«Tsʼet chikintaik ti kʼu yelan chavaʼiike»

TOJ tsots skʼoplal skʼan jchikintatik sventa oyuk kʼusi jchantik, yuʼun bakʼintike te tsakal skʼoplal jkuxlejaltik. Kʼalal mu toʼox jaluk slokʼesoj ta mosoil ta Ejipto steklumal li Jeovae, laj yalbe Moises ti akʼo yalbe moletik ta Israel kʼusitik skʼan spasik sventa mu xlaj ta milel yuʼun anjel li sba xnichʼonike (Éx. 12:21-23). Vaʼun li moletik eke laj yalbeik batel jujuchop utsʼ alalil li kʼusitik skʼan spasike. Ta skoj ti muʼyuk bu tsʼibabil ta jlikuk vune, persa skʼan xchikintaik lek. ¿Kʼu yelan laj yaʼiik? Xi chal li Vivliae: «Li israeletique la spasic scotol jech chac cʼu chaʼal iʼalbatic yuʼun Mucʼul Dios li Moisés chiʼuc Aarone» (Éx. 12:28, 50, 51). Ta skoj ti la xchʼunik mantale, kolik li j-israeletike.

Li avie yakal chchapanutik Jeova sventa jun kolebal ti mas to labal sbae, jaʼ yuʼun tsots tajek skʼoplal ti jchikintatik li mantaletik chkaʼitik ta tsobajeletike. ¿Mi yakal chatabe lek sbalil li tsobajeletike? Chatabe me sbalil mi xatojob xchikintael leke.

¿Mi chkom ta ajol li kʼusitik tsots skʼoplal ch-echʼ ta tsobajeletike? ¿Mi jujun xemana nopem xavaʼi chanopbe skʼoplal kʼuxi xuʼ xavakʼ ta akuxlejal o ti chavalbe yantike?

Chapano li avoʼontone

Skʼan me jchapan koʼontontik sventa jtabetik lek sbalil li chanubtasel chkichʼtik ta tsobajeletike. Ti kʼu sjalil ajvalilaj ta Juda li Josafate te chvinaj ti kʼu yuʼun tsots skʼoplal skʼan jech jpastike. Li Josafat ti lek tsots yoʼonton la spakbe skʼoplal li melel yichʼel ta mukʼ Diose «la sloqʼues li cʼopojebaletic ta toyol vitsetique xchiʼuc li slocʼobaltac Asera te ta stojol judaetique» xchiʼuk laj yalbe bankilaletik, jlevietik xchiʼuk paleetik ti xchanubtasik ta Mantal skotol li jnaklejetik ta Judae. «Pero muʼyuc onoʼox xlocʼ yuʼun scotol li cʼopojebaletic ta toyol vitsetique.» (2 Crón. 17:6-9; 20:33.) Chichʼik ta mukʼ jecheʼ diosetik li ta toyol vitsetike xchiʼuk mu lekuk ti kʼu yelan te chichʼik ta mukʼ li Jeova eke; ta skoj ti nopem tajek xaʼiike, muʼyuk chʼay-o skʼoplal.

¿Kʼu yuʼun muʼyuk jal laj yichʼ tabel sbalil li kʼusi la spas Josafate? Xi to chal batel li Vivliae: «Li judaetique mu junuc yoʼntonic [muʼyuk toʼox xchapanoj yoʼontonik, TNM] la stsʼaclinic o li Dios yuʼun smoltot syameʼic ta voʼonee». Laj yaʼiik kʼusi albatik li judaetike, pe muʼyuk la spasik. Laj van snopik ti toj vokol chaʼiik ti te to chbat yakʼik milbil matanaletik li ta templo ta Jerusalene. Kʼusiuk noʼox srasonal yuʼunik ti muʼyuk chbatike, jaʼ ta skoj ti muʼyuk chtijbat yoʼontonik yuʼun li xchʼunel yoʼontonike.

