Skotol kʼakʼal ta smiyonal noʼox krixchanoetik vokol tajek chlokʼ-o stakʼinik jujun u xchiʼuk mas to chil-o svokolik li kʼusi chkʼot ta pasel ta balumile. ¿Kʼu yuʼun?
Kʼalal oy vokolil ta junuk lume, bakʼintike chtoy stojol li bu nakalutike xchiʼuk li veʼlile.
Chjutukaj li abtelale xchiʼuk chyal li tojolile.
Li nikeletik, nojelal ta voʼ xchiʼuk yan kʼusitike xuʼ me slajes li pʼolmajebaletik, naetik xchiʼuk yan kʼusitik. Ta skoj taje xuʼ me povre xikta li krixchanoetike.
¿Mi anaʼoj xa?
Mi xatojob stunesel lek li atakʼine, mas me mu vokoluk chavaʼi kʼalal chtal jtosuk vokolile.
Mu me teuk-o sbatel osil li takʼine, jech kʼuchaʼal ti kʼu yepal atsoboj atakʼine. Jech xtok, mi oy jaypʼej anatake xuʼ me xyal stojol.
Li takʼine mu xuʼ xijmuyubaj yuʼun o ti lekuk tsobol li kutsʼ kalaltike.
¿Kʼusi xuʼ xapas?
Xi chal li Vivliae: «Mi oy noʼox jveʼeltik xchiʼuk jkʼuʼ jpokʼtike, junuk noʼox koʼontontik yuʼun» (1 Timoteo 6:8).
Ti xkuxet koʼontontike maʼuk skʼan xal ti oy kuʼuntik skotol li kʼusi ta jkʼantike, jaʼ ta skoj ti jun koʼontontik yuʼun li kʼusi x-ayan kuʼuntike. Mi te-o ta joltik taje mas me tskoltautik kʼalal mi chʼabal lek jtakʼintike.
Yikʼaluk van oy kʼusi skʼan xajel ta akuxlejal sventa mas junuk noʼox avoʼontone. Pe mi mas ep chalajes atakʼin, ti jaʼ mu sta ti kʼu yepal chapas kanale, ta me xavil-o avokol.