Oyuk ta avoʼonton li buchʼu chchikintaike

KʼALAL chbat jcholbetik mantal li krixchanoetike, maʼuk noʼox skʼan xchikintaik, skʼan xkʼot ta yoʼontonik kuʼuntik xtok. Li kʼusi xuʼ skoltautik ta spasele jaʼ ti oyuk ta koʼontontik ta melel li buchʼu ta jcholbetik mantale. Oy ep ta tos ti kʼu yelan xuʼ xkakʼtik ta ilel ti oy ta koʼontontike.

Tsako ta venta li kʼusi tsnopike. Li jtakbol Pabloe la stsak ta venta ti kʼu yelan echʼem talel xkuxlejalik li buchʼutik la xcholbe mantale xchiʼuk li kʼusi tsnopike. Xi laj yalbe smelolale: «La jpas jba kʼuchaʼal juda ta stojolal li judaetike sventa ta jpas ta kanal li judaetike; la jpas jba kʼuchaʼal ventainbilun yuʼun mantal ta stojolal li buchʼutik ventainbilik yuʼun mantale, akʼo mi muʼyuk bu sventainojun li mantale sventa ta jpas ta kanal li buchʼutik ventainbilik yuʼun mantale. La jpas jba kʼuchaʼal muʼyuk ventainbilun yuʼun mantal ta stojolal li buchʼutik muʼyuk ventainbilik yuʼun mantale, akʼo mi ventainbilun yuʼun mantal li ta sat Diose xchiʼuk sventainojun li smantal Kristoe, sventa ta jpas ta kanal li buchʼutik muʼyuk ventainbil yuʼun mantale. Kʼun la jpas jba ta stojolal li buchʼutik kʼunike, sventa ta jpas ta kanal li buchʼutik kʼune. La jpas jba ta kʼusiuk noʼox ta stojolal skotol li krixchanoetike, sventa akʼo xuʼ jech xkolik jayvoʼuk ta sventa li kʼusitik la jpase. Ta jpas skotol ta skoj li lekil aʼyejetike, sventa xuʼ chkalbe batel li yantike» (1 Kor. 9:20-23). ¿Kʼusi skʼan jpastik avi ek sventa «jpas [jbatik] ta kʼusiuk noʼox ta stojolal skotol li krixchanoetike»?

Kʼalal skʼan xakʼopoje, akʼo venta kʼu yelan li buchʼu chacholbe mantale, jaʼ tskoltaot sventa xanaʼ kʼusi oy ta yoʼonton xchiʼuk kʼu yelan xkuxlejal li yajval nae. ¿Mi xuʼ xavakʼ venta kʼusi yabtel li jun krixchanoe? ¿Mi xuʼ xavakʼ venta mi oy srelijion o ti kʼu yelan li yutsʼ yalale? Mi laj avakʼ ta venta une, ¿mi xuʼ jaʼ xalikes-o aloʼil sventa mas xkʼot ta yoʼonton?

Sventa mas xchikintaik li kʼusi chaval ta cholmantale, nopo baʼyel kʼu yelan chkʼot akʼopon li yajval nae. Bakʼintike oy ta jtatik krixchanoetik ti likemik tal ta yantik lume. ¿Mi anaʼoj kʼuxi xuʼ xacholbe lek mantal li krixchanoetik taje? «Li kʼusi tskʼan yoʼonton li Diose jaʼ ti akʼo koluk skotol li krixchanoetike xchiʼuk ti akʼo yojtikinik lek li kʼusi melele», jaʼ yuʼun kakʼbetik yipal sventa xkʼot ta yoʼonton kuʼuntik li lekil aʼyej sventa li Ajvalilal yuʼun Diose (1 Tim. 2:4).

Lek xachikintabe. Manchuk mi snaʼoj skotol li Jeovae, ta onoʼox xchikinta li kʼusi ch-albate. Oy kʼusi akʼbat yil yuʼun Dios li j-alkʼop Micaias (Micaya) ti te la sta ta kʼelel ti yakal tsjakʼbe yaj-anjeltak Jeova kʼusi tsnopik sventa spasik jun abtelale. Oy jun anjele laj yal ti snopoj kʼusi tspase, vaʼun albat yuʼun Dios ti akʼo spase (1 Rey. 22:19-22, Ch). Kʼalal laj yal Abraan ti tsvul-o yoʼonton ti chichʼ lajesel li Sodomae, chikintabat lek yuʼun li Jeovae (Gén. 18:23-33). ¿Kʼu yelan xuʼ jchanbetik stalelal Jeova li ta cholmantale?

Tijbo yoʼonton ti akʼo loʼilajuk li yajval nae, oyuk kʼusi xajakʼbe ti sta-o leke, vaʼun malao sventa stakʼ talel. Lek xachikintabe. Mas oy ta yoʼonton chloʼilaj mi lek chachikintabee. Mi laj avakʼ venta li kʼusi oy ta yoʼontone, ta slekil avoʼonton oyuk kʼusi yan xajakʼbe. Akʼo ta avoʼonton yojtikinel lek li krixchanoe, pe mu me toj epuk kʼusi xajakʼbe xtok. Mi xuʼ chavile, jaʼ lek albo yaʼi ti lek li kʼusi tsnope. Manchuk mi mu koʼoluk li kʼusi chanopike, tojbo ta vokol ti chal li kʼusi tsnope (Kol. 4:6).

