Pato avoʼonton ta stojolal Jeova jech kʼuchaʼal la spas Sansone

1, 2. ¿Kʼusi sbalil ta jtatik mi la jchantik li kʼusi kʼot ta stojolal Sansone?

¿KʼUSI chtal ta ajol kʼalal chalbeik skʼoplal li Sansone? Jaʼ van chtal ta ajol ti toj echʼ noʼox tsots yipe, pe oy kʼusi la spas ti laj yil-o tsots svokole. Akʼo mi jech, li Jeovae maʼuk la stsak ta venta li kʼusi chopol la spase, jaʼ la skʼel ti oy lek xchʼunel yoʼontone xchiʼuk laj yakʼ ti te tsʼibabiluk xkom ta Vivlia li kʼusi la spas sventa oyuk kʼusi jchantike.

² Li Jeovae la stunes Sanson sventa skolta li j-israeletike. Ta mas tsʼakal kʼalal chamem xa oxe, li Jeovae laj yalbe jtakbol Pablo ti akʼo stsʼibabe komel sbi Sanson li ta lista ti bu oy sbiik li buchʼutik lek tsots xchʼunel yoʼontonike (Ebr. 11:​32-34). Akʼo mi oy kʼusitik tsots la snuptan li Sansone, la spat yoʼonton ta stojolal Jeova. Li ta xchanobil liʼe, ta jkʼeltik kʼuxi tstsatsubtas koʼontontik xchiʼuk kʼusi chakʼ jchantik.

LI SANSONE LA SPAT YOʼONTON TA STOJOLAL JEOVA

3. ¿K’usi akʼbat sbain li Sansone?

³ Kʼalal ayan li Sansone, jaʼo chlajik ta ilbajinel yuʼun jfilisteaetik li j-israeletike (Jues. 13:1). Ta skoj ti toj chopolik li jfilisteaetike, chakʼbeik tajek svokol li j-israeletike. Li Jeovae la stʼuj Sanson «sventa spoj lokʼel ta skʼob jfilisteaetik li Israele» (Jues. 13:5). ¡Toj echʼ noʼox tsots li kʼusi la sbaine! Sventa spas yuʼun li Sansone, skʼan spat yoʼonton ta stojolal Jeova.

4. ¿Kʼuxi koltaat yuʼun Jeova li Sansone? (Jueses 15:​14-16).

⁴ Jun velta li Sansone laj yakʼ ta ilel ti spatoj yoʼonton ta stojolal Jeovae. Li soltaroetik ta Filisteae batik ta Lei ti te van xkom ta Juda sventa xbat stsakik li Sansone. Li judaetike xiʼik tajek, jaʼ yuʼun la snopik ti jaʼ lek xakʼik ta entrekal li Sansone. La xchukik ta achʼ chʼojon, vaʼun laj yikʼik batel ta stojolal li jfilisteaetike (Jues. 15:​9-13). Pe li Sansone «akʼbat yip yuʼun li s-espiritu Jeovae», vaʼun muʼyuk tsakat batel. Ta mas tsʼakale «la stabe sbakil ye vuro ti lek to yoxe», vaʼun la smil jmil ta voʼ jfilisteaetik (kʼelo Jueses 15:​14-16).

5. ¿Kʼuxi laj yakʼ ta ilel Sanson ti spatoj yoʼonton ta stojolal Jeovae?

⁵ ¿Ta sbakil van ye vuro? ¿Kʼu yuʼun sbakil ye vuro la stunes? Yuʼun snaʼoj ti jaʼ mas tsots skʼoplal ti spatoj yoʼonton ta stojolal Jeovae, maʼuk li kʼusi tstunese. Li Sansone jaʼ la spasbe li kʼusi tskʼan yoʼonton Jeovae. Ta skoj ti la spat yoʼonton ta stojolale, lek li kʼusi kʼot ta pasel yuʼune.

6. ¿Kʼusi chakʼ jchantik li Sansone?

