Muyubajan noʼox kʼalal chakʼopoje

KʼALAL xamuyubaj chakʼopoje, kʼupil sba ta aʼiel li mantale. Manchuk mi tsots skʼoplal li kʼusi chavale, muʼyuk me chchikintaik kʼusi chaval mi muʼyuk xamuyubaj chakʼopoje. Xuʼ me jchantik ti xijmuyubaj noʼox chijkʼopoje manchuk mi jeltos jkuxlejaltik xchiʼuk jtalelaltik.

Jaʼuk jech xaval ti kʼu yelan chavaʼi abae. Li Jesuse laj yalbe jun jsamaria ants ti skʼan xichʼik ta mukʼ Jeova «jech kʼuchaʼal tskʼan chʼul espiritu xchiʼuk li kʼusi melele» (Juan 4:24). Skʼan xichʼik ta mukʼ ta sjunul yoʼontonik xchiʼuk ti jechuk spasik kʼuchaʼal chal li Skʼop Diose. Xvinaj ta skʼopojel li buchʼu jech oy ta yoʼontone. Oy tajek ta yoʼonton chalbe batel yantik li kʼusitik yakʼoj Jeova ta slekil yoʼontone. Xvinaj ta sat, ta skʼopojel xchiʼuk ta stalelal li kʼu yelan chaʼi sbae.

Oy jlom li buchʼutik tsjelubtasik mantal ti skʼanojik Jeova xchiʼuk ti xchʼunojik li kʼusi chalike muʼyuk xmuyubaj chkʼopojik. ¿Kʼu yuʼun? Yuʼun mu baluk noʼox ti chchapan sbaik leke. Skʼan skʼupinik lek li kʼusi ch-echʼ yalike xchiʼuk ti oyuk lek ta yoʼontonike. Jnoptik ta sventa jun ermano ti ch-echʼ yalbe skʼoplal li pojelal laj yakʼ Jesukristoe. Kʼalal chetʼese, maʼuk noʼox chalbe skʼoplal li pojelale, skʼan xakʼ ta ilel ti ep sbalil tstabeik ti laj yakʼ sba ta matanal li Jesuse xchiʼuk ti epuk sbalil xilik ek li buchʼutik te oyike. Sventa spas yuʼun taje, skʼan teuk ta sjol ti skʼan stojbe tajek ta vokol Jeova xchiʼuk Jesus li kʼupil sba matanale. Skʼan snopbe skʼoplal ti kʼuxi tstabeik sbalil li krixchanoetike: tstaik kuxlejal sbatel osil ti bu muʼyuk xa ch-ipajike xchiʼuk ti xmuyubaj chnakiik ta jun paraisoe. Jech oxal skʼan jechuk xal ti kʼu yelan chaʼi sbae.

Li Vivliae xi chalbe skʼoplal jun jchanubtasvanej ta Israele: «Li Esdrase jaʼ noʼox oy ta yoʼnton o [«la xchapan yoʼonton», TNM] ta xchan lec li smantaltac Mucʼul Diose, xchiʼuc oy ta yoʼnton tspas batel, xchiʼuc oy ta yoʼnton chchanubtas ta smantaltac Dios li xchiʼiltaque» (Esd. 7:10). Mi ta jchapan koʼontontik li voʼotik eke, ti maʼuk noʼox ta jchapantik li kʼusi ch-echʼ kaltike, chlokʼ me tal ta koʼontontik kʼalal chkalbetik skʼoplal li kʼusi melele. Taje jaʼ chkoltavan sventa xkʼot ta yoʼontonik kʼusi melel li buchʼutik te chchikintaike.

Teuk ta ajol li buchʼutik te chchikintaike. Li kʼusi tskoltaot xtok sventa xamuyubaj noʼox xakʼopoje, jaʼ mi achʼunoj lek ti chtun yuʼun yantik li kʼusi chavalbe skʼoplale. Taje jaʼ skʼan xal ti maʼuk noʼox skʼan xasabe skʼoplal li mantal kʼalal chachapan abae, jaʼ yuʼun albo akʼo skoltaot Jeova sventa stabeik sbalil yantik li kʼusi ch-echʼ avalbe skʼoplale (Sal. 32:8; Mat. 7:7, 8). Jakʼbo aba ti kʼu yuʼun skʼan xchikintaik li kʼusi chavalbe skʼoplale, ti kʼuxi xuʼ stabeik sbalile xchiʼuk ti kʼuxi xuʼ xavalbe skʼoplal sventa xakʼik venta ti oy sbalile.

Jaʼ to xavikta aba xchapanel aparte mi xamuyubaj yuʼun ti kʼu yelan la achapane. Mu persauk ti achʼik to smelolal li kʼusi chavalbe skʼoplale, pe xuʼ xajel ti kʼu yelan xuʼ xakʼ ta xkuxlejalike. Ta muyubajeluk me xakʼopoj kʼalal chajelubtas junuk aparte mi jaʼ sventa tskolta yantik yoʼ lekuk xil sbaik xchiʼuk Jeovae, jech xtok ta muyubajeluk me xakʼopoj mi tskolta yantik sventa stojbeik ta vokol Dios li kʼusitik yakʼojbutike, mi jaʼ sventa stsal yuʼunik li vokoliletik ta xkuxlejalik liʼ ta mol balumile o mi jaʼ chkoltaatik sventa xtojobik lek ta cholmantal.

