¿Kʼusi xuʼ jpastik kʼalal chopol chkaʼi jbatike?

1, 2. ¿Kʼu yelan laj yaʼi sba bateltik li Pabloe, xchiʼuk kʼu yuʼun oy jech chkaʼi jbatik ek? (Romanos 7:​21-24).

KʼALAL chalbeik skʼoplal Pabloe, ¿kʼusi chtal ta ajol? Xuʼ van chtal ta joltik ti jaʼ jun misionero ti tsots yoʼontone, ti xtojob lek ta chanubtasvaneje xchiʼuk ti la stsʼiba epal livroetik ta Vivliae. Ta melel, la spas skotol taje. Akʼo mi jech, jaʼ jun vinik ti la svul yoʼonton xtoke xchiʼuk laj yakʼ persa stsalel li kʼusitik chopol-o chaʼi sba bateltik jech kʼuchaʼal voʼotike.

² (Kʼelo Romanos 7:​21-24). K’alal la stsʼibabe batel karta jromaetik li Pabloe, laj yal ti kʼu yelan chaʼi sbae xchiʼuk oy van jech xkaʼi jbatik ek. Akʼo mi yakʼoj persa tukʼ chtun ta stojolal Jeova, vokol laj yaʼi spasel li kʼusi tskʼan yoʼonton Diose, yuʼun jaʼ oy ta stojolal li kʼusi chopole. Kʼalal chvul ta sjol li kʼusi chopol la spas ta voʼnee, oy smul laj yaʼi sba xchiʼuk chopol laj yaʼi sba ta skoj ti oy kʼusi vokol chaʼi stsalele.

3. ¿Kʼusi ta jkʼeltik li ta xchanobil liʼe? (Kʼelo xtok «Liʼe tsots skʼoplal»).

³ Akʼo mi oy kʼusitik chopol-o laj yaʼi sbaa li Pabloe, muʼyuk laj yakʼ ti jaʼuk stsalat-oe. Li ta xchanobil liʼe, ta jkʼeltik batel kʼu yuʼun oy bateltik toj abol sba laj yaʼi li jtakbole, kʼusi koltaat sventa mu jechuk-o xaʼi sbae xchiʼuk kʼusi xuʼ jpastik mi oy jech xkaʼi jbatik eke.

¿KʼUCHAʼAL TI CHOPOL LAJ YAʼI SBA LI PABLOE?

4. ¿Kʼu yuʼun chopol laj yaʼi sba li Pabloe?

⁴ Li kʼusitik laj toʼox spas ta voʼnee. Kʼalal maʼuk toʼox yajtsʼaklom Kristo li Pablo o Saulo kʼuchaʼal toʼox ojtikinbile, oy kʼusitik la spas ti laj to xchaʼnaʼ ta tsʼakale. Lek laj yil kʼalal laj yichʼ milel li Estebane (Ech. 7:58; 8:1). Jech xtok, tsots la skontrain epal yajtsʼaklomtak Kristo (Ech. 8:3; 26:​9-11).

5. ¿Kʼu yelan laj yaʼi sba Pablo kʼalal vul ta sjol li kʼusitik toʼox la spase?

⁵ Kʼalal och xa ox ta yajtsʼaklom Kristo li jtakbol Pabloe, bateltike chopol laj yaʼi sba ta skoj li kʼusitik chopol la spas ta voʼnee. Kʼalal ch-echʼ batel li jabiletike, xuʼ van mas to chopol laj yaʼi sba. Jech kʼuchaʼal liʼe, li ta sjabilal 55 kʼalal la stsʼibabe batel li yajtsʼaklomtak Kristo ta Korinto ta baʼyel skartae, xi laj yale: «Mu jta-o ti jtakbol chkichʼ albele, yuʼun la jkontrainbe li stsobobbail Diose» (1 Kor. 15:9). Kʼalal echʼ xa ox voʼob jabil xtoke, xi laj yal kʼalal la stsʼibabe batel skarta li j-efesoetike: «Voʼon ti mas bikʼit jkʼoplal ta stojolal skotol li buchʼutik [chʼule]» (Efes. 3:8). Jech xtok, kʼalal la stsʼibabe batel li Timoteoe, laj yal ti kʼalal maʼuk toʼox yajtsʼaklom Kristoe, chopol kʼoptavan, kontrainvan xchiʼuk muʼyuk smelol o xkʼexlal li kʼusitik la spase (1 Tim. 1:13). ¿Mi xnop xa noʼox kuʼuntik kʼu yelan laj yaʼi sba Pablo kʼalal chbat svulaʼan li tsobobbailetik xchiʼuk ti te chil junantik ermanoetik ti laj toʼox skontraine o ti te chilbe li yutsʼ yalale?