⁶ Li Jeovae chakʼ kipaltik sventa spas kuʼuntik li kʼusi chakʼ jbaintik ta s-organisasione akʼo mi mu spas kuʼun chkiltik. Labal sba ti kʼu yelan xuʼ skoltautike. Mi la apat avoʼonton ta stojolale, xuʼ me jpʼel ta avoʼonton ti tskoltaot sventa xapas li kʼusi tskʼan yoʼontone xchiʼuk chakʼ avipal jech kʼuchaʼal la spas ta stojolal li Sansone (Prov. 16:3).

7. ¿Kʼu yuʼun toj tsots skʼoplal ti jsaʼtik beiltasel ta stojolal li Jeovae?

⁷ Epal ermanoetik xchiʼuk ermanaetik ti tsvaʼanik salonetik xchiʼuk yan kʼusitike yakʼojik ta ilel ti spatoj yoʼontonik ta stojolal Jeovae. Li ta voʼnee, li s-organisasion Jeovae jaʼ ta spasbe splanoal xchiʼuk jutuk mu skotoluk jaʼ tsvaʼan li salonetik sventa tsobobbaile xchiʼuk li yan naetik sventa yichʼobil ta mukʼ Jeovae. Ta skoj ti yantik xchʼi li steklumal Jeovae, oy kʼusitik jel. Li buchʼutik sbainojik svaʼanel salonetik xchiʼuk yan kʼusitike la skʼelik kʼusi yan xuʼ xichʼ pasel xchiʼuk la skʼanbeik ti xbeiltasatik yuʼun li Jeovae. Jtos ti kʼusi lik spasike jaʼ ti lik smanik osiletik ti oy xa snaile, vaʼun jaʼ xa noʼox ta xchaʼachʼubtasik. Li Robert ti abtejem talel ta svaʼanel salonetik xchiʼuk yan kʼusitik ta spʼejel balumile, xi chale: «Ta slikebale mu kʼunuk laj kaʼikutik ti jech xa chlik yichʼ pasele, yuʼun jelel toʼox ti kʼu yelan nopem xkaʼikutik spasele. Pe li ermanoetike nop xaʼiik spasel, vaʼun jaʼ te vinaj ti yakal chakʼbe talel bendision Jeova li kʼusi achʼ lik yichʼ pasel tale». Taje jaʼ svinajeb ti yakal tsbeiltas steklumal Jeova sventa xkʼot ta pasel li kʼusi tskʼan yoʼontone. Jaʼ yuʼun, lek ti xi jakʼbe jbatike: «¿Mi yakal chkakʼ sbeiltasun li Jeovae xchiʼuk mi ta jpas li kʼusi chkichʼ albele?».

LI SANSONE LAJ YAKʼ SBA TA KOLTAEL YUʼUN LI JEOVAE

8. ¿Kʼusi la spas Sanson kʼalal akʼbat takitiʼile?

⁸ Kʼalal chavaʼibe sbi li Sansone, chtal van ta ajol li kʼusitik labalik sba la spase. La smil jkot leon, ta tsʼakale la smil 30 ta voʼ viniketik ta Askelon (Jues. 14:​5, 6, 19). Li Sansone snaʼoj ti jaʼ koltaat yuʼun li Jeovae. Taje vinaj ti spatoj yoʼonton ta stojolal Jeovae, yuʼun kʼalal laj xa ox smil jmil ta voʼ jfilisteaetike, akʼbat takitiʼil. Pe muʼyuk la saʼ stuk li voʼe, la skʼanbe Jeova ti akʼo xkoltaate (Jues. 15:18).

9. ¿Kʼuxi koltaat yuʼun Jeova li Sansone? (Jueses 15:19).

⁹ Li Jeovae la skolta li Sansone, yuʼun ta jech noʼox lokʼ talel li voʼe. Kʼalaluk laj yuchʼ voʼ li Sansone, «la stsak yipal yan velta xchiʼuk la xchaʼkux tal» (kʼelo Jueses 15:19). Li voʼ taje epal jabil te oy, yuʼun kʼalal laj yalbe j-alkʼop Samuel ti akʼo stsʼiba li slivroal Juesese, te toʼox oy. Kʼalal chilik j-israeletik li voʼ taje, chvulesbat van ta sjolik mi la spat yoʼontonik ta stojolal li Jeovae, chkoltaatik kʼalal chil svokolike.