¿Kʼusi xuʼ xapas mi skʼelel o yaptael noʼox vun ataoj li ta apartee? Sventa xamuyubaj chakʼopoje, maʼuk noʼox me bal ti sjunlej orasion chakʼele o ti lek xpʼejlajet chakʼele. Skʼan xachan lek li bu ataoj skʼelele. Sabo mas yaʼyejal mi chakʼel junuk loʼil ta Vivliae. Akʼo venta mi xavaʼibe lek smelolal. Nopo kʼuxi chatabe sbalil xchiʼuk kʼuxi tstabeik sbalil li buchʼutik te chchikintaike, vaʼun kʼalal chakʼele, oyuk-o ta avoʼonton ti xaʼibeik smelolale.

¿Kʼusi xuʼ xapas mi yakal chachapan aba sventa li cholmantale? Chaʼkʼelo li kʼusi anopoj chavalbe skʼoplale xchiʼuk li tekstoetik chakʼan chakʼele. Tsako ta venta xtok ti kʼusi tsnopik li krixchanoetike. ¿Kʼusitik chkʼot ta pasel? ¿Kʼusitik vokolil tsnuptanik? Mi achapanoj aba sventa xavakʼbe yil kʼusi chal Vivlia ta sventa ti kʼuxi chichʼ lajesel ta tsʼakal li vokoliletike, jech me oy ta avoʼonton chavakʼbe yil xchiʼuk xamuyubaj jech chapas.

Akʼo stij oʼontonal li apartee. Mas xvinaj ta jkʼopojeltik xchiʼuk ta jsatik kʼalal xijmuyubaje. Akʼo ta ilel ti achʼunoj li kʼusi chavale, pe mu me jpʼeluk xa xaval xtok un.

Jaʼ yuʼun, oyuk noʼox spʼisol ti kʼu yelan chapas taje. Jlome chakʼbeik smasil ti xmuyubaj chkʼopojik ta kʼusuk noʼoxe, kʼalal jeche, skʼan van albel ti mu lekuk jech spasik kʼalal tsjelubtasik mantale, yuʼun xuʼ snop yantik ti jaʼ tsots skʼoplal chaʼi sba stukike, ti jaʼ mu masuk li mantal tsjelubtasike. Pe li buchʼu stsʼijetik noʼoxe, skʼan tijbel yoʼontonik sventa masuk xmuyubaj xkʼopojik.

Chmuyubajik me yantik ek mi xijmuyubaj kʼalal chijkʼopoje. Mi jkʼelojbetik sat li buchʼu ta jkʼopontike xchiʼuk mi xijmuyubaj chijkʼopoje, chmuyubajik ek. Li Apolose xmuyubaj chkʼopoj xchiʼuk xtojob lek ta kʼopojel jech kʼuchaʼal chal li Vivliae. Xuʼ me xatijbe yoʼonton yantik sventa spasik kʼusi chaval mi xamuyubaj chakʼopoj ta skoj ti yakʼojbot lek atsatsal li xchʼul espiritu Diose (Ech. 18:24, 25; Rom. 12:11).

Muyubajan kʼalal chakʼopoj mi sta-o li kʼusi chavetʼese. Ichʼo apʼijil xtok sventa mu xamuyubajuk tajek xakʼopoj ta sjunul li apartee, yuʼun xuʼ van xtavan xaʼiik. Mi jeche, xuʼ van mu xa xkʼot ta yoʼontonik jtosuk li kʼusi chaval ti skʼan spasike. Taje chakʼ ta ilel ti skʼan onoʼox jelulanel ti kʼu yelan chichʼ alel li mantale. Mu me xavakʼ ta ilel xtok ti xuʼ noʼox chavaʼi kʼuk yelan chaval li mantale. Mi chatʼuj lek li kʼusi chavalbe skʼoplale, kʼupil me sba chaʼiik skotol. Pe jaʼ noʼoxe mu skotoluk sta-o ti xamuyubaj chavalbe skʼoplale, jlom noʼox ti bu sta-oe. Jaʼ yuʼun, skʼan xavakʼ venta butik skʼan xamuyubaj chakʼopoj xchiʼuk butik mu sta-o.

Skʼan me mas xamuyubaj chaval ti bu tsotsik skʼoplale. Skʼan jamal xvinaj li bu tsotsik skʼoplal ta apartee, yuʼun jaʼ mas chavalbe skʼoplal xchiʼuk jaʼ tstijbe yoʼonton li buchʼutik te chaʼiike. Kʼalal xchʼunojik xaʼoxe, skʼan xatijbe yoʼontonik xchiʼuk albo yaʼiik kʼusi sbalil tstaik mi chakʼ ta xkuxlejalik li kʼusi laj avale. Ti xamuyubaj chakʼopoje jaʼ chkʼot-o ta yoʼonton yantik li kʼusi chavale. Jaʼ yuʼun, mu vokoluk chlokʼ tal ti xijmuyubaj chijkʼopoj mi sta-o lek li kʼusi yakal chkalbetik skʼoplale.