Jech xakʼopoj jech kʼuchaʼal onoʼox nopem xavaʼie

MI JECH chijkʼopoj kʼuchaʼal onoʼox nopem xkaʼitike, tspat me yoʼonton ta jtojolaltik li yantike. ¿Mi chapat avoʼonton ta stojolal junuk krixchano ti slapoj smaskara kʼalal tskʼoponote? ¿O mi jaʼ van chapat-o avoʼonton yuʼun mi solel toj kʼupil sba li smaskara slapoje? Ta melel moʼoj. Jaʼ yuʼun mu me yanuk-o xapas aba kʼalal chakʼopoje, jaʼ lek ti xakʼopoj jech kʼuchaʼal onoʼox nopem xavaʼie.

Ti chijkʼopoj jech kʼuchaʼal onoʼox nopem xkaʼitike, jaʼ skʼan xal ti oyuk smelolal li kʼusi chkaltike. Jtsaktik me ta venta li gramatika kʼalal chijkʼopoje, lekuk xkaltik li jujupʼel kʼope, lekuk xpʼejlajet xijkʼopoj xchiʼuk mu me jtunestik li jpʼelantik kʼop ti muʼyuk lek ta aʼiele. Ichʼvankutik me ta mukʼ ta jkʼopojeltik xchiʼuk li ta jtalelaltike. Li buchʼu chkʼopoj jech kʼuchaʼal onoʼox nopem xaʼie, oyuk noʼox smelolal kʼu yelan tspas xchiʼuk maʼukuk xbat ta yoʼonton ti kʼu yelan ch-ilat yuʼun li yantike.

Li kʼusi skʼan jpastik ta cholmantale. ¿Mi chaxiʼ kʼalal chanopaj batel ta jpʼejuk na o ta stojolal junuk krixchano sventa chacholbe mantale? Jutuk mu jkotoltik jech chkʼot ta jtojolaltik, li jlome mas jlikel chchʼay yuʼunik li xiʼele, pe li yantike mas jal. Kʼalal chijxiʼe, xuʼ van mu xa xlokʼ lek ta alel kuʼuntik li kʼusi chkaltike xchiʼuk muʼyuk xa smelolal ti kʼu yelan ta jbakʼes li jkʼobtike xchiʼuk li joltike.

Oy ep srasonal ti kʼu yuʼun chijxiʼe. Xuʼ van sjakʼbe sba kʼu yelan ch-ilat yuʼun yantik li jcholmantale o mi lek van chbat yuʼun li kʼusi chale. Stalel onoʼox ti jech ta jakʼbe jbatike, pe chopol me mi jaʼ xa chbat tajek ta koʼontontike. ¿Kʼusi xuʼ xapas mi chaxiʼ kʼalal chalokʼ ta cholmantale? Chapano lek aba xchiʼuk vokoletan ta stojolal Jeova (Ech. 4:29). Nopbo lek skʼoplal ti kʼu yelan chkʼuxubin krixchanoetik li Jeovae, ti muʼyuk xa buchʼu ch-ipajik xchiʼuk ti chkuxiik sbatel osil li ta Paraisoe. Nopbo skʼoplal li buchʼutik chakoltae, ti persa skʼan xaʼiik li lekil aʼyejetike.

Teuk me ta ajol xtok ti xuʼ tsnop stuk mi chchikinta lekil aʼyej li jun krixchanoe o mi moʼoj. Jech kʼot ta stojolal Jesus ek kʼalal la xcholbe mantal li j-israeletik ta voʼnee. Li kʼusi noʼox abainoje jaʼ ti xachol mantale (Mat. 24:14). Manchuk mi mu skʼan xchikintaik li kʼusi chavale, xkoʼolaj kʼuchaʼal laj xa acholbe mantal mi laj yilikote. Lek kʼusi chkʼot ta pasel avuʼun, yuʼun ayanem ta avoʼonton ti akʼo stunesot Jeova sventa chapas li kʼusi tskʼan yoʼontone. Kʼalal chchikintaik li kʼusi chavale, ¿kʼu yelan li akʼopojele? Kʼupil me sba ta aʼiel xchiʼuk jech me chakʼopoj jech kʼuchaʼal onoʼox nopem chakʼopoj mi oy ta avoʼonton li kʼusitik chtun yuʼun li yantike.

