4 Akʼbo abaik perton

¿KʼUSI SMAKOJ?

Li yakʼel pertone jaʼ skʼan xal ti mu masuk jtukʼulantik li kʼusi chopol laj kichʼtik pasbele xchiʼuk ti mu jnakʼ skʼakʼal koʼontontike. Taje maʼuk skʼan xal ti muʼyuk tsots skʼoplal li kʼusi kʼot ta pasele o ti jnoptik ti muʼyuk kʼot ta pasele.

BEILTASEL TA VIVLIA: «Jechuk˗o me tsʼikbo abaik ta jujuntal xchiʼuk mu me xajalanbe abaik ta jujuntal ti chapasbe abaik pertone akʼo mi oy buchʼu tsaʼ smul ta atojolalik» (Kolosenses 3:13).

«Kʼalal oy buchʼu akʼanoje, muʼyuk chakʼelbe li spaltailtake, yuʼun jaʼ chavakʼ ta avoʼonton li kʼusi yakal tspas sventa xlekub stalelale» (Aaron).

¿KʼU YUʼUN TSOTS SKʼOPLAL?

Muʼyuk lek mi chanakʼ skʼakʼal avoʼontone, yuʼun xuʼ me xa ipaj˗o, muʼyuk xa jun avoʼonton xchiʼuk xuʼ xavil avokol ta anupunel.

«Jun veltae, li jmalale la skʼanbun perton ta skoj ti oy kʼusi la spasbun ti kʼux tajek laj kaʼie. Akʼo mi mu kʼunuk laj kaʼi yakʼel ta perton, laj onoʼox jpas. Chopol laj kaʼi jba ti muʼyuk laj kakʼ ta perton ta ora noʼoxe. Ti jechuk la jpase, muʼyuk laj kil jvokol ta jnupunelkutik jechuke» (Julia).

¿KʼUSI STAKʼ XAPAS?

NOPBO SKʼOPLAL LIʼE:

Kʼalal tsyayijesot li anup achiʼile, xi xajakʼbe abae:

• ¿Mi jpʼelun ta kʼop?

• ¿Mi ta jkʼan ti xtal skʼanbun pertone o mi xuʼ jchʼay ta jol li kʼusi la spasbune?

LOʼILTAO XCHIʼUK ANUP ACHIʼIL LIʼE:

• ¿Kʼu sjalil ch˗echʼ sventa xkakʼbe jbatik perton?

• ¿Kʼusi skʼan jpastik sventa xkakʼbe noʼox jbatik perton?

LI KʼUSI XUʼ XAPASE

• Mu xanop ti yolbaj tsyayijes avoʼonton li anup achiʼile.

• Aʼibo smelolal ti kʼu yelan chaʼi sba li anup achiʼile, teuk ta ajol ti «ep ta velta ta jmak kakan» jkotoltike (Santiago 3:2).

«Mas kʼun chkaʼitik yakʼel perton kʼalal oy jmul jchaʼvoʼaltike. Pe kʼalal jun noʼox ti buchʼu oy kʼusi chopol la spase, mas vokol. Sventa xij˗akʼvan ta pertone, skʼan bikʼit xkakʼ jbatik» (Kimberly).

BEILTASEL TA VIVLIA: «Lajesbo yoʼonton ta ora» (Mateo 5:25).