Romanos 12:12 | «Kuxetuk avoʼontonik yuʼun li spatobil oʼontonale. Kuchuk me avuʼunik akʼo mi oy tsots avokolik. Pasilanik˗o me orasion»

«Kuxetuk avoʼontonik yuʼun li spatobil oʼontonale. Kuchuk me avuʼunik akʼo mi oy tsots avokolik. Pasilanik˗o me orasion» (Romanos 12:12, Xchʼul Kʼop Dios sventa Achʼ Balumil).

«Junuc avoʼntonic cuxianic. Muyubajanic, yuʼun apatoj avoʼntonic ti oy cʼusi ta xataique. Oyuc me smucʼul avoʼntonic cʼalal ta xavichʼ avocolique. Mu me xavicta abaic ta scʼoponel ti Diose» (Romanos 12:12, Ti Achʼ Rextomento yuʼun ti Jesucristoe, ta skʼop Chamula).

Li kʼusi skʼan xal Romanos 12:12

Li ta versikulo liʼe, li jtakbol Pabloe laj yalbe yajtsʼaklomtak Kristo ta Roma oxtos kʼusitik ti xuʼ xkoltaatik sventa tukʼ xakʼ sbaik manchuk mi xichʼik kontrainel o snuptanik yan vokoliletik.

«Kuxetuk avoʼontonik yuʼun li spatobil oʼontonale». Li yajtsʼaklomtak Kristoe spatoj yoʼontonik ti xuʼ xkuxiik sbatel osile; jlome ta vinajel, pe jutuk mu skotolikuke liʼ chkuxiik ta balumil kʼalal mi kʼatajem xa ox ta paraiso spʼejel li balumile (Salmo 37:29; Juan 3:16; Apokalipsis 14:1-4; 21:3, 4). Te tsakal skʼoplal xtok ti ta xilik ti kʼu yelan ta xchʼaybe skʼoplal skotol kʼusitik chopol li Ajvalilal yuʼun Diosea (Daniel 2:44; Mateo 6:10). Li yajtuneltak Diose xuʼ xkuxet-o yoʼontonik, yuʼun akʼo mi ta snuptanik vokoliletik, snaʼojik ti chkʼot ta pasel li kʼusi xchʼunojike xchiʼuk ti lek ch-ilatik yuʼun Dios mi kuch yuʼunike (Mateo 5:11, 12; Romanos 5:3-5).

«Kuchuk me avuʼunik akʼo mi oy tsots avokolik». Kʼalal «kuchuk me avuʼunik» xi li ta Vivliae, li ta griegoe jaʼ skʼan xal «ti te chijkom˗oe», «ti muʼyuk chijbate» xchiʼuk «ti te oyutik˗oe». Ta skoj ti maʼuk te skʼoplalik ta balumilb li yajchankʼoptak Jesuse, snaʼojik ti ta xichʼik kontrainele. Jaʼ yuʼun, skʼan xkuch yuʼunik (Juan 15:18-20; 2 Timoteo 3:12). Mi tukʼ chakʼ sba ta stojolal Dios li jun yajtsʼaklom Kristo kʼalal tsnuptan prevaetike, mas to tstsatsub li xchʼunel yoʼonton ti tsta li kʼusi yaloj onoʼox Dios ta xakʼe (Mateo 24:13). Li xchʼunel yoʼonton taje jaʼ chkoltaat sventa xmuyubaj noʼox xchiʼuk ti oyuk noʼox smalael yuʼun sventa xkuch yuʼun li tsatsal prevaetike (Kolosenses 1:11).

«Pasilanik˗o me orasion». Li yajtsʼaklomtak Kristoe nopajtik noʼox ch˗albatik ti mu xikta sbaik spasel orasion sventa tukʼ xbakʼ sbaik ta stojolal li Diose (Lukas 11:9; 18:1). Skʼan saʼilanik beiltasel ta stojolal Dios xchiʼuk ti skʼanbeik koltael kʼalal oy kʼusi tsnuptan ta xkuxlejalike (Kolosenses 4:2; 1 Tesalonisenses 5:17). Spatoj yoʼontonik ti chtakʼbat s˗orasionik yuʼun Diose, yuʼun ta xchʼunbeik li smantaltake xchiʼuk chakʼik persa spasel li kʼusi tskʼan yoʼonton Diose (1 Juan 3:22; 5:14). Jech xtok, snaʼojik ti mi nopajtik noʼox tspasik orasione, ch˗akʼbat stsatsal yoʼontonik sventa tukʼ xakʼ sbaik ta stojolal Dios akʼo mi snuptanik prevaetik (Filipenses 4:13).

Stsʼak loʼil ta Romanos 12:12

Li Pabloe la stsʼibabe batel li yajtsʼaklomtak Kristo ta Roma tetik van ta sjabilal 56 kʼalal talem xa ox Jesuse. Li ta kapitulo 12 li ta skartae, laj yal lekil mantaletik ta sventa lekil talelal, ti kʼu yelan skʼan xichʼik ta mukʼ li ermanoetike xchiʼuk li buchʼutik muʼyuk chaʼiik mantale, jech xtok laj yal kʼusi skʼan spasik sventa mu saʼik kʼop kʼalal ta xichʼik kontrainele (Romanos 12:9-21). Li yajtsʼaklomtak Kristo ta Romae jaʼo chtun yuʼunik li mantaletik taje, yuʼun poʼot xa ox snuptanik tsatsal kontrainel.

Mu ta sjaliluke, li ta jabil 64 kʼalal talem xa ox Jesuse kol kʼokʼ ta Roma ti ep kʼusitik la xchikʼe. Oy buchʼutik lik yalik ti jaʼ la ta smul li ajvalil Nerone. Jun j˗al˗loʼil ta Roma ti Tácito sbie laj yal ti Nerone laj la spak skʼoplal, jaʼ laj yakʼbe xkuchin li yajtsʼaklomtak Kristoe. Ta skoj taje, xuʼ van jaʼ te lik˗o tsatsal kontrainel ta stojolal li yajtsʼaklomtak Kristoe. Li kʼusi laj yal Pabloe jaʼ koltaatik sventa xkuch yuʼunik li kontrainele xchiʼuk ti mu xkʼunib li xchʼunel yoʼontonike (1 Tesalonisenses 5:15; 1 Pedro 3:9). Li yajtunelutik Dios avi eke lek ti jchanbetik li stalelalike.

Sventa xavaʼibe smelolal kʼusi chal li slivroal Romanose, kʼelo li video liʼe.