Ichʼo ta mukʼ li yantike

XI CHALBUTIK mantal li Vivliae: «Ichʼik me ta mukʼ buchʼuuk noʼox krixchanoal» xchiʼuk «mu me chopoluk [xakʼopojik] ta stojolal yantik» (1 Ped. 2:17; Tito 3:2). Ta melel, ta jtatik ta kʼoponel krixchanoetik ti «laj yichʼik pasel kʼuchaʼal ‹slokʼol Diose›» (Sant. 3:9). Xchiʼuk cham ta stojolalik ek li Kristoe (Juan 3:16). Jech xtok sta-o ti xaʼiik li lekil aʼyej sventa xchʼunike xchiʼuk xuʼ jech xkolik-o (2 Ped. 3:9). Oy jlom krixchanoetike mas to sta-o xichʼik ichʼel ta mukʼ ta skoj li stalelalike o li yabtel yichʼojike.

¿Kʼu yuʼun mu jechuk ch-ichʼvanik ta mukʼ jlom krixchanoetik jech kʼuchaʼal chal li Vivliae? Ta jlom lumetike xuʼ van nopem xaʼiik ti jaʼ chichʼik ta mukʼ ta skoj stsʼunbalik, mi jelel skoloralik, mi vinik o mi ants, mi muʼyuk ip, jayib sjabilal, mi jkʼulej o mi ep kʼusitik oy yuʼun. Ta skoj ti tspasik kʼusitik chopol li buchʼutik oy yabtelike, muʼyuk xa mas ch-ichʼatik ta mukʼ. Ta junantik lum xtoke, mu junuk yoʼonton ta xkuxlejalik li krixchanoetike xchiʼuk jal van ch-abtejik sventa staik li kʼusi mas chtun yuʼunike. Jech xtok, chchiʼinik ta abtel li buchʼutik mu snaʼ x-ichʼvanik ta mukʼe. Li kerem tsebetike tstaik sujel yuʼun xchiʼiltakik sventa stoy sbaik ta stojolal li smaestroik xchiʼuk li buchʼutik oy yabtelik ta skoj ti muʼyuk lek chilike. Jutuk mu skotoluk li kerem tsebetike jaʼ chchanbeik stalelal li jtoyba ololetik chlokʼ ta television ti tsloʼla stot smeʼik xchiʼuk ti jaʼ xa tspasvanik ta mantale. Skʼan onoʼox xkakʼtik persa sventa mu jechuk jtalelaltik xchiʼuk ti xkichʼtik ta mukʼ li yantike. Mas me jun koʼontontik chijloʼilaj xchiʼuk yantik mi chij-ichʼvan ta mukʼe.

Vinajuk ta jtalelaltik ti chij-ichʼvan ta mukʼe. Skʼan me lekuk jkʼuʼ jpokʼtik xchiʼuk lekuk jtalelaltik kʼalal ta jcholtik mantale. Xuʼ van jelel ta jujun lum li kʼusi tsnopik ta sventa li kʼu yelan ta jmeltsan jbatike. Ta jlom lumetike muʼyuk lek chilik mi muʼyuk tslokʼ xpixol o ti stikʼoj jun skʼob ta xvorxa kʼalal oy buchʼu chkʼopoje, pe xuʼ van lek chilik li ta yan lumetik xtoke. Tsako ta venta kʼusitik nopem xaʼiik spasel bu chachol mantal sventa mu chopoluk xaʼi sba avuʼun li yantike, vaʼun jaʼ tskoltaot sventa xavalbe lek skʼoplal li lekil aʼyeje.

Jech xtok, skʼan jtsaktik ta venta ti kʼu yelan chkʼot jkʼopontik junuk krixchanoe, mas to kʼalal oy xa sjabilale. Jutuk mu skotoluk velta mu lekuk chilik kʼalal oy jun kerem o jun tseb tskʼopon ta sbi li buchʼu oy xa sjabilale, jaʼ to xuʼ jech spas mi jech albile. Ta jlom lumetike manchuk mi yijil krixchano xa li buchʼu chkʼopoje, muʼyuk lek mi ta sbi tskʼopon li buchʼu mu xojtikinike. Ta junantik kʼopetik xtoke oy jaytosuk kʼusi chalik sventa ch-ichʼvanik ta mukʼ o yan kʼutik yelan chakʼik ta ilel ti chichʼik ta mukʼ li buchʼutik oy xa sjabilalike o li buchʼutik yichʼoj yabtelike.