10. ¿Kʼusi skʼan jpastik sventa skoltautik li Jeovae? (Kʼelo xtok li lokʼoletike).

¹⁰ Jkotoltik skʼan jkʼanbetik koltael Jeova jech kʼuchaʼal la spas li Sansone. Mu ventauk kʼusi xijtojob spasel o kʼusi jtaojtik ta mantal, skʼan bikʼit xkakʼ jbatik xchiʼuk kakʼtik venta ti jaʼ noʼox lek chbat jkuxlejaltik mi tskoltautik li Jeovae. Li Sansone tsatsub yan velta kʼalal laj yuchʼ li voʼ akʼbat yuʼun Jeovae. Li voʼotik eke lek me tsotsutik ta mantal mi la jchʼamtik li koltael chakʼbutik Jeovae (Mat. 11:28).

11. ¿Kʼusi skʼan jpastik sventa skoltautik li Jeovae, xchiʼuk kʼusi chakʼ jchantik li jun nupultsʼakale?

¹¹ Kalbetik skʼoplal Aleksei ti te likem ta Rusia ti bu chichʼik kontrainele. ¿Bu staoj koltael? Li Aleksei xchiʼuk yajnile jaʼ batem ta yoʼontonik li kʼusitik sventa mantale, xi chal li Alekseie: «Jaʼ kakʼoj ta koʼonton li mantale jech kʼuchaʼal ti jchan Jvivlia jujun kʼakʼale. Jech xtok, ta jujun sobe koʼol ta jchankutik xchiʼuk kajnil li teksto sventa jujun kʼakʼale xchiʼuk koʼol ta jkʼoponkutik Jeova». ¿Kʼusi chakʼ jchantik taje? Jaʼ ti mu jpat koʼonton ta jtuktik noʼoxe, jaʼ lek jpat koʼontontik ta stojolal Jeova. Sventa jtsatsubtas li xchʼunel koʼontontike, skʼan jchan Jvivliatik, jpastik orasion, xijbat ta tsobajeletik xchiʼuk ta cholmantal. Mi jech la jpastike, ta me xakʼbutik sbendision li Jeovae xchiʼuk tskoltautik sventa jechuk-o xijtun batel ta stojolal. Li Sansone akʼbat yip yuʼun li Jeovae, jech me tspas ta jtojolaltik ek.

LI SANSONE JECH-O TUN TA STOJOLAL JEOVA

12. ¿Kʼusi muʼyuk lek kʼot ta nopel yuʼun li Sansone, xchiʼuk kʼu yuʼun jelel xchiʼuk li kʼusitik baʼyel la spase?

¹² Li Sansone jmulavil kʼuchaʼal li voʼotike, jaʼ yuʼun oy kʼusitik muʼyuk lek xbat ta nopel yuʼun. Ta skoj taje, muʼyuk lek kʼusi kʼot ta pasel yuʼun, yuʼun muʼyuk la stsak ta venta li kʼusi akʼbil sbain yuʼun Jeovae. Kʼalal oy xa ox kʼuk sjalil chtun ta jchapanvaneje, «lek laj yil jun tseb te ta stenlejaltik Sorek, Dalila sbi» (Jues. 16:4). Kʼalal skʼan toʼox xojtikin li Dalilae, ta xa ox xnupun xchiʼuk jun jfilistea ants. Pe li Vivliae chal «ti jaʼ beiltasbil yuʼun li Jeovae, yuʼun li Diose yakal tsabe yorail sventa skontrain li [jfilisteaetike]». Ta yan velta xtoke, li Sansone bat ta slumal jfilisteaetik ta Gasa, vaʼun te och ta sna jun jchonbail ants. Li Jeovae jaʼ xa yorail laj yil sventa stsak ta kʼop li jfilisteaetik te ta Gasae. Jaʼ yuʼun, laj yakʼbe yip Sanson sventa spits lokʼel li stiʼ jteklum ti jaʼ spojobbailike (Jues. 14:​1-4; 16:​1-3). Pe li Dalilae xuʼ van jaʼ j-israelal ants, jaʼ yuʼun mu van xkoltaat-o sventa stsak ta kʼop li jfilisteaetike.

