼ van xi chtal ta joltike: «Akʼo mi ch-akʼvan ta perton li Jeovae, li voʼone oy-o jmul chkaʼi jba». Pe teuk ta joltik ti jaʼ oy ta sba Jeova sventa xakʼutik ta pertone xchiʼuk jaʼ yakʼojbe sbain Xnichʼon sventa xchapanutike. Maʼuk yakʼoj jbaintik yalel buchʼu sta-o xichʼ kʼuxubinel. Xi chal li Vivliae: «Mi te chijxanav ta sakil osile, [ . . . ] tsakubtas skotol jmultik li xchʼichʼel Xnichʼon ti jaʼ li Jesuse» (1 Juan 1:​6, 7). Skʼan jchʼuntik taje, jech kʼuchaʼal jchʼunojtik li yan chanubtaseletik ta Vivliae. Ta skoj li pojelale, oy xa lek srasonal yuʼun Jeova sventa xkʼuxubinutik. Jech xtok, li Vivliae jamal chal ti chapal sventa xchʼay jmultike (Sal. 86:5).

XUʼ XPOXTAUTIK XCHIʼUK XUʼ XAKʼBUTIK JUN OʼONTONAL

9. ¿Kʼusi smakojbe skʼoplal li mulile? (Salmo 51:5 xchiʼuk li tsʼib ta yok vune).

⁹ Kʼalal mulil xi li ta Vivliae, maʼuk noʼox chalbe skʼoplal li kʼusi chopol ta jpastike, yuʼun te skʼoplal xtok li mulil jkuchojtik tal kʼalal lijnapʼ ta xchʼut jmeʼtike (kʼelo Salmo 51:5 xchiʼuk li tsʼib ta yok vune). Li mulil jkuchojtike maʼuk noʼox tstij koʼontontik sventa jpastik li kʼusi chopole, yuʼun chij-ipaj yuʼun, chijmalub xchiʼuk chijcham. Li neneʼetik eke ch-ipajik xchiʼuk chchamik akʼo mi chʼabal kʼusi chopol spasojik. Jech xtok, ta skoj li mulile, chil svokol li krixchanoetike xchiʼuk chchamik akʼo mi lek o chopol kʼusi tspasik. Ta skoj ti jaʼ jnitilulaltik li Adane, chkil jvokoltik jkotoltik.

10. ¿Kʼu yelan laj yaʼi sbaik Adan xchiʼuk Eva kʼalal la saʼ smulike?

¹⁰ Jnopbetik skʼoplal kʼu yelan laj yaʼi sbaik li Adan xchiʼuk Eva kʼalal la saʼ smulike xchiʼuk ti kʼotik ta jpasmulile. Kʼalal muʼyuk la xchʼunbeik smantal Dios ti te tsʼibabil ta yoʼontonike, ta anil noʼox chopol tajek laj yaʼi sbaik (Rom. 2:15). Laj yakʼik venta ti oy kʼusi jel ta yoʼontonik ta skoj ti oy kʼusi muʼyuk lek la spasike. Jaʼ yuʼun, la saʼ kʼusi xpix-o sbekʼtalik xchiʼuk la snakʼ sbaik ta stojolal li Jpasvanej yuʼunik ta skoj ti la saʼ smulike (Jen. 3:​7, 8). Jaʼ to te la spasik preva kʼu yelan ti oy jmul chkaʼi jbatike, ti ta jvul koʼontontike, ti chijxiʼutike, ti oy kʼusi kʼux chkaʼitike xchiʼuk ti chijkʼexave. Taje jech-o laj yaʼi sbaik jaʼ to ti kʼuxi chamike (Jen. 3:​16-19).

11. ¿Kʼu yelan jkuxlejaltik ta skoj ti jpasmulilutike?

¹¹ Ta skoj ti jpasmulilutik jkotoltike, jaʼ jech tajek chkaʼi jbatik kʼuchaʼal li Adan xchiʼuk Evae. Ta skoj li mulile, chij-ipaj xchiʼuk muʼyuk jun koʼontontik. Akʼo mi chkakʼ kipaltik sventa xlekub li jkuxlejaltike, oy noʼox spajeb li kʼusi spas kuʼuntike. Jaʼ yuʼun, li Vivliae chal ti kʼalal la spas smulik li Adan xchiʼuk Evae, «muʼyuk stu kʼot li kʼusitik pasbile» (Rom. 8:20). ¿Kʼusi skʼan xal taje? Jaʼ ti oy xa noʼox spajeb li kʼusi spas yuʼun li krixchanoetike. Jech kʼuchaʼal liʼe, oy buchʼutik chakʼik persa sventa mu xichʼ sokesel li balumile, ti slajesbeik skʼoplal li choplejale, li povreale xchiʼuk li paskʼope. ¿Mi pasem talel yuʼunik? Mu toj masuk, yuʼun mu xchapaj yuʼunik skotol. Pe li pojelale chakʼ spatobil koʼontontik ta melel.

12. ¿Kʼusi spatobil koʼontontik chakʼ li pojelale?