Ichʼvankutik ta mukʼ kʼalal chkʼot kʼopojkutike. Ta parajeetike muʼyuk lek chilik mi muʼyuk ta jkʼopontik li buchʼutik chkiltik ta be o ta buyuk noʼoxe. Xuʼ van jaʼ noʼox jpʼelchaʼpʼel kʼusi xaval, ti stseʼetuk asat, chabakʼes ajol o chayeʼ akʼob ti jaʼ senyail ti cha-ichʼvan ta mukʼe. Mi mu jechuk chapase, jaʼ van svinajeb ti muʼyuk cha-ichʼvan ta mukʼe.

Akʼo mi jech, oy jlom ti xuʼ chopol onoʼox chaʼi sbaik manchuk mi xkʼot jkʼopontike. ¿Kʼu yuʼun? Tsnopik van ti muʼyuk chkichʼtik ta mukʼ ta skoj ti kʼu yelan ta jkʼopontike. Jech kʼuchaʼal liʼe, jelel kʼu yelan chichʼik kʼoponel ta skoj ti kʼu yelan spat xokon li jun krixchanoe. Jutuk mu skotoluk velta mu skʼan xchiʼinik o skʼoponik li buchʼutik staoj svokolike o ti ip chaʼiike. Pe li Vivliae chchanubtasvan ti skʼan jkʼuxubintike xchiʼuk ti xkichʼtik ta mukʼe (Mat. 8:2, 3). Jkotoltik jtaojtik ta makiel li smul Adane. ¿Mi ichʼbilot van ta mukʼ chavaʼi mi jaʼ cha-ojtikinat-o ta skoj li achopolile? ¿Mi mu jaʼuk mas lek chavaʼi ti jaʼ cha-ojtikinat-o ta skoj li alekil talelaltake?

Tskoltaot xtok sventa xatsak ta venta li viniketik mi cha-ichʼvan ta mukʼe. Ta jlom lumetike skʼan baʼyel jakʼbetik vinik mi xuʼ jcholbetik mantal li yutsʼ yalale. Manchuk mi jaʼ yalojbutik Jeova ti skʼan jcholtik mantal xchiʼuk ti xijchanubtasvane, jnaʼojtik xtok ti jaʼ yakʼojbe ta sba totil meʼiletik ti xchanubtas li yalab xnichʼnabike, ti spasik ta mantale xchiʼuk ti sbeiltasike (Efes. 6:1-4). Jaʼ yuʼun, li kʼusi onoʼox mas leke jakʼbetik baʼyel totil meʼiletik mi xuʼ jcholbetik mantal li yalab xnichʼnabik kʼalal chijkʼot ta jpʼejuk nae.

Li buchʼu oy xa sjabilale mas xa ep kʼusitik snaʼ ta xkuxlejal, jaʼ yuʼun skʼan xkichʼtik ta mukʼ (Job 32:6, 7). Ta skoj ti yakʼoj venta jun tsebal prekursora ta Sri Lanka ti mas ep kʼusi snaʼ li buchʼu oy xa sjabilale, la stabe sbalil kʼalal la svulaʼan jun vinik ti oy xa sjabilale. Xi laj yal ta slikebal li vinike: «¿Kʼuxi xa noʼox ti chachanubtasun ta Vivlia ti toj tsebot toe?». Vaʼun xi la stakʼ li prekursorae: «Ta melele muʼyuk tal jchanubtasot, jaʼ noʼox tal kalbot li kʼusi jchanoj ti ximuyubaj tajek yuʼune xchiʼuk ti skʼan xkalbe batel yantike». Ta skoj ti ichʼvan ta mukʼ li prekursorae, jaʼ tijbat-o yoʼonton li vinike, vaʼun xi laj yale: «Albun tal kaʼi chaʼa, ¿kʼusi ti achanoje?». Xi laj yale: «Jchanoj kʼusi skʼan jpas sventa xikuxi sbatel osil». Vaʼun lik xchan Vivlia xchiʼuk stestigotak Jeova li vinike. Manchuk mi muʼyuk jamal chalik ti tskʼanik ichʼel ta mukʼ li buchʼutik oy xa sjabilalike, ep onoʼox me tstojik ta vokol mi chkichʼtik ta mukʼe.

Jech xtok, oyuk noʼox me smelolal ti kʼu yelan chij-ichʼvan ta mukʼ ta jkʼopojeltike. Li ta lumetik ti joyol ta nab ta Pacífico xchiʼuk ta yantik lume li stestigotak Jeovae jech chkʼopojik kʼuchaʼal nopem xaʼi tskʼoponik junuk bankilal ta junuk paraje o bankilal ta jvokʼuk jnaklejetike. Taje jaʼ chkoltaatik sventa xcholbeik mantal li bankilaletik xchiʼuk li jnaklejetike. Akʼo mi jech, muʼyuk lek mi jaʼ noʼox chijkʼupil kʼoptavane xchiʼuk maʼuk batsʼi tsots skʼoplal (Prov. 29:5). Jaʼ yuʼun chaʼa, manchuk mi oy ep ta pʼel kʼopetik tstunesik sventa x-ichʼvanik ta mukʼ ta junantik kʼope, mu persauk ep kʼusitik xal sventa x-ichʼvan ta mukʼ li jun yajtsʼaklom Kristoe.

