LI KʼUSITIK TSJAKʼ KEREM TSEBETIKE

¿Kʼuxi xuʼ skoltaun li Vivliae? Yoxvokʼal: Tabo lek sbalil kʼalal chachan Vivliae

Kʼalal chajam li Vivliae, naka letraetik chavil, pe ¡mu me xachibaj! Nopo ti xkoʼolaj ta epal jeltos veʼlil li Vivliae. Mu xlaj avuʼun skotol, pe xuʼ xalajes ti kʼu yepal xanoj˗o yuʼune.

Mi chakʼan chatabe sbalil li kʼusi chachan ta Vivliae, jaʼ xkaltik, li veʼlil ta mantale, skʼan xavakʼ ta avoʼonton li kʼusi chachane. Li ta mantal liʼe jaʼ tskoltaot kʼuxi ta pasel.

Li ta mantal liʼe ta jkʼeltik batel:

¿Kʼu yuʼun skʼan xavakʼ ta avoʼonton kʼalal chachan Vivliae?

Kʼalal mas chavakʼ ta avoʼonton xchanel li Vivliae, mas to chatabe lek sbalil. Nopbo skʼoplal liʼe: mi junchib noʼox segundo chatikʼ ta kʼakʼal voʼ li jun sovre tee, jutuk noʼox chlokʼ smuil, pe mi jal chatikʼe, lek chlokʼ smuil.

Te xvinaj jun tasa ti chʼakbil ta oʼlole. Li ta j˗oʼlole xvinaj ti muʼyuk jal och ta kʼakʼaloʼ li tee, yuʼun muʼyuk skoloral. Yan li ta jot j˗oʼlole mas oy lek skoloral, yuʼun jal laj yichʼ tikʼel ta kʼakʼaloʼ li tee.

Jaʼtik jech xkoʼolaj kʼalal chachan Vivliae. Mu xachan ta anil, jaʼ lek chʼakbo yorail sventa xanopbe skʼoplal li kʼusi chachane. Vaʼun, jaʼ jech chkʼot ta ajol avoʼonton li kʼusi chachane. Jaʼ toʼox jech snaʼ spas li jtsʼibajom yuʼun Salmo 119. Xi chal ta sventa li smantal Diose: «Ta jnopbe skʼoplal skotol kʼakʼal» (Salmo 119:97).

Taje maʼuk skʼan xal ti te chotolot˗o sjunul kʼakʼal chachan Avivliae xchiʼuk ti chanopbe skʼoplale. Li kʼusi la spas li jtsʼibajom yuʼun salmoe jaʼ ti la xchʼakbe yorail sventa snopbe skʼoplal li kʼusi chal Skʼop Diose. Taje jaʼ koltaat˗o sventa lek kʼusi xkʼot ta nopel yuʼun (Salmo 119:98-100).

«Xi laj yalbun jun velta li jmeʼe: ‹Yichʼoj vukub kʼakʼal li jun xemanae, pe jaʼ mas chachʼakbe yorail li kʼusi chakʼupin spasele. ¿Mi mu skʼanuk xachʼakbe yorail ek li Jeovae?›» (Melanie).

Mi chatsak ta venta li beiltaseletik ta Vivliae, jaʼ tskoltaot sventa lekuk kʼusi xkʼot ta nopel avuʼun. Jech kʼuchaʼal liʼe, chatojob stʼujel avamigotak o xanaʼ kʼusi chapas kʼalal tstij avoʼonton spasel li kʼusi chopole.

¿Kʼusi stak’ xapas sventa xatabe lek sbalil kʼalal chachan Vivliae?

Oyuk lek yorail avuʼun. Xi chal jun chex tseb ti Julia sbie: «Akʼbo lek yorail ti chachan Avivliae, kak nopo li kʼusi chachane, bu chachan xchiʼuk kʼusi ora».

Jun chex tseb tstsʼiba ta kalendario ti bakʼin chchan Svivliae.

Kʼelo lek bu xuʼ xachanunaj. Xi chal jun chex tseb ti Gianna sbie: «Saʼo ti bu tsʼijil noʼoxe xchiʼuk albo avutsʼ avalal ti bakʼin chachan Avivlia sventa mu xchʼayik avoʼontone».

Mi nopem xavaʼi chachan ta atavleta o ta aselulare, akʼo ta modo avion o desactivar las notificaciones. Jech xtok, xuʼ xachan li Vivlia ti pasbil imprimire. Nabil lek ti jaʼ mas chavaʼibe smelolal mi ta vun chachane. Pe mi chachan ta selulare, xuʼ mas ep k’usi xchʼay avoʼonton.

«Jaʼ mas chchʼay koʼonton kʼalal ta selular ta jchane, yuʼun jujulikel chvul li notifikasionetike, chyal sbateria o muʼyuk lek li Internete... Kʼalal ta jkʼel ta vune, jaʼ noʼox ta jsaʼ ti bu oy lek luse» (Elena).

