¿Mi chakʼan chchanik atalelal li avalab anichʼnabe?
SVENTA TOTIL MEʼILETIK
8 Vinajuk ta atalelal
¿KʼUSI SMAKOJ?
Kʼalal chkakʼtik ta ilel slekil skʼelobile, jaʼ skʼan xal ti jech ta jpastik li kʼusi chkakʼtik ta chanele. Li totile mu xuʼ xalbe xnichʼon ti mu sjut kʼop mi oy xi chal kʼalal oy buchʼu chkʼot saʼatuke: «Albo ti chʼabal liʼ oyune».
«Ep buchʼutik xi chalike: ‹Paso li kʼusi chkale, maʼuk xachan li kʼusi ta jpase›. Pe taje muʼyuk sbalil mi jech chkalbetik li ololetike, yuʼun xkoʼolajik ta esponja ti tstsʼutsʼ skotole. Li kʼusi chkaltik xchiʼuk li kʼusi ta jpastike ta me xchanik. Mi oy kʼusi chkakʼbetik xchan, pe ti muʼyuk ta jpastik li voʼotike, ta me xakʼik venta xchiʼuk ta me xalbutik» (David).
BEILTASEL TA VIVLIA: «Voʼot ti xi chachol mantale: ‹Mu me xa˗elkʼaj›, ¿mi cha˗elkʼaj?» (Romanos 2:21).
¿KʼU YUʼUN TSOTS SKʼOPLAL?
Li kʼoxetike jaʼ mas chchan li kʼusi tspas stot smeʼike, jaʼ mu sta li ta xchiʼiltakik ta chanune. Jech˗o tspasik akʼo mi chex kerem tsebik xa. Jaʼ yuʼun, totil meʼiletik, voʼoxuk me li buchʼu mas lek xuʼ xabeiltasik batel ta tukʼil be li avalab anichʼnabike. Pe jaʼ noʼox me mi jech chavakʼik ta ilele.
«Muʼyuk chchikintaik yilel li alab nichʼnabiletik kʼalal oy kʼusi ep ta velta chkalbetike, pe mi muʼyuk la jpastik li kʼusi laj kalbetike, tstikʼ ta jsatik. Yuʼun te me satik li ta kʼusitik ta jpastike akʼo mi mu xakʼik venta yilel» (Nicole).
BEILTASEL TA VIVLIA: «Li pʼijilal ta toyole [...] mu snaʼ xloʼlavan» (Santiago 3:17).
¿KʼUSI STAKʼ XAPAS?
Xi xajakʼbe abae: «¿Kʼu yelan jtalelal ta stojolal li jnup jchiʼile xchiʼuk ta stojolal li kalab jnichʼnabe? ¿Kʼusi mas ta jkʼel li ta televisione? ¿Kʼu yelan stalelal li kamigotake? ¿Mi oy ta koʼonton li yantike?». Jaʼ xkaltik, mi sta svaʼlej li avalab anichʼnabe, ¿mi chakʼan ti jaʼuk jech stalelal kʼuchaʼal atalelale?
«Mi oy junuk mantal ti muʼyuk ta jtsakutik ta venta xchiʼuk li jmalale, mu xuʼ jkʼanbekutik kalab jnichʼnabkutik ti akʼo spasike» (Christine).
Xanaʼuk skʼanel perton. Li alab nichʼnabiletike snaʼojik ti oy spaltail li stot smeʼike. Jech oxal, mi chakʼanbe perton li anup achiʼil o li avalab anichʼnab ta skoj ti oy kʼusi muʼyuk lek la apase, chavakʼ ta ilel ti skʼan meleluk snaʼ xkʼopojik xchiʼuk ti bikʼituk xakʼ sbaike.
«Skʼan xkaltik ti oy bu lijchʼaye xchiʼuk ti jkʼantik pertone. Mi mu jechuk la jpastike, li alab nichʼnabiletike muʼyuk me chchanik skʼanel perton» (Robin).
«Ep kʼusi xuʼ xavakʼbe xchan li avalab anichʼnabe. Yuʼun jaʼ mas chchanik li kʼusi chapase, xkoʼolaj ti ta jchanubtastik ta kʼakʼal akʼobale» (Wendell).