Ichʼvankutik ta mukʼ kʼalal chkaltik mantale. Li Vivliae chalbutik ti skʼan ‹manxoukutik kʼalal jech ta jpastike xchiʼuk ti xij-ichʼvan lek ta mukʼe› (1 Ped. 3:15). Jaʼ yuʼun, manchuk mi anil chkakʼtik venta ti mu snaʼ lek xrasonaj li buchʼu ta jchiʼintik ta loʼile, ¿mi jaʼ van lek ti chopol chaʼi sba kuʼuntik ta skoj ti mu snaʼ lek xrasonaje? Jaʼ mas lek ti baʼyel ta jchikintatik li kʼusi chale o jakʼbetik ti kʼu yuʼun jech tsnope, ti jtsaktik ta venta kʼu yelan chaʼi sbae xchiʼuk ti jtunestik Vivlia sventa xijrasonaj xchiʼuke.

Maʼuk noʼox skʼan xkichʼtik ta mukʼ li buchʼu ta jchiʼintik ta loʼile, skʼan xij-ichʼvan ta mukʼ xtok kʼalal chketʼestik mantale. Li jelubtasej mantal ti ch-ichʼvan ta mukʼe muʼyuk chchopol kʼopta li buchʼutik te oyike, mi jaʼuk xi chalbe yaʼeluke: «Yuʼun muʼyuk ta avoʼontonik ti mu spas avuʼunike». Xuʼ van xchibajik-o mi jech chkʼopoje. Li kʼusi xuʼ spas li jelubtasej mantale jaʼ ti skʼanojikuk Jeova xil li buchʼutik te oyike xchiʼuk ti oy ta yoʼonton chtunik ta stojolale. Jchanbetik li Jesuse, kaʼibetik smelolal kʼu yelan chaʼi sbaik li buchʼutik kʼunik ta mantale, li buchʼutik mu to masuk xtojobike o li buchʼutik vokol chaʼi chakʼ ta xkuxlejalik li tojobtasel chakʼ Vivliae.

Mas me ichʼbil ta mukʼ chaʼi sbaik yantik mi te stikʼojbe sba skʼoplal ek li jelubtasej mantal kʼalal chal kʼuxi xuʼ xakʼ ta xkuxlejalik li kʼusi chal Vivliae. Jaʼ yuʼun, kʼalal chkaltik kʼuxi chkakʼ ta jkuxlejaltik li kʼusi chal Vivliae, jaʼ lek ti mu masuk xi xkaltike: «Voʼote skʼan xavakʼ ta akuxlejal» o «Voʼoxuke skʼan xavakʼ ta akuxlejalik». Akʼo avil venta sjelbenal kʼalal xi ta jakʼtike: «¿Mi yakalot spasel ti bu kʼalal xuʼ avuʼune?», xchiʼuk kʼalal xi chkaltike: «Skʼan me xi jakʼbe jbatik ta jujuntale: ‹¿Mi yakalun spasel ti bu kʼalal xuʼ kuʼune?›». Xkoʼolajtik li kʼusi tsjakʼe, pe li ta baʼyele chakʼ ta ilel li jelubtasej mantal ti mu koʼoluk chaʼi sba xchiʼuk li buchʼutik te oyike. Ta xchibale tstijbe yoʼonton ta jujuntal ti akʼo skʼel kʼu yelan xkuxlejalik xchiʼuk ti kʼusi oy ta yoʼontonike ti te tsakal skʼoplal ek li jelubtasej mantale.

Mu me kʼusi xaval ti jaʼ noʼox sventa chasabe stseʼimol li buchʼutik te oyike. Xuʼ van xchʼaybe sbalil li mantal ta Vivliae. Melel onoʼox ti skʼan jkʼupintik ti chijtun ta stojolal Diose xchiʼuk xuʼ van chakʼ onoʼox tseʼimol jlomuk li kʼusi jtaojtik yalbel skʼoplale. Pe mu jtunestik sventa stseʼin-o yantik li kʼusi tsotsik skʼoplale, yuʼun chkakʼtik ta ilel ti muʼyuk chkichʼtik ta mukʼ Dios xchiʼuk li buchʼutik te oyik mi jech ta jpastike.

Skotol ora vinajuk ta jkʼopojeltik, ta jtalelaltik xchiʼuk ti kʼu yelan chkʼot kʼopojkutik ti jech chkiltik yantik jech kʼuchaʼal xchanubtasojutik li Jeovae.