Akʼo ta ilel li kʼusitik oy ta avoʼontone xchiʼuk ti chakʼanvane

STALEL onoʼox ti oy kʼusi chaʼi ta yoʼonton li krixchanoetike. Kʼalal chal kʼu yelan chaʼi sba jun krixchanoe, jaʼ te chvinaj li kʼusi oy ta yoʼontone, ti kʼu yelan ta melele, ti kʼu yelan chil li yantike xchiʼuk li kʼusitik tsnuptane. Ta skoj ti kʼusi snuptanoj ta xkuxlejalik junantike, mu xalik li kʼusi oy ta yoʼontonike, li junantik xtoke jaʼ ta skoj ti kʼu yelan stalel xkuxlejalike. Pe li Jeovae chalbutik ti akʼo kakʼtik persa ti xlekub batel jtalelaltike xchiʼuk ti akʼo kakʼtik lek ta ilele (Rom. 12:10; 1 Tes. 2:7, 8).

Mi mu xvinaj ta jkʼopojeltik li kʼusi oy ta koʼontontike, xuʼ van mu xchʼunik lek kʼusi chkaltik li buchʼutik chchikintabutike. Pe mi lek xa kʼupil sba yechʼomal ke chkaltike, jun yutsil tajek chkʼot ta yoʼontonik.

Akʼo ta ilel ti chakʼanvane. Ti kʼu yelan chkiltik li yantike jaʼ te chvinaj mi chijkʼanvanutik. Kʼalal jaʼ chkalbetik skʼoplal li skʼupil talelaltak Jeovae xchiʼuk kʼalal ta jtojbetik ta vokol li slekil yoʼontone, skʼan kʼupiluk sba ta aʼiel li yechʼomal ketike (Is. 63:7-9). Jech xtok, skʼan kʼupiluk sba ta aʼiel yechʼomal ketik kʼalal ta jkʼopontik junuk krixchanoe.

Jun vinik ti ip ta kʼaʼemal chamele bat skʼanbe vokol Jesus ti akʼo xpoxtaate. Nopo noʼox avaʼi ti kʼu yelan yechʼomal ye Jesus kʼalal xi laj yalbee: «¡Ta jkʼan!; kolan» (Mar. 1:40, 41). Nopbo skʼoplal xtok «jun ants ti oy xa ta lajcheb jabil ti mu xmak xchamele» ti kʼunkʼun chnopaj batel ta spat li Jesuse, vaʼun «la spikbe li stsitsimal skʼuʼ slapoj ta sbae». Kʼalal laj yakʼ venta ti yichʼ ilele, xtʼeltʼun nopaj batel, la skejan sba ta stojolal Jesus xchiʼuk jamal laj yalbe sjunul jteklum ti kʼu yuʼun la spike xchiʼuk ti kʼuxi poxtaj ta anile. Nopo noʼox avaʼi ti kʼu yelan yechʼomal ye Jesus kʼalal xi laj yalbee: «Jtseb, lapoxtaj xa ta skoj li xchʼunel avoʼontone. Junuk avoʼonton batan» (Luk. 8:42 xchaʼvokʼal kʼalal ta 48). Kʼalal to tana tstij koʼontontik ti kʼu yelan kʼuxubinvan li Jesuse.

Chvinaj me ta jkʼopojeltik kʼalal oy ta koʼontontik xkʼuxubinel li yantike xchiʼuk kʼalal ta sjunul koʼontontik ta jkoltatik jech kʼuchaʼal la spas li Jesuse. Kakʼtik ta ilel ti chijkʼanvan kʼalal chijkʼopoje, lokʼuk ta koʼontontik xchiʼuk mu me nakauk noʼox jkuy jbatik. Mi ta slekil koʼontontik chijkʼopoje, jaʼ me chkoltavan sventa lekuk stakʼbutik li buchʼu ta jkʼopontike. Jutuk mu skotoluk velta kʼalal ta jcholtik mantale, xuʼ xkakʼtik ta ilel ti chijkʼanvane. Taje mas to jech skʼan jpastik kʼalal chijrasonaj xchiʼuk li krixchanoetike, kʼalal ta jtijbetik yoʼontonike, kʼalal ta jtojobtastike o kʼalal jech chkaʼi jbatik jech kʼuchaʼal chaʼi sba stukik ta skoj li svokolike.

Akʼo vinajuk ta asat ti akʼanoj li krixchanoetike. Mi xvinaj ta asat ti chakʼanvane, chnopaj tal li buchʼutik chchikintaike jech kʼuchaʼal chnopajik tal ta kʼokʼ kʼalal toj sik li ta akʼobaltike. Pe mi mu xvinaj ta asat ti chakʼanvane, xuʼ van snopik ti muʼyuk chakʼanvan ta melele. Skʼan xijkʼanvan ta melel, mu jechuk noʼox jkuy jbatik.

