LI BALUMILE NOJ TA VOKOLIL

3 | Chabio li avutsʼ avalale

¿KʼU YUʼUN TSOTS SKʼOPLAL?

Ta skoj ti yantik tsok batel li kuxlejale, ep buchʼutik mu xakʼik venta ti muʼyuk xa mas ta yoʼontonik li yutsʼ yalalik xchiʼuk li yamigotakike.

Li krixchanoetike jaʼ xa mas lek chaʼiik ti stuk oyike.
Li nupultsʼakaletike mas xa chut sbaik.
Oy totil meʼiletike jutuk xa tajek o muʼyuk xa tstsakik ta venta li kʼusi tsvul-o yoʼonton yalab xnichʼnabike.

¿Mi anaʼoj xa?

Kʼalal oy kʼusi tsots ta jnuptantike, li kamigotaktike tskoltautik sventa lekuk noʼox oyutik xchiʼuk junuk noʼox koʼontontik.
Li vul oʼontone xuʼ me jeltos kʼu yelan chil-o svokol li avutsʼ avalale.
Li notisiaetik ti xibalik sbae xuʼ me svul-o tajek yoʼonton li avalab anichʼnabe.

¿Kʼusi xuʼ xapas?

Xi chal li Vivliae: «Li melel amigoile skotol ora chakʼ ta ilel ti chkʼanvane xchiʼuk jaʼ jchiʼiltik ta vokʼel chkʼot kʼalal oy jvokoltike» (Proverbios 17:17).

Kʼanbo koltael li buchʼu xaʼi ti kʼu yelan chavaʼi abae xchiʼuk ti xuʼ xakʼbot lekil beiltaseletike. Kʼalal anaʼoj ti oy buchʼu skʼanojote, ta me spat avoʼonton xchiʼuk ta me xakʼ avipal sventa xkuch avuʼun li kʼusitik chanuptane.

¿KʼUSI XUʼ SKOLTAUTIK? Junantik tojobtaseletik

Sventa xachabi avutsʼ avalal kʼalal oy kʼusitik tsots chanuptane, paso liʼe

MASUK TO LEK XAVIL ABA XCHIʼUK LI ANUP ACHIʼILE

Masuk to lek xavil aba xchiʼuk li anup achiʼile

Xi chal li Vivliae: «Mas lek mi chaʼvoʼike, jaʼ mu sta mi jun noʼoxe […]. Yuʼun mi oy buchʼu junukal yal ta lume, xuʼ xkoltaat likel yuʼun li xchiʼile» (Eklesiastes 4:9, 10). Li nupultsʼakale skʼan moj x-abtejik o skolta sbaik. Maʼuk ti kontra chil sbaike.

Mi lubemoxuke mu me xalokʼes skʼakʼal avoʼonton ta stojolal li anup achiʼile, mas me jun avoʼontonik mi oy smalael avuʼunike xchiʼuk mi chatsʼikbe abaike.
Xuʼ van xaloʼiltaik jkojuk ta xemana li kʼusi vokol chavaʼiike. Jaʼ lek ti xachapan li akʼopike, mu jaʼuk xatsak ta kʼop li anup achiʼile.
Chʼakbeik yorail sventa koʼoluk xapasik li kʼusi chakʼupin achaʼvoʼalike.
Vuleso ta ajolik li kʼusi jmoj apasojik tale. Xuʼ van xakʼelik fotoetik kʼalal lanupunike o kʼalal oy kʼusi yan la apasike.

«Li jun nupultsʼakale mu van skotoluk velta ti koʼol kʼusi chkʼot ta nopel yuʼunike, pe taje maʼuk skʼan xal ti mu xa xuʼ koʼoluk ch-abtejike. Xuʼ jmoj kʼusi tsnopik xchiʼuk xakʼik persa sventa lekuk xbat ta pasel yuʼunike» (David).

LEKUK-O XAVIL ABA XCHIʼUK LI AVAMIGOTAKE

Lekuk-o xavil aba xchiʼuk li avamigotake

Mu me jaʼuk noʼox te amalaoj ti spat avoʼonton li avamigotake, skʼan me xapatbe yoʼontonik ek. Mi chakolta yantike, ta me xatabe sbalil.
Sil kʼakʼal kʼopono batel junuk avamigo sventa xanaʼ kʼu yelan oy.
Jakʼbo avamigotak kʼuxi stsalojik junantik vokoliletik ti jech yakal chanuptane.

«Kʼalal chavil avokol ti xkoʼolaj kʼuchaʼal tsatsal ikʼaloʼe, li avamigotake xuʼ skoltaot sventa xanaʼ kʼusi skʼan xapas. Bakʼintike, jaʼ no’ox mi svules ta ajol li kʼusi anaʼoj xae. Skʼanojot li avamigotake xchiʼuk li stukike snaʼojik ti akʼanojane» (Nicole).

AʼIO KʼU YELAN CHAʼI SBA LI AVALAB ANICHʼNABE

Aʼio kʼu yelan chaʼi sba li avalab anichʼnabe

Xi chal li Vivliae: «Skʼan me akotolikuk oyuk ta avoʼontonik xchikintael, nopik me lek kʼalal chakʼopojike» (Santiago 1:19). Yikʼaluk van mu kʼunuk chaʼiik yalbel skʼoplal avalab anichʼnab li kʼusi chat-o yoʼontonik o li kʼusi chiʼik-oe. Pe mi chavakʼ ta ilel ti oy smalael avuʼun kʼalal chachikinta li kʼusi chalike, mas me kʼun chaʼiik yalel ti kʼu yelan chaʼi sbaike.

Sventa junuk yoʼonton xaʼi sba avalab anichʼnab xchiʼuk xal ti kʼu yelan chaʼi sbae, jaʼ lek ti xaloʼilajik kʼalal chaxanavike o kʼalal chabat ta akaroike. Bateltike jaʼ muʼyuk lek chaʼi sbaik kʼalal chachotanik sventa xachiʼinik ta loʼile.
Mu xavakʼ ti xchikintaik xibal sba notisiaetik li avalab anichʼnabike.
Albo li kʼusi yakal chapas sventa xachabi li avutsʼ avalale.
Chapano kʼusi xuʼ xapas sventa mi oy kʼusi kʼot ta pasel ta anile, vaʼun chano xchiʼuk li avalab anichʼnabe.

«Chiʼino ta loʼil li avalab anichʼnabe xchiʼuk akʼo yalik ti kʼu yelan chaʼi sbaike. Yikʼaluk van chiʼik o mi ilinemik ti muʼyuk yalojboxuke. Xuʼ xavalbe xtok ti jech chavaʼi aba eke xchiʼuk albo kʼusi skoltaojot sventa mas junuk avoʼontone» (Bethany).