Pato oʼontonal xchiʼuk tsatsubtasvanan

KʼUSIUK vokolil tsnuptanik li yajtuneltak Diose xuʼ me jaʼ snakʼobbailik chkʼot li tsobobbaile, yuʼun jaʼ te tsta spatobil yoʼontonik. Jaʼ yuʼun li moletik ta tsobobbaile skʼan spatik oʼontonal kʼalal tsjelubtasik mantale xchiʼuk kʼalal chakʼik tojobtasele. Jech xtok skʼan xkʼotik «jech chac cʼu chaʼal jpojubbailtic ta tsatsal icʼ, jaʼ jech chac cʼu chaʼal jnacʼubbailtic cʼalal chtal tsots icʼal voʼ, jaʼ jech chac cʼu chaʼal jun bevoʼ ti chatʼes lec taqui banamile, jaʼ jech chac cʼu chaʼal xyaxinal mucʼta chʼen ta scʼuxul cʼacʼal ta qʼuixin osil» (Is. 32: 2).

Mi molot ta tsobobbaile, ¿mi tspatbe yoʼonton xchiʼuk mi tstsatsubtasbe yoʼonton yantik kʼalal chajelubtas apartee? ¿Mi tspatbe yoʼontonik li buchʼutik chakʼik persa tukʼ chtunik ta stojolal li Jeovae? ¿Mi tstsatsubtasbat yoʼontonik yoʼ jech spasik-o li kʼusi tskʼan yoʼonton Jeova akʼo mi muʼyuk lek ch-ilatik yuʼun krixchanoetik xchiʼuk akʼo mi chichʼik kontrainele? ¿Mi oy buchʼutik ipik ta at-oʼonton, mi chil svokolik ta takʼin o mi snuptanojik chamel ti mu stakʼ poxtaele? Li ‹voʼote xuʼ ta lekil kʼop› xatsatsubtasbe yoʼontonik (Job 16:5).

Jaʼ yuʼun kʼalal chajelubtas apartee, koltao li ermanoetik sventa stsatsub yoʼontonik xchiʼuk sventa spat yoʼontonik ta stojolal Jeova xchiʼuk ta skotol li kʼusitik yakʼoj sventa stabeik sbalile (Rom. 15:13; Efes. 6:10).

Vulesbo ta sjol ermanoetik li kʼusitik spasoj Jeovae. Ti kʼu yelan tsots skʼoplal sventa jpatbetik yoʼontonike jaʼ ti xlik kalbetik skʼoplal ti kʼutik yelan la skolta steklumal ta voʼne li Jpasvanej kʼalal laj yil svokolike (Rom. 15:4).

Li Jeovae laj yalbe Moises ti akʼo ‹spatbe yoʼonton xchiʼuk stsatsubtasbe yoʼonton› li Josue kʼalal muʼyuk toʼox bu ch-ochik ta Albil Balumile, ti jaʼ toʼox te nakal li jyanlumetik ti jaʼ yajkontraike. ¿Kʼuxi pas yuʼun Moises li kʼusi albate? Te skʼeloj Josue la svulesbe ta sjol j-israeletik ti kʼuxi koltaatik yuʼun Dios kʼalal lokʼik tal ta Ejiptoe (Deut. 3:28; 7:18). Jech xtok la svulesbe ta sjolik kʼalal koltaatik yuʼun Jeova ta yok skʼob li j-amorreoetike. Vaʼun xi albat yuʼun Moises li Josuee: «Tsotsan me. Oyuc me stsatsal avoʼnton» (Deut. 31:1-8). Kʼalal chavakʼ persa ta spatbel yoʼontonik xchiʼuk ta stsatsubtasbel yoʼontonik li ermanoetike, ¿mi chavulesbe ta sjolik li kʼusitik spasoj xa Jeova ta stojolalike?

Bakʼintike tsots tajek chaʼiik svokolik li krixchanoetike, jaʼ yuʼun tsnopik mi tstaik onoʼox ta melel li bendisionetik chakʼ li Ajvalilal yuʼun Diose. Vulesbo ta sjolik ti xuʼ jpat koʼontontik yuʼun li kʼusi yaloj tspas Diose (Jos. 23:14).

