Kʼotuk ta yoʼonton avuʼun li mantale

SKʼAN xkʼot ta yoʼonton kuʼuntik li krixchanoetike maʼuk noʼox ti ta jcholbetik mantale. Li ta Vivliae chalbe skʼoplal ti mu xkoʼolaj li kʼusi oy ta yoʼonton krixchanoetik xchiʼuk ti kʼu yelan xvinaj ta spat xokonike. Li oʼontonal ti chalbe skʼoplal Vivliae jaʼ smakoj skotol ti kʼu yelan jun krixchanoe: li kʼusi chaʼi ta yoʼontone, li kʼusi tsnope, ti kʼu yuʼun jech tsnope xchiʼuk li kʼusi tspas ta skoj ti jech tsnope. Taje jaʼ li oʼontonal ti bu chichʼ tsʼunel li kʼusi chchanubtasvan ta melel li Vivliae (Mat. 13:19). Jech xtok te chlik talel ti chichʼ chʼunbel li smantal Diose (Prov. 3:1; Rom. 6:17).

Sventa xkʼot ta yoʼonton krixchanoetik li kʼusi chavakʼ ta chanele, akʼo ta avoʼonton spasel liʼe: 1) akʼo venta kʼu yuʼun ti jech tsnope o li kʼusi oy ta yoʼontone; 2) koltao yoʼ xlekub stalelal jech kʼuchaʼal li kʼanelale xchiʼuk li xiʼtael Diose xchiʼuk 3) koltao yoʼ xakʼ venta li kʼusi oy ta yoʼontone sventa lek x-ilat yuʼun li Jeovae.

Pʼijan me. Oy ep ta tos srasonal ti kʼu yuʼun muʼyuk to ochemik ta mantal li krixchanoetike. Yikʼaluk van chavakʼ venta ti skʼan xakolta yoʼ xikta li kʼusi chopol tsnop li buchʼu chavakʼbe estudioe xchiʼuk albo li kʼusitik kʼotem ta pasel yoʼ xavakʼbe yil ti mu jechuk li kʼusi tsnope o mi moʼoje jaʼ noʼox akʼbo ta ilel sprevailtak ti mu jechuk li kʼusi tsnope. Xi xajakʼbe abae: «¿Mi snaʼoj van ti chtun yuʼun li mantale? ¿Kʼusitik xchʼunoj xa? ¿Kʼusitik muʼyuk to xchʼunoj? ¿Kʼu yuʼun ti jech xchʼunoje? ¿Mi skʼan van koltael sventa xikta spasel li kʼusitik xuʼ xmakat ta be sventa xchʼi ta mantale?».

Mu onoʼox skotoluk velta kʼun ta naʼel ti kʼu yuʼun jech xchʼunoj li jun krixchanoe. Xi chal Proverbios 20:5: «Li cʼusi tsnop ta yoʼnton cristianoe jaʼ jech chac cʼu chaʼal natil voʼ ti mu xquilbetic xchaque, pero li bochʼo bije snaʼ sjotsʼol jaqʼuel». Ti pʼijutike jaʼ skʼan xal ti xkaʼibetik lek smelolal li kʼusi tsnop ti mu jamaluk ta aʼiele, skʼan xijtojobutik lek yakʼel venta xchiʼuk oyuk xkʼuxul koʼontontik.

Ep ta tos kʼuxi chakʼik ta ilel li kʼusi oy ta yoʼontonike. Kʼalal oy kʼusi chkalbetik jun krixchanoe, xuʼ van xvinaj ta sat o ta skʼopojel ti kʼu yelan chaʼi sba kuʼuntike. Mi totil meʼilote, anaʼoj ti yuʼun oy kʼusi yakal chkʼot ta xkuxlejal avalab anichʼnab mi chjel stalelal chavile. Teuk me ta ajol taje, yuʼun jaʼ tskoltaot ta snaʼel kʼusi oy ta yutil yoʼontonik li krixchanoetike.

