Kapitulo 6
Li kʼusi laj yichʼ chibal kʼoptael ti te tsakal jkʼoplaltik eke
1, 2. 1) ¿Kʼusi la xchibal kʼopta te ta Edén li Satanase? 2) ¿Kʼu yelan laj yakʼ ta aʼyel ti la xchibal kʼopta li Ajvalilal tspas Jeovae?
OY KʼUSI laj yichʼ chibal kʼoptael ti muʼyuk toʼox bu jech xil li krixchanoetike, te me tsakal akʼoplal ek, jech oxal, ti kʼusi cha nop cha pas ta sventa taje, jaʼ me te chvinaj mi cha kuxi sbatel osil. Li kʼusi laj yichʼ chibal kʼoptaele te lik tal kʼalal la stoy sbaik te ta Edene. Li Satanase xi la sjakʼbe li Evae: «¿Me ta melel laj yalboxuc Mucʼul Dios mu xuʼ chaloʼbeic sat jpetsuc li teʼetic liʼ ta tsʼunubaltique?», xut. Li Evae laj yal li mantal albil yuʼun Dios ta sventa li jtekʼ teʼe: «Mu xuʼ ta jloʼbecutic sat [...]. Me jech ta jpascutique, ta xichamcutic», xi. Vaʼun li Satanase la spakʼta ta jutkʼop li Jeovae, laj yal ti mu persauk chchʼunbeik smantal Dios sventa chkuxiik li Adán xchiʼuk Evae. Li Satanase laj yal ti Diose oy la kʼusi lek yuʼun ti mu skʼan xakʼbe li kʼusitik kuxajtik spasoje, jaʼ xkaltik, ti xuʼ tsnop stukik ti kʼuyelan tskʼan chkuxiike. Xi laj yale: «Li Diose snaʼoj ti chjam asatic me laj aloʼique; chlic anaʼic cʼusi lec xchiʼuc cʼusi chopol. Chacoʼlajic jech chac cʼu chaʼal Dios», xi (Génesis 3:1-5).
2 Li Satanase laj yal ti mas la lek xkuxlejal li krixchanoetik ti mi tsnop stukik li kʼusi tskʼan tspasike, ti mu la persauk chchʼunbeik smantal li Diose. Jaʼ jech la xchibal kʼopta ti kʼuyelan ch-ajvalilaj li Diose, jaʼ jech te lik yichʼ chopol kʼoptael li ajvalilal Yuʼun ta vinajel-balumile, jaʼ xkaltik, chibal kʼoptabat ti jaʼ oy sderecho tsventain skotol li kʼusitik kuxajtik spasoje. Jaʼ yuʼun xuʼ xi ta xichʼ jakʼele: «¿Kʼusi mas lek ta sventa li krixchanoe: mi jaʼ ti chventainat yuʼun Jeovae o mi jaʼ ti moʼoje?». Li Jeovae xuʼ ta ora noʼox la slajes jechuk li Adán xchiʼuk Evae, pe ti jechuk la spase, muʼyuk me chapaj ti laj yichʼ chibal kʼoptael li Ajvalilal yuʼune. Kʼalal laj yakʼ ti akʼo jal spasik tal li kʼusitik tskʼan yoʼontonik li krixchanoetike, li Diose yakʼoj tal ta ilel kʼusitik chkʼot ta pasel ta skoj ti tsventain sba stukike xchiʼuk ti muʼyuk chchʼunbat li smantaltake.
3. ¿Kʼusi to yan la xchibal kʼopta li Satanase?