Mi mu jkʼan xijchʼay ta be yuʼun li sbalumil Satanase, skʼan me jchapan koʼontontik sventa jchʼuntik li mantaletik chakʼbutik Jeova avie. ¿Kʼuxi xuʼ jpastik? Jtos ti kʼusi tsots skʼoplale jaʼ ti jpastik orasione. Jkʼanbetik Dios sventa ta sjunuluk koʼontontik jchʼunbetik li smantaltake (Sal. 27:4; 95:2). Kʼalal jech ta jkʼanbetik li Jeovae, jaʼ tskoltautik ti oyuk sbalil xkiltik li kʼusitik tspasik li ermanoetike, manchuk mi oy spaltailik, pe ta sjunul yoʼonton chtunik ta stojolal Jeova sventa chchanubtasbeik li steklumale. Jaʼ tstij koʼontontik sventa jtojbetik ta vokol Jpasvanej li kʼusitik achʼik to ta jchantike xchiʼuk ti oyuk mas sbalil xkiltik xtok li kʼusitik jchanojtik xa onoʼoxe. Ta skoj ti oy tajek ta koʼontontik ta jpastik li kʼusi tskʼan yoʼonton Diose, xi ta jkʼanbetik vokole: «Mucʼul Dios, acʼbun lec quil li be avuʼune [...]. Acʼbun ta coʼnton ti voʼot noʼox xuʼ chaquichʼot o ta muqʼue» (Sal. 86:11).

Akʼo ta avoʼonton xchikintael

Ep li kʼusitik xuʼ xchʼay koʼontontike. Xuʼ van ta jvul koʼontontik, xuʼ van oy kʼusitik chbakʼ o chnik ta yut o ta spat li bu ta jtsob jbatike o xuʼ van oy kʼusi ip chkaʼitik. Li totil meʼiletik xtoke skʼan skʼel li yalab xnichʼnabik ti kʼoxik toe. ¿Kʼusi van tskoltautik sventa mu xchʼay koʼontontik?

Ta skoj ti xuʼ xchʼay avoʼonton yuʼun li kʼusi chakʼele, jaʼ lek jaʼ kʼelo li buchʼu tsjelubtas mantale. Saʼo xchiʼuk kʼelo li tekstoetik chal tale manchuk mi anaʼoj xa li tekstoe. Akʼo persa mu xajoyij kʼalal oy kʼusi chbakʼ chavaʼie. Mi chchʼaybot avoʼonton li kʼusi chakʼele, xuʼ van ep kʼusi mu xavaʼibe smelolal li kʼusi chalik tal ta plataformae.

Mi chchʼay avoʼonton ta skoj ti ‹toj ep chloʼilaj avoʼontone›, kʼanbo Jeova sventa junuk avoʼonton (Sal. 94:19; Filip. 4:6, 7). Ep ta velta xakʼanbe mi persa chavile (Mat. 7:7, 8). Jaʼ jun matanal yakʼoj Jeova li tsobajeletike, jaʼ yuʼun xuʼ xachʼun ti oy ta yoʼonton ti xatabe sbalile (1 Juan 5:14, 15).

Kʼalal chachikinta mantaletike

Xuʼ van xvul to ta ajol jlom kʼusitik tsotsik skʼoplal kʼalal laj yetʼes mantal junuk ermanoe. Pe kʼalal ch-echʼ junuk mantale, maʼuk noʼox sventa jkomtsan ta joltik jlomuk li kʼusitik tsotsik skʼoplale. Li mantale xkoʼolaj kʼalal oy bu chijbate: ep kʼusitik kʼupilik sba chkiltik li ta bee, pe li kʼusi mas tsots skʼoplale jaʼ ti bu ta jkʼan chijbate, li kʼusi ta jkʼan ta jtatike. Jaʼ jech li buchʼu tsjelubtas mantal eke tskʼan ti oy kʼusi xkʼot ta nopel yuʼun li buchʼu te chchikintaike o ti xtijbat yoʼontonik sventa oy kʼusi spasike.