Mi ta jnoptik lek li kʼusi ta jakʼbetike, xuʼ jnaʼtik kʼusi oy ta yoʼontonik. Xuʼ xi xajakʼbee: «¿Kʼu yelan chavaʼi aba ta sventa...? ¿Kʼu yuʼun ti jech la achʼun ti...? ¿Kʼusi van chapas ti...?». Pe kʼelo me aba ti mu chopoluk xaʼi sba avuʼune. Xuʼ van mas lek ti xi xajakʼbee: «¿Mi xuʼ oy kʼusi jakʼbot?». Mu toj kʼunuk ta pasel maʼ taje, yuʼun mu xakʼik ta ilel ta anil li kʼusi tsnopike. Sventa xalbot ti kʼu yelan chaʼi sbae, skʼan spat yoʼonton ta atojolal baʼyel, pe taje mu xkʼot ta pasel ta junchib noʼox kʼakʼal. Akʼo mi jech, skʼan onoʼox me oyuk apʼijil yoʼ mu snop ti persa chakʼan chanabe skotol li kʼusi oy ta xkuxlejale (1 Ped. 4:15).

Skʼan me oyuk apʼijil xtok kʼu yelan chapas aba kʼalal oy kʼusi chalbote. Teuk me ta ajol ti jaʼ sventa xanaʼ kʼusi beiltasel ta Vivlia xuʼ xatunes sventa xakolta li jun krixchanoe. Mu me naka yalbeluk avuʼun ti chopol ti kʼu yelan tsnope. Jaʼ lek akʼo venta kʼu yelan chaʼi sba ta skoj li kʼusi chale. Mi jech chapase, jaʼ tskoltaot sventa xanaʼ kʼusi chatakʼbe xchiʼuk mas van tsnopbe skʼoplal li kʼusi chavalbee (Prov. 16:23).

Xuʼ onoʼox xatijbe yoʼontonik ta jujuntal manchuk mi ep te tsobolik li buchʼutik chchikintabote. Mi chakʼelbe sat li buchʼutik chachiʼin ta loʼile, mi chavakʼ venta ti kʼu yelan xvinaj ta satike xchiʼuk mi oy kʼusi chajakʼbe sventa snopbeik skʼoplale, mas me chanaʼ kʼusi tsnopik ta sventa li kʼusi yakal chavale. Tsako me ta venta mi xavojtikinbe kʼu yelan xkuxlejalik li buchʼutik te tsobolike. Tsako ta venta kʼu yelan stalelalik li buchʼutik te oyik ta tsobobbail kʼalal charasonaj xchiʼukik ta sventa li Vivliae (Gal. 6:18).

Lekuk kʼusi snop avuʼun. Mas me chanaʼ kʼu yelan chakolta batel mi laj xaʼox anaʼ li kʼusi xchʼunoje o li kʼusi muʼyuk xchʼunoje xchiʼuk ti kʼu yuʼun jech xchʼunoje. Kʼalal chaʼkuxiem xaʼox li Jesuse, kʼot ta yoʼonton yuʼun yajchankʼoptak kʼalal ‹lek tsʼakal la sjambe smelolal Tsʼibetik› ta sventa li kʼusi jaʼ to kʼot ta pasele (Luk. 24:32). Akʼo me persa ek ti xavakʼbe yil li buchʼu chaʼibot ti kʼuxi snitojbe sba skʼoplal li kʼusi kʼotem ta xkuxlejale, li kʼusi tskʼane xchiʼuk li kʼusi yiloj ta Skʼop Diose. Mi kʼot xa ta yoʼonton li kʼusi la xchan li buchʼu chavakʼbe estudioe, xi me chal ta yoʼontone: «¡Jaʼ MELEL li kʼusi ta jchane!».