3 Li kʼusi chopol laj yal Satanás ta sventa li sderecho Jeova ta ajvalilale mu teuk noʼox tsuts skʼoplal ta Edén. Jech noxtok, li Satanase la xchibal kʼoptabe skʼoplal mi tukʼ chakʼ sbaik ta stojolal Jeova li kʼusitik pʼij kuxajtik spasoje, taje jaʼ li xchibal kʼusi laj yichʼ chibal kʼoptael ti tsakal skʼoplal xchiʼuk li baʼyel ti mas tsots skʼoplale. Li xchibal kʼusi laj yichʼ chibal kʼoptaele te smakojbe batel skʼoplalik li snitilultak li Adán xchiʼuk Evae, li xnichʼnabtak Dios ti mu xvinajik ta kʼelele xchiʼuk li sBaʼyel Nichʼon ti skʼanoj tajmeke. Jech kʼuchaʼal li ta skʼakʼalil Jobe chaʼa, li Satanase laj yal ti buchʼutik la chtunik ta stojolal Jeovae, mu yuʼunuk la jaʼ ti skʼanojike xchiʼuk ti kʼuyelan ch-ajvalilaje, moʼoj la, yuʼun la jaʼ noʼox ta spasik ta skoj ti tskʼan slekilal stukike. Laj yal ti mi ta la xichʼik akʼbel svokolike, ta la xchibaj yoʼontonik ta skoj ti jaʼ noʼox la tskʼan li kʼusi lek ta stojolalike (Job 2:1-6; Apocalipsis 12:10).
Li kʼusi vinajem tal ta xkuxlejal li krixchanoetike
4, 5. ¿Kʼusi yakʼoj ta ilel li xkuxlejal krixchanoetik ti tspas yaʼi preva tsventain sba stukike?
4 Ta sventa ti laj yichʼ chibal kʼoptael li ajvalilale, toj tsots me skʼoplal skʼan jtsaktik ta venta liʼe: li krixchanoetike muʼyuk laj yichʼik pasel yuʼun Dios ti xuʼ tsventain sba stukik ti jech lek chbat li xkuxlejalike. Mu jechuk la spas, yuʼun sventa lek chbat li xkuxlejalike chaʼa skʼan xchʼunbeik li stukʼil mantaltak Diose. Li j-alkʼop Jeremiase jech laj yakʼ venta: «Cajval, jnaʼ ti mu yuʼunuc sba stuc ti jnaclejetique, ti mu xuʼ ta spas sba ta mantal stuquique. Tuqʼuibtasuncutic», xi (Jeremías 10:23, 24, Ch). Jech oxal li sKʼop Diose xi chi yalbutike: «Jaʼ noʼox pato avoʼnton ta stojol li Mucʼul Diose; mu me jaʼuc xapat avoʼnton yuʼun li abijil atuque», xi (Proverbios 3:5). Jech kʼuchaʼal yakʼoj mantaletik ti ch-abtej ta vinajel-balumile xchiʼuk ta jbekʼtaltik ti skʼan jchʼuntik sventa xi jkuxiutike, jaʼ noʼox jech xtok, laj yakʼ mantaletik sventa talelaletik ti ta sta slekilalik li krixchanoetik mi ta xchʼunike.
5 Ta melel, li Jeovae snaʼoj onoʼox ti mu xuʼ sbeiltas sbaik batel stukik li krixchanoetik mi xchʼakoj sbaik ta stojolal li Ajvalilal yuʼune. Sventa tspasik preva ti tsventain sba stukike ep ta tos ajvalilal echʼem yuʼunik, jeltos ta saʼ stakʼinik xchiʼuk spasojik preva jeltos relijionetik. Ta skoj ti jelelik li kʼusitik taje muʼyuk bu jmoj chkʼot li skʼop chchapanike, jech oxal epajem tal majbail, pas kʼopetik xchiʼuk lajelal. Li Vivliae xi chale: «Laj quil noxtoc ti oy bu ta xpechʼ ta teqʼuel xchiʼil li cristianoe, pero leʼe toj vocol», xi (Eclesiastés 8:9). Jaʼ jech tajmek kʼotem ta pasel ti kʼu sjalil kuxiem tal li krixchanoe. Jech kʼuchaʼal onoʼox yaloj li sKʼop Diose, li chopol krixchanoetike xchiʼuk li jloʼlavanejetike mas to «ta soquic o batel» (2 Timoteo 3:13). Li ta siglo 20 toj ep kʼusi la xchanik tal li pʼijikil krixchanoetike xchiʼuk toj ep xa kʼusitik achʼ lokʼem tal sventa spasobil kʼusitik, pe jech noxtok mas toj chopol kʼusitik kʼotem ta pasel ta xkuxlejal li krixchanoetike. Toj lek vinajem ti melel li kʼusi chal Jeremías 10:23: li krixchanoe muʼyuk laj yichʼ pasel sventa tsbeiltas sba stuk.
