Tojoban lek stunesel li kʼusi xkiltike

¿KʼU YUʼUN skʼan jtunestik li kʼusitik xkil ta jsatik kʼalal chijchanubtasvane? Yuʼun mas to chkʼot ta yoʼontonik li kʼusi chkakʼbetik xchanike. Jech la stunes li Jeova Dios xchiʼuk Jesukristoe xchiʼuk skʼan me jech jtunestik ek. Mi tstunes xchikinik xchiʼuk satik li buchʼu ta jchanubtastike, jaʼ chkoltaatik sventa chchikintabutik li kʼusi chkaltike xchiʼuk mas chkʼot ta yoʼontonik. ¿Kʼuxi xuʼ jtunestik li kʼusitik xkil ta jsatik kʼalal ta jcholtik mantale? ¿Kʼuxi xuʼ jnaʼtik mi lek yakal ta jtunestik?

Li mukʼta Jchanubtasvanejetike lek la stunesik li kʼusitik xkil ta jsatike. Toj lek kʼusitik laj yakʼ ta chanel Jeova kʼalal la stunes li kʼusitik xkil ta jsatik ti te-o ta joltike. Jun veltae laj yikʼ batel ta osiltik ta akʼobaltik li Abraane, xi laj yalbee: «Qʼuelo lec avil li vinajele. Ato jaybej li cʼanaletique. Jqʼueltiquic me xuʼ avuʼun yatel, yuʼun jech to yepal chbat li amomnichʼnabtaque» (Gén. 15:5). Akʼo mi vokol ta chʼunel yaʼel li kʼusi laj yal tspas Diose, kʼot ta yoʼonton li Abraane xchiʼuk laj yakʼ xchʼunel yoʼonton ta stojolal li Diose. Jun velta xtok li Jeovae la stak batel Jeremias ta sna jun jpatpʼin sventa xakʼ venta kʼu yelan tspat li pʼine. ¡Toj lek ti kʼu yelan laj yakʼ ta chanel ti jaʼ jech tsots yabtel yichʼoj li Jpasvanej ta stojolal li krixchanoetike! (Jer. 18:1-6.) Li Jeovae la stunes jpets vomol sventa xakʼ ta ilel ti oy xkʼuxul yoʼontone, ¿mi chʼay van ta sjol Jonas ti jech akʼbat yile? (Jon. 4:6-11.) Oy jayvoʼuk j-alkʼopetike albatik yuʼun Jeova ti oyuk kʼusi stunesik ti xkil ta jsatik sventa xakʼik ta ilel li kʼusi chkʼot ta pasele (1 Rey. 11:29-32; Jer. 27:1-8; Ezeq. 4:1-17). Li axibalna xchiʼuk li temploe jaʼ noʼox skʼelobil sventa xkaʼibetik lek smelolal li kʼusitik oy ta vinajele (Evr. 9:9, 23, 24). Li Jeova xtoke ep kʼusitik laj yakʼ ta ilel kʼalal oy kʼusi tsots skʼoplal tskʼan chale (Ezeq. 1:4-28; 8:2-18; Ech. 10:9-16; 16:9, 10; Apok. 1:1).

¿Kʼuxi la stunes Jesus li kʼusi xkil ta jsatike? Kʼalal akʼat ta preva yuʼun jfariseoetik xchiʼuk sviniktak Erodes li Jesuse, la skʼanbe jsep takʼin xchiʼuk laj yakʼ ta ilel li slokʼol Sesar ti te chvinaj li ta takʼine. Vaʼun laj yalbe smelolal ti skʼan stojbeik Sesar li kʼusitik jaʼ yuʼun Sesare, yan li kʼusitik jaʼ yuʼun Diose skʼan stojbeik Dios (Mat. 22:19-21). Sventa xakʼ jchantik ti xuʼ xkichʼtik-o ta mukʼ Jeova skotol li kʼusitik oy kuʼuntike, laj yalbe skʼoplal jun meʼon ants ti chʼabal kʼusi oy yuʼun ti laj yakʼ chaʼsep yuni takʼin ti jutuk tajek sbalile (Luk. 21:1-4). Ta yan kʼakʼal xtoke la stunes jun uni olol sventa xakʼ ta chanel ti skʼan bikʼit xkakʼ jbatike xchiʼuk ti maʼukuk xbat ta koʼontontik saʼel li kʼusitik tskʼan koʼontontike (Mat. 18:2-6). Laj yakʼ ta ilel ti kʼusi skʼan xal ti bikʼit chkakʼ jbatike, yuʼun la spokbe yoktak li yajchankʼoptake (Juan 13:14).

Ti kʼutik yelan skʼan jtunestik li kʼusi xkil ta jsatike. Li voʼotike mu x-akʼ kuʼuntik ta ilel kʼusitik jech kʼuchaʼal la spas li Jeovae. Pe xuʼ jtunestik li epal lokʼoletik ti te talemik ta jvuntik sventa snopbeik skʼoplal li buchʼu ta jchanubtastike. Tuneso sventa xakolta li buchʼutik oy ta yoʼontonik mantal yoʼ snaʼik kʼu yelan li Paraiso ta Balumil ti te chal ta Skʼop Diose. O akʼbo yil junuk divujo li buchʼu chavakʼbe estudio ta sventa li kʼusi yakal chachanike, vaʼun jakʼbo kʼusitik ti te chile. Kʼalal oy kʼusi akʼbat yil yuʼun Jeova li Amose, xi jakʼbate: «Amós, ¿cʼusi chavil?» (Amós 7:7, 8; 8:1, 2). Lek ti jech jakʼtik ek kʼalal chkakʼbetik yil junuk lokʼol li buchʼu ta jchanubtastike.

Mi chatsʼiba ta vun kʼalal oy kʼusi skʼan chapele o mi chapas divujar ti kʼuxi lek xcholet talel li fechaetike, jaʼ chkoltavan sventa xichʼ lek aʼibel smelolal junantik albil kʼopetik jech kʼuchaʼal li «vucub jabil» te chal ta Daniel 4:16 o li «lajuneb xchanvinic (70) xemuna» ti te chal ta Daniel 9:24. Ti vaʼ yelan chapase ep ta velta chvinaj li ta jvuntik ti jaʼ chkakʼtik-o estudioe.

Mi chatunesik lokʼoletik xchiʼuk divujoetik (diagrama) kʼalal chachanik Vivlia xchiʼuk avutsʼ avalal ti te chvinaj li ta livro Perspicacia para comprender las Escrituras, li ta apendise ta Traducción del Nuevo Mundo de las Santas Escrituras (con referencias), li ta revista Li Jkʼel osil ta toyole xchiʼuk li ta yan jvuntike, jaʼ tskoltaot sventa xavaʼibeik lek smelolal kʼu yelan li axibalnae, li templo ta Jerusalene xchiʼuk li templo akʼbat yil yuʼun Jeova li Ezequiele.

Tojoban lek stunesel mapaetik kʼalal chakʼelik Vivlia xchiʼuk li avutsʼ avalale. Akʼik venta ti butik echʼ batel li Abraan kʼalal lokʼ batel ta Ur ti bat kʼalal to ta Arane xchiʼuk ti bat ta Betel ta mas tsʼakale. Akʼik venta xtok ti butik echʼik batel li j-israeletik kʼalal lokʼik batel ta Ejipto ti batik ta Albil Balumile. Kʼelik bu xkom li yosilik laj yichʼik li jujuchop snitilulaltak Israele. Kʼelik bu to kʼalal sventainoj li Salomone. Kʼelik ti butik echʼ Elias kʼalal jatav batel ta takixokol balumil ta Beerseba ti te lik batel ta Jezreel ta skoj ti tskʼan ox chmilat yuʼun li Jesabele (1 Rey. 18:46–19:4). Kʼelik butik xkom li jteklumetik xchiʼuk lumetik ti butik la xchol mantal li Jesuse xchiʼuk butik echʼ ta cholmantal li Pablo ti te chal ta slivroal Echose.