¹² Li pojelale chakʼ spatobil koʼontontik, yuʼun tskoltautik lokʼel ta mosoil yuʼun li mulile xchiʼuk ta lajelal (Rom. 8:21). Jaʼ yuʼun, kʼalal te xa ox oyutik ta achʼ balumile xchiʼuk kʼalal tukʼil krixchanoutik xa oxe, muʼyuk xa kʼusi kʼux ip chkaʼitik, muʼyuk xa chij-ipaj ta jnopbentik xchiʼuk chlaj skʼoplal ti oy jmul chkaʼi jbatike, ti ta jvul koʼontontike, ti chijxiʼutike, ti oy kʼusi kʼux chkaʼitike xchiʼuk ti chijkʼexave. Jech xtok, kʼalal jaʼ xa ox tsventainutik li Jesukristo ti jaʼ li Bankilal J-akʼ-jun-oʼontonale xchiʼuk ti jaʼ la spojutike, xuʼ xa kuʼuntik xchabiel lek li balumile xchiʼuk jun xa noʼox koʼontontik (Is. 9:​6, 7).

13. ¿Kʼusi yan xuʼ jnopbetik skʼoplal kʼalal mu to chijbat ta Konmemorasione?

¹³ Jnopbetik skʼoplal kʼu yelan jkuxlejaltik kʼalal tukʼutik xa oxe. Kʼalal chijlik jujun sobe, lek tajek chkaʼi jbatik. Muʼyuk xa ta jvul koʼontontik mi chkiltik viʼnal, ti xij-ipajutike o ti xijchamutike, mi jaʼuk ta jvul koʼontontik ta stojolal li kutsʼ kalaltik eke. Mi jchʼunojtik «ta melel li spatobil koʼontontik» ti te oy ta kelovaltike, jun noʼox koʼontontik li avie, yuʼun «xkoʼolaj kʼuchaʼal s-anklail jkuxlejaltik li spatobil koʼontontike, yuʼun lek tukʼ xchiʼuk staoj lek yav» (Ebr. 6:​18, 19). Li s-anklail jkot varkoe jaʼ chkoltaat sventa mu xyukʼilaj tajek. Jaʼ noʼox jech ek, mi ta jnopbetik skʼoplal li spatobil koʼontontike, jaʼ tskoltautik sventa tsotsuk li xchʼunel koʼontontike xchiʼuk ti xkuch kuʼuntik kʼusiuk preva jnuptantike. Jchʼunojtik lek ti «ch-akʼbat smotonik [yuʼun Jeova] li buchʼutik ta sjunul yoʼonton tsaʼike» (Ebr. 11:6). Ta skoj li pojelale, xuʼ jun noʼox koʼontontik li avie xchiʼuk oy kʼusitik ta jkʼupintik ta jelavel.

XUʼ LEK XKIL JBATIK YAN VELTA XCHIʼUK LI DIOSE

14. Kʼalal la saʼ smulik li Adan xchiʼuk Evae, ¿kʼu xa yelan xkil jbatik xchiʼuk li Jeovae, xchiʼuk kʼu yuʼun?

¹⁴ Kʼalal la saʼ smulik li Adan xchiʼuk Evae, lijnamaj ta stojolal li Jeovae (Kol. 1:21). Li Vivliae chal ti kʼotik ta yajkontra Dios li krixchanoetike (Rom. 8:​7, 8). ¿Kʼu yuʼun? Yuʼun li Jeovae tukʼ xchiʼuk tukʼ tajek li smantaltake, jaʼ yuʼun spʼajoj tajek li mulile. Xi laj yal jun jtsʼibajom ta Vivliae: «Toj echʼ xa noʼox chʼul li sbekʼ asate, mu kʼelbaj chaʼi li kʼusi chopole, mu stsʼik avuʼun li kʼusi chopole» (Abak. 1:13). Jech kʼuchaʼal chkiltike, li mulile la snamajesutik ta stojolal li Diose. Muʼyuk buchʼu xuʼ lek xil sba xchiʼuk li Jeovae, yuʼun xkoʼolaj ti jin o sok li be ti jaʼ chikʼutik batel ta stojolale. Jaʼ yuʼun, skʼan xichʼ meltsanel li be sventa xuʼ xijnopaj yan velta ta stojolale. Li pojelale jaʼ la smeltsan li be taje.

15. ¿Kʼuxi koltavan li pojelal sventa lekuk xkil jbatik yan velta xchiʼuk li Diose?

¹⁵ Li Vivliae chal ti Jesuse «jaʼ kʼotem ta milbil matanal sventa jmultik yoʼ lek xkil jbatik xchiʼuk li Diose» (1 Juan 2:2). Pe ¿kʼuxi koltavan li pojelal sventa lekuk xil sbaik yan velta xchiʼuk Dios li krixchanoetike? Kʼalal cham li Jesuse, oy xa ox lek srasonal yuʼun Jeova sventa lekuk xkil jbatik yan velta xchiʼuke (Rom. 3:​23-26). Jech xtok, tukʼ xa laj yil li buchʼutik tukʼ laj yakʼ sbaik kʼalal muʼyuk toʼox chamem li Kristoe (Jen. 15:​1, 6). ¿Kʼu yuʼun? Yuʼun xchʼunoj lek Jeova ti ta onoʼox xpojvan li Xnichʼone (Is. 46:10). Kʼuchaʼal chkakʼtik ventae, li pojelale jaʼ la sjam li be sventa lekuk xil sbaik yan velta xchiʼuk Dios li krixchanoetike.