6. Li Diose, ¿kʼuxi poʼot xa ta xakʼbe slajeb ti sventainoj sba stuk li krixchanoe?
6 Li kʼusitik toj chopol kʼotem ta pasel xchiʼuk ti toj jal xa jech ta skoj ti tsventain sba stuk li krixchano ti muʼyuk tstsak ta venta li Diose, yakʼoj tal ta ilel ti muʼyuk kʼusi lek kʼotem ta pasel ti kʼuyelan ch-ajvalilaj li krixchanoe. Jaʼ noʼox mi tsventainutik li Diose ta jtatik muyubajel, jmoj oyutik, lek jkuxlejaltik xchiʼuk muʼyuk xa chi j-ipajutik. Jech noxtok, li sKʼop Jeovae chal kaʼitik ti mu xa jaluk chakʼ ti akʼo x-ajvalilajik li krixchanoetik ti xchʼakoj sbaik ta stojolale (Mateo 24:3-14; 2 Timoteo 3:1-5). Poʼot xa me xchapan Dios li kʼopetik yuʼun krixchanoetike, jaʼ xa me tspas mantal ta spʼejel Balumil. Li albil kʼop ta Vivliae xi chal ta melele: «Cʼalal jaʼo ochemic ta ajvalilal li ajvaliletic leʼe [li ajvaliletik ta jkʼakʼaliltike], li Dios te oy ta vinajele ta sliques jun ajvalil [te ta vinajel]; muʼyuc bochʼo xuʼ chtuchʼbat yabtel, mu junuc lum chtal tsalatuc yuʼun [mi jutebuk xa tsventain krixchanoetik li Balumile]. Jaʼ ta stsal, jaʼ ta slajesbe scʼoplal scotol li yantic ajvaliletique [li ajvaliletik ta jkʼakʼaliltike]; yan li stuque jʼechʼel te chcom o sbatel osil», xi (Daniel 2:44).
Li buchʼutik kuxul chkomik ti chjelavik ta achʼ balumil yuʼun Diose
7. Kʼalaluk mi laj yakʼbe slajeb li ajvalilal yuʼun krixchanoetik li Ajvalilal yuʼun Diose, ¿buchʼutik kuxul chkomik?
7 Kʼalaluk mi laj yakʼbe slajeb li ajvalilal yuʼun krixchanoetik li Ajvalilal yuʼun Diose, ¿buchʼutik kuxul chkomik? Li Vivliae xi tstakʼe: «Yuʼun li bochʼotic tucʼ yoʼntonique [li buchʼutik tskʼanik ti jaʼ akʼo x-ajvalilaj li Diose] te chnaquiic o ta banamil; li bochʼotic lequique jʼechʼel te oyic o. Yan li bochʼotic chopolique [li buchʼutik mu skʼanik ti jaʼ x-ajvalilaj li Diose] ta xichʼic nutsel loqʼuel», xi (Proverbios 2:21, 22). Jech laj yal ek li jtsʼibajom yuʼun Salmoe: «Mu xa jaluc liʼ oyic li bochʼotic chopolique [...]. Li bochʼo tucʼ yoʼntonique jaʼ chuʼuninic o li yosilique, jech jun yoʼnton te chnaquiic o», xi (Salmo 37:10, 29).
8. ¿Kʼuxi ta xakʼ ta ilel Dios ti jaʼ noʼox oy sderecho ta Ajvalilale?
