5 Chiʼino abaik lek ta loʼil

¿KʼUSI SMAKOJ?

Kʼalal lek chchiʼin sbaik ta loʼil li totil meʼiletik xchiʼuk yalab xnichʼnabike, jaʼ skʼan xal ti chalbe sbaik li kʼusi tsnopik xchiʼuk ti kʼu yelan chaʼi sbaike.

¿KʼU YUʼUN TSOTS SKʼOPLAL?

Mu kʼunuk ta chiʼinel ta loʼil li alab nichʼnabiletik kʼalal tsta svaʼlejike. Kʼalal bikʼitik toʼoxe, mas toʼox lek chaʼi tsjam yoʼontonik ta atojolalik. Avi ti svaʼlejik xae mu xa kʼusi chalbot akʼo mi amalaoj ti chalbot li kʼusi tsnuptane. Akʼo mi vokol chavaʼi xchiʼinel ta loʼil, jaʼ me yorail sventa xichʼ chiʼinel ta loʼil li alab nichʼnabile.

¿KʼUSI STAKʼ XAPAS?

Chiʼino ta loʼil ti kʼusi ora mas lek chaʼiike. Jechuk xapas akʼo mi nax xa akʼobal chlaj loʼilajanik.

«Bakʼintike, xi ta jkʼan chkaltike: ‹¡Jmoj oyutik sjunul kʼakʼal, ¿jaʼ to chakʼan chijloʼilaj?!›. ¿Kʼu yuʼun jech chavalbe li avalab anichʼnab ti tskʼan chalbot li kʼusi oy ta yoʼontone? ¿Mi mu jaʼuk li kʼusi oy ta koʼontontik li totil meʼilutike?» (Lisa).

«Nopem xkaʼi sob chivay, pe kakʼoj venta ti mas lek kʼusi ta jloʼiltakutik xchiʼuk jnichʼnabtak kʼalal echʼem xa ox oʼlol akʼobale» (Herbert).

BEILTASEL TA VIVLIA: «Ta jujuntal akʼo saʼik li kʼusi lek chaʼi yan krixchanoe, maʼuk li kʼusi lek chaʼi stukike» (1 Korintios 10:24).

Mu me kʼusi xchʼay avoʼonton. Xi chal jun totile: «Bakʼintike, kʼalal jaʼo tskʼoponikun li jnichʼnabtake, yan xa kʼusi chlik jnop ta anil. Pe ta onoʼox xakʼik venta».

Mi jaʼ jech chavaʼi aba kʼuchaʼal taje, tupʼo li atelevisione xchiʼuk iktao jlikeluk li aselulare. Chikintabo lek li kʼusi chalbot li akerem atsebe. Mi jech chapase, chavakʼ ta ilel ti tsots skʼoplal chavil ek li kʼusi chalbote akʼo mi mu toj masuk tsots skʼoplal.

«Tsots skʼoplal ti snaʼik kalab jnichʼnabtik ti ta jtsaktik ta venta ti kʼu yelan chaʼi sbaike. Mi mu jechuk ta jpastike, muʼyuk me chalbutik ti kʼu yelan chaʼi sbaike o chbat skʼanbeik koltael yantik» (Maranda).

«Mu xa˗ilin akʼo mi muʼyuk stukʼil li kʼusi chalbot anichʼone» (Anthony).

BEILTASEL TA VIVLIA: «Tsʼet chikintaik lek» (Lukas 8:18).

Kʼusiuk noʼox ora jech xapas. Bakʼintike, li kerem tsebetike mas jun yoʼonton chaʼiik ti xchiʼin sbaik ta loʼil xchiʼuk stot smeʼik kʼalal oy kʼusi jmoj tspasike.

«Jaʼo chiloʼilajkutik kʼalal jmoj chilokʼkutik batel ta xanbal ta karroe. Mas jun koʼonton chiloʼilajkutik kʼalal muʼyuk jkʼelojbe jba jsatkutike, ti naka noʼox jmoj te chotolunkutik batele» (Nicole).

Kʼalal chijveʼe, jaʼo lek yorail sventa xijloʼilaj xtok.

«Kʼalal chiveʼkutik ta akʼobaltike, ta jloʼiltakutik li kʼusi chopol xchiʼuk lek echʼ kuʼunkutik ta sjunul kʼakʼale. Ti jech ta jpaskutike mas to jmoj chkaʼi jbakutik xchiʼuk jech ta jnaʼkutik ti mu jtukuk oyunkutik kʼalal oy kʼusi ta jnuptankutike» (Robin).

BEILTASEL TA VIVLIA: «Skʼan me akotolikuk oyuk ta avoʼontonik xchikintael, nopik me lek kʼalal chakʼopojike» (Santiago 1:19).