¿Kʼu yelan li chanubtasel ta Vivlia chakʼik li stestigotak Jeovae?
Li stestigotak Jeovae tskoltaik li krixchanoetik sventa xaʼibeik smelolal kʼusi chchanubtasvan li Vivliae. Li chanubtasel ta Vivlia chakʼike xuʼ skoltaot ta akuxlejal jech kʼuchaʼal liʼe:
Xamuyubaj noʼox.
Chavamigoin Dios.
Chachan kʼusi chal Vivlia ti chkʼot ta pasel ta jelavele.
Li ta pajina liʼe, ta jtakʼtik li sjakʼobiltak liʼe:
Mi la jchʼam jun chanubtasel ta Vivliae, ¿mi skʼan xi˗och ta stestigo Jeova?
¿Mi xuʼ oy buchʼu xchiʼinun kʼalal chkichʼ chanubtasel ta Vivliae?
Mi laj xa onoʼox kichʼ estudio ta voʼnee, ¿mi xuʼ to xkichʼ estudio yan velta?
¿Kʼu yelan chichʼ akʼel li chanubtasel ta Vivliae?
Oy buchʼu tskoltaot sventa xavaʼibe smelolal Vivlia ti ta jujun xchanobil chakʼelik batele. Jaʼ tskoltaot ta yaʼibel smelolal li livro ¡Kʼupino akuxlejal ta sbatel osil!, kʼunkʼun chachan batel kʼusi chchanubtasvan li Vivliae xchiʼuk kʼuxi xuʼ xatabe sbalil. Mi chakʼan to chanabe mas yaʼyejale, kʼelo li video liʼe.
¿Mi tojbil li chanubtasele?
Muʼyuk. Li stestigotak Jeovae Jaʼ jech ta jpaskutik kʼuchaʼal laj yalbe Jesus li yajchankʼoptake: «Ta moton la˗akʼbatik, jaʼ jech ta moton xavakʼik ek» (Mateo 10:8). Muʼyuk chichʼ tojel jutebuk li buchʼu chchanubtasvane, jech xtok muʼyuk chatoj mi la akʼan jlikuk Vivlia o jlikuk vun ¡Kʼupino akuxlejal ta sbatel osil!
¿Kʼu sjalil chichʼ akʼel li chanubtasele?
Ta skotole yichʼoj 60 xchanobil. Xuʼ xachan ti kʼu yepal chakʼane. Epal krixchanoetike chchanik jun xchanobil ta xemana yantike chchanik to mas.
¿Kʼusi skʼan jpas sventa xkichʼ chanubtasele?
1. Nojeso li formulario ta Internete. Li kʼusitik te chatsʼibae jaʼ noʼox ta jtuneskutik sventa xuʼ jtaotkutik ta kʼoponel.
2. Li buchʼu chakʼbot chanubtasel ta Vivliae ta staot ta kʼoponel o ta saʼel. Ta xchapbot kʼu yelan li chanubtasel ta Vivliae xchiʼuk tstakʼbot li kʼusitik chajakʼe.
3. Chachapik xchiʼuk li buchʼu chchanubtasot ti bakʼin xchiʼuk ti kʼu yelan chakʼan li chanubtasele. Xuʼ xkʼot yakʼboxuk chanubtasel o xuʼ xakʼboxuk chanubtasel ta telefono, ta videollamada, ta korreo o ta korreo elektroniko. Xuʼ xjalij jun ora o mas li chanubtasele o jlikel noʼox, jaʼ ti kʼu sjalil xuʼ avuʼune.
¿Mi xuʼ jkʼel baʼyuk kʼu yelan li chanubtasel ta Vivliae?
Xuʼ. Nojeso li formulario ta Internete. Kʼalal mi la staot ta kʼoponel o ta saʼel li buchʼu chakʼbot chanubtasele, albo ti jaʼ noʼox chakʼan chakʼel kʼu yelan li chanubtasele sventa xakʼel mi chakʼupin o mi muʼyuk. Vaʼun, chatunesik li foyeto ¡Kʼupino akuxlejal ta sbatel osil! ti jaʼ noʼox yichʼoj li baʼyel oxib xchanobile.
Mi la jchʼam jun chanubtasel ta Vivliae, ¿mi skʼan xi˗och ta stestigo Jeova?
Moʼoj. Li stestigotak Jeovae tskʼupinik xchanel Vivlia xchiʼuk li krixchanoetike, pe muʼyuk bu tsujik sventa x˗och li ta srelijionike. Li kʼusi tspasike jaʼ ti chchapbeik smelolal kʼusi chchanubtasvan li Vivliae xchiʼuk te ta sjolik ti ta jujuntal xuʼ stʼujik ti kʼusi tskʼan chchʼunike (1 Pedro 3:15).
¿Mi xuʼ jtunes li Jvivliae?
Xuʼ, xuʼ xatunes li Vivlia ti bu mas lek chavile. Li stestigounkutik Jeovae ta jtuneskutik li Xchʼul Kʼop Dios sventa Achʼ Balumile ti lek tukʼ jelubtasbile xchiʼuk kʼun ta aʼibel smelolal. Akʼo mi jech, oy epal krixchanoetike lek xaʼiik stunesel li Vivlia ti bu mas nopem xaʼiik xchanele.
¿Mi xuʼ oy buchʼu xchiʼinun kʼalal chkichʼ chanubtasel ta Vivliae?
Xuʼ. Xuʼ xavalbe avutsʼ avalal o avamigotak ti xchiʼinote.
Mi laj xa onoʼox kichʼ estudio ta voʼnee, ¿mi xuʼ to xkichʼ estudio yan velta?
Xuʼ. Yikʼaluk mas xa chakʼupin li avie. Li chanubtasel ta Vivliae achʼub xa, yuʼun jaʼ xa laj yichʼ tsakel ta venta ti kʼu yelan mas tskʼupinik xchanel li krixchanoetik avie. Yichʼoj xa tal videoetik, lokʼoletik o yan kʼusitik ti jaʼ ta jloʼiltatike ti mu toʼox jechuk chichʼ akʼel li chanubtasel ta voʼnee.
¿Mi oy kʼusitik slokʼesanoj li stestigotak Jeova sventa jchan jtuk li Vivliae, ti mu persauk oy buchʼu xchanubtasune?
Oy. Akʼo mi oy ep krixchanoetik ti mas lek chaʼiik ti oyuk buchʼu xkoltaatike. Yantike mas lek chaʼiik ti baʼyel xchan stukike. Yoʼ bu chal: «Koltael sventa xachan Vivliae», oy kʼusitik te akʼbil ti xuʼ xa skoltaote. Liʼe, jaʼ junantik:
Videoetik ta Vivlia. Li ta videoetik liʼe, chchapbe smelolal junantik chanubtaseletik ta Vivlia ti tsotsik skʼoplale.
Kʼusitik tsjakʼik ta sventa Vivlia. Oy te mantaletik ti te tstakʼbutik li kʼusitik ta jakʼbe jbatik ta sventa li Vivliae.
Tekstoetik ti chapbil smelolale. Te chchapbe smelolal jpʼelantik kʼop xchiʼuk li tekstoetik ta Vivlia ti lek ojtikinbile.