8 Kʼalal mi laj yichʼ lajesel li kʼusitik yuʼun Satanase, li Diose ta xakʼ tal li achʼ balumil yuʼune, ti bu chʼabal xa majbail, pas kʼop, abolbail, vokolil, chameletik xchiʼuk lajelal, ti ta smilal noʼox jabiletik yakʼojbe tal svokol li krixchanoe. Li Vivliae xi alakʼ sba chal kaʼitik li bendisionetik ti smalaoj tstaik li jchʼunej mantal viniketik xchiʼuk antsetike: «Li Diose ta scusbe loqʼuel scotol yaʼlel satic, jech muʼyuc xa bochʼo chcham, muʼyuc xa bochʼo chat yoʼnton, muʼyuc xa bochʼo ch-ocʼ, muʼyuc xa bochʼo cʼusi cʼux chaʼay. Yuʼun ilaj xa scʼoplal scotol ti jech toʼox oy ta baʼyuque», xi (Apocalipsis 21:3, 4). Ta sventa li Ajvalilal ta vinajel yuʼun Dios ti oy ta skʼob li Cristoe, li Diose chakʼ ta ilel ti jaʼ noʼox stuk oy sderecho ta x-ajvalilaje, jaʼ xkaltik, ti jaʼ Ajvalil kuʼuntike (Romanos 16:20; 2 Pedro 3:10-13; Apocalipsis 20:1-6).
Buchʼu la skʼanik ch-ajvalilaj
9. 1) ¿Kʼu yelan stsakojbeik ta mukʼ smantal Jeova li buchʼutik tukʼ yakʼoj sbaik ta stojolale? 2) ¿Kʼuxi laj yakʼ ta ilel Noé ti tukʼ yoʼonton ta stojolal Jeovae, xchiʼuk kʼusi xuʼ jchanbetik?
9 Ti kʼu sjalil talel li kuxlejale, oy viniketik xchiʼuk antsetik ti oy xchʼunel yoʼontonike, ti tukʼ laj yakʼik ta ilel ti jaʼ Ajvalil yuʼunik li Jeovae. Laj yakʼik venta ti sventa chkuxiike skʼan xchikintabeik xchiʼuk xchʼunbeik li smantal Diose. Jun ta skotolalik taje jaʼ li Noee. Li Diose xi laj yalbee: «Laj xa jnop ti ta jlajes scotol li cristianoetique [...]. Meltsano jun barco», xut. Li Noee la xchʼun li mantal taje. Pe li yan krixchanoetik ta skʼakʼalil Noee, manchuk mi laj yichʼik albel ti kʼusi chkʼot ta pasele, solel jaʼ batem ta yoʼontonik spasel li kʼusitik yuʼunik ta jujun kʼakʼale, yuʼun mu kʼusi labal sba chkʼot ta pasel chaʼiik yileluk. Yan li Noee la spas jun mukʼta arka xchiʼuk lek tsots yoʼonton laj yal batel li stukʼil mantaltak Jeovae. Li loʼil ta Vivliae xi chale: «Li Noee la spas scotol jech cʼu chaʼal iʼalbat yuʼun li Diose» (Génesis 6:13-22; Hebreos 11:7; 2 Pedro 2:5).
10. 1) ¿Kʼuxi laj yakʼik ta ilel Abraham xchiʼuk Sara ti laj yakʼ sbaik ta stojolal li Ajvalilal yuʼun Jeovae? 2) ¿Kʼuxi xuʼ ta jbalintik li slekil talelal li Abraham xchiʼuk Sarae?