Li ta lumetik ti bu mu x-akʼbat xcholik mantal li ermanoetike, li moletik ta tsobobbail ti lek yoʼontonike xuʼ jaʼ xalbeik skʼoplal li kʼusi kʼot ta xkuxlejalik yajtakboltak Jesukristo sventa spatbeik yoʼonton li ermanoetike (Ech. 4:1–5:42). Jech xtok, mi chalbeik skʼoplal ti kʼuxi la sbeiltas Dios li kʼusitik kʼot ta pasel ti te tsʼibabil kom ta slivroal Estere, xuʼ chpatbat tajek yoʼontonik.

Oy jlom mu xchʼiik ta mantal li buchʼutik chkʼotik ta tsobajele. Yuʼun yalojik van ti mu x-akʼatik ta perton yuʼun Dios ta skoj li kʼusitik chopol toʼox la spasike. Mi jech chaʼi sbaike, albo skʼoplal ti kʼu yelan kʼuxubinat yuʼun Jeova li ajvalil Manasese. O albo skʼoplal li buchʼutik te nakalik ta voʼneal Korinto ti la sjel xkuxlejalike, ti kʼotik ta jchʼunolajele xchiʼuk ti tukʼ xa albat skʼoplalik yuʼun Diose (2 Crón. 33:1-16; 1 Kor. 6:9-11).

¿Mi oy van buchʼutik tsnopik ti yuʼun muʼyuk xa lek ch-ilatik yuʼun Dios ta skoj li svokolike? Mi jeche, vulesbo ta sjolik ti laj onoʼox yil svokol li Job eke xchiʼuk ti la sta epal bendision ta tsʼakal ta skoj ti tukʼ laj yakʼ sba ta stojolal Jeovae (Job 1:1-22; 10:1; 42:12, 13; Sal. 34:19). Li buchʼutik ay spatbeik yoʼonton ta alel li Jobe laj yalik ti yuʼun la la spas smule (Job 4:7, 8; 8:5, 6). Pe li Pablo xchiʼuk Bernabee mu jechuk la spasik, li stukike «la stsatsubtasbeik yoʼonton li jchankʼopetike, la spatbeik yoʼonton ti akʼo oyuk-o xchʼunel yoʼontonike, xi laj yalike: ‹Ta onoʼox xkil ep tsots jvokoltik sventa chij-ochutik li ta Ajvalilal yuʼun Diose›» (Ech. 14:21, 22). Li buchʼutik chil svokolik ta jkʼakʼaliltik eke ta me stsatsub yoʼontonik avuʼun mi chavakʼbe yil ta Vivlia ti ta onoʼox xkil jvokoltik li yajtsʼaklomutik Kristoe xchiʼuk ti toj ep sbalil chil Dios mi kuch kuʼuntike (Prov. 27:11; Mat. 24:13; Rom. 5:3, 4; 2 Tim. 3:12).

Albo ti akʼo snopbeik skʼoplal li kʼutik yelan kʼotem ta pasel yuʼun Jeova li kʼusitik yaloj tspas ta stojolalike. Mi jech chapase, jaʼ jech chakolta yoʼ xakʼik venta ti koltabilik xa yuʼun Dios jech kʼuchaʼal yaloj onoʼoxe. Xi chal li ta Salmo 32:8: «Vuʼun ta jbijubtasot; vuʼun ta jchanubtasot lec. Ta xcacʼbot lec avil bu beal tscʼan chabat; scotol cʼacʼal te oy o jsat ta atojol». Mi chichʼ vulesbel ta sjolik ti kʼu yelan beiltasatik xchiʼuk ti tsatsubtasatik yuʼun Jeovae, mas chchʼunik ti kʼanbilik yuʼun li Diose xchiʼuk ti chkoltaatik ta melel li ta svokol yakal tsnuptanike (Is. 41:10, 13; 1 Ped. 5:7).

Akʼo ta ilel ti xkuxet avoʼonton yuʼun li kʼusi yakal tspas Diose. Sventa xapatbe yoʼonton li ermanoetike, jaʼ akʼo ta avoʼonton li kʼusitik lek spasoj Jeova ta stojolal li yajtuneltake. Akʼo ta ilel ta akʼopojel ti xkuxet avoʼonton yuʼun li kʼusitik spasoj Jeovae sventa jechuk xkuxet yoʼonton avuʼun li buchʼutik te oyike.

