¿Mi tsjelik van kʼusi chal Vivlia ta skoj li kʼusi xchʼunojik li stestigotak Jeovae?
Mu jechuk, muʼyuk ta jelkutik, yuʼun kʼalal oy kʼusi ta jtakutik ta chanel ti muʼyuk koʼol tajek kʼuchaʼal chal Vivliae, jaʼ ta jel li kʼusi jchʼunojkutike.
Kʼalal skʼan toʼox xlokʼ li Vivlia Traducción del Nuevo Mundo de las Santas Escrituras ta 1950, ta xa onoʼox jchankutik kʼusi chal li Vivliae. Jaʼ noʼox mi oye, kʼusiukal Vivlia ta jtuneskutik, vaʼun jaʼ te lik talel li kʼusitik jchʼunojkutike. Jkʼeltik jlomuk kʼusitik xchʼunojik li stestigotak Jeova ti voʼne xa onoʼox jech xchʼunojike xchiʼuk akʼo venta atuk mi koʼol xchiʼuk li kʼusi chchanubtasvan ta melel li Vivliae.
Li kʼusi jchʼunojkutike: Li Diose maʼuk jun trinidad. Li ta jun mantal lokʼ ta revista Zionʼs Watch Tower (La Torre del Vigía de Sión) ta julio ta 1882 xi laj yale: «Li buchʼutik tskʼelik li jvunkutike snaʼojik ti akʼo mi jchʼunojkutik ta stojolal Jeova, ta stojolal Jesús xchiʼuk ta stojolal li Chʼul espiritue, mi jsetʼuk jchʼunojkutik ti jech chchanubtasvan Vivlia ti jaʼik oxib Diosetik ta jun noʼox jech kʼuchaʼal chalik junantik ti jun noʼox Dios oy ta yoxvoʼalike.
Li kʼusi chal Vivliae: «Ti Ajvalil Dios cuʼuntique, jun noʼox, muʼyuc yan» (Deuteronomio 6:4, Ch). «Pero li vuʼutique jnaʼtic lec ti jun noʼox Dios oye, jaʼ li Dios Totile, ti jaʼ la spas scotol cʼusitic oye, xchiʼuc ti jaʼ la spasutique» (1 Corintios 8:6.) Xi onoʼox laj yal stuk li Jesuse: «Yuʼun ti stuque xʼechʼ to jelavem scʼoplal, jaʼ mu sta ti vuʼune» (Juan 14:28, Ch).
Li kʼusi jchʼunojkutike: Muʼyuk kʼatinbak ti te chkil jvokoltik yuʼun sbatel osile. Li revista Zionʼs Watch Tower (La Torre del Vigía de Sión) ta junio ta 1882 xi jal yalbe skʼoplal li kʼusi chal Romanos 6:23: «Li stojol mulile jaʼ ti chijchamutique». Xi to chal xtok li revistae: «Lek jamal xchiʼuk kʼun ta aʼibeel smelolal kʼusi chal li tekstoe. Labal sba ta aʼiel ti akʼo mi oy junantik chalik ti xchʼunojik ti jaʼ skʼop Dios li Vivliae, mu jechuk chalik kʼuchʼal chal Vivlia yuʼun xchʼunojik chiʼuk chalik ti jech la chal Vivlia stojobil mulile jaʼ la ti chkil jvokoltik sbatel osile».
Li kʼusi chal Vivliae: «Li bochʼo ta saʼ smule jaʼ noʼox ta xcham» (Ezequiel 18:4, 20). Li kastigo chichʼik li buchʼutik tstoy sbaik ta stojolal Diose maʼuk ti te chil-o svokolik sbatel osile, moʼoj, li kastigo chichʼike jaʼ li «lajelal sbatel osile» (2 Tesalonicenses 1:9, TNM).
Li kʼusi jchʼunojkutike: jaʼ jun melel Ajvalilal li Ajvalilal yuʼun Diose, maʼuk ti ta koʼontontik noʼox oye. Li revista Zionʼs Watch Tower (La Torre del Vigía de Sión) ta diciembre ta 1881 xi laj yal ta sventa li Ajvalilal yuʼun Diose: Ti chvaʼi li Ajvalilal taje jaʼ skʼan xal ti chichʼik lokʼesel skotol li ajvaliletik liʼ ta Balumile».
Li kʼusi chal Vivliae: «Cʼalal jaʼo ochemic ta ajvalilal li ajvaliletic leʼe, li Dios te oy ta vinajele ta sliques jun ajvalil; muʼyuc bochʼo xuʼ chtuchʼbat yabtel, mu junuc lum chtal tsalatuc yuʼun. Jaʼ ta stsal, jaʼ ta slajesbe scʼoplal scotol li yantic ajvaliletique; yan li stuque jʼechʼel te chcom o sbatel osil» (Daniel 2:44).
¿Mi jaʼ noʼox tstunesik li Vivlia Traducción del Nuevo Mundo de las Santas Escrituras sventa te chakʼik ta ilel kʼusitik xchʼunojik li stestigotak Jeovae?
Moʼoj, yuʼun ta jtuneskutik yantik Vivliaetik sventa xkalkutik li mantale. Akʼo mi xuʼ xkakʼkutik li Vivlia Traducción del Nuevo Mundo de las Santas Escrituras kʼalal chakkutik chanubtasel ta Vivliae, ximuyubajkutik xchanel xchiʼukik xtok kʼalal tskʼan tstunesik yantik Vivliae.