16. ¿Kʼusi to yan xuʼ jnopbetik skʼoplal kʼalal mu to chijbat ta Konmemorasione? (Kʼelo xtok li lokʼole).

¹⁶ Jnopbetik skʼoplal kʼusitik sbalil ta jtatik ti lek xa xkil jbatik xchiʼuk li Diose. Jech kʼuchaʼal chanubtasvan li Jesuse, xuʼ Tot xkutik li Jeovae (Mat. 6:9). Xuʼ van nopajtik noʼox chkaltik ti jaʼ kamigotik xtoke. Kʼalal chkaltik ti jaʼ «Jtotik» o kamigotik li Jeovae, skʼan ti bikʼituk xkakʼ jbatike xchiʼuk ti xkichʼtik ta mukʼe. ¿Kʼu yuʼun? Yuʼun maʼuk tukʼil krixchanoutik. Mi nopol chkaʼi jbatik ta stojolal Jeova xchiʼuk mi jaʼ kamigo chkiltike, maʼuk ta kipal jtuktik, yuʼun jaʼ ta skoj ti laj kichʼtik pojele. Li Jeovae la stunes Jesus sventa xchaʼta «yav ti kʼu yelan xil sbaik xchiʼuk Dios» skotol li yan kʼusitik «ta skoj ti la smal xchʼichʼel ta jtel teʼ sventa vokolile» (Kol. 1:​19, 20). Jaʼ yuʼun, xuʼ lek tajek xkil jbatik xchiʼuk Dios akʼo mi jpasmulilutik.

CHAKʼ TA ILEL TI OY XKʼUXUL YOʼONTON LI JEOVAE

17. Li pojelale, ¿kʼuxi chakʼ ta ilel ti kʼuxutik ta yoʼonton li Jeovae? (Efesios 2:​4, 5).

¹⁷ Li pojelale jamal chakʼ ta ilel ti kʼuxutik tajek ta yoʼonton li Jeovae, yuʼun laj yakʼ ti xijkuxi yan velta «kʼalal chamemutik toʼox ta skoj jpaltailtike» (kʼelo Efesios 2:​4, 5). «Li buchʼutik oy lek ta yoʼontonik stael li kuxlejal sbatel osile» x-avetik ta skʼanel koltael, yuʼun chakʼik venta ti netʼbilik yuʼun li mulil xkuchojike xchiʼuk tskʼanik ti xichʼik pojel lokʼele (Ech. 13:48). ¿Kʼusi tspas Jeova sventa spojan lokʼele? Jaʼ ti chakʼanbe snaʼ li lekil aʼyej sventa xuʼuk x-ojtikinate xchiʼuk ti xojtikinik li Xnichʼone (Juan 17:3). Li Satanase laj van snop ti laj xa spas kanal kʼalal la saʼ smulik li Adan xchiʼuk Evae, yuʼun tsmak ox ta be yaloj li kʼusi oy ta yoʼonton tspas Diose, pe bu chata, jaʼ noʼox la sloʼla sba stuk.

18. Kʼalal ta jnopbetik skʼoplal li pojelale, ¿kʼusi ti skʼan teuk ta joltike?

¹⁸ Maʼuk noʼox jnopbetik skʼoplal kʼuxi ta jtabetik sbalil ta jujuntal li pojelale, yuʼun oy to yan srasonal ti mas tsots skʼoplal ti kʼu yuʼun la spojutik li Jeovae. Maʼuk noʼox sventa jta jkoleltik, yuʼun jaʼ sventa stakʼbe sutel Satanas kʼalal chibal kʼoptaat ta nichimaltik Edene (Jen. 3:​1-5, 15). Ta skoj li pojelale, jaʼ jech chchʼultajes sbi li Jeovae xchiʼuk chakʼ ta ilel ti mu meleluk li kʼusitik laj yal Satanase. Jech xtok, li pojelale tskoltautik lokʼel ta yok skʼob li mulil xchiʼuk lajelale. Taje chakʼ ta ilel ti skʼanojutik tajek li Diose. Jech xtok, ta skoj li slekil yutsil yoʼontone, chakʼ ti akʼo jpakbetik skʼoplal li kʼusi jecheʼ yaloj Satanase akʼo mi jpasmulilutik (Prov. 27:11). Ta melel, ¡ep tajek sbalil chkiltik li pojelale! ¿Kʼuxi xuʼ xkakʼtik ta ilel ti ta jtojtik ta vokole? Jaʼ ta jkʼelbetik skʼoplal li ta yan xchanobile.