Nopbo skʼoplal ti kʼu yelan skoltaojutik Jeova yoʼ stsal kuʼuntik li kʼusitik chkichʼtik sujel ta spasel jujun kʼakʼale. Li Diose jaʼ chchanubtasutik ti kʼu yelan xuʼ lek xbat li jkuxlejaltike (Is. 30:21). Chalbutik ti kʼu yuʼun oy li pʼaj mantale, ti muʼyuk tukʼilale, ti oy povreale, ti oy chamel xchiʼuk lajelale, jech xtok chalbutik ti kʼu yelan tslajesbe skʼoplal skotol li kʼusitik taje. Yakʼojbutik ermanoetik ti jaʼ kʼotem ta jpojobbailtike xchiʼuk li matanal ti stakʼ jpastik orasione. Jaʼ jun matanal xtok ti jaʼ Stestigoutike. Yakʼoj kiltik xtok ti ochem xa ta ajvalil ta vinajel li Kristoe xchiʼuk ti poʼot xa tajek xlaj skʼoplal li slajebal kʼakʼale (Apok. 12:1-12).

Albo yaʼi xtok ti jaʼ jun bendision ti chijbat ta tsobajeletik xchiʼuk ta asambleaetike. Mi chatoj ta vokol li bendisionetik taje, jech me chatijbe yoʼonton ermanoetik sventa mu xikta sbaik ti jech tstsobilan sbaik xchiʼuk li yantik ermanoetike (Evr. 10:23-25).

Li kʼusitik chichʼ albel skʼoplal ti chkʼot ta pasel li ta s-organisasion Jeovae jaʼ jun sprevail ti chakʼbe bendision kabteltik ta cholmantal li Jeovae xchiʼuk ti tspat koʼontontike. Kʼalal jaʼo yakal chbatik ta Jerusalen li Pablo xchiʼuk Bernabe ta baʼyel sigloe, «xmuyubaj noʼox yuʼunik skotol li [ermanoetik]» kʼalal laj yalbeik ti pasik ta jchʼunolajel li jyanlumetike (Ech. 15:3). Jaʼ me chmuyubaj-o avuʼun ermanoetik ek mi jaʼ chavalbe skʼoplal li kʼusitik lek kʼotem ta pasel ta xkuxlejal li yantike.

Mas to me chpatbat yoʼontonik mi jaʼ chavalbe ti oy sbalil li kʼusi yakalik spasele. Kʼupil kʼoptao li buchʼutik xuʼ lek yuʼunik cholmantale, jech xtok kʼupil kʼoptao ti jech kuchem talel yuʼunik li buchʼutik jutuk chlokʼik ta cholmantal ta skoj ti ip noʼox chaʼiike o ta skoj ti oy xa sjabilalike. Vulesbo ta sjolik ti mu xchʼay ta sjol Jeova ti chakʼik ta ilel ti skʼanojbeik li sbie (Evr. 6:10). Li ermanoetike lek ti chichʼ vulesbel ta sjolik ti oy tajek sbalil mi kuch yuʼun preva li xchʼunel yoʼontonike (1 Ped. 1:6, 7).

Kuxetuk avoʼonton kʼalal chavalbe skʼoplal li spatobil koʼontontike. Toj ep chpatbat yoʼontonik li buchʼutik skʼanojik Jeova kʼalal chkalbetik skʼoplal li bendisionetik ti yaloj chakʼ Diose. Xuʼ van ep buchʼutik ti ep ta velta yaʼiojbeik xa skʼoplal li bendisionetik taje. Pe mi chavakʼ ta ilel ti chatoj ta vokol kʼalal chavalbe skʼoplal li kʼusi yaloj tspas Diose, mas to chkʼot ta yoʼontonik, vaʼun mas tspat yoʼontonik ti chkʼot onoʼox ta pasele xchiʼuk ti tstojik ta vokole. Jech me chkʼot ta pasel avuʼun mi chachʼun li tojobtaseletik chichʼ alel li ta Chanob vun sventa Kabteltik yuʼun Diose.

Manchuk mi jaʼ Jeova ti tspatbe yoʼonton xchiʼuk ti tstsatsubtasbe yoʼonton li steklumale, xuʼ me jech xakoltavan ek. Jaʼ yuʼun jaʼuk me sventa xapatbe yoʼonton ermanoetik kʼalal chajelubtas apartee.