10 Li Abraham xchiʼuk Sara eke lek ta chanbel stalelalik ta sventa ti laj yakʼ sbaik ta stojolal li Ajvalilal yuʼun Jeovae, yuʼun la spasik skotol li kʼusi albatike. Li Abraham xchiʼuk yajnile te toʼox nakalik ta lekil lum Ur, ta yosilal Caldea, pe kʼalaluk albat yuʼun Jeova ti akʼo xikta slumal li Abrahame, ti akʼo xbat ta jun lum ti mu xojtikine «li Abrahame ilocʼ batel [...] jech cʼu chaʼal iʼalbat yuʼun li Mucʼul Diose». Toj lek van tajmek xkuxlejal ta Ur li Sarae, oy van lek sna, yamigotak xchiʼuk yutsʼ yalaltak. Pe la xchʼunbe smantal Dios xchiʼuk li smalale, bat ta slumal Canaán manchuk mi mu snaʼ kʼuyelan li kuxlejal tee (Génesis 11:31–12:4; Hechos 7:2-4).
11. 1) ¿Kʼusi vokolil laj yil Moisés kʼalal laj yakʼ ta ilel ti yakʼoj sba ta stojolal li Ajvalilal yuʼun Jeovae? 2) ¿Kʼusi chi xchanubtasutik li stalelal Moisese?
11 Jech li Moisés eke laj yakʼ ta ilel ti yakʼoj sba ta stojolal li Ajvalilal yuʼun Jeovae, mu kʼunuk ta pasel laj yaʼi yuʼun ta sat Faraón ta Egipto laj yakʼ ta ilel. Mu yuʼunuk spatoj lek yoʼonton ti xtojob li Moisese; moʼoj, yuʼun snaʼoj ti vokol chlokʼ chkʼopoje. Manchuk mi jech, la xchʼunbe smantal li Diose. Koliyal li Diose xchiʼuk li sbankil ti jaʼ sbi Aarone ep ta velta koltaat sventa chalbe sKʼop Jeova li Faraón ti mu xaʼi mantal ta jyalele. Jech noxtok, oy jlom j-israeletik toj tsots la xchopol kʼoptaik li Moisese. Akʼo mi jech, tukʼ la spas skotol li kʼusi albat yuʼun Jeovae xchiʼuk ta stojolal li Moisese kolik lokʼel ta mosoil ta Egipto li j-israeletike (Éxodo 7:6; 12:50, 51; Hebreos 11:24-27).
12. 1) Sventa tukʼuk koʼontontik ta stojolal li Jeovae, ¿kʼusi chakʼ ta ilel ti mu jaʼuk noʼox skʼan jchʼuntik li kʼusitik tsʼibabil yuʼun li Diose? 2) Ta yaʼibel smelolal ti vaʼ yelan skʼan tukʼuk koʼontontik ta stojolal Jeovae, ¿kʼuxi chi skoltautik ta yakʼel ta jkuxlejaltik li kʼusi chal 1 Juan 2:15?
12 Li buchʼutik tukʼ yoʼonton laj yakʼ sbaik ta stojolal li Jeovae muʼyuk bu la snopik ti jaʼ noʼox skʼan chʼunel li kʼusitik stsʼibaoje. Kʼalaluk li yajnil Potifar ta sloʼla ox yaʼi li José sventa chchiʼin ta vayele, muʼyuk toʼox mi junuk mantal tsʼibabil ti chal ti mu stakʼ chiʼinel ta vayel yajnil yan vinike. Pe li Josee snaʼoj ti jaʼ Jeova li buchʼu laj yakʼbe slikeb li nupunel te ta Edene xchiʼuk ti muʼyuk lek chil ti chchiʼinbe ta vayel yajnil yan vinike. Jech oxal chaʼa, muʼyuk bu la snop mi tskʼel bu to kʼalal ch-akʼbat yuʼun Dios xchanbel stalelal li j-egiptoetike. Tukʼ laj yakʼ sba ta smantaltak li Jeovae yuʼun la snop lek ti kʼuyelan chil krixchanoetik li Diose, vaʼun jaʼ jech la spas ti kʼuyelan tskʼan yoʼonton chil li Jeovae (Génesis 39:7-12; Salmo 77:11, 12).
13. ¿Kʼuxi vinaj ti jaʼ jun jutkʼop li Diablo ta stojolal li 1) Jobe? 2) oxvoʼ j-hebreoal keremetike?