Oyuk noʼox me spʼisol kʼalal chkakʼtik ta ilel ti oy ta koʼontontik li yantike. Kʼalal oy ta koʼontontik li jun krixchanoe, maʼuk skʼan xal ti xuʼ jtikʼ jbatik ta xkuxlejalike (1 Ped. 4:15). Skʼan me jkʼel jbatik mi maʼuk jchiʼiltik ta vinikal o ta antsil li buchʼu ta jchiʼintik ta loʼile, sventa mu chopoluk kʼusi snopik kʼalal ta slekil koʼonton ta jkʼopontike. Skʼan xkichʼ jpʼijiltik, yuʼun li kʼusi lek noʼox chilik ta jun lume mu jechuk chilik li ta yan lume o jelel kʼusi tsnopik jujun krixchano (Luk. 6:31).

Mi lek ta jchapan jbatik ta cholmantale, jaʼ tskoltautik sventa jchikintabetik li kʼusi chalike. Yuʼun kʼalal jnaʼojtik lek li kʼusi chbat kalbetike, jaʼ tskoltautik sventa junuk koʼontontik xijkʼopoj xchiʼuk ta jchikintabetik li kʼusi chalike. Mi jech ta jpastike, mas lek chaʼi sbaik xchiʼuk mas jun yoʼonton chchiʼinutik ta loʼil.

Chkichʼtik ta mukʼ yantik kʼalal ta jchikintatik li kʼusi chalike (Rom. 12:10). Mi jech ta jpastike, chkakʼtik ta ilel ti ta jtsaktik ta venta li kʼusi tsnopike xchiʼuk ti kʼu yelan chaʼi sbaike, jech xtok jaʼ van chtijbat-o yoʼontonik sventa xchikintaik li kʼusi chkalbetike. Jaʼ yuʼun xi tstojobtasutik li Vivliae: «Oyuk ta avoʼontonik xchikintael, nopik me lek kʼalal chakʼopojike» (Sant. 1:19).

Koltao yantik sventa xchʼiik ta mantal. Kʼalal oy ta koʼontontik li krixchanoetike, jaʼ tskoltautik sventa teuk-o ta joltik li buchʼutik lek laj yaʼiik mantale xchiʼuk ti jchaʼvulaʼantik sventa xbat kalbetik jtosuk mantal ti mas chtun yuʼune. Nopo baʼyel kʼu yelan xkuxlejal li yajval na kʼalal skʼan to xbat achaʼvulaʼane. Jaʼ xachapan li kʼusi tsvul-o yoʼontone. Akʼbo yil ti jtunel yuʼun ta xkuxlejale xchiʼuk ti xuʼ stabe sbalil li kʼusi yakal chchane (Is. 48:17).

Mi oy kʼusi laj yalbot ti jaʼ tsvul-o yoʼontone, toj lek ti jaʼ xalikes-o aloʼil sventa xacholbe mantale. Chanbo stalelal Jesus ti laj onoʼox spatbe yoʼonton li buchʼutik oy svokolike (Mar. 6:31-34). Mu me jpʼelchaʼpʼeluk noʼox kʼusi xaval ta anil ti kʼuxi chchapaj-o li svokole, yuʼun xuʼ snop ti muʼyuk ta avoʼonton mi jech chapase. Li kʼusi xuʼ xapase jaʼ ti xavaʼibe xkʼuxul li svokole (1 Ped. 3:8). Mi laje, saʼo batel vunetik ti lokʼem ta Vivlia sventa xbat avakʼbe ti jaʼ chkoltaat ta stsʼikel li svokole. Mi oy ta avoʼonton li yajval nae, muʼyuk me chavalbe batel yantik li kʼusi jaʼ noʼox laj yalbot voʼote, jaʼ to mi oy lek srasonal ti xuʼ xaval batele (Prov. 25:9).

Jaʼ mas skʼan oyuk ta koʼontontik li buchʼutik ta jchanubtastik ta Vivliae. Kʼanbo koltael Jeova sventa xanaʼ kʼusi chtun yuʼun li buchʼu chachanubtase xchiʼuk teuk ta ajol kʼalal chachapan abae. Xi xajakʼbe abae: «¿Kʼusi skʼan spas sventa xchʼi-o batel ta mantal?». Ta slekil avoʼonton albo kʼusi skʼan spas ti te chal ta Vivlia xchiʼuk ta vunetik ti jaʼ yakʼoj «li tukʼil xchiʼuk pʼijil [mosoile]» xchiʼuk koltao sventa oyuk sbalil xil li kʼusi chale (Mat. 24:45). Bakʼintike maʼuk noʼox skʼan jchapbetik smelolal li kʼusi yakal chchane. Skʼan snaʼ kʼuxi chakʼ ta xkuxlejal junuk beiltasel ta Vivlia, sventa spas kuʼuntike skʼan ti oyuk kʼusi jmoj jpastike (Juan 13:1-15).

