Mu me xchʼay ta koʼontontik ti toj tsots skʼoplal li mukʼul pasmantal yuʼun Jeovae

1, 2. 1) ¿Kʼusi ti mas tsots skʼoplale? 2) ¿Kʼu yuʼun toj tsots skʼoplal ti xkaʼibetik lek smelolal taje?

LI EPAL krixchanoetik avie, jaʼ mas tsots skʼoplal chilik li takʼine. Jech oxal jaʼ chakʼ ta yoʼontonik saʼel li skʼulejalike o ti mu xchʼay li kʼusi oy xa yuʼunike. Yantik xtoke jaʼ mas tsots skʼoplal chil li yutsʼ yalalike, ti lekuk noʼox oyike xchiʼuk li kʼusi pasem xa tal yuʼunike.

² Akʼo mi jech, oy to kʼusi ti mas tsots skʼoplal ti mu xkoʼolaj ta kʼusiuk noʼoxe xchiʼuk ti skʼan mu xchʼay ta koʼontontik jsetʼuke, ¿kʼusi jaʼ taje? Jaʼ li spakbel skʼoplal li mukʼul pasmantal yuʼun Jeovae. Pe mi muʼyuk la jkʼel jbatike, xuʼ me jaʼ xbat ta koʼontontik li kʼusitik ta jpastik jujun kʼakʼale o ti jvul tajek koʼontontik yuʼun li jvokoltike, vaʼun ti jaʼ xchʼay xkaʼitik li kʼusi mas tsots skʼoplale. Pe mi laj kaʼibetik lek smelolal ti jaʼ noʼox jpasmantal li Jeovae, mas me chapalutik ta sventa li kʼusi ta jnuptantik jujun kʼakʼale xchiʼuk mas to lek chkil jbatik xchiʼuk li Jeovae.

¿KʼU YUʼUN TI TOJ TSOTS SKʼOPLALE?

3. ¿Kʼusi yaloj li Satanas ta sventa ti kʼu yelan ch-ajvalilaj li Diose?

³ Li Satanase xchibal kʼoptaoj li sderecho ch-ajvalilaj Jeovae. Chal ti muʼyuk la lek ch-ajvalilaje, ti maʼuk la tskʼan sventa jlekilaltike xchiʼuk mas la xmuyubaj li krixchanoetik mi tsventain sba stukike (Gén. 3:1-5). Chal xtok ti mi ep svokol li krixchanoetike, muʼyuk xa la tukʼ chakʼ sbaik ta stojolal li Diose xchiʼuk ta la spʼajik li ajvalilal yuʼune (Job 2:4, 5) Jaʼ yuʼun, li Jeovae yakʼoj to xjelav kʼuuk sjalil yoʼ xkakʼtik lek venta jkotoltik ti muʼyuk lek kʼusi chkʼot ta jtojolaltik mi muʼyuk ta jchʼamtik li Ajvalilal yuʼune.

4. ¿Kʼusi ta jnuptantik yoʼ to muʼyuk chapajem li kʼusi xchibal kʼoptaoj Satanase?

⁴ Jamal xvinaj ti snaʼoj lek Jeova ti maʼuk melel skotol li kʼusi yaloj li Satanase. ¿Pe kʼu yuʼun yakʼoj to akʼo jelavuk tajek skʼakʼalil sventa xchapan? Yuʼun te tsakal skʼoplalik li anjeletik xchiʼuk li krixchanoetike (kʼelo Salmo 83:18). Akʼo mi jech, jaʼ toj ep li buchʼutik spʼajojik ti kʼu yelan ch-ajvalilaj li Jeovae, jech kʼuchaʼal la spasik li Adan xchiʼuk Evae. Ta skoj taje, xuʼ van xlik snopik ti oy srason li Diabloe. Pe yoʼ to muʼyuk bu jamal yilojik kʼuxi chchapaj li krixchanoetik xchiʼuk li anjeletike, jech-o to me muʼyuk jun koʼontontik xchiʼuk muʼyuk jmoj oyutik li avie. Pe kʼalal mi laj yichʼ pakbel skʼoplal li mukʼul pasmantal yuʼun Jeovae, chlik sventainutik jkotoltik ta sbatel osil xchiʼuk jun xa noʼox koʼonton jkotoltik (Efes. 1:9, 10).

5. ¿Kʼuxi xuʼ jkoltatik li mukʼul pasmantal yuʼun Jeovae?

⁵ Kʼalal mi la stunes Ajvalilal yuʼun Mesias sventa tslajesbe skʼoplal li sbalumil Satanase, jaʼ me te chvinaj ti tukʼ xchiʼuk ti stuk noʼox jech li ajvalilal yuʼun Jeovae. Vaʼun, li tukʼil krixchanoetike laj xa ox me yakʼik ta ilel ek ti xuʼ tukʼ skoltaik li ajvalilaj yuʼun Jeovae (Is. 45:23, 24). ¿Mi ta jkʼantik ti teuk tsakal jkʼoplaltik li ta tukʼil krixchanoetik taje? Tana ta melel. Pe sventa jkoltatik li ajvalilaj yuʼun Jeovae, skʼan me teuk-o ta joltik xchiʼuk skʼan xkaʼibetik lek smelolal ti kʼu yuʼun toj tsots skʼoplale.

MAS TSOTS SKʼOPLAL KʼUCHAʼAL LI JKOLEBALTIKE

6. ¿Mi toj tsots skʼoplal li spakbel skʼoplal li mukʼul pasmantal yuʼun Jeovae?

