¿Mi cha kʼan cha chanbe mas skʼoplal li Vivliae?

¿Kʼu yuʼun skʼan kʼelel li Vivliae?

LI VIVLIAE mu xkoʼolaj ta yan livroetik, yuʼun te oy li smantaltak Dios ti ta sjunul yoʼonton yakʼoje (1 Tesalonicenses 2:13). Mi cha vakʼ ta akuxlejal li kʼusi chchanubtas li Vivliae, ep sbalil cha ta. Ta x-epaj li kʼanelal avuʼun ta stojolal li Diose xchiʼuk cha nopaj mas ta stojolal ti Buchʼu chakʼ «skotol li kʼusi leke xchiʼuk li kʼusitik lek tukʼ chi j-akʼbate» (Santiago 1:17). Ta xa chan skʼoponel, xchiʼuk kʼalal cha vil avokole cha ta ta kʼelbel li skoltael Diose. Jech noxtok, mi cha vakʼ ta akuxlejal li mantaletik ta Vivliae, Dios ta xa yakʼbot akuxlejal sbatel osil (Romanos 6:23).

Li ta Vivliae te oy melelaletik ti tsjambe smelolal li kʼusitike. Ti buchʼutik ta xaʼibe smelolal li kʼusi chal li Vivliae ta xkolik li ta jecheʼ nopbenaletik ti pasbil ta mantal sjol yoʼonton li epal miyon krixchanoetike. Jech kʼuchaʼal liʼe, kʼalal ta jnaʼtik li kʼusi chkʼot ta pasel kʼalal chcham jun krixchanoe ta skoltautik sventa mu xa jchʼuntik ti xuʼ chi jyilbajinutike, xchiʼuk tskoltautik sventa mu jchʼuntik ti ta xil svokolik li kutsʼ kalaltik o kamikotik ti chamemik xae (Ezequiel 18:4). Li chaʼkuxesel ti chal li Vivliae, ta spatbe yoʼonton li krixchanoetik ti oy buchʼu chamem yuʼunike (Juan 11:25). Jech noxtok, kʼalal ta xkojtikintik li melel ta sventa li chopol anjeletike ta spʼijubtasutik li ta vokoliletik ti xuʼ jnuptantik ta skoj li espiritismoe xchiʼuk ta skoltautik ta yaʼibel smelolal ti kʼu yuʼun oy ep vokoliletik ta lume.

Li chanubtaseletik yuʼun Dios te ta Vivliae ta xchanubtasutik kʼuxi xuʼ ta jta jlekilaltik li ta jbekʼtaltike. Jech kʼuchaʼal liʼe, li krixchano ti «lek tsnop kʼusi ta spase» jaʼ chkoltaat sventa mu x-ipaj (1 Timoteo 3:2, LS [Z]). Mi ta «jsakubtas jbatik ta skotol yikʼobal bekʼtalil xchiʼuk ti espiritue», vaʼun bi muʼyuk bu ta jsokes jbekʼtaltik (2 Corintios 7:1, NM). Li yabtelanel smantaltak Dios ti te chvinaj ta Vivliae ta xakʼ muyubajel ta anupunel xchiʼuk ta xal kʼuxi xuʼ cha kʼuxubin aba (1 Corintios 6:18).

Mi cha vakʼ ta akuxlejal li sKʼop Diose, ta xchʼi li smuyubajel avoʼontone. Li ojtikinelal ta Vivliae ta xakʼ slekil yutil oʼontonal, muyubajel, xchiʼuk spatel oʼontonal. Chkoltavan sventa ta xchʼi li kʼuxubinelal, kʼanelal, kuxetel oʼontonal, jun noʼox oʼontonal, lekil oʼontonal, xchʼunel oʼontonal xchiʼuk yan lekil elaniletik ti jaʼ tspasutik ta lekil malalil, ajnilal, totil, meʼil, keremil xchiʼuk tsebil (Gálatas 5:22, 23; Efesios 4:24, 32).

¿Mi oy ajakʼojbe aba ti kʼusi chkʼot ta pasel ta jtojolaltik ta tsʼakale? Li albil kʼopetik ta Vivliae chakʼ kiltik bu kʼakʼal oyutik tana. Mu jaʼuk noʼox ta xal kʼu yelan li lum tanae, yuʼun ti Dios xtoke chal ti poʼot xa ta skʼatajes ta jun paraiso li Balumile (Apocalipsis 21:3, 4).

Koltael sventa yaʼibel smelolal li Vivliae

Xuʼ van lik xa akʼel li Vivliae, pe yikʼal van tsots jutuk ta yaʼibel smelolal cha vaʼi. Yikʼal van mu xa naʼ stael ta aVivlia li stakʼobiltak kʼusitik cha jakʼbe abae. Mu xa vat avoʼonton, mu atukuk noʼox. Jkotoltik ta jkʼantik koltael sventa chkaʼibetik smelolal li sKʼop Diose. Epal miyon krixchanoetik ta 235 mukʼtik lumetik chanubtasbilik ta moton yuʼun xrextikotak Jeova, jaʼ yuʼun ta sjunul yoʼontonik ta xa skoltaik ek.

Jaʼ onoʼox lek ti mi ta kʼunkʼun ta xichʼ chanel li Vivliae. Jaʼ baʼyuk akʼo yichʼ likesel li ta kʼusitik baʼyel skʼan chanele (Hebreos 6:1). Jech kʼu yelan cha chanilan batele, kʼun cha vaʼi sveʼel li «tsatsal veʼlile», jaʼ xkaltik, li melelaletik ti tsots ta aʼibel smelolaltake (Hebreos 5:14). Li livro ti mas tsots skʼoplal ta chanele jaʼ li Vivliae. Pe vunetik ti lokʼemik sloʼil ta Vivlia, jech kʼuchaʼal li foyeto ¿Kʼusi tskʼanbutik ti Diose?, cha skoltaot ta yaʼibel smelolal li kʼusi chal sventa li jel tos chanubtaseletik yuʼun li Vivliae.

¿Mi oy ta avoʼonton cha chʼakbe yorail xchanel jujun xemana li Vivliae?

Jechtik onoʼox, li chanubtasel ta Vivliae ta xichʼ akʼel kʼusuk noʼox ora xchiʼuk ti buuk noʼox tskʼan yoʼonton li krixchanoe. Ep krixchanoetik ta xchanik ta snaik. Ti jlome ta xchanik ta telefono. Jaʼ chanubtasel ta jujuntal —maʼuk ta jtsop krixchanoetik— jaʼ ti kʼuxi xuʼ yuʼun li buchʼu chchane, xchiʼuk jaʼ ti kʼu yepal xuʼ yuʼun xchanele. Muʼyuk cha vichʼ pasbel eksamenetik xchiʼuk muʼyuk cha vichʼ kʼexlaltasel. Cha tabe stakʼobiltak li kʼusi cha kʼan cha naʼ ta Vivliae xchiʼuk cha chan kʼuxi xuʼ cha nopaj ta stojolal Dios.

Muʼyuk cha toj li chanubtasel ta Vivlia cha vichʼe (Mateo 10:8). Ta moton chichʼ chanubtasel skotol krixchanoetik ti oy xchiʼuk muʼyuk srelijionik, pe jaʼ noʼox mi ta melel oy ta yoʼontonik xchanel mas li sKʼop Diose.

¿Buchʼutik xuʼ ta xchanik? Skotol avutsʼ avalal xchiʼuk ti buchʼutik oy ta avoʼonton cha kʼan cha vikʼ ta xchanel li Vivliae. O mi jech cha kʼane, xuʼ atuk noʼox.

Ep buchʼutik ta xchʼakik jun ora ta xemana sventa chchanik li Vivliae. Pe, akʼo mi jal cha kʼan cha chan ta xemana o mi jutuk noʼox, li Rextikoetike ta skʼelik kʼuxi xuʼ cha skoltaikot.

Jun ikʼel sventa xchanel

Chkalkutik avaʼi ti xa kʼopon li xrextikotak Jeovae. Xuʼ ta xa pas mi cha tsʼibaj batel ta buuk noʼox jotukal snailal ti liʼ tsʼibabil ta olone. Jaʼ tsaʼik buchʼu xuʼ ta xakʼbot moton chanubtasel ta ana ta sventa li Vivliae.

□ Takbikun talel li foyeto ¿Kʼusi tskʼanbutik ti Diose? Alo ta kʼusi kʼopal.

□ Ta jkʼan cha valbikun skʼoplal li moton chanubtasel avuʼunik ta naetike.