Mi chkakʼbetik yilik li kʼusitik xkil ta jsatik li buchʼu chkakʼbetik estudioe, mas me chaʼibeik smelolal kʼusitik chichʼ pasel li ta tsobobbaile. Xuʼ xkakʼbetik yil li programa sventa asambleae xchiʼuk xuʼ xkalbetik smelolal li kʼusitik te ch-echʼe. Oy ep krixchanoetik labal sba laj yilik kʼalal ayik li ta Salon sventa Tsobobbail o kʼalal ay svulaʼanik li Betele, jech xtok jaʼ koltaatik sventa mu kʼusi chopol snopik ta sventa li abtelal ta jpastike xchiʼuk ti kʼu yuʼun jech ta jpastike. Akʼbo yil ti mu xkoʼolaj kʼuchaʼal yan temploetik li Salon sventa Tsobobbaile. Albo ti jaʼ noʼox sventa oy kʼusi ta jchantik te li ta Salon sventa Tsobobbail ti lek noʼox sba vaʼanbile. Akʼbo yil li kʼusitik te oy ti jaʼ te tsakal skʼoplal li cholmantal ta jpastike, jech kʼuchaʼal ti bu chichʼ akʼel vunetike, li smapailtak butik ta jcholtik mantale xchiʼuk li xkaxail ti bu chichʼ tikʼel takʼine (ti jelel kʼuchaʼal li uni mochetik sventa tstsobik-o takʼin li yan relijionetike).

Mi oy avuʼun li videoetik ti slokʼesojik li Jtsop Jbeiltasvaneje, tuneso sventa mas xkʼot ta yoʼontonik li kʼusi chal Vivlia li buchʼutik chkakʼbetik estudioe, sventa xojtikinik li kʼusitik tspasik li stestigotak Jeovae xchiʼuk sventa xakʼ ta xkuxlejalik li beiltaseletik ta Vivliae.

Kʼalal ep tsobolutike. Mi lek jchapanojtik xchiʼuk mi lek xijtojob ta stunesel li kʼusitik xkil ta jsatik kʼalal chijchanubtasvane, mas me chkʼot ta yoʼontonik li buchʼutik te tsobolike. Li tukʼil xchiʼuk pʼijil mosoile ep kʼutik yelan yakʼojbutik li kʼusitik xkil ta jsatike.

Li ta xchanobiltak ta revista Li Jkʼel osil ta toyole ep yichʼoj talel lokʼoletik ti xuʼ stunes li buchʼu sbainoj sjelubtasel sventa xakʼ ta ilel li kʼusitik mas tsotsik skʼoplale, jech skʼan xichʼ pasel xtok li ta Xchanel Vivlia ta Tsobobbaile.

Mi sta-oe, xuʼ xichʼ tunesel lokʼoletik xtok kʼalal chichʼ etʼesel li mantal ta yeloval krixchanoetik sventa xichʼ aʼibel lek smelolal li mantale. Pe li kʼusi mas leke jaʼ noʼox xavakʼ ta avoʼonton stunesel li Vivliae, yuʼun jutuk mu skotoluk oy yuʼunik. Mi persa chavil chatunes junuk lokʼol sventa chavalbe smelolal li kʼusitik mas tsotsik skʼoplale, tsako me ta venta mi staik ta kʼelel skotolik. Jech xtok, oyuk noʼox me spʼisol xatunes.

Maʼuk noʼox me sventa jchʼaybetik yoʼontonik kʼalal ta jtunestik li kʼusitik xkil ta jsatik kʼalal chijloʼilaj xchiʼuk kʼalal chijchanubtasvane. Mi jech sta-o chavil chatunese, jaʼuk me xkoltavan sventa xichʼ aʼibel lek smelolal li kʼusitik mas tsotsik skʼoplale. Jech xtok, chkoltavan sventa xichʼ jambel lek smelolal li kʼusi laj xa yichʼ alele xchiʼuk jaʼ chkoltaatik sventa xchʼunik ti jaʼ melele. Mi sta-o jtunestik li kʼusitik xkil ta jsatike xchiʼuk mi lek ta jtunestike, kʼupil tajek chaʼiik li buchʼutik te oyike xchiʼuk te chkom ta sjolik li kʼusi laj yichʼ tunesele xchiʼuk li kʼusi chakʼ ta chanele.

Li jsatik xchiʼuk jchikintike toj jtunelik sventa oyuk kʼusi jchantik yuʼun. Vuleso ta ajol ti jaʼ jech la spasik li mukʼta Jchanubtasvanejetike, akʼo persa jechuk xapas ek kʼalal chachanubtasvane.