Mi chavakʼbe yil ti oy slekil yoʼonton li Diose, ti chkʼanvane, ti oy slekil yutsil yoʼontone xchiʼuk ti tukʼ li smantaltake, mas me chlik skʼan Dios avuʼun li buchʼu chavakʼbe estudioe. Mi laj avalbe ti jaʼ tskʼel jlekil talelaltik li Diose, mas me chchʼun ti xuʼ lek xil sba xchiʼuke. Sventa spas avuʼune, albo akʼo snopbe skʼoplal li kʼusi chal ta Salmo 139:1 kʼalal ta 3, Lukas 21:1 kʼalal ta 4 xchiʼuk Juan 6:44. Jech xtok, albo akʼo snopbe skʼoplal ti kʼux ta yoʼonton tukʼil yajtuneltak li Jpasvaneje (Rom. 8:38, 39). Albo yaʼi smelolal ti maʼuk noʼox tskʼel jmultik li Diose, moʼoj, xil skotol li kʼusi jpasojtik tal ta jkuxlejaltike, ti oy tajek ta koʼontontik li yichʼel ta mukʼe xchiʼuk ti jkʼanojbetik li sbie (2 Crón. 19:2, 3; Evr. 6:10). Li stuke batsʼi xojtikin ta jyalel ti kʼu kelantike, jaʼ yuʼun mi la xchaʼkuxes «skotol li buchʼutik oy ta smukinalike», jech chchaʼkuxiik tal ti kʼu onoʼox yelanike (Juan 5:28, 29; Luk. 12:6, 7). Ta skoj ti la spasutik jech kʼuchaʼal stuk li Diose, mas me chkʼot ta yoʼonton krixchanoetik kʼalal chkalbetik stalelaltak li Diose (Gén. 1:27).

Chkʼunib me yoʼonton li jun krixchano kʼalal chakʼ venta ti kʼu yelan ch-ilatik yuʼun Dios li krixchanoetike. Mi xkʼuxubinojutik li Diose, jaʼ me jech chkʼuxubin li yantik eke, maʼuk tstsak ta venta bu likemutik talel xchiʼuk maʼuk tstsak ta venta kʼusi jtsʼunbaltik (Ech. 10:34, 35). Mi laj xa yaʼibe smelolal taje, jaʼ chtijbat yoʼonton sventa mu xa spʼaj li xchiʼiltake xchiʼuk ti muʼyuk xa kʼusi chopol tsnop ta stojolalike, vaʼun jun xa yoʼonton xchiʼuk yantik kʼalal chchan to batel li kʼusi tskʼan yoʼonton Diose.

Li yan talelal ti skʼan jchanubtastik li jun krixchanoe jaʼ ti akʼo yaʼi ta yoʼonton ti chiʼta li Diose (Sal. 111:10; Apok. 14:6, 7). Li yichʼel ta mukʼ Dios taje, li xiʼtael Diose, jaʼ chtijbat yoʼontonik ta spasel li kʼusi lek chil Jeova ti mu spas yuʼun ta stukik noʼoxe. Mi chkalbetik skʼoplal li yan sba yutsil yabtel li Jeovae xchiʼuk li yan sba slekil yutsil yoʼontone, jaʼ chtijbat yoʼonton yoʼ jaʼuk spas li kʼusi lek chil Diose (Sal. 66:5; Jer. 32:40).

Akʼbo me yaʼi ti tsots skʼoplal chil Dios li stalelalike. Ta me xat yoʼonton Jeova mi mu jchʼunbetik smantale, pe chmuyubaj mi ta jchʼunbetike (Sal. 78:40-42). Akʼbo yaʼi ti jtalelaltike tsots skʼoplal sventa jpakbetik skʼoplal li kʼusi la xchibal kʼopta Satanas ta stojolal li Diose (Prov. 27:11).

