Kʼalal chalikes junuk estudioe, tuneso li videoetik liʼe

Oy chanib videoetik ti chalbe skʼoplal li estudio chkakʼtike. ¿Kʼusi sventa jujun, xchiʼuk kʼuxi xuʼ jtunestik ta cholmantal?

• 

  ¿Kʼu yuʼun skʼan jchantik li Vivliae? (video ti mas nate). Li video li’e jaʼ sventa x˗ayan ta yoʼontonik xchanel Vivlia li krixchanoetike mu ventauk kʼusi srelijionik. Chtijbat yoʼontonik sventa sabeik stakʼobil ta Vivlia li kʼusitik tsjakʼbe sbaike xchiʼuk tstunes jun skʼelobil ti chakʼ ta ilel ti xuʼ jchʼuntik li kʼusi chal Vivliae. Ta slajeb xa li videoe chal kʼuxi ta kʼanel junuk chanubtasel ta Vivlia.

• 

  ¿Kʼu yuʼun skʼan jchantik li Vivliae? (video ti muʼyuk mas jale). Xkoʼolaj tajek xchiʼuk li video ti mas nate, jaʼ noʼoxe muʼyuk mas jal, yuʼun jaʼ sventa li krixchanoetik ti muʼyuk mas xokolike.

• 

  ¿Kʼu yelan chichʼ akʼel li chanubtasel ta Vivliae? Li video liʼe jaʼ sventa stijbe yoʼonton krixchanoetik yoʼ snaʼik kʼu yelan li matanal chanubtasel chkakʼtike. Jech xtok, chalbe skʼoplal li kʼusi tsjakʼbe sbaik bakʼintik ta sventa li chanubtasele, jech kʼuchaʼal ti kʼuxi xuʼ skʼanik li chanubtasele.

• 

  Lek ti chlik achan li Vivliae. Li video liʼe jaʼ chichʼ akʼbel ta ilel li buchʼutik xchʼamojik xa chanubtasel ta Vivlia. Akʼo mi jaʼ to chichʼ albel skʼoplal li ta pajina 2 li ta livro Kʼupino akuxlejale, xuʼ xichʼ akʼel ta ilel kʼalal chichʼ chanel li foyeto xtoke. Li videoe chalbe jutuk skʼoplal li kʼusi yichʼoj tal li livroe xchiʼuk chakʼbe ta ilel li kaj˗estudiotik kʼu yelan li chanubtasele.

Akʼo mi jelajtik kʼusi sventa laj yichʼ pasel li jujun videoe, xuʼ xkakʼtik ta ilel xchiʼuk jtaktik batel kʼalal sta˗o chkiltike. Jkʼeltik lek li kʼusi chalbe skʼoplal li videoetike xchiʼuk jtunestik lek li ta cholmantale.