13. ¿Kʼusi la spasbe Sanson li Dalilae?

¹³ Li jfilisteaetike laj yalbeik Dalila ti sjakʼbe Sanson ti bu chlik tal li yipe. Laj yakʼbeik epal plata, vaʼun la xchʼam. Pe ¿kʼu yuʼun muʼyuk laj yakʼ venta Sanson li kʼusi oy ta yoʼonton li Dalilae? ¿Mi jaʼ van ta skoj ti skʼanoj tajeke? Li Dalilae la sjakʼilanbe ep ta velta ti bu chlik tal li yipe, vaʼun laj yalbe onoʼox. Ta skoj li kʼusi la spase, muʼyuk xa yip kom li Sansone xchiʼuk muʼyuk xa lek ilat yuʼun li Jeovae (Jues. 16:​16-20).

14. ¿Kʼusi kʼot ta stojolal Sanson ta skoj ti la spat yoʼonton ta stojolal Dalilae?

¹⁴ Li Sansone jaʼ mas la spat yoʼonton ta stojolal li Dalilae, maʼuk ta stojolal Jeova. Jaʼ yuʼun, tsots laj yil svokol. Li jfilisteaetike la xchukik batel xchiʼuk la spitsbeik li sbekʼ sate. Ta tsʼakale, la stikʼik ta chukinab ta Gasa ti jaʼ li jteklum ti bu la spitsbe lokʼel li stiʼtake. Te la smosoinik sventa xjuchʼ sat tsʼunobiletik. Ta tsʼakale, li jfilisteaetike la spasik kʼin xchiʼuk laj yakʼbeik smoton li sdiosik Dagone, yuʼun tsnopik ti jaʼ akʼbat ta skʼobik li Sansone. Vaʼun, «bat slokʼesik tal ta chukel li Sansone sventa xchʼay-o yoʼontonik», jaʼ xkaltik, sventa slabanik (Jues. 16:​21-25).

15. ¿Kʼuxi laj yakʼ ta ilel Sanson ti la spat yoʼonton yan velta ta stojolal Jeovae? (Jueses 16:​28-30; kʼelo xtok li lokʼol ta pajina 1).

¹⁵ Li Sansone oy kʼusi muʼyuk lek bat ta pasel yuʼun, pe jech-o tun ta stojolal Jeova. Yuʼun la spas li kʼusi akʼbil sbain yuʼun Jeovae, jaʼ ti stsal li jfilisteaetike (kʼelo Jueses 16:​28-30). Jaʼ yuʼun, xi la skʼanbe vokol Jeova li Sansone: «Koltaun sventa xkakʼbe stojik jfilisteaetik». Li Diose laj yaʼi li kʼusi laj yal ta s-orasione, vaʼun laj yakʼbe sutel li yipe. Jech oxal, mas to ep la smil kʼalal jmoj te cham xchiʼuk li jfilisteaetike jaʼ jutuk la smil kʼalal kuxul toʼoxe.

16. ¿Kʼusi chakʼ jchantik li Sansone?

¹⁶ Li Sansone laj yil-o svokol li kʼusi chopol bat ta pasel yuʼune, pe jech-o tun ta stojolal Jeova. Mi oy kʼusi muʼyuk lek bat ta pasel kuʼuntik eke, mu me xijlubtsaj akʼo mi xkichʼtik akʼbel mantal o mi mu xa stakʼ jpastik li kʼusi jbainojtik toʼox ta steklumal Jeovae. Teuk me ta joltik ti muʼyuk tsnop Jeova ti mu xa xijtukʼibe (Sal. 103:​8-10). Akʼo mi ep kʼusitik muʼyuk lek chbat ta pasel kuʼuntik, teuk me ta joltik ti xuʼ to stunesutik jech kʼuchaʼal la spas ta stojolal li Sansone.