Jechuk-o me atalelal xchiʼuk jechuk-o me xakʼopoj jech kʼuchaʼal onoʼox nopem xavaʼi chakʼopoj kʼalal chachol mantale, vaʼun mas jun yoʼonton chchikintaik mi jech chapase. Xuʼ van mas oy ta yoʼonton chchikintaik li mantaletik ta Vivlia chavalbe skʼoplale. Mu me voʼotuk noʼox te xavulvun, jaʼ lek loʼilajan achiʼuk. Lekuk avoʼonton, oyuk ta avoʼonton li krixchanoe xchiʼuk albo ti lek ti chal sloʼile. Paso me jech mi skʼan pasel li kʼusitik onoʼox nopem xaʼiik sventa chij-ichʼvan ta mukʼ ta skoj ti jelel slumalik o jelel skʼopike. Teuk me ta ajol ti lek me tajek mi stseʼet noʼox li jsatike.

Kʼusi skʼan jpastik kʼalal teutik ta plataformae. Kʼalal oyot ta stojolal junuk grupoe, jechuk-o me xakʼopoj jech kʼuchaʼal onoʼox nopem xavaʼie xchiʼuk jechuk-o me stsatsal xakʼopoj jech kʼuchaʼal onoʼox chaloʼilaje. (Pe skʼan me mas tsots xakʼopoj mi mas ep li krixchanoetike.) Mi chakomtsan ta ajol li apartee o mi solel jujupʼel xa kʼop atsakoj ta vune, xuʼ van jaʼ xa chbat tajek ta avoʼonton stunesel li jujupʼel kʼop atsʼibaoje. Tsots me skʼoplal ti jtʼujtik li jujupʼel kʼope, pe maʼuk me xbat ta koʼontontik un, yuʼun mu xa jechuk chijkʼopoj jech kʼuchaʼal onoʼox nopem xkaʼitik chijkʼopoj mi jech ta jpastike. Baʼyel nopo lek li kʼusi chavale, pe jaʼ akʼo ta avoʼonton li kʼusi chakʼan chavalbe skʼoplale, maʼuk li jujupʼel kʼope.

Jaʼ jech skʼan xapas xtok kʼalal chavichʼ jakʼbel aloʼil li ta tsobajele. Chapano lek aba mi chavichʼ jakʼbel aloʼile, pe mu xakomtsan ta ajol xchiʼuk mu xakʼel ta vun li kʼusi chavale. Jelilanbo snukʼilal li kʼusi chavale jech kʼuchaʼal onoʼox nopem xavaʼi chakʼopoje yoʼ kʼupiluk sba ta aʼiel kʼalal chaval aloʼile.

Akʼo mi chapas li kʼusitik skʼan pasel sventa chavetʼes mantale, muʼyuk lek ta aʼiel mi chavakʼbe smasile. Jech kʼuchaʼal liʼe, lekuk xpʼejlajet xakʼopoj xchiʼuk lekuk xaval jujupʼel kʼop, pe oyuk noʼox me smelolal yoʼ lekuk ta aʼiel li kʼusi chavale. Akʼo mi kʼupil sba yuʼun jpartetik kʼalal ta jtunestik li senyailtak sventa chkaltik kʼu yelane o li senyailtak sventa chkakʼtik ta aʼiel li kʼusi tsots skʼoplale, muʼyuk me sbalil chkʼot mi muʼyuk lek ta jpastike, yuʼun chchʼaybe sbalil li kʼusi chkaltike. Toyo jutukuk yechʼomal ave mi sta-o chavile, pe mu me toj tsotsuk xtok un. Bakʼintike lek me mi xamuyubaj kʼalal chakʼopoje, pe mu me xajelav ta mas. Jelilanbo snukʼilal li kʼusi chavale, muyubajan kʼalal chakʼopoje xchiʼuk akʼo ta ilel li kʼusitik oy ta avoʼontone, pe ichʼo me apʼijil ti mu voʼotuk mas tsots akʼoplal xayilik xchiʼuk ti mu chopoluk chaʼi sbaik li buchʼutik te oyike.