Baʼyel paso orasion. Albo Jeova ti akʼo skoltaot sventa xavaʼibe smelolal li kʼusi anopoj chachan ta Vivliae, ti xkom ta ajole xchiʼuk ti xatabe lek sbalile (Santiago 1:5).

Sventa xavakʼbe yil Jeova ti oy ta avoʼonton chapas li kʼusi laj avalbee, sabo skʼoplal li kʼusi yakal chachane. ¿Kʼuxi? Mi jaʼ chatunes li JW Library o chachan li Vivlia ta Internete, xuʼ xavakʼbe klik ta jujun versikulo sventa sabot talel mas yaʼyejal xchiʼuk sabot tal yan mantaletik ti jaʼ te snitojbe sba skʼoplale.

Nopbo skʼoplal. Jech kʼuchaʼal liʼe: «¿Kʼusi chakʼ jchan sventa Jeova? ¿Kʼusi stalelal Jeova ti xuʼ jchanbee?» (Efesios 5:1). «¿Kʼusi xuʼ jchan li ta loʼil liʼe? ¿Kʼuxi xuʼ xkakʼ ta jkuxlejal?» (Salmo 119:105). «¿Kʼuxi xuʼ jkolta˗o yantik li kʼusi la jchane?» (Romanos 1:11).

Xi xanopbe skʼoplal xtoke: «Li kʼusi laj xa jchane, ¿kʼuxi te tsakal skʼoplal li kʼusi chal ta sliklej Vivliae?». Taje toj tsots skʼoplal. ¿Kʼu yuʼun? Yuʼun li kʼusi chal ta Vivlia ta Jenesis kʼalal to ta Apokalipsise te snitojbe sba skʼoplal ti kʼu yelan chichʼ chʼultajesbel sbi Jeova li ta Ajvalilal yuʼune. Vaʼun, jaʼ jech chakʼ ta ilel ti jaʼ noʼox oy sderecho ch˗ajvalilaje xchiʼuk ti mas to lek ti kʼu yelan chventainvane.

Li kʼusi tsnopik yan kerem tsebetike

«Mi jaʼ chakʼupin xchanel li loʼiletike, chanbo skʼoplal li kʼusitik kʼotanuk ta pasele o li kʼusitik tabil ta jteklumetik chal ta Vivliae. Mi jaʼ lek chavaʼi xchanbel skʼoplal li krixchanoetik chal ta Vivliae, sabo mas skʼoplal. Jech kʼuchaʼal liʼe, xuʼ xachanbe skʼoplal li kʼusi kʼot ta xkuxlejal Davide. Li ta Vivliae te oy skotol li kʼusi chakʼan chachane. Jaʼ noʼox skʼan xanopbe skʼoplal li kʼusi tstij avoʼonton xchanele xchiʼuk mi oy ta avoʼonton chasabe skʼoplale» (Judah).

«Kʼalal ta jchan li Vivliae, ta jkʼel li buchʼutik lek stalelalike xchiʼuk li buchʼutik chopol stalelalike, vaʼun xi ta jnopbe skʼoplale: ‹¿Kʼusi kʼot ta xkuxlejal? ¿Kʼu toʼox yelan stalelal? ¿Kʼu yelan bat xkuxlejal?›. Xchiʼuk xi ta jnopbe skʼoplale: ‹¿Kʼusi chakʼ jchan taje?›» (Mackenzie).

«Chkakʼ persa yaʼibel smelolal li kʼusi chal li loʼiletik ta sliklej Vivliae. Jech kʼuchaʼal liʼe: ¿bakʼin laj yichʼ tsʼibael? ¿Buchʼu la stsʼiba? ¿Kʼu yuʼun laj yichʼ tsʼibael li livro ta Vivlia liʼe? Ep onoʼox kʼusi chakʼ jchantik li loʼiletike, pe kʼalal mas ta jsabe skʼoplale, te chkakʼ venta kʼu yelan laj yaʼi sbaik li krixchanoetik ta skoj li kʼusi la spasike» (Elle).

«Kʼalal ta jchan li Vivliae, ta jnopbe skʼoplal kʼuxi xuʼ jchapbe smelolal li jun krixchanoe, jech kʼuchaʼal liʼe, xi ta jnopbe skʼoplale: ‹¿Kʼusi xuʼ xkalbe sventa xaʼibe lek smelolale? ¿Kʼusi skʼelobil xuʼ xkalbe sventa xaʼibe smelolal li kʼusi mas tsots skʼoplale?›. Kʼalal ta jnopbe skʼoplal li stakʼobiltak taje, jaʼ tskoltaun sventa xkaʼibe lek smelolal. Kʼalal chijchanubtasvane, mas to ta jchantik» (Owen).