Skʼan xkakʼtik ta ilel xtok ti chijkʼanvan kʼalal chijkʼopoje. Mi tsots xanaʼ xakʼopoj xchiʼuk ti kʼuxik noʼox ta aʼiele, xuʼ van vokol chavaʼi chavakʼ ta ilel slekil avoʼonton kʼalal chakʼopoje. Pe mi chavakʼ persae, xuʼ spas avuʼun. Jtos ti kʼusi xuʼ skoltaote jaʼ ti teuk ta ajol ti mu lekuk ta aʼiel mi cha-ilin yilel xchiʼuk mi kʼuxik ta aʼiel kʼalal chakʼopoje. Jech xtok, skʼan teuk ta ajol ti skʼan mas xlamet xakʼopoje. Mi jech chapase, mas me kʼupil sba ta aʼiel li akʼopojele.

Pe jtos ti kʼusi mas tsots skʼoplale jaʼ ti oyuk ta avoʼonton chavakʼ ta ilel ti chakʼanvane. Ta me xvinaj ta akʼopojel mi oy ta avoʼonton ta melel ti akʼo stabeik sbalil yantik li kʼusi chavale.

Manchuk mi tsots skʼoplal ti stij oʼontonal li mantal chavetʼese, pe mas to tsots skʼoplal ti xavakʼ ta ilel ti chakʼanvane. Mu baluk mi jaʼ noʼox chkakʼbetik snopbe skʼoplal mantal li buchʼu chaʼibutike, skʼan jtijbetik yoʼonton.

Akʼo ta ilel li kʼusitik oy ta avoʼontone. Kʼalal oy jvokoltike, xuʼ van xvinaj li kʼusi oy ta koʼontontike, chvinaj ta jsatik ti chkat koʼontontike, ti chijxiʼutike xchiʼuk ti muʼyuk jbalil chkaʼi jbatike. Jtos li kʼusi skʼan xvinaj ta jkuxlejaltike xchiʼuk ti skʼan xvinaj kʼalal chijloʼilaje, jaʼ ti xijmuyubaje. Pe skʼan jnakʼtik jlom li kʼusitik oy ta koʼontontike, yuʼun li jlome mu sta-o jech stalelal li yajtsʼaklomtak Kristoe (Efes. 4:31, 32; Filip. 4:4). Xuʼ xkakʼtik ta ilel skotol kʼusitik oy ta koʼontontik kʼalal ta jnoptik lek li kʼusi chkaltike, kʼalal lek ta jtunestik li yechʼomal ketike, ti kʼu stsatsal chijkʼopoje, kʼalal ta jpastik senyail ta jsatik, ta jkʼobtik o yantik senyail.

Li Vivliae chalbe skʼoplal krixchanoetik li kʼusi laj yaʼi ta yoʼontonike. Bakʼintike chalbe skʼoplal li kʼusi oy ta yoʼontonike, bakʼintik xtoke chal kʼusi kʼot ta pasel ti chakʼ ta ilel ti kʼu yelan laj yaʼi sbaike. Kʼalal chakʼel o chavapta Vivliae, mas me chatabe sbalil xchiʼuk mas me tstabeik sbalil yantik mi chavakʼ ta aʼiel ta yechʼomal ave ti kʼu yelan laj yaʼi sbaik li buchʼutik te chalbe skʼoplal li Vivliae. Jaʼ yuʼun skʼan voʼotuk xa jech xavaʼi aba jech kʼuchaʼal chaʼi sbaik li buchʼutik te chalbe skʼoplal li ta Vivliae. Li buchʼutik te chchikintaik eke kuxuluk xa chilik li buchʼutik chachanbe skʼoplal ta Vivliae. Pe oyuk noʼox me spʼisol ti kʼu yelan chapase xchiʼuk ti kʼu yelan chakʼopoje.

Stauk-o li kʼusi chavalbe skʼoplale. Jech kʼuchaʼal tsots skʼoplal ti xijmuyubaj chijkʼopoj mi sta-o li kʼusi chkalbetik skʼoplale, jech tsots skʼoplal ek ti xkakʼtik ta ilel ti chijkʼanvan xchiʼuk ti xkakʼtik ta ilel kʼusi oy ta koʼontontik mi sta-o li kʼusi chkaltike.

Saʼo Mateo 11:28 kʼalal ta 30 xchiʼuk aʼibo lek smelolal li kʼusi chale. Laje kʼelo Mateo kapitulo 23, vaʼun te chavakʼ venta ti kʼu yelan ilin Jesus ta stojolal li jchanubtasvanejetik ta Mantal xchiʼuk jfariseoetike. Ta melel xuʼ jnoptik ti ilinem xchiʼuk kapem sjol Jesus kʼalal laj yale.

¿Kʼu yelan skʼan xavakʼ ta aʼiel ta akʼopojel kʼalal chakʼel Génesis kapitulo 44 ti te chalbe skʼoplal kʼu yelan la skʼan vokol Juda sventa mu xkom ta mosoil li yitsʼin ti Benjamin sbie? Kʼelo ta versikulo 13 ti kʼu yelan laj yaʼi sbaike, kʼelo ta versikulo 16 ti kʼusi la snop Juda ti kʼu yuʼun chil svokolike xchiʼuk ti kʼu yelan laj yaʼi sba Jose ti chal ta Génesis 45:1.

Mi oy ta koʼontontik ti lek chbat ti kʼu yelan ta jkʼeltik vun xchiʼuk ti kʼu yelan chijkʼopoje, maʼuk noʼox me skʼan jnopbetik skʼoplal li jujupʼel kʼope o li smelolale, skʼan me xlokʼ ta koʼontontik li kʼusi chkaltike.