13 Li buchʼutik xojtikinik ta melel li Jeovae muʼyuk bu chnamajik ta stojolal manchuk mi tsnuptanik tsatsal prevaetik. Li Satanase laj yal ta stojolal Job, ti lek albil skʼoplal yuʼun Jeovae, ti muʼyuk la bu tukʼ ta xakʼ sba ta stojolal Jeova ti mi chʼay li kʼusitik oy yuʼune o mi ipaj lae. Pe li Jobe laj yakʼ ta ilel ti jaʼ jun jutkʼop li Diabloe, manchuk mi muʼyuk la snaʼ kʼu yuʼun ti jech toj tsots svokole (Job 2:9, 10). Echʼ jayibuk siglo, li Satanase ta to xakʼ yaʼi ta ilel ti oy srasone, jech oxal la stijbe sjol yoʼonton jun ajvalil ta Babilonia ti ilinem ta jyalele, li ajvalil taje laj yalbe oxvoʼ j-hebreoal keremetik ti tsmil ta kʼakʼal orno mi muʼyuk tsnijan sbaik ta stojolal jun lokʼol ti la spase xchiʼuk ti akʼo yichʼik ta mukʼe. Kʼalal laj yakʼik venta ti skʼan xalik ti buchʼu skʼan xchʼunbeik smantale, mi jaʼ li smantal ajvalile o mi jaʼ li smantal Dios ti chal mu stakʼ xichʼik ta mukʼ lokʼoletike, tsots yoʼonton laj yalik ti chtunik ta stojolal Jeovae xchiʼuk ti jaʼ Mukʼul Ajvalil yuʼunike. Jaʼ mas tsots skʼoplal laj yaʼiik ti tukʼuk yoʼontonik ta stojolal li Jeovae, jaʼ xkom to ta be laj yaʼiik li xkuxlejalike (Daniel 3:14-18).
14. Manchuk mi oy jchopolaltik, ¿kʼuxi xuʼ chkakʼtik ta ilel ti tukʼ koʼontontik ta stojolal li Jeovae?
14 Li kʼusitik laj chantike, ¿mi jaʼ smelolal ti skʼan mu jsetʼuk jchopolaltik sventa tukʼuk koʼontontik ta stojolal li Jeovae o ti mi oy buchʼu la spas smule mi jaʼ smelolal ti chʼay-o xae? Mu jechuk. Li Vivliae chal kaʼitik ti ep ta velta muʼyuk lek tukʼ bat ta pasel yuʼun kʼusitik li Moisese. Manchuk mi muʼyuk lek laj yil Jeova kʼalal jech la spase, mu jaʼuk la spʼaj-o li Moisese. Li yajtakboltak Jesucristoe muʼyuk bu lek tukʼ bat yuʼunik ta spasel skotol ek. Li Jeovae yichʼoj ta venta ti jkuchojtik tal li mulile, jech oxal chaʼa lek chil ti kʼalaluk mu yaleluk ta jpastik li kʼusitik mu skʼan yoʼontone. Mi oy kʼusi chopol la jpastik ta skoj ti kʼunutike, tsots me skʼoplal ti jsutes koʼontontik ta melele xchiʼuk ti mu me jnopes jbatik ta spasel li kʼusi chopole. Jaʼ jech chkakʼtik ta ilel ti jkʼanojtik ta melel li kʼusi chal Jeova ti leke xchiʼuk ti jpʼajojtik li kʼusi chal ti jaʼ chopole. Ta sventa ti kakʼoj xchʼunel koʼontontik ta stojolal li matanal pojelal laj yakʼ Jesús ti chchʼay mulile, xuʼ jkʼupintik ti lek sak oyutik ta stojolal li Diose (Amós 5:15; Hechos 3:19; Hebreos 9:14).
