Kʼuxi xuʼ xkʼot ta yoʼonton kuʼuntik mantal li kaj-estudiotike
1. ¿Kʼu yelan laj yaʼi sbaik li jchankʼopetik kʼalal oy kʼusi jambatik smelolal yuʼun li Jesuse?
1 Li Jesuse kʼot yuʼun ta yoʼonton mantal li buchʼu chikintabate, yuʼun li Vivliae chal ti oy jun velta ti ‹xtiltun› kom yoʼontonik li yajchankʼoptake (Luk. 24:32). Skʼan xlokʼ ta koʼontontik xchʼunbel smantal li Diose; jaʼ yuʼun, ¿kʼuxi xuʼ jtijbetik yoʼonton li kaj-estudiotik sventa sjel li xkuxlejalike? (Rom. 6:17.)
2. ¿Kʼuxi xuʼ xkʼot ta yoʼonton kuʼuntik mantal li krixchanoetike?
2 Kakʼtik iluk jpʼijiltik xchiʼuk jchikintatik ti kʼu yelan chaʼi sbaike. Jutuk mu skotoluk li krixchanoetike mu sjel xkuxlejalik kʼalal naka noʼox chkalbetik li kʼusi lek xchiʼuk li kʼusi chopole. Jech xtok, kʼalal ta jkʼelbetik epal tekstoetik ti chakʼ iluk ti muʼyuk lek li kʼusi xchʼunojike, xuʼ me jaʼ mu xa skʼan xchikintaik-o li mantale. Sventa jtijbetik yoʼontonike, skʼan baʼyel jchikintabetik ti kʼu yuʼun jech xchʼunojike xchiʼuk ti kʼu yuʼun jelel li kʼusitik tspasike. Kʼalal ta jnoptik lek kʼusi xuʼ jakʼbetik xchiʼuk chkakʼ iluk jpʼijiltike, xuʼ me xtijbat yoʼontonik yoʼ xalik li kʼusi tsnopike (Prov. 20:5). Vaʼun jaʼ noʼox me jech xuʼ jtʼujtik versikuloetik ta Vivlia ti chkʼot ta yoʼontonike. Jaʼ yuʼun toj tsots skʼoplal ti jvul koʼontontik ta stojolalike xchiʼuk ti oyuk smalael kuʼuntike (Prov. 25:15). Teuk me ta anopben ti jelel ti kʼu yelan chchʼiik tal ta mantale. Sventa xjelbat snopbenik xchiʼuk stalelalik yuʼun li xchʼul espiritu Jeovae skʼan me xjelav kʼuk sjaliluk (Mar. 4:26-29).
3. ¿Kʼuxi xuʼ jkoltatik sventa x-ayan slekil talelalik li kaj-estudiotike?
3 Koltao yoʼ xlekub stalelalik. Kʼalal jmoj ta jchantik xchiʼukik junantik teksto ti chalbe skʼoplal li slekil yoʼonton xchiʼuk li kʼanelal yuʼun Jeovae, xuʼ xkoltaatik sventa x-ayan slekil talelalik. Sventa xakʼik venta ti oyutik tajek ta yoʼonton li Diose, xuʼ jkʼelbetik li Salmos 139:1 kʼalal ta 4 xchiʼuk Lukas 12:6 xchiʼuk 7. Kʼalal oy buchʼu oy ta yoʼonton ta melel tstojbe ta vokol li slekil yoʼonton Jeovae, ta me xchʼi yuʼun li kʼanelal ta stojolale xchiʼuk ti kʼu yelan chichʼ ta mukʼe (Rom. 5:6-8; 1 Juan 4:19). Jech xtok, kʼalal mi la xchan ti kʼu yelan chaʼi sba Jeova ta skoj li kʼusitik tspase, jaʼ xa me oy ta yoʼonton spasel li kʼusitik leke xchiʼuk li kʼusitik tsmuyubta-o Diose (Sal. 78:40, 41; Prov. 23:15).
4. ¿Kʼu yelan xuʼ jchanbetik stalelal Jeova kʼalal chkakʼtik estudioe?
4 Li Jeovae muʼyuk tsujutik ta xchʼunbel li smantaltake, jaʼ noʼox chakʼ iluk ti jaʼ sventa jlekilaltik mi la jchʼunbetik li tojobtasel yuʼune (Is. 48:17, 18). Yakal me ta jchanbetik stalelal Jeova mi chkakʼtik akʼo snop stuk li kaj-estudiotike. Mi jech ta jpastik taje, mas me lek li kʼusi chkʼot ta pasel ta xkuxlejale (Rom. 12:2). Jaʼ me jech ta xnopajik mas ta stojolal li Jeovae, yuʼun li Vivliae xi chale: «Li yoʼnton cristianoe jaʼ tsqʼuel stuc li Mucʼul Diose» (Prov. 17:3).