Echʼ xtuchʼik Tsajal Nab

¡KʼELAVIL li kʼusi yakal chkʼot ta pasele! Leʼe jaʼ Moisés ti syeʼoj snamteʼ ta sba Tsajal Nabe. Li buchʼutik te xchiʼuk ta jot nab ti lek xa oyike jaʼ li j-israeletike. Pe li Faraón xchiʼuk li yajsoltarotake yakal ta xjikʼavik. Jkʼeltikik kʼuxi kʼot ta pasel leʼe.

Kʼuchaʼal la jchantike, kʼalaluk echʼ li slajunebal vokolile li Faraone la jyalbe j-israeletik ti akʼo lokʼikuk batel li ta Egiptoe. Jutuk mu 600.000 viniketik lokʼik ta Egipto, parte to li antsetike xchiʼuk li ololetike. Xchiʼuk epal krixchanoetik ti la jyakʼ sbaik ta stojolal Jeovae la xchiʼinik lokʼel li j-israeletike. Skotolik la jyikʼik batel li xchijike, li stentsunike xchiʼuk li xvakaxik ti kʼalal lokʼik batel li ta Egiptoe.

Kʼalal skʼan toʼox xlokʼik batele, li j-israeletike la skʼanbeik kʼuʼiletik li j-egiptoetike xchiʼuk kʼusitikuk pasbil ta kʼanal takʼin xchiʼuk ta sakil takʼin. Ta skoj li slajeb vokolile li j-egiptoal krixchanoetike chiʼik tajek. Jech oxal la jyakʼik li kʼusi kʼanbatik yuʼun li j-israeletike.

Ta xchibal yoxibal kʼakʼal ne kʼotik ta Tsajal Nab li j-israeletike. Te la xkux yoʼontonik. Kʼalal jaʼo chkux yoʼonton li j-israeletike, li Faraón xchiʼuk sviniktake la sjel li snopbenalike; la snopik ti kʼu yuʼun la skoltaik batel li j-israeletike. ¡La jkakʼtik batuk li jmosovtike!, xi chalilanik.

Jech oxal li Faraone la sjel li snopbenale. Ta anil noʼox lik xchapan soltarotak xchiʼuk skaretailik sventa spasobil leto. Vaʼun xchiʼuk 600 karetaetik ti lek chapale xchiʼuk yantik karetaetik ta Egipto la stijluik batel li j-israeletike.

Kʼalal la jyilik ti te xa xtal li Faraón xchiʼuk yajsoltarotake, xiʼik tajek li j-israeletike. Muʼyuk bu xuʼ xjatavik batel. Te tsobolik ta stiʼ Tsajal Nab, jech noxtok li j-egiptoetike te xtal ta spat li j-israeletike. Pe li Jeovae la jyakʼ ta oʼlol jvol tok, li ta jote te la jyakʼ slumal pe li ta jote te la jyikta li j-egiptoal krixchanoetike. Jaʼ yuʼun li j-egiptoetike mu xilik bu oy li j-israeletik sventa chbat stsakike.

Tana ne ti Jeovae la jyalbe Moisés ti akʼo syeʼ ta sba Tsajal Nab li snamteʼe. Kʼalal jech la spas li Moisese, Jeova la jyakʼ taluk ta slokʼeb Kʼakʼal tsatsal ikʼ. Ti nabe la xchʼak sba, lek tsots vaʼal kom kʼuchaʼal spakʼbal na.

Vaʼun li j-israeletike lik xanavikuk batel ta takin balumil ta oʼlol nab. Sventa xkʼotik ta jot nab li epal miyon krixchanoetik taje xchiʼuk li stsʼunob chonike jalij tajek. Ta slajebal xa ne, li j-egiptoetike kʼot satik noxtok li ta j-israeletike, vaʼun la stikʼ sbaik ochel ta yut nab ek.

Kʼalal jech la spasike, Dios la spas ti akʼo koluk lokʼel li skarosal skaretaike. Li j-egiptoetike xiʼik tajek, xi tsots la jyalike: Li Jeovae jaʼ chletovaj ta jkontratik. ¡Jatavkutik lokʼel!, xiik. Pe bu xa ta maʼuk xaʼox yorail.

Vaʼun li Moisese albat yuʼun Jeova ti akʼo syeʼ ta sba Tsajal Nab li snamteʼe, jech kʼuchaʼal la vil ta lokʼole. Jech oxal li voʼ ti lek toʼox tsots vaʼal kʼuchaʼal spakʼbal nae la sta yavil, te mutʼij komel li j-egiptoal krixchanoetik xchiʼuk li skaretaike. Skotol soltaroetik tikʼilik ta yut nab. ¡Mi junuk j-egiptoal krixchano kuxul kom!

¡Muyubajik tajek li slumal Dios ta skoj ti kuxul komike! Li viniketike kʼejinik sventa tstojbeik ta vokol Jeova, xi la jyalike: Li Jeovae tsal yuʼun mukʼta leto. Li kaʼetike xchiʼuk li yajvaltake la sten ochel ta nab. María li xvix Moisese, la stunes spandereta, li yan antsetike jech lik spasik ek. Akʼotajik xchiʼuk la skʼejintaik: Li Jeovae tsal yuʼun mukʼta leto. Li kaʼetike xchiʼuk li yajvaltake la sten ochel ta nab.