15. 1) Ta skotol li krixchanoetike, ¿buchʼu ti lek tukʼ laj yakʼ ta ilel yoʼonton ta stojolal Diose, xchiʼuk ti vaʼ yelan la spase kʼusi te laj yakʼ ta ilel? 2) ¿Kʼuxi chi skoltautik li kʼusi la spas Jesuse?
15 Vaʼun chaʼa, ¿mi mu van xuʼ yuʼunik ti lek tsʼakal chchʼunik mantal li krixchanoetik ta sventa li Ajvalilal yuʼun Jeovae? Echʼ van chanmiluk jabil, li stakʼobil taje mukul toʼox yuʼun Dios. Manchuk mi tukʼ laj yichʼ pasel li Adane, muʼyuk bu tukʼ laj yakʼ ta ilel stalelal ta sventa yichʼel ta mukʼ li Diose. ¿Buchʼu van xuʼ chakʼ ta ilel? Ta melel mu junuk li snitilultak Adán ti jaʼ jsaʼ muliletike. Li buchʼu noʼox ipas yuʼune, jaʼ li Jesucristoe (Hebreos 4:15). Ta stalelal li Jesucristoe laj yakʼ ta ilel ti Adane xuʼ tukʼ laj yakʼ ta ilel stalelal ti jechuke, yuʼun lek toʼox kʼusitik oy ta stojolal, ti lajuk skʼane xuʼ lek tukʼ laj yakʼ sba ta stojolal Jeova. Li kʼusi chopole chaʼa, maʼuk li spasben Diose. Jech un chaʼa, jaʼ chkakʼbetik yipal ta xchanbel stalelal li Jesuse, yuʼun mu jaʼuk noʼox la xchʼunbe smantal li Diose, yuʼun laj yichʼ lek ta mukʼ li Jeovae, li Ajvalil ta vinajel-balumile (Deuteronomio 32:4, 5).
¿Buchʼu ta jkʼantik ti akʼo x-ajvalilaje?
16. ¿Kʼu yuʼun skʼan jchabi jbatik ta sventa ti kʼu yelan koʼontontik ta sventa li Ajvalilal yuʼun Jeovae?
16 Ta sventa ti kʼusi laj yichʼ chibal kʼoptaele, ta jujuntal me skʼan xkakʼtik ta ilel buchʼu ta stojolal kakʼoj jbatik ta sventa li Ajvalilal ta vinajel-balumile. Mi jamal chkaltik ti oyutik ta stojolal Jeovae, tukʼ me tskʼelutik tal li Satanase. Skotol kʼusi tstunes sventa chi yilbajinutik, jech to ta spasulan-o jaʼ to mi tal slajeb li chopol kʼusitik liʼe, jech oxal skʼan me jchabi jbatik (1 Pedro 5:8). Li jtalelaltike jaʼ me chakʼ ta ilel kʼusi oy ta koʼontontik ta sventa ti kʼusi mas mukʼ laj yichʼ chibal kʼoptaele, li Ajvalilal yuʼun Jeovae xchiʼuk ta sventa li xchibal kʼusi laj yichʼ chibal kʼoptaele, mi tukʼ chkakʼ jbatik ta stojolal Jeova kʼalal chkil jvokoltike. Mu xtun ti lek noʼox chkiltik ti muʼyuk tukʼ koʼontontik ta stojolal Jeova ta skoj ti yuʼun jech stalelal li krixchanoetik ta balumile. Sventa lek tukʼuk koʼontontik ta stojolal li Jeovae, toj tsots me skʼoplal skʼan xkakʼbetik yipal xchʼunel li stukʼil mantaltak ta skotol li jkuxlejaltike.