6. ¿Kʼusi yan la snuptan Pablo ti la svul-o yoʼontone? (Kʼelo xtok li tsʼib ta yok vune).

⁶ Chʼix ta sbekʼtal. Li Pabloe laj yal ti oy kʼusi kʼux tajek chaʼi ti la skoʼoltas ta jun chʼix ta sbekʼtale (2 Kor. 12:7). Muʼyuk laj yal mi jaʼ jtosuk chamel, mi vul oʼonton o yan kʼusi. Akʼo mi jech, li kʼusi laj yale chakʼ ta aʼiel ti toj echʼ xa noʼox akʼbat svokole.b

7. ¿K’u yelan chaʼi sba Pablo ta skoj li spaltailtake? (Romanos 7:​18, 19).

⁷ Li spaltailtake. Li Pabloe laj yakʼ persa stsalel li spaltailtake, pe chopol-o laj yaʼi sba ta skoj ti mu spas yuʼune (kʼelo Romanos 7:​18, 19). Akʼo mi jaʼ oy ta yoʼonton spasel li kʼusi leke, pe ta skoj ti jpasmulile jaʼ tspas li kʼusi chopole. Jaʼ yuʼun, laj yakʼ tajek persa tslekubtas li stalelale xchiʼuk laj yakʼ venta ti skʼan jech-o spase (1 Kor. 9:27). Chopol van tajek laj yaʼi sba jujukoj kʼalal oy kʼusi chal o tspas ti muʼyuk leke.

¿KʼUSI KOLTAAT PABLO SVENTA MU CHOPOLUK-O XAʼI SBAE?

8. ¿Kʼusitik la spas Pablo ti jaʼ koltaat sventa sjel stalelale?

⁸ Li ta skartatak Pabloe, te xvinaj ti la snopbe skʼoplal kʼuxi chkoltavan li xchʼul espiritu Diose, ti kʼuxi xuʼ xkoltaat stuk xchiʼuk yan yajtsʼaklomtak Kristo sventa stsal yuʼunik li kʼusitik chopole (Rom. 8:13; Gal. 5:​16, 17). Ep ta velta laj yalbe skʼoplal li kʼusitik chopol tskʼan koʼontontike xchiʼuk li kʼusitik mu stakʼ spasik li yajtsʼaklomtak Kristo sventa mu chopoluk xaʼi sba li Jeovae (Gal. 5:​19-21, 26). La snopbe skʼoplal kʼusi xuʼ spas ta sventa li spaltailtake, la saʼ beiltaseletik li ta Skʼop Diose xchiʼuk la skʼel kʼusi xuʼ spas sventa sjel stalelal. Ta melel, jnaʼojtik lek ti baʼyel laj yakʼ ta xkuxlejal li kʼusi chakʼ ta chanele.

9, 10. ¿Kʼusi koltaat-o Pablo kʼalal chopol chaʼi sbae? (Efesios 1:7; kʼelo xtok li lokʼole).

⁹ Akʼo mi chibaj bateltik li Pabloe, ¿kʼusi koltaat sventa jechuk-o xmuyubaje? Jtose, jaʼo kʼalal chaʼi li kʼusitik ch-albat yuʼun xchiʼiltak ta xanbal ta sventa li kʼusitik lek tspas li tsobobbailetike (2 Kor. 7:​6, 7). Xmuyubaj xtok ta skoj ti oy lek yamigotake (2 Tim. 1:4). Snaʼoj xtok ti lek ch-ilat yuʼun li Jeovae xchiʼuk ti jaʼ yamigoe (2 Tim. 1:3). Jech xtok, kʼalal jaʼo te chukul ta Romae, xi laj yalbe li yajtsʼaklomtak Kristoe: «Kuxetuk avoʼontonik skotol ora ta stojolal li Kajvaltike» (Filip. 4:4). Ti tsvuluk-o tajek yoʼontone, ¿mi jech to van laj yal? Kʼalal oy kʼusi chvul ta sjol Pablo ti chopol-o chaʼi sbae, tsjel ta anil li kʼusi tsnope jaʼ chlik snopbe skʼoplal li kʼusi xuʼ xmuyubaj-oe.

