¿Kʼusi xuʼ xapas sventa teuk xa akʼeloj yilel li kʼusi chachane?

Li Vivliae yichʼoj epal loʼiletik ti oy kʼusi chakʼ jchantik ti toj tsotsik skʼoplale. Li kʼusi xuʼ skoltautik sventa xkaʼibetik smelolal xchiʼuk ti jtabetik sbalile jaʼ ti jnopbetik skʼoplal li kʼusi yakal ta jchantike. Kalbetik skʼoplal kʼusi xuʼ jpastik sventa teuk xa jkʼelojtik yilel li kʼusi ta jchantike.

• Tsotsuk xkaptatik. Kʼalal jech ta jpastike, tskoltautik sventa teuk xa jkʼelojtik yilel li kʼusi yakal chkʼot ta pasele. Mi yakal chavapta xchiʼuk avutsʼ avalale, xuʼ xavaʼanbe yajval li buchʼutik yakal chalbe skʼoplal li ta loʼil sventa masuk to xakʼupinike.

• Jnopbetik skʼoplal kʼusi yakal chkʼot ta pasel. Kakʼtik persa ti jechuk xa xkaʼi jbatik xchiʼuk jnoptik jech kʼuchaʼal chaʼi sbaik li buchʼutik ta jchanbetik skʼoplale. Xuʼ xi jnopbetik skʼoplale: «¿Kʼu yuʼun ti jech tspas o jech chal liʼe? ¿Kʼusi van la jpas ti voʼonukun jech yakal ta jnuptane? ¿Kʼu van yelan laj kaʼi jba jechuke?».

• Jpastik divujoetik. Akʼo mi mu jnaʼtik lek spasel divujo, pe mi la jpasbetik sdivujoal li kʼusi yakal ta jchantike, tskoltautik sventa jnopbetik skʼoplal xchiʼuk ti mu xchʼay ta anil ta joltike.