Jechuk xaloʼilaj jech kʼuchaʼal onoʼox chaloʼilaje

LEKTIK onoʼox xaʼi xloʼilaj xchiʼuk yamigotakik li krixchanoetike, jaʼ yuʼun chal ta skʼop stukik li kʼusi chalike. Lek xaʼi xloʼilaj li jlom krixchanoetike, yan li jlome mu masuk snaʼ xloʼilajik. Manchuk mi lek jnaʼ xijloʼilaj o mi muʼyuk, jaʼ onoʼox toj kʼupil sba ti jech xijkʼopoj jech kʼuchaʼal chijloʼilaj onoʼoxe.

Pe muʼyuk me lek mi solel xkojtikintik xa yilel kʼu yelan ta jkʼopontik li buchʼu mu xkojtikintike. Li ta yan lumetike jelel tajek kʼu yelan chlik xchiʼinik ta loʼil li buchʼu mu xojtikinike. Vaʼun mi laj xaʼox yakʼ ta ilel ti la stsak ta mukʼe, xuʼ xa jech xchiʼinik ta loʼil ti kʼu onoʼox yelan snaʼ xloʼilaj jujun kʼakʼale.

Skʼan xkichʼ jpʼijiltik ek kʼalal ta jelubtas jpartetik ta tsobajele. Mi solel jaʼ xa jech chijkʼopoj jech kʼuchaʼal ta jchiʼintik ta loʼil li buchʼu lek xkojtikintike, xuʼ muʼyuk xa lek chilik li jtsobajeltike xchiʼuk ixtol loʼil xa noʼox chaʼiik li kʼusi chkalbetik skʼoplale. Li ta yantik kʼope jeltos kʼopetik tstunesik kʼalal chchiʼinik ta loʼil li buchʼutik oy xa sjabilalike, li maestroetike, li totil meʼiletike o li buchʼutik tsots yabtel yichʼojike (akʼo avil venta ti oy jaypʼeluk kʼop chal li ta Echos 7:2 xchiʼuk 13:16). Jech xtok, oy jaypʼel kʼop tstunesik ti kʼalal chchiʼin sbaik ta loʼil li buchʼu snup xchiʼil sbaike xchiʼuk li buchʼutik yamigo sbaik tajeke. Jaʼ yuʼun chaʼa, skʼan xij-ichʼvan ta mukʼ kʼalal ta jelubtas jpartetik ta tsobajele xchiʼuk ti jechuk jpastik jech kʼuchaʼal chijloʼilaj onoʼoxe.

Oy jaytosuk ti kʼu yuʼun mu jechuk chkʼopoj jech kʼuchaʼal onoʼox nopem xaʼi li buchʼu tsjelubtas spartee. Li baʼyele jaʼ ti kʼu yelan chchol ta alel li jujupʼel kʼope. Taje jaʼ ta skoj ti jech tajek chal ti kʼu yelan tsʼibabil ta svune. Pe jnaʼojtik ti jelel tajek li kʼusi tsʼibabil xchiʼuk ti kʼu yelan nopem xkaʼitik chijkʼopoje. Melel onoʼox ti nopem xaʼiik tslokʼesik ta junuk vun kʼusi chalik li buchʼutik chetʼesik mantale; jutuk mu skotoluk veltae jaʼ tstunesik li voskejo ch-akʼbatike. Mi jech chaval tajek kʼuchaʼal tsʼibabil ta jlikuk vun li kʼusitik chavalbe skʼoplale o mi kʼelbil o aptabil chavut li kʼusi chal avoskejoe, mu jechuk chbat ta alel avuʼun jech kʼuchaʼal chaloʼilaj onoʼox jujun kʼakʼale. Jaʼ yuʼun, sventa jechuk xakʼopoj jech kʼuchaʼal onoʼox chaloʼilaje, skʼan xaval ta akʼop atuk xchiʼuk kʼunuk ta aʼiel ti kʼu yelan chakʼopoje.

Li jtos xtok ti kʼu yuʼun mu jechuk chijkʼopoj jech kʼuchaʼal onoʼox nopemutike jaʼ mi muʼyuk ta jeltik mi anil o kʼunkʼun ta jkʼeltik batele. Li buchʼu mu jechuk chkʼopoj jech kʼuchaʼal onoʼox nopem xaʼie, muʼyuk tsjelilan ti kʼu sjalikil chpaje xchiʼuk mi anil o kʼunkʼun tskʼel batele. Yan li buchʼu jech chkʼopoj kʼuchaʼal onoʼox nopem xaʼie, tsjelilan batel mi anil o mi kʼunkʼun chkʼopoj xchiʼuk ti kʼu sjalikil chpaje.

Kʼalal jech chakʼopoj jech kʼuchaʼal onoʼox nopem xavaʼi kʼalal ep buchʼu chachiʼin ta loʼile, mas tsots skʼan xakʼopoj xchiʼuk skʼan mas xamuyubaj sventa xchikintaik li kʼusi chavale.

Skʼan xanopes aba ti lekuk xakʼopoj jujun kʼakʼal mi oy ta avoʼonton jech chakʼopoj ta cholmantal jech kʼuchaʼal onoʼox chaloʼilaje. Taje maʼuk skʼan xal ti solel ep tajek kʼusi skʼan xachane. Pe skʼan onoʼox xanopes aba ti lekuk xakʼopoj sventa xichʼik lek ta mukʼ li kʼusi chavale. Akʼo venta mi chtun avuʼun sventa xlekub batel akʼopojel jujun kʼakʼal li kʼusi chichʼ alel batel liʼe.

1. Mu xaval li jpʼelantik kʼop ti mu jechuk chal li gramatikae o ti jech chal li krixchanoetik ti muʼyuk chchanik li Vivliae. Li ta Kolosenses 3:8 te chalbutik ti mu stakʼ xkaltik li bol kʼopetike. Akʼo mi jech, muʼyuk chopol ti oy buchʼutik nopem xaʼi ti xojtikin xa noʼox yilel skotol li buchʼu chchiʼinik ta loʼile, jaʼ noʼox venta mi tstsakik to ta mukʼ li gramatikae.

2. Kʼalal oy kʼusi chavalbe skʼoplale, jelilano li jujupʼel kʼop chatunese. Skʼan xachan stunesel yan jpʼelantik kʼop ti jamal chakʼ ta aʼiel li kʼusi chakʼan chavale.

3. Teuk lek ta ajol kʼusi chakʼan chaval kʼalal muʼyuk to chlik kʼopojane, sventa mu xachaʼal yan velta.

4. Mu toj epuk kʼusi xaval sventa jamaluk to lek ta aʼiel li kʼusi chakʼan chavalbe skʼoplale. Mi chakʼan ti xkom ta sjolik li kʼusi chavalbe skʼoplale, skʼan kʼunuk ta aʼiel li jujun orasion chavale.

5. Ichʼvanan ta mukʼ kʼalal chakʼopoje.