Akʼbo yil ti ta jtabetik sbalil ta jkuxlejaltik mi ta jchʼuntik li kʼusi tskʼanbutik Diose (Is. 48:17). Ti kʼuxi xuʼ xapase akʼbo yil ti ta jta jvokoltik ta jbekʼtaltik xchiʼuk ta jnopbentik akʼo mi uni jlikel noʼox ti muʼyuk ta jchʼunbetik li smantal Diose. Albo yaʼi smelolal ti tsnamajesutik ta stojolal Jeova mi ta jpas jmultike, mu xa me xchikintabutik krixchanoetik kʼalal bat jcholbetik mantale, jech xtok muʼyuk xa ta jtsakbetik ta mukʼ sderecho li yantike (1 Tes. 4:6). Tijbo yoʼonton ti oyuk sbalil xil li bendisionetik staoj ta skoj ti chchʼunbe li smantal Diose xchiʼuk tijbo yoʼonton ti akʼo stoj ta vokol ti muʼyuk tsta svokol ta skoj ti chchʼunbe li stukʼil mantaltake. Mi kʼot xa ta yoʼonton ti naka lek li smantaltak Diose, jaʼ xa me chtijbat yoʼonton sventa mu spas li kʼusitik chopole (Sal. 119:104). Maʼuk xa jun ikatsil chaʼi ta xchʼunbel li smantal Diose, jech xa chil kʼuchaʼal tstojbe ta vokol ti skʼanoje xchiʼuk ti chichʼ ta mukʼe.

Koltao sventa xakʼ venta ti kʼu yelane. Sventa xchʼi ta mantal li jun krixchanoe, skʼan me snaʼ li kʼusi oy ta yoʼontone. Albo yaʼi ti kʼuxi xuʼ xkoltaat yuʼun li Vivliae.

Koltao sventa xchʼunik ti maʼuk noʼox naka mantaletik yichʼoj li Vivliae, ti maʼuk noʼox naka loʼiletike xchiʼuk ti maʼuk noʼox naka albil kʼopetike, yuʼun chakʼ ta ilel xtok kʼusi tsnop li Jpasvaneje. Li ta Santiago 1:22 kʼalal ta 25 tskoʼoltas ta jun nen li Skʼop Diose. Ti kʼu yelan ta jchʼamtik li kʼusi chal Vivliae xchiʼuk ti kʼu yelan ta jchʼamtik ti kʼu yelan chkʼot ta pasel yuʼun Jeova li kʼusi tskʼan yoʼontone, jech chkakʼtik ta ilel li kʼusi oy ta koʼontontike xchiʼuk chalbutik kʼu yelan chilutik li Diose ti jaʼ tskʼelbe «li yoʼnton cristianoe» (Prov. 17:3). Tijbo yoʼontonik ti akʼo mu xchʼay ta sjolik taje. Albo yaʼiik ti akʼo snopbeik skʼoplal li kʼusi te tsʼibabil ta Skʼop Diose xchiʼuk albo yaʼiik ti skʼan sjel stalelalik sventa lek x-ilatik yuʼun li Jeovae. Akʼbo yaʼi mi ta jkʼelilantik li Vivliae, jaʼ tskoltautik sventa jnaʼtik kʼu yelan chil Jeova li «jnopbentik xchiʼuk li kʼusi oy ta koʼontontike», vaʼun jaʼ jech koʼol chij-abtej xchiʼuk Jeova kʼalal chkakʼtik persa ta sjelel li jtalelaltike (Evr. 4:12; Rom. 15:4).

Jlom li buchʼutik chchanik Vivliae chakʼ yaʼi ta xkuxlejalik li kʼusi chchanike, pe chiʼik ta skoj li kʼusi tsnop yantike. Yikʼaluk van vokol chaʼiik tajek ta yiktael li kʼusi chopol tspasike o tsnopik ti xuʼ onoʼox xichʼik ta mukʼ Dios mi jech-o tspasike. Akʼbo yil ti toj xibal sba mi jech tsnopike (1 Rey. 18:21). Albo ti akʼo skʼanbeik Jeova ti akʼo koltaatikuk ta skʼelbel li kʼusi oy ta yoʼontonike xchiʼuk ti akʼo tukʼibtasbatikuke (Sal. 26:2; 139:23, 24).