¹⁰ Yan ti kʼusi koltaat sventa mu xlajesat-o kʼalal chopol chaʼi sbae jaʼ ti la snopbe skʼoplal li pojelale, ti jaʼ jun matanal akʼbat yuʼun li Jeovae (Gal. 2:20; kʼelo Efesios 1:7). Jaʼ yuʼun, la spat yoʼonton ti ch-akʼat ta perton yuʼun li Jeovae xchiʼuk ti jech-o tspas koliyal li Jesuse (Rom. 7:​24, 25). Jech oxal, akʼo mi oy kʼusitik chopol la spas ta voʼne xchiʼuk oy spaltailtak, xmuyubaj noʼox tun ta stojolal li Jeovae (Ebr. 9:​12-14).

11. ¿Kʼu yelan tspat koʼontontik ti kʼu yelan laj yaʼi sba Pabloe?

¹¹ Xuʼ van oy jech chkaʼi jbatik kʼuchaʼal li Pabloe, ti oy kʼusi vokol chkaʼitik stsalel jujun kʼakʼale, xuʼ van jaʼ li kʼusi ta jnoptike, li kʼusi ta jpastike o li kʼusi chkaltike. Xuʼ van xi chkaltik eke: «¡Solel toj abol jba!». Jun ermana ti Elizac sbi ti mas ta 20 sjabilale, xi laj yale: «Tspat tajek koʼonton kʼalal ta jnop ta stojolal Pabloe. Tspat tajek koʼonton ti maʼuk jtuk jech chkaʼi jbae. Taje tsvulesbun ta jol ti te sat Jeova ta stojolal li yajtuneltak ti chil svokolike». Jkʼeltik batel kʼusi xuʼ jpastik sventa sakuk jol koʼontontik xchiʼuk xijmuyubajuk noʼox kʼuchaʼal Pablo akʼo mi oy chopol chkaʼi jbatik yuʼun bateltik.

¿KʼUSI XUʼ SKOLTAUTIK EK?

12. ¿Kʼuxi tskoltautik kʼalal muʼyuk chkiktatik spasel li kʼusitik tsnopajesutik ta stojolal Jeovae?

¹² Mu xkiktatik spasel li kʼusitik tsnopajesutik ta stojolal Jeovae. Kʼalal jech chkakʼtik persa spasele, tskoltautik sventa xijmuyubaj noʼox. Jnoptik ta sventa liʼe, kʼalal lek chijveʼ, nopajtik noʼox ta jpastik ejersisio xchiʼuk ta jkuxtik leke, jaʼ tskoltautik sventa lek noʼox chkaʼi jbatik. Jaʼ jech li ta mantal eke, kʼalal ta jchantik jujun kʼakʼal li Vivliae, chijbat ta cholmantal, ta jchapan jbatik sventa tsobajeletik xchiʼuk ti chkakʼ jloʼiltike. Taje jaʼ tskoltautik sventa junuk noʼox koʼontontik xchiʼuk mu x-och ta jnopbetik li kʼusitik chopol-o chkaʼi jbatik yuʼune (Rom. 12:​11, 12).

13, 14. ¿Kʼusi sbalil staojbeik li ermanoetik kʼalal jech-o tspasik li kʼusitik xuʼ xnopajesatik ta stojolal Jeovae?

¹³ Kalbetik skʼoplal li Juan ti 39 toʼox sjabilal kʼalal albat ti tsakbil ta kansere. Ta slikebale, toj kʼux laj yaʼi, xi laj yale: «¿Kʼuchaʼal jech li-ipaj ti keremun toe?». Jech xtok, oy jun yuni keremik ti oxib sjabilale. ¿Kʼusi koltaat sventa mu stsalat yuʼun ti kʼu yelan chaʼi sbae? Xi chale: «Akʼo mi kʼunibemun tajek, laj kakʼ persa ti mu xkiktakutik spasel li kʼusitik tsnopajesunkutik ta stojolal Jeovae. Akʼo mi vokol chkaʼikutik bateltik, jujun xemana chibatkutik ta tsobajel, chilokʼkutik ta cholmantal xchiʼuk ta jpaskutik li yichʼel ta mukʼ Dios ta kutsʼ kalalkutike». Xi to chal xtoke: «Ta slikebale, solel lilijem koʼonton laj kaʼi jba. Pe laj kakʼ venta ti jaʼ la stoyun likel li Jeovae, yuʼun laj yakʼbun kipal xchiʼuk laj yakʼbun ta ilel ti skʼanojune. Li Jeovae xuʼ skoltaot kʼuchaʼal la skoltaun eke. ¡Melel xkal!».

