Galatas 6:9 | «Mu me xijlubtsajutic ta spasel li cʼusitic leque»

«Mu me xkikta jbatik ta spasel li kʼusitik toj leke, yuʼun mi muʼyuk lijlubtsaje, ta jtsobbetik sat mi sta skʼakʼalile» (Galatas 6:9, Xchʼul Kʼop Dios sventa Achʼ Balumil).

«Mu me xijlubtsajutic ta spasel li cʼusitic leque. Yuʼun tsta yorail chcʼot jcʼajbetic sat, me muc xchibaj coʼntontic ta spasele» (Galatas 6:9, Xchʼul Cʼop Jtotic Dios, ta skʼop Chenalhó).

Li kʼusi skʼan xal Galatas 6:9

Li jtakbol Pabloe tstijbe yoʼonton li yajtsʼaklomtak Kristo ti akʼo spasik li kʼusitik leke, jaʼ xkaltik, li kʼusitik toj lek ta sat Diose. Mi jech tspasike, xuʼ me spat yoʼontonik ti ch˗akʼbat smotonik yuʼun li Diose.

«Mi muʼyuk lijlubtsaje». Li jaypʼel kʼop liʼe xuʼ xichʼ alel xi xtoke: «Mu me xkikta jbatik». Li ta griego kʼope chakʼ kaʼitik xtok ti skʼan mu xijchibaj xchiʼuk ti ta muyubajeluk˗o jech jpastike. Kʼalal laj yal Pablo «mi muʼyuk lijlubtsaje» xie, laj yakʼ ta aʼiel ti oy bateltik chibajem laj yaʼi sba eke (Romanos 7:21-24).

«Li kʼusitik toj leke» o li kʼusitik leke te smakojbe skʼoplal skotol li kʼusi skʼan spas jun yajtsʼaklom Kristo kʼalal chtun ta stojolal Diose. Jech kʼuchaʼal liʼe, ti kʼalal tskolta li xchiʼil ta chʼunolajel li jun yajtsʼaklom Kristo xchiʼuk tskolta li buchʼutik maʼuke (Galatas 6:10).

«Mi muʼyuk lijlubtsaje, ta jtsobbetik sat mi sta skʼakʼalile». Li kʼusi laj yal li Pabloe chakʼ kaʼitik ti bateltike skʼan jmalatik sventa jtabetik sbalil li kʼusitik lekik la jpastike jech kʼuchaʼal jun jtsʼunolajel ti skʼan smala sventa xchʼi li kʼusi la stsʼune. Kʼalal laj yalbe skʼoplal stsobbel sat tsʼunobil li Pabloe, laj to sta ta alel li kʼusi chal versikulo 7: «Kʼusiuk noʼox ti yakal tstsʼun li jun krixchanoe jaʼ tstsobbe sat xtok», jaʼ xkaltik, mi jaʼ tspas li kʼusitik lek chil Dios li jun yajtsʼaklom Kristoe, ta sta epal bendisionetik ti te tsakal skʼoplal ti xuʼ xkuxi ta sbatel osile (Romanos 2:6, 7; Galatas 6:8).

Stsʼak loʼil ta Galatas 6:9

Leʼtik bal ta sjabilal 50 kʼalal ta 52, li jtakbol Pabloe la stsʼibabe batel li ermanoetik ta Galasia ti akʼo yichʼ spʼijilik ti mu xjelbat snopbenik yuʼun li krixchanoetik ti tskuy sbaik ta yajtsʼaklom Kristoe xchiʼuk ti tsjelik li kʼusi melel ta sventa li Jesuse (Galatas 1:6, 7). Li jecheʼ jchanubtasvanejetik liʼe chalik ti yajtsʼaklomtak Kristoe skʼan xchʼunik-o li Mantal laj yichʼik akʼbel j˗israeletike (Galatas 2:15, 16). Li Pabloe laj yalbe smelolal ti lajem xa ox skʼoplal li Mantal taje, jaʼ yuʼun li buchʼutik chichʼik ta mukʼ li Diose mu xa ox persa xchʼunik (Romanos 10:4; Galatas 3:23-25).

Kʼalal la stijbe yoʼonton Pablo li yajtsʼaklomtak Kristo ti jaʼuk spasik «li kʼusitik toj leke», maʼuk yakal chalbe skʼoplal ti skʼan xchʼunik li Mantal akʼbat Moisese, moʼoj, jaʼ ti skʼan xchʼunik «li smantal Kristoe».Taje te tsakal skʼoplal skotol li kʼusitik lekik skʼan jpastik ta stojolal yantik jech kʼuchaʼal laj yakʼ ta chanel li Jesuse (Galatas 6:2; Mateo 7:12; Juan 13:34).

Sventa xavaʼibe smelolal kʼusi chal li Karta sventa Galatase, kʼelo li video liʼe: