Xcholetuk xajambe batel smelolal li temae

LI BUCHʼUTIK xchanojik lek yetʼesel mantale yakʼojik venta ti mas oy sbalil mi oy stemail li jun mantal chetʼesike. Kʼalal yakal chchapan sparteike, jtos noʼox kʼusi chakʼ ta yoʼontonik, vaʼun tsabeik lek smelolal. Kʼalal jtos noʼox kʼusi lek chalbeik smelolale, mas tstabeik sbalil li krixchanoetike. Mi lek snitojbe sba skʼoplal li kʼusitik mas tsotsik skʼoplal xchiʼuk li temae xchiʼuk mi lek tsjambe smelolale, jaʼ mas chkom-o ta sjolik xchiʼuk oy sbalil chilik.

Oy junantik temaetike ep tajek kʼusitik smakojbe skʼoplal, jaʼ yuʼun mas me xtojob yetʼesel mantal mi te ta sjol ti jtos noʼox skʼan xalbe smelolal li buchʼu tsjelubtas mantale, taje xuʼ te sta li ta stituloal spartee. Jech kʼuchaʼal liʼe, li Ajvalilal yuʼun Diose, li Vivliae xchiʼuk li chaʼkuxesele jaʼ temaetik ti ep kʼusitik smakojbe skʼoplal jujutose, jech xtok li ta temaetik taje xuʼ to xichʼ lokʼesel yan temaetik ti jutuk noʼox kʼusi smakojbe skʼoplale. Jaʼ junantik liʼe: «Oy ta melel li Ajvalilal yuʼun Diose», «Li Ajvalilale tskʼatajes ta paraiso spʼejel li Balumile», «Jaʼ yakʼoj ta naʼel Dios li Vivliae», «Xuʼ skoltautik ta jkuxlejaltik li Vivliae», «Li chaʼkuxesele tspatbe yoʼonton li buchʼu oy buchʼu chamem yuʼune» xchiʼuk «Li spatobil koʼontontik ti oy chaʼkuxesele tskoltautik sventa lek tukʼ chkakʼ jbatik kʼalal ta jtatik kontrainele». Sventa xichʼ albel skʼoplal jujutos li temaetik taje, jeltos kʼu yelan skʼan albel smelolal.

Li kʼusi mas laj yalbe skʼoplal kʼalal la xchol mantal li Jesuse jaʼ liʼe: «Li Ajvalilal ta vinajele nopajem xa tal», taje jaʼ li kʼusi mas chalbe skʼoplal li Vivlia eke (Mat. 4:17). ¿Kʼu yelan xcholet laj yalbe skʼoplal? Li ta Evanjelioetike te chichʼ albel skʼoplal mas ta 110 ta velta li Ajvalilale. Pe li Jesuse maʼuk noʼox la stunes li jpʼel kʼop Ajvalilale. Skotol li kʼusitik chanubtasvane xchiʼuk li skʼelobil juʼelal la spase laj yakʼ ta ilel ti jaʼ li Xnichʼon Dios li buchʼu te xchiʼukike, li Mesiase, li buchʼu chakʼbe Ajvalilal li Jeovae. Jech xtok, li Jesuse laj yalbe skʼoplal ti jaʼ ta stojolal ti xuʼ x-ajvalilajik yantik li ta Ajvalilale xchiʼuk laj yal kʼu yelan skʼan stalelal li buchʼutik tstaik taje. Li kʼusitik chanubtasvane xchiʼuk li skʼelobiltak juʼelal la spase jamal laj yakʼ ta ilel li kʼusitik tspas ta stojolal krixchanoetik li Ajvalilal yuʼun Diose. Jech xtok, ta skoj ti la slokʼes pukujetik ta s-espiritu Diose, laj yal ti jaʼ chakʼ ta ilel ti ‹tabilik xa yuʼun Ajvalilal yuʼun Dios› li buchʼutik chchikintabate (Luk. 11:20). Li Jesuse laj yalbe yajtsʼaklomtak ti akʼo yalbeik skʼoplal li Ajvalilal taje (Mat. 10:7; 24:14).

Jtunestik junuk titulo ti sta-o li jtematike. Melel onoʼox ti muʼyuk chavichʼ albel ti xavalbe skʼoplal junuk tema jech kʼuchaʼal chalbe skʼoplal li Vivlia ti ep ta tos chalbe skʼoplale, pe chavichʼ albel ti jech xavalbe skʼoplal aparte jech kʼuchaʼal li stituloale.

Mi voʼot chatʼuj li stituloal apartee, jaʼ me tsots skʼoplal ti teuk ta ajol li kʼusi oy ta avoʼonton staele. Laje tʼujo li kʼusitik mas tsotsik skʼoplal sventa chatsʼiba li ta voskejoe xchiʼuk akʼo venta ti lekuk snitojbe sba skʼoplal xchiʼuk li stituloal apartee.

Mi oy xa onoʼox stituloal li apartee, aʼibo lek smelolal li kʼusi chakʼ ta chanele xchiʼuk akʼo venta kʼusi sbalil xchiʼuk ti kʼuxi xuʼ xatunes sventa xakoltavan-oe. Kʼalal chasabe mas smelolale, akʼo persa ta stʼujel lek yoʼ mu xjel smelolal li kʼusi mas chavalbe skʼoplale. Mi avichʼoj xa akʼbel ti bu chlokʼ li apartee, nopo lek kʼuxi xuʼ koʼoluk skʼoplal xkʼot xchiʼuk li tituloe. Jech xtok, skʼan xanopbe lek skʼoplal kʼuxi xuʼ stabeik sbalil li buchʼutik chchikintaike xchiʼuk li kʼusi oy ta avoʼonton staele, vaʼun jech chanaʼ bu chavakʼbe lek snukʼilal.

Kʼuxi xuʼ xkakʼbetik lek snukʼilal li stemaile. Lek chbat ta akʼbel snukʼilal avuʼun mi ta slikebal onoʼox chatʼuj lek xchiʼuk mi xcholet lek chatsʼiba li kʼusi chavale. Jaʼ noʼox xaval li kʼusi sta-o li kʼusi chavalbe skʼoplale xchiʼuk tsako ta venta li tojobtasel chal livro kʼalal chapas li avoskejoe, vaʼun jech chavalbe lek skʼoplal li stemaile.

Mas chakʼ ta aʼiel kʼusi chkalbetik skʼoplal kʼalal ep ta velta chkaltike. Jech kʼuchaʼal liʼe, jnopbetik skʼoplal jtosuk musika ti chalbe skʼoplal kʼanbaile, li buchʼu chkʼejine jaʼ chalbe skʼoplal li buchʼu skʼanoje. Xuʼ van ep ta tos kʼu yelan chalbe skʼoplal. Jech xtok, xuʼ van tstunes yan kʼopetik sventa chalbe skʼoplal li «kʼanbaile». Xuʼ van tstunes yan kʼop xtok ti koʼol kʼusi skʼan xale o tstunes lokʼolkʼopetik. Akʼo mi jech, jtos noʼox li kʼusi yakal chalbe skʼoplale. Jech skʼan jpastik ek kʼalal chketʼes jpartetike. Xkoʼolaj kʼuchaʼal musika kʼalal chkʼetes li jpartetike, xuʼ ep ta velta xkaltik li kʼusitik mas tsotsik skʼoplale. Sventa xajel jutukuke, xuʼ xatunes yan kʼopetik ti koʼol onoʼox kʼusi skʼan xale. Mi jech chapase, chkom ta sjolik kʼusi laj aval li buchʼutik chchikintaike.

Li tojobtasel taje maʼuk noʼox sventa li mantaletik chichʼ etʼesel ta plataformae, jtunel xtok kʼalal ta jcholtik mantale. Akʼo mi jlikel noʼox chijloʼilaj o mi chkakʼtik estudio, mas kʼun chvul ta sjol mantal li jun krixchano mi lek chkakʼbetik snukʼilal li kʼusi chkalbetik skʼoplale. Jaʼ yuʼun, mi laj avakʼ persa ti lek chatʼuj atema xchiʼuk mi xcholet chaval batele, tskoltaot me ti xatojob ta yetʼesel mantale xchiʼuk ti xakʼot ta lekil jchanubtasvanej ta sventa li Skʼop Diose.