Jkʼelbetik skʼoplal li mantal laj yalbe j-israeletik li Josuee, ta Josué 24:1 kʼalal ta 15. Li kʼusi oy ta yoʼontone jaʼ ti xakʼ lek ta yoʼontonik li melel yichʼel ta mukʼ Diose xchiʼuk ti xiktaik-o ta jyalel li yichʼel ta mukʼ jecheʼ diosetik ti jech tspasik li jteklumetik ti te nopol oyike. ¿Kʼu yuʼun toj tsots skʼoplal taje? Ta skoj ti epajem tajek skʼoplal li jecheʼ relijione, xuʼ x-akʼatik ta vokol li j-israeletike, xuʼ mu xa lekuk x-ilatik yuʼun li Jeovae. Li kʼusi albatik yuʼun li Josuee xi la stakʼik li j-israeletike: «Mu xcʼot ta pasel ta jcomtsancutic li Mucʼul Diose, ti jaʼ chbat tuncuncutic yuʼun yantic diosetique, [...] li vuʼuncutique jaʼ noʼox chituncutic yuʼun ec li Mucʼul Diose». Jech onoʼox la spasik un (Jos. 24:16, 18, 31).

Kʼalal chachikinta junuk mantale, nopo kʼusi sventa ti jech chichʼ alele. Chikintao ti kʼuxi chalbe smelolal li buchʼu chetʼes mantale xchiʼuk jakʼbo aba kʼuxi xuʼ xavakʼ ta akuxlejal li kʼusi yakal chavaʼie.

Kʼalal chichʼ jakʼel xchiʼuk chichʼ takʼele

Li Xchanel Li Jkʼel osil ta toyole, li Xchanel Vivlia ta Tsobobbail xchiʼuk jayvokʼuk mantal li ta Tsobajel sventa Tunelale chichʼ chanel jlikuk vun lokʼem ta Vivlia ti chichʼ jakʼel xchiʼuk chichʼ takʼele.

Li mantaletik taje xkoʼolaj oy buchʼu chijloʼilaj xchiʼuk, jaʼ yuʼun mas to me chatabe sbalil mi chachikinta leke. Chikintao kʼuxi snitojbe sba skʼoplal li aʼyejetike, ti kʼuxi chalbe mas smelolal xchiʼuk chal kʼusitik tsots skʼoplal li buchʼu chetʼese. Ta avoʼonton noʼox xatakʼ li kʼusi tsjakʼe. Chikintao kʼalal chchapbeik skʼoplal xchiʼuk ti chalik kʼuxi chakʼ ta xkuxlejalik li yantike, xuʼ van muʼyuk toʼox jech avaʼioj ti kʼu yelan chalbeik skʼoplal li kʼusi yakal chichʼ chanele. Jech xtok, tsatsubtasbo yoʼonton yantik kʼalal chavakʼ aloʼile (Rom. 1:12).

Jaʼ me tskoltaot sventa xavakʼ aloʼil xchiʼuk xachikintabe sloʼil yantik mi chachapan abae. Mi mu xuʼ avuʼun xachapan aba leke, chʼako noʼox jayibuk minuto sventa xakʼel skotol li kʼusi chichʼ chanel ta tsobajele, vaʼun jech chatabe mas sbalil.

Ta asamblea

Li ta asambleae mas to van ep kʼusi chchʼay koʼontontik, jaʼ mu sta li ta tsobajeletike, jaʼ yuʼun mas to van vokol chkaʼitik ti xkakʼ ta koʼontontik xchikintaele. ¿Kʼusi xuʼ skoltaot?

