KʼALAL CHTOY STOJOL LI KʼUSITIKE

Oyuk spatobil koʼontontik

¿Mi yantik xtoy stojol li kʼusitik chtun avuʼun ti bu nakalote, pe ti jaʼ muʼyuk chtoy li atojol ta abtele? ¿Mi chavul-o avoʼonton kʼuxi chata li kʼusitik chtun avuʼunik xchiʼuk li avutsʼ avalale? Xuʼ van xi chanope: «¿Kʼusi xa noʼox ta jpas li ta jelavele?». Kʼalal jech chanuptane, xuʼ me skoltaot mi oy spatobil avoʼontone.

¿KʼU YUʼUN TSOTS SKʼOPLAL TAJE?

Li buchʼutik oy spatobil yoʼontonike mu jecheʼuk noʼox te smalaojik ti xlekub li kuxlejale, yuʼun oy kʼusitik tspasik kʼalal oy kʼusi tsnuptanike. Li buchʼutik xchanojbeik skʼoplale yakʼojik venta ti oy kʼusitik toj lek spas yuʼunik li buchʼutik oy spatobil yoʼontonike, jech kʼuchaʼal liʼe:

Mas xkuch yuʼunik li kʼusitik tsnuptanike.
Kʼun noʼox chaʼiik sventa oyuk kʼusi sjel ta xkuxlejalik.
Mas lek kʼusi chkʼot ta nopel yuʼunik, vaʼun jaʼ chkoltaatik sventa mu masuk x-ipajik.

LI KʼUSI XUʼ XAPASE

Baʼyel, nopbo skʼoplal kʼuxi xuʼ skoltaot avi li kʼusi chal Vivliae. Li ta Vivliae oy kʼusitik chal ti xuʼ skoltaot kʼalal chtoyanuk stojol li kʼusitik chtun avuʼune. Li kʼusitik chale xuʼ skoltaot sventa lekuk noʼox li akuxlejale xchiʼuk ti chapalukot mi oy kʼusi la anuptan ta jelavele.

«Ti xanaʼ xatucʼulan abae, ti oy abijile, muʼyuc cʼusi xanuptan unbi» (Proverbios 2:11, Xchʼul Cʼop ti Jtotic Diose, ta skʼop Chamula).

Xchibal, kʼelo li kʼusi chal Vivlia ti chkʼot ta pasel ta jelavele. Kʼalal chavakʼ venta ti toj jtunel li kʼusi chal Vivliae, xuʼ stij avoʼonton sventa xachan-o batel. Li ta Vivliae te chachan ti oy xa kʼusi spasoj Dios sventa oyuk kʼusi lek jtatik ta jelavele xchiʼuk ti oyuk spatobil koʼontontike. Te chachan xtok ti oy lek srasonal sventa jchʼuntik ti chkʼot ta pasel li kʼusi yaloje (Jeremias 29:11). Sventa xkʼot ta pasel yuʼune, jaʼ tstunes li Ajvalilal svaʼanoje.

¿KʼUSI JAʼ LI AJVALILAL YUʼUN DIOSE XCHIʼUK KʼUSI TSPAS?

Li Ajvalilal yuʼun Diose te oy ta vinajel xchiʼuk ta jelavele jaʼ tsventain tal spʼejel li balumile (Daniel 2:44; Mateo 6:10). Tslajesbe skʼoplal li vokolile xchiʼuk li povreale. Vaʼun, chakʼ talel jun oʼontonal xchiʼuk oy xa noʼox li kʼusi chtun kuʼuntike. Jaʼ jech chakʼ ta ilel li tekstoetik ta Vivlia liʼe:

«Ta xamuyubaj xchiʼuk chakʼupin li kʼusitik oy avuʼune» (Salmo 128:2).

Li buchʼutik chventainatik yuʼun li Ajvalilal yuʼun Diose «mu jecheʼuk noʼox ti tsots ch-abtejike» (Isaias 65:23).

«Ch-ayan ep kʼusitik stakʼ lajesel li ta balumile» (Salmo 72:16).

Ta smiyonal xa noʼox krixchanoetik xchʼunojik ti chkʼot ta pasel li kʼusi chal Vivliae, yuʼun snaʼojik ti mu snaʼ sjut kʼop li Diose (Tito 1:2). Li spatobil koʼontontik chal Vivliae xuʼ skoltaot sventa xanaʼ kʼusi chapas kʼalal chavil avokol ta takʼine xchiʼuk ti teuk ta ajol ti chtal lekilal ta jelavele. ¿Mi chakʼan to chanabe mas skʼoplal li kʼusi chal Vivliae?