Skʼan oyuk noʼox spʼisol xchiʼuk skʼan xkichʼ jpʼijiltik kʼalal ta jkoltaik yantik yoʼ xakʼ ta xkuxlejalik li smantaltak Jeovae. Yuʼun jelajtik kʼusi echʼem ta xkuxlejal jujun krixchano xchiʼuk ti kʼusi xtojobik spasele, jaʼ jech jelajtik xtok ti kʼu yelan chchʼiik ta mantale. Jaʼ yuʼun oyuk noʼox me srasonal li kʼusi chakʼan akʼo spasike (Filip. 4:5). Mu xasuj ta sjelel li xkuxlejale, jaʼ lek koltao sventa xtijbat yoʼonton yuʼun Skʼop Dios xchiʼuk xchʼul espiritu Dios ta sjelel li xkuxlejale. Li Jeovae oy ta yoʼonton ti ta sjunuluk koʼontontik xijtun ta stojolale, mu skʼan ti sujbilutike (Sal. 110:3). Akʼo snop stuk li kʼusi oy ta sba snopel li krixchanoe, mu xavalbe kʼusi skʼan spas manchuk mi tsjakʼbot (Gal. 6:5).

Tunuk yuʼun ti kʼu yelan chakoltae. Li kʼusi mas tsvul-o yoʼonton li Jesuse jaʼ ti kʼu yelan oyik ta mantal li buchʼu chchiʼin ta loʼile, pe stsakoj ta venta xtok li yan kʼusitik chtun yuʼunike (Mat. 15:32). Manchuk mi muʼyuk kʼusi mas x-ayan kuʼuntik, oy ep ta tos ti kʼu yelan xuʼ xijkoltavane.

Mas chijtsakvan ta mukʼ mi oy ta koʼontontik li yantike. Kalbetik skʼoplal liʼe, mi chakʼ voʼ o kʼixin tajek kʼakʼal ti vokol chaʼi li yajval nae, kʼelo bu xuʼ xaloʼilajik o ta yan to kʼakʼal xachiʼin ta loʼil. Mi jaʼo lakʼot kʼalal muʼyuk kʼusi xute, albo ti chasut ta mas tsʼakale. Mi ip chaʼi o mi te oy ta ospital li buchʼu lek laj yaʼi mantale o junuk alakʼna ti lek chaʼi mantal eke, akʼo ta ilel ti oy ta avoʼontone, xuʼ xatakbe batel junuk tarjeta o jlikuk karta o bat vulaʼano. Mi xuʼ chavile, xuʼ xavichʼbe batel jutuk sveʼel o yan kʼuxi xuʼ xakolta.

Li buchʼutik yakal xa chchʼiik ta mantale xuʼ van chat yoʼonton ta skoj ti muʼyuk xa chchiʼinik li buchʼutik nopem toʼox xaʼiik xchiʼinele. Akʼbo yil ti xuʼ xavamigoin abaike. Xuʼ xaloʼilajik mi laj xaʼox avoʼontonik ta xchanel li Vivliae xchiʼuk xuʼ xachiʼin ta loʼil ta kʼusiuk noʼox ora, tijbo yoʼonton xtok ti jaʼ xchiʼin li buchʼutik lek stalelalike (Prov. 13:20). Koltao sventa xbat li ta tsobajeletike, chiʼino ta chotlej xchiʼuk koltao ta skʼelel yalab o xnichʼnab sventa stabeik sbalil skotolik li mantale.

Akʼo ta ilel ti oy ta avoʼonton ta melel li yantike. Kʼalal oy ta koʼontontik li yantike, mu chanbiluk ta jpastik, yuʼun chlokʼ ta koʼontontik. Ep kʼu yelan xuʼ xkakʼtik ta ilel mi oy ta koʼontontike: te chvinaj ti kʼu yelan ta jchikintabetike, ti kʼusi chkalbetike, ti oy slekil koʼontontik ta stojolale xchiʼuk ti ta jtsaktik ta mukʼe. Manchuk mi muʼyuk kʼusi chkalbetik o mi muʼyuk kʼusi ta jpastik, xilik onoʼox ta jtalelaltik o ta jsatik ti oy ta koʼontontike.

Ti kʼu yuʼun oy ta koʼontontik ta melel li yantike jaʼ ta skoj ti ta jchanbetik stalelal li Jtotik ta vinajel ti chkʼanvan xchiʼuk ti chkʼuxubinvane. Taje jaʼ chkoltaatik sventa xnopajik ta stojolal Jeova xchiʼuk ti xkʼot ta yoʼontonik li lekil aʼyeje. Jaʼ yuʼun kʼalal ta jcholtik mantale, skʼan me xkakʼ ta koʼontontik spasel liʼe: «Oyuk-o me ta avoʼontonik li yantike, maʼuk noʼox me xanop akʼoplal atukik» (Filip. 2:4).