Tsots skʼoplal ti jkuxtik lek li ta akʼobaltike. Kʼalal skʼan toʼox xlik li mantale, komtsano ta ajol kʼusi stemail li vaʼ kʼakʼale, kʼelo li sbitak mantale xchiʼuk baʼyel xa onoʼox nopo ti kʼusi chalbe skʼoplale. Tuneso li Avivliae. Ep buchʼutik yakʼojik venta ti mas to chakʼ ta yoʼontonik xchikintael kʼalal tstsakik ta vun jlomuk li kʼusitik tsots skʼoplal chichʼ alele. Tsʼibao li kʼusi chakʼan chavakʼ ta akuxlejale o ti chatunes ta cholmantale. Jech xtok, kʼalal chabat jujun kʼakʼal ta asamblea xchiʼuk kʼalal chasut tale, loʼiltabo skʼoplal li kʼusi jelave. Mi jech chapase, jaʼ tskoltaot sventa xkom ta ajol.

Chanubtaso sventa xchikintaik li akʼoxtake

Li yajtsʼaklomtak Kristoe ‹tspʼijubtasik ta sventa kolebal› li yalab xnichʼnabik kʼalal chikʼik batel ta tsobajel xchiʼuk ta asambleae, manchuk mi kʼoxik to tajek (2 Tim. 3:15). Ta skoj ti jelel stalelalik xchiʼuk ti jelel kʼu yepal xuʼ yuʼunik xchikintael li ololetike, skʼan xtojobik ti kʼuxi chchanubtasik sventa xchikintae. Xuʼ van xtun avuʼun li tojobtaseletik liʼe.

Li ta anae chʼakbo yorail kʼuk sjalil sventa xchotiik li akʼoxtake xchiʼuk kʼelik vunetik ti lokʼemik ta Vivliae o kʼelik li sdivujoaltake. Mu xachʼaybe yoʼonton ta ixtolaletik li ta tsobajele. Li srasonal ti kʼu yuʼun chbatik ta tsobajele xkoʼolaj kʼuchaʼal li ta voʼneal Israele: «Acʼo tal yaʼyic scotolic li smantal Mucʼul Dios chavaptaique. Yuʼun jech acʼo xchanic» (Deut. 31:12). Kʼalal sta-o chilik jlom totil meʼile, chakʼbeik yalab xnichʼnabik jlikuk li vun ti yakal chichʼ chanele manchuk mi kʼoxik to tajek. Mi mas xa mukʼtik li ololetike, koltaik sventa xchapan sbaik yoʼ xakʼ sloʼilik kʼalal ch-echʼ junuk parte ti chichʼ jakʼel xchiʼuk chichʼ takʼele.

Li Vivliae chakʼ ta ilel ti snitojbe sba tajek skʼoplal xchikintael li kʼusi chal Jeova xchiʼuk ti chichʼ chʼunbel smantale. Taje jech chakʼ ta ilel kʼalal xi laj yalbe j-israeletik li Moisese: «Laj xa cacʼboxuc atʼujic li cʼusi chacʼanique: ¿Me jaʼ chacʼanic li cuxlejale, o me jaʼ chacʼanic li lajele? ¿Me jaʼ chacʼanic li bendicione, o me jaʼ chacʼanic li stojol mulile? Jaʼ lec jaʼ cʼanic li cuxlejale [...]. Jaʼ me cʼanic li Mucʼul Dios avuʼunique. Chʼunbeic [chikintabeik, TNM] li cʼusi chayalboxuque, xchiʼuc junuc avoʼntonic o ta stojol» (Deut. 30:19, 20). Li avie toj tsots skʼoplal ti jchikintatik li kʼusi chakʼ jchantik Jeovae xchiʼuk ti xkakʼ ta jkuxlejaltike, yuʼun jaʼ noʼox jech xuʼ lek xilutik xchiʼuk xuʼ jtatik li kuxlejal sbatel osile. Jaʼ yuʼun skʼan jchʼuntik li kʼusi xi laj yal Jesuse: «Tsʼet chikintaik ti kʼu yelan chavaʼiike» (Luk. 8:18).