Jun vinik ti toj echʼ noʼox tsots yipe

¿MI XA nabe sbi li vinik ti toj echʼ noʼox tsots yip echʼ ta Balumile? Jaʼ jun jchapanvanej, Sansón sbi. Li Jeova jaʼ ti buchʼu chakʼbe yip li Sansone. Yuʼun kʼalaluk mu toʼox chvokʼ li Sansone, li smeʼe xi albat yuʼun li Jeovae: Poʼot xa xa vil jun akerem. Jaʼ tskolta lokʼel j-israeletik ta skʼob li jfilistaetike, x-utat.

Li jfilistaetike naka chopol krixchanoetik ti te nakalik ta Canaane. Toj ep yajsoltaroik, xchiʼuk toj ilbaj xutik li j-israeletike. Jun veltae, kʼalaluk li Sansón bat ti bu nakal li jfilistaetike, te x-avet tal ta stojolal jkot mukʼta leon. Pe li Sansone ta skʼob noʼox la smil. Jech noxtok ta sienaltak noʼox jfilistaetik la smilanan.

Ta mas tsʼakal ne, li Sansone lek la jyil jun ants, jaʼ sbi Dalila. Li bankilaletik yuʼun jfilisteoetike la jyalbeik Dalila ti ta xakʼbeik ta jujuntal 1.100 ta pech sakil takʼin mi ta xal kʼusi ti tsots-o yip li Sansone. Li Dalilae tskʼan li takʼine. Mu lekuk yoʼonton ta stojolal Sansón, mi jaʼuk ta stojolal slumal Dios. Jech oxal la sjakʼolanbe Sansón kʼusi tspasat-o ta tsatsal vinik.

Ta sjalil ne, li Dalilae albat yuʼun Sansón kʼusi ti oy-o li yipe. Li Sansone xi la jyale: Muʼyuk bu slokʼojbeikun-o li jole. Ti kʼalaluk li vokʼe, li Diose la stʼujun sventa chi kʼot ta yajtunel, jaʼ sbi nasareoal. Mi la slokʼbeikun li jole, chʼabal kip chi kom un bi, xi li Sansone.

Ti kʼalaluk la jyaʼi Dalila taje, la svayubtas ta sba stsek li Sansone. Vuʼun la jyakʼ ochuk tal jun vinik, sventa tslokʼbe li sjole. Kʼalal julav li Sansone, chʼabal xaʼox yip. Vaʼun och tal li jfilistaetike, la stsakik batel. La slokʼesbeik xchaʼpʼejal sbekʼ sat xchiʼuk la spas ta smosovik.

Oy jun kʼakʼal li jfilistaetike la spasik jun mukʼta kʼin sventa tsmuyubtaik li sdiosik, ti jaʼ sbi Dagone, vaʼun la slokʼesik tal ta chukel li Sansone sventa ta slabanik. Pe ichʼi xaʼox tal sjol li Sansone. Vaʼun li Sansone xi la jyalbe li jnitvanej kereme: Nitun batel ti bu oy li yoyaltak nae, xut. Li Sansone la skʼopon Jeova sventa tskʼanbe yip, la stsak li yoyaltak nae. Vaʼun xi tsots avane: Akʼo chamkun xchiʼuk li jfilistaetike, xi. Oy oxmil jfilistaetik li ta kʼine, li Sansone la stsakbe yipal sventa chuj li yoyaltak nae, jin yalel, jech la smil skotol li chopol krixchanoetik tee.