¹⁴ Li Eliza ti laj kalbetik skʼoplal ta parafo 11, xi to laj yale: «K’alal chibatilan ta tsobajel xchiʼuk ta jchan Jvivliae, mas to ta jchʼun ti chaʼibun j-orasion xchiʼuk skʼanojun li Jeovae, taje ximuyubaj-o yuʼun». Li Nolan ti jaʼ jkʼelvanej ta sirkuito ta Africae chal kʼusi koltaatik-o xchiʼuk li yajnil Dianee: «Akʼo mi chichibajkutik bakʼintik jech-o chkakʼkutik persa xchanel Jvivliakutik, spasel orasion, chibatkutik ta tsobajeletik xchiʼuk ta jcholkutik mantal, jaʼ jech tskoltaunkutik Jeova sventa ximuyubajkutik noʼox. Jech xtok, chkakʼkutik persa ti teuk ta jolkutik ti tskoltaunkutik xchiʼuk ti chakʼbunkutik sbendisione, mu jnaʼkutik lek kʼu yelan tspas, pe ta onoʼox skoltaunkutik».

15. ¿Kʼusi yan skʼan jpastik sventa stsal kuʼuntik kʼalal chopol chkaʼi jbatike? Albo junuk skʼelobil.

¹⁵ Sventa stsal kuʼuntik kʼalal chopol chkaʼi jbatike, xuʼ van oy kʼusi yan skʼan jpastik ti mu baluk noʼox li kʼusi laj xa kaltik tale. Kalbetik junuk skʼelobil, jnoptik noʼox ti ip apate, mu baluk noʼox van ti xavalbe junuk avutsʼ avalal ti xpichʼot sventa xakole. Yuʼun xuʼ van skʼan xasabe mas skʼoplal o ti xabat ta doktore. Jaʼ jech ek, sventa mu stsalutik li kʼusi chopol chkaʼi jbatik yuʼune skʼan jsabetik skʼoplal ta Vivlia, ta jvuntik o jakʼbetik junuk ermano ti yij ta mantale. Jkʼeltik to batel yan kʼusi xuʼ jpastik.

16. ¿Kʼusi xuʼ skoltautik sventa jnaʼtik kʼu yuʼun ti oy kʼusi chopol ta jnoptike? (Salmo 139:​1-4, 23, 24).

¹⁶ Jkʼanbetik Jeova ti skoltautik ta snaʼel li kʼusi chtun kuʼuntike. Li ajvalil Davide snaʼoj ti x-ojtikinat lek yuʼun li Jeovae, jaʼ yuʼun la skʼanbe koltael sventa x-akʼbat snaʼ kʼusi ti tsvul-o yoʼontone (kʼelo Salmo 139:​1-4, 23, 24). Li voʼotik eke xuʼ jkʼanbetik Jeova ti skoltautik ta snaʼel ti kʼu yuʼun oy kʼusi chopol ta jnoptike xchiʼuk ti kʼuxi xuʼ jtsaltike. Lek xtok ti xiuk jakʼbe jbatike: «¿Kʼusi ti ta jvul-o koʼonton yuʼun ta melele? ¿Mi oy kʼusi ti jaʼ chopol chkaʼi-o jba yuʼune? ¿Mi jaʼ te xinopnun chikom yuʼun o mi ta jel ta anil li kʼusi ta jnope?

17. ¿Kʼusitik xuʼ jchanbetik skʼoplal? (Kʼelo xtok li lokʼole).