Akʼbo yaʼiik ti xaʼibe smelolal Jeova li kʼusi vokol chaʼiik yiktaele xchiʼuk ti chal ta Vivlia ti kʼu yuʼun vokol ta iktaele (Rom. 7:22, 23). Pʼijubtaso ti mu jaʼuk stsalat yuʼun li kʼusi oy ta yoʼontonike (Prov. 3:5, 6; 28:26; Jer. 17:9, 10).

Tijbo yoʼontonik ti akʼo yakʼik venta li kʼusi oy ta yoʼontonik ta melele. Chanubtaso ti xiuk sjakʼbe sbaike: «¿Kʼu yuʼun ta jkʼan ta jpas liʼe? ¿Mi jech chkakʼbe yil Jeova ti ta jtojbe ta vokol li kʼusitik spasoj ta jtojole?». Akʼo persa yoʼ xchʼun avuʼun ti muʼyuk kʼusi xkoʼolaj-o kʼalal lek chkil jbatik xchiʼuk li Jeovae.

Akʼo me yaʼibeik smelolal avuʼun kʼusi smakojbe skʼoplal ti chijtun ta ‹sjunul koʼontontik› ta stojolal li Jeovae (Luk. 10:27). Taje jaʼ skʼan xal ti tsjel ti kʼu yelan chaʼi sbaike, li kʼusi oy ta yoʼontonike xchiʼuk ti kʼu yuʼun chchʼunbeik li smantal Jeovae. Jaʼ yuʼun maʼukuk noʼox me xakʼik venta avuʼun ti kʼusi tspasike, akʼo yakʼik venta xtok li kʼusi chaʼi ta yoʼontonik ta sventa li smantaltak Diose xchiʼuk ti kʼu yuʼun chtunik ta stojolale (Sal. 37:4). Mi laj xaʼox yakʼik venta ti kʼusitik to skʼan sjel ta xkuxlejalike, tijbo yoʼontonik ti xiuk skʼanbeik li Jeovae: «Acʼbun ta coʼnton ti voʼot noʼox xuʼ chaquichʼot o ta muqʼue» (Sal. 86:11).

Mi lek xa xil sba xchiʼuk Dios li buchʼu chchan Vivliae, jaʼ xa chtijbat yoʼonton ta xchʼunbel smantal Dios li xchʼunel yoʼontone maʼuk xa ta skoj li kʼusi chavalbee. Vaʼun stuk xa chakʼ «batel venta li kʼusi lek chil Kajvaltike» (Efes. 5:10; Filip. 2:12). Taje jaʼ me li kʼusi lek chil li Diose ti ta sjunul koʼontontik ta jchʼunbetik li smantaltake (Prov. 23:15).

Teuk ta ajol ti jaʼ tskʼel Jeova li kʼusi oy ta koʼontontike xchiʼuk ti jaʼ chikʼ talel li krixchanoetik sventa lekuk xil sba xchiʼuke (Prov. 21:2; Juan 6:44). Li voʼotike jaʼ noʼox ta jchiʼintik ta abtel li Diose (1 Kor. 3:9). ‹Xkoʼolaj kʼuchaʼal chtakvan ta ikʼel Dios ti jaʼ tstunesutike.› (2 Kor. 5:20; Ech. 16:14.) Li Jpasvaneje muʼyuk tsuj krixchanoetik sventa xchʼunik li kʼusi melele, akʼo mi jech, mi ta jtunestik lek Vivlia kʼalal ta xijchanubtasvane, li Diose xuʼ skolta sventa xaʼibeik smelolal ti jaʼ stakʼobil li kʼusi toʼox tsjakʼbe sbaike o ti jaʼ stakʼobil li s-orasionike. Taje skʼan me teuk ta ajol kʼalal chachanubtasvane xchiʼuk kʼanbo vokol Jeova ti akʼo sbeiltasot xchiʼuk ti skoltaote (1 Crón. 29:18, 19; Efes. 1:16-18).