Manchuk mi muʼyuk yakal chetʼes sparteik li junantik krixchanoetike, lek onoʼox tajek ta aʼiel kʼalal chkʼopojike, pe mu jechuk li junantik xtoke. Li kʼusi mas tsots skʼoplale jaʼ ti lekuk xijkʼopoj jujun kʼakʼale xchiʼuk jechuk jtalelaltik kʼuchaʼal tskʼan li Diose. Mi jech chapas jujun kʼakʼale, kʼalal te oyot ta plataformae jaʼ me jech chapas atalelal xchiʼuk akʼopojel jech kʼuchaʼal onoʼox nopem xavaʼie.

Kʼusi skʼan xapas kʼalal chakʼel vun ta yeloval krixchanoetike. Skʼan xkakʼtik persa ti jechuk jkʼeltik o xkaptatik vun jech kʼuchaʼal onoʼox nopem xkaʼitik chijkʼopoje. Baʼyele kʼelo li kʼusi mas tsotsik skʼoplale xchiʼuk akʼo venta ti kʼu yelan chal batele. Teuk me ta ajol taje, yuʼun muʼyuk me smelolal kʼusi chakʼel mi mu jechuk chapase. Saʼo ta diksionario li kʼusi mu xavaʼibe smelolale. Laje tsots xakʼel, jelilanbo lek snukʼilal xchiʼuk kʼelo sjunul orasion sventa lekuk ta aʼibel smelolal li kʼusi chavale. Chanilano-o batel jaʼ to mi lek xa xcholet li kʼusi chavale. Aʼibo lek smelolal li kʼusi chakʼele jaʼ to mi laj avakʼbe lek snukʼilal jech kʼuchaʼal onoʼox chaloʼilaje. Jech xa me chakʼopoj kʼuchaʼal onoʼox chakʼopoj mi pas avuʼun li kʼusitik taje.

Jutuk mu skotoluk li vun ta jkʼeltik ta yeloval li krixchanoetike jaʼ li jvuntik lokʼemik ta Vivliae. Li ta Chanob vun sventa Kabteltik yuʼun Diose chkichʼ jpartetik sventa skʼelel Vivlia, pe maʼuk noʼox taje, ta jkʼeltik tekstoetik xtok kʼalal chijlokʼ ta cholmantale xchiʼuk kʼalal chketʼes jpartetik li ta plataformae. Li viniketike ch-akʼbat skʼelik parafoetik li ta Xchanel Li Jkʼel osil ta toyole xchiʼuk li ta Xchanel Vivlia ta Tsobobbaile, bakʼintik xtok li jlom ermanoetike lek xa snaʼik sjelubtasel mantaletik ta asamblea rejional ti kʼelbil noʼox ta jun voskejoe. Mi chakʼel junuk loʼil ta Vivlia o junuk vun ti te chal kʼusi yaloj junuk krixchano o yan kʼusitike, kʼupiluk sba xakʼel. Mi ep buchʼu chkʼopoj li ta vun chakʼele, jelilano jutukuk li yechʼomal ave kʼalal chjel li buchʼu chkʼopoje. Pe oyuk noʼox me smelolal kʼalal jech chapase. Kʼupiluk sba ti kʼu yelan chakʼel li vune xchiʼuk jech me xapas jech kʼuchaʼal onoʼox nopem xavaʼie.

Jechuk me jkʼeltik vun jech kʼuchaʼal onoʼox nopem xkaʼitik chijloʼilaje. Skʼan jchʼunojtikuk lek xtok li kʼusi chkaltike.