17. Ti jech jnaʼojtik bu chlik tal li jutkʼop xchiʼuk li elekʼe, ¿kʼu yuʼun skʼan mu jechuk jpastik?
17 Jech kʼuchaʼal liʼe, mu me stakʼ jchanbetik li Satanase, yuʼun «jaʼ mero smeʼ epalcʼop» (Juan 8:44). Buyuk noʼox me oyukutik mu me stakʼ jutik kʼop. Li ta slumal Satanase, li alab-nichʼnabiletike ta sloʼla li stot smeʼike, li kerem-tsebetik ti tstsʼakliik Cristoe mu jechuk ta spasik, jaʼ jech ta xakʼik ta ilel ti jutbil li kʼusi laj yal Diablo ti muʼyuk la tukʼik li yajtuneltak Dios ti kʼalal ta xil svokolike (Job 1:9-11; Proverbios 6:16-19). Oy van jlom chonolajel o manolajel ti nitil tsakal skʼoplal xchiʼuk li «smeʼ epalcʼop[e]», ti mu jaʼuk ta stojolal li Dios yuʼun li kʼusi melele, taje skʼan me jchʼak jbatik lokʼel ta stojolal (Miqueas 6:11, 12). Muʼyuk bu lek jtosuk elekʼal, manchuk mi abol sba ti buchʼu ch-elkʼaje o mi toj echʼ noʼox stakʼin ti buchʼu chlaj ta elekʼe (Proverbios 6:30, 31; 1 Pedro 4:15). Manchuk mi toj nopem xaʼiik spasel jech ti bu nakalutike o mi toj jutuk sbalil ti kʼusi ta xichʼ elkʼanele, yuʼun onoʼox jaʼ elekʼal ti chal smantal Dios ti mu stakʼ pasele (Lucas 16:10; Romanos 12:2; Efesios 4:28).
18. 1) Kʼalal mi laj li Ajvalilal yuʼun Cristo ta Jmil Jabile, ¿kʼusi prevail ta xil skotol li krixchanoetike? 2) ¿Kʼusi skʼan jnopes jbatik ta spasel li avie?
18 Li ta Ajvalilal yuʼun Cristo ta Jmil Jabile, li Satanás xchiʼuk li spukujtake te xaʼox oyik ta xab, jaʼ yuʼun muʼyuk xa bu ta stijbe sjol yoʼonton li krixchanoetike. ¡Kʼu to noʼox yutsil! Pe mi laj li jmil jabile ta xichʼik koltael kʼuk yuni jalil. Li Satanás xchiʼuk li yajtsʼaklomtake ta me xilbajinik li krixchanoetik ti achʼubtasbilik xa ti tukʼ yoʼontonik ta stojolal Diose (Apocalipsis 20:7-10). Mi kuxulutik toʼox ti kʼalal chkʼot skʼakʼalil taje, ¿kʼuxi chkakʼtik ta ilel ti jaʼ chkakʼ jbatik ta stojolal li Ajvalilal ta vinajel-balumil yuʼun Jeovae? Ta sventa ti tukʼ xaʼox skotol li krixchanoetike, mi oy buchʼu muʼyuk tukʼ yoʼonton ta stojolal li Jeovae, yalel xa me jech ta spas, jech oxal ta me x-akʼbat-o slajeb ta sbatel osil. Jech oxal chaʼa, toj tsots me skʼoplal skʼan jnopes jbatik ta xchʼunbel skotol smantal Jeova li avie, jaʼuk mi chlik tal ta Vivlia o mi ta s-organisasion. Kʼalal jech ta jpastike, chkakʼtik ta ilel ti kichʼojtik ta mukʼ ta melel kʼuchaʼal Ajvalil ta vinajel-balumil li Jeovae.
Svulesobil ta joltik
• ¿Kʼusi laj yichʼ chibal kʼoptael ti te tsakal jkʼoplaltik eke? ¿Kʼuxi te laj kichʼtik albel jkʼoplaltik ek?
• ¿Kʼusi stakʼ xkaltik ta sventa ti kʼu yelan laj yakʼik ta ilel ti tukʼ yoʼontonik ta stojolal Jeova li viniketik xchiʼuk li antsetik ta voʼnee?
• ¿Kʼu yuʼun toj tsots skʼoplal skʼan jmuyubtatik ta jtalelaltik skotol kʼakʼal li Jeovae?