Li Jeovae laj yakʼbe yip li Sansone

Oy ep j-israeletik ti lik yichʼik ta mukʼ yan velta li jecheʼ diosetike. Jaʼ yuʼun, li Jeovae laj yakʼ ti akʼo xlajik ta ilbajinel yuʼun li jfilisteaetike. Pe oy jlom j-israeletike chchʼunbeik smantal li Jeovae, jech kʼuchaʼal li Manoae. Li Manoa xchiʼuk yajnile chʼabal yalabik. Pe jun kʼakʼal li Jeovae la stak tal jun yaj-anjel sventa xi xalbe li yajnil Manoae: «Chachiʼin avol, chavokʼes jun kerem. Jaʼ tskolta lokʼel ta skʼob jfilisteaetik li achiʼiltak ta israelale. Jaʼ jun jnasareo chkʼot». ¿Mi xanaʼ buchʼu jaʼik li jnasareoetike? Jaʼik li buchʼutik chtunik ta stojolal Jeova sventa spasik jun abtelal ti stuk noʼox jeche, jech xtok mu stakʼ slokʼ sjolik.

Ta mas jelavele, vokʼ jun xnichʼon li Manoae, Sanson laj yakʼbeik sbi. Kʼalal chʼi xa ox talele, akʼbat tsots yip yuʼun li Jeovae, yuʼun xuʼ xmil yuʼun jkot leon ta skʼob noʼox. Jun veltae, stuk noʼox la smil 30 jfilisteaetik. Jech oxal, li jfilisteaetike chopol tajek laj yilik li Sansone, jaʼ yuʼun lik snopik kʼuxi xuʼ smilik. Jun akʼobal kʼalal yakal chvay te ta jteklum Gasa li Sansone, li yajkontratake te bat smalaik ta stiʼ jteklum sventa smilik kʼalal mi sakub osile. Pe li Sansone lik ta oʼlol akʼobal, bat ta stiʼ jteklum sventa stʼol o spitsbe lokʼel li stiʼe. Vaʼun, la xkuch batel ta snekeb kʼalal to ta jun vits ti nopol xil Ebrone.

Ta tsʼakale, bat kʼoponatuk yuʼun jfilisteaetik li snovia Sanson ti jaʼ li Dalilae, xi albate: «Ti mi la anaʼ kʼu yuʼun toj tsots yip li Sansone, ta jtojotkutik 1,100 ta sep plata ta jujuntal. Yuʼun ta jkʼan ta jtsakutik xchiʼuk ta jtikʼkutik ta chukel». Ta skoj ti tskʼan takʼin li Dalilae, la xchʼun. Vaʼun, la sjakʼbe Sanson ti kʼu yuʼun toj tsots li yipe, ta slikebale mu toʼox skʼan xal, pe ta skoj ti te xvulvun-o li Dalilae, xi laj yalbee: «Jaʼ ta skoj ti muʼyuk buchʼu slokʼojbun-o li jole, yuʼun jnasaretal vinikun, pe mi oy buchʼu tslokʼbune, muʼyuk xa kip chikom». Muʼyuk lek ti jech la spas li Sansone, ¿mi mu jechuk?

Kʼalal laj yaʼi li Dalilae, la stak ta ikʼel li jfilisteaetike, vaʼun xi laj yale: «Li Sansone laj xa yalbun ta jamal ti kʼu yuʼun tsots yipe». Vaʼun, li Dalilae laj yakʼ ti akʼo ochuk svayel ta sjol yakane xchiʼuk oy buchʼu laj yikʼ ochel sventa slokʼbe sjol li Sansone. Laje, xi avan li Dalilae: «¡Sanson, tal xa stsakikot li jfilisteaetike!». Kʼalaluk vikʼ sat li Sansone, laj yaʼi ti chʼabal xa yipe. Jaʼ yuʼun, li jfilisteaetike la xchukik batel, la spitsbeik li sbekʼ sate xchiʼuk la stikʼik ta chukel.

Jun kʼakʼale, ta smilal xa noʼox jfilisteaetik la stsob sbaik ta sna sdiosik ti Dagon sbie, xi tsots avanike: «¡Li dios kuʼuntike laj xa yakʼ ta jkʼobtik li Sansone, lokʼesik sventa jlabantik!». La xchukik ta oʼlol chib yoyaltak na, vaʼun xi tsots avan li Sansone: «¡Kajval Jeova!, ¡avokoluk akʼbun kip yan velta!». Kʼalal jech la skʼanbe li Jeovae, chʼiem xa ox sjol yan velta li Sansone. Vaʼun, tsots la xuj li yoyaltak nae. Kʼalaluk jech la spase, jin yalel skotol, te cham skotol li buchʼutik te tsobolike xchiʼuk te kapal cham ek li Sansone.