17, 18. ¿Kʼu yuʼun tspat avoʼonton li kʼusi la snuptan Michaele? (Kʼelo xtok li lokʼoletike).

¹⁷ Jkʼeltik kʼusi kʼot ta stojolal jun kerem ti Michael sbie. Jaʼ toʼox siervo ministerial, prekursor regular xchiʼuk jaʼ batem ta yoʼonton spasel li kʼusitik sventa mantale. Pe oy kʼusi muʼyuk lek bat ta pasel yuʼun. Jaʼ yuʼun, mu xa stakʼ spas li kʼusitik sbainoj ta tsobobbaile. Xi chal kaʼitike: «Jun toʼox koʼonton chitun ta stojolal Jeova, pe ta anil noʼox mu xa stakʼ jpas li yabtel Jeovae. Jnaʼoj ti muʼyuk chiktaune, pe la jnopilan mi xuʼ to van xkamigoin yan velta li Jeovae o mi xuʼ to van oy kʼusi xakʼbeikun jbain li ta tsobobbaile».

¹⁸ Li Michaele muʼyuk xlubtsaj, xi chale: «Jaʼ mas laj kakʼ ta koʼonton ti xinopaj ta stojolal Jeovae. Li kʼusi la skoltaune jaʼ ti la jambe koʼonton li Jeovae, la jchan Jvivlia xchiʼuk la jnopbe skʼoplal li kʼusi la jchane». Ta tsʼakale, li Michaele la sta yan velta li kʼusi sbainoj ta tsobobbaile. Li avie jaʼ xa mol ta tsobobbail xchiʼuk chtun ta prekursor regular. Xi to chal kaʼitike: «Koliyal ti la skoltaikun xchiʼuk la spatbeikun koʼonton li ermanoetike, mas to li moletik ta tsobobbaile, la skoltaun sventa xkakʼ venta ti jech-o skʼanojun li Jeovae. Jech oxal, xuʼ jun koʼonton xitun ta stojolal. Li kʼusi kʼot ta jtojolale chakʼbun kil ti ch-akʼvan ta perton Jeova mi ta melel ta jsutes koʼontontike». Jech kʼuchaʼal kʼot ta stojolal li Michaele xuʼ me stunesutik-o Jeova akʼo mi oy kʼusi muʼyuk lek chbat ta pasel kuʼuntik. Vaʼun, chakʼbutik bendision mi muʼyuk xa la jpastik li kʼusi chopole xchiʼuk mi jech-o la jpat koʼontontik ta stojolale (Sal. 86:5; Prov. 28:13).

19. ¿Kʼuxi la stsatsubtasot li sloʼilal Sansone?

¹⁹ Li ta xchanobil liʼe, laj kiltik kʼusitik la spas ta xkuxlejal li Sansone. Akʼo mi jmulavil xchiʼuk muʼyuk lek kʼusi la spas kʼalal lek laj yil li Dalilae, muʼyuk laj yal Jeova ti mu xa kʼusi stakʼ pasele, yuʼun jech-o tun ta stojolal Jeova xchiʼuk jech-o tunesat batel. Lek-o tsots xchʼunel yoʼonton laj yil. Jaʼ yuʼun, te tsakal sbi xchiʼuk li yan yajtuneltak Jeova li ta kapitulo 11 ta Ebreose. Tspat koʼontontik ti skʼanojutik xchiʼuk ti chakʼ kipaltik li Jtotik Jeovae, mas to kʼalal chkil jvokoltik xchiʼuk ta jkʼantik akʼo skoltautike. Jech kʼuchaʼal la spas li Sansone, xiuk jkʼanbetik li Jeovae: «Mu xachʼayun-o ta avoʼonton, avokoluk. Kajval Dios, avokoluk, slajeb xa velta ta jkʼanbot ti akʼo xatsatsubtasune» (Jues. 16:28).