¹⁷ Jaʼuk jchantik li kʼusi xuʼ skoltautike. Bateltike lek ti jchanbetik skʼoplal junantik stalelal li Jeovae. Jech kʼuchaʼal li jtakbol Pabloe koltaat tajek kʼalal la snopbe skʼoplal li pojelale xchiʼuk ti snaʼ x-akʼvan ta perton li Jeovae, xuʼ me jech jpastik ek. Li ta Saʼobil sventa xchanik mas li stestigotak Jeovae xchiʼuk li ta Índice de las publicaciones Watch Tower xuʼ jsabetik skʼoplal ta sventa li xkʼuxul yoʼonton Diose, ti snaʼ x-akʼvan ta pertone xchiʼuk li tukʼil kʼanelal yuʼune. Jtsʼibatik ta vun li mantaletik ti xuʼ skoltautike, teuk xkakʼtik ti bu xuʼ jtatik noʼox ta kʼelele xchiʼuk jchantik kʼalal chopol chkaʼi jbatike. Jech xtok, jkʼeltik kʼuxi xuʼ skoltautik sventa lekuk noʼox xkaʼi jbatike (Filip. 4:8).

18. ¿Kʼusi koltabilik-o li junantik ermanoetike?

¹⁸ Li Eliza ti laj kalbetik xa skʼoplale, chal ti jaʼ lik xchanbe skʼoplal li Jobe, xi chal kaʼitike: «Jaʼ jech tajek chkaʼi jba kʼuchaʼal Job ti ep tajek la snuptan prevaetike. Akʼo mi mu snaʼ lek ti kʼu yuʼun laj yil svokole xchiʼuk ti tsots tajek kʼusi la snuptane, jech-o la spat yoʼonton ta stojolal Jeova» (Job 42:​1-6). Li Diane ti laj kalbetik skʼoplal ta parafo 14, xi chale: «Koʼol ta jchankutik xchiʼuk jchiʼil li livro Acerquémonos a Jehová. Ximuyubajkutik tajek ti jaʼ tspatunkutik Jeova jech kʼuchaʼal jun jpatpʼine. Kʼalal chichibajkutik ta skoj li kʼusi muʼyuk lek chbat ta pasel kuʼunkutike, chkakʼkutik persa snopbel skʼoplal ti jaʼ chchanubtasunkutik Jeova xchiʼuk jaʼ tspatunkutik sventa masuk to xlekub jtalelalkutike. Taje mas to tsnopajesunkutik ta stojolal» (Is. 64:8).

JPʼELUK TA KOʼONTONTIK TI TSKOLTAUTIK LI JEOVAE

19. ¿Kʼu van yelan chkaʼi jbatik bateltik, xchiʼuk kʼusi skʼan teuk ta joltik?

¹⁹ Akʼo mi chkakʼtik persa spasel li kʼusitik tsnopajesutik ta stojolal Jeova xchiʼuk ti jaʼ ta jchanilantik li kʼusi xuʼ skoltautike, oy to onoʼox junantik velta ti chijchibaje xchiʼuk ti abol jba chkaʼi jbatik jech kʼuchaʼal laj yaʼi sba li jtakbol Pabloe. Akʼo mi jech, xuʼ jchʼuntik ti jaʼ tskoltautik Jeova ta stsalel li kʼusi chopol-o chkaʼi jbatik yuʼune o li kʼusi chopol ta jnop ta jtojolaltike. Pe xuʼ jpʼel ta koʼontontik ti jaʼ junantik xa noʼox kʼakʼal ti muʼyuk lek chkaʼi jbatike, yuʼun jaʼ tskoltautik ti lek xkil jbatik xchiʼuk Jeovae xchiʼuk ti sak jol koʼontontik chkichʼtik ta mukʼe.

20. ¿Kʼusi skʼan xkakʼtik-o persa spasel?

²⁰ Jechuk-o xkakʼtik persa sventa mu chopol-o chkaʼi jbatik yuʼun li kʼusi toʼox la jpastik ta voʼnee, li kʼusi ta jnuptantike o ta skoj li jpaltailtike. Li Jeovae jaʼ tskoltautik sventa junuk noʼox koʼontontik (Sal. 143:10). Oy xa tajek ta koʼontontik ti xlaj skʼoplal li kʼusi chopol-o chkaʼi jbatik yuʼune. Li ta achʼ balumile, jun xa noʼox koʼontontik chijsakub jujun sob, yuʼun muʼyuk xa chtal ta jnopbentik li kʼusi ta jvul-o koʼontontike. Yuʼun li vaʼ kʼakʼale, ¡xijmuyubaj chijtun ta stojolal Jeova ti toj echʼ noʼox snaʼ xkʼanvane!