⁶ Jech kʼuchaʼal laj xa kaltike, li spakbel skʼoplal li mukʼul pasmantal yuʼun Jeovae jaʼ li kʼusi mas tsots skʼoplal ta stojolal li krixchanoetike. Yuʼun mas to tsots skʼoplal jech kʼuchaʼal li kʼusi chakʼ jmuyubajeltike. Pe, ¿mi jaʼ skʼan xal ti muʼyuk tsots skʼoplal li jkolebaltike o ti muʼyukutik ta yoʼonton li Jeovae? Moʼoj ta melel. ¿Kʼuxi jnaʼojtik?

7, 8. Li kʼusitik yaloj tspas Jeovae, ¿kʼuxi ti jaʼ tspakbe skʼoplal li mukʼul pasmantal yuʼune?

⁷ Li Jeovae toj ep jbalil chilutik xchiʼuk skʼanojutik tajek, «yuʼun laj yakʼ li jun noʼox Xnichʼon sventa» xijkolutike xchiʼuk ti jtatik-o kuxlejal ta sbatel osile (Juan 3:16; 1 Juan 4:9). Ti jech mu xkʼot ta pasel li kʼusi yaloj chakʼbutik li Jeovae, li pukuje xuʼ van xal ti jaʼ jun jut kʼope, ti muʼyuk lek ch-ajvalilaje xchiʼuk ti oy kʼusi mu xakʼbe skʼupin li krixchanoetike. Li yajkontratake xuʼ van oy xa lek srasonal chaʼiik venta slabanik xchiʼuk ti xi chalike: «Yaloj onoʼox ti chtale, pe ¿bu oy un? Yuʼun ti kʼalal vayik ta lajelal li jmoltotakutik ta voʼnee jech-o li kʼusitik ti kʼuxi lik yichʼ pasel talel li kʼusitike» (2 Ped. 3:3, 4). Jaʼ yuʼun, kʼalal mi lijkolutike, jaʼ me tstunes Jeova sventa spakbe-o skʼoplal li mukʼul pasmantal yuʼune (kʼelo Isaías 55:10, 11). Jech xtok, li Jeovae yakʼoj ta ilel ti ta kʼanelal tspas mantale. Jaʼ yuʼun, xuʼ jpat koʼontontik ti jech-o tskʼan li tukʼil yajtuneltake xchiʼuk ti oy-o tajek sbalil chile (Éx. 34:6).

⁸ Kʼalal chkaʼibetik smelolal ti tsots tajek skʼoplal li mukʼul pasmantal yuʼun Jeovae, maʼuk me skʼan xal ti jaʼ xa muʼyuk sbalil chkaʼi li jkolebaltike o ti muʼyuk xa jbaliltik chil li Diose. Moʼoj, li kʼusi skʼan xale jaʼ ti xkaʼibetik lek smelolal ti jaʼ mas tsots skʼoplal li mukʼul pasmantal yuʼun Jeovae, ti jaʼ mu sta li jkolebaltike. Vaʼun, jaʼ me jech muʼyuk chchʼay-o ta joltik li kʼusi mas tsots skʼoplale xchiʼuk ti jechuk-o jkoltatik li tukʼil pasmantal yuʼun Jeovae.

LI JOBE LA SJEL LI KʼUSI TOʼOX TSNOPE

9. ¿Kʼusi laj yal ta stojolal Job li Satanase? (Kʼelo li lokʼol ta slikebale).

⁹ Li slivroal Jobe chakʼ kiltik kʼu yuʼun ti skʼan xkakʼtik-o venta li kʼusi mas tsots skʼoplale. Jech xtok, te chal ti la xchibal kʼoptabe stukʼil yoʼonton Job li Satanase, laj yal ti muʼyuk xa la chchʼunbe smantal Dios mi ep laj yil svokole. La skʼanbe Jeova ti akʼo xakʼbe svokol li Jobe. Li Diose mu jechuk la spas, pe laj yakʼbe permiso Satanas sventa xakʼ ta preva li Jobe, jaʼ yuʼun xi laj yalbee: «Scotol li cʼusi oy yuʼune oy ta acʼob» (Kʼelo Job 1:7-12). Mu ta sjaliluke cham skotol li smosotake xchiʼuk li lajuneb xnichʼnabtake, jech xtok chʼay skotol li kʼusitik oy yuʼune. Li Satanase pas yuʼun ti jaʼ xa chakʼ vokolil yilel li Diose (Job 1:13-19). Ta tsʼakal xtoke, laj yakʼbe jtos xchamel ti toj echʼ xa noʼox kʼuxe xchiʼuk ti toj ibal sbae (Job 2:7). Pe sventa mas to xil svokole, chibajesbat yoʼonton yuʼun li yajnil xchiʼuk li oxib yamigotak ta alele (Job 2:9; 3:11; 16:2).

10. 1) ¿Kʼuxi laj yakʼ ta ilel ti tukʼ yoʼonton ta stojolal Dios li Jobe? 2) ¿Kʼusi muʼyuk lek la spas?

¹⁰ ¿Mi oy srason li Satanase? Muʼyuk. Yuʼun li Jobe muʼyuk la svalopatin komel li Diose (Job 27:5). Akʼo mi jech, ta tsʼakale chʼay ta sjol li kʼusi mas tsots skʼoplale, yuʼun jaʼ bat ta yoʼonton ti xakʼ ta ilel ti jaʼ jun tukʼil vinike xchiʼuk la skʼan tajek ti akʼo xchapbat smelolal ti kʼuyuʼun chil svokole (Job 7:20; 13:24). Xuʼ van ta jnoptik ti oy srason ti jech chale, yuʼun onoʼox toj ep laj yil svokol. Jaʼ yuʼun, li Jeovae mas lek laj yil ti stukʼibtase. ¿Kʼusi laj yalbe?

11, 12. 1) ¿Kʼusi laj yaʼibe smelolal Job koliyal ti koltae yuʼun Jeovae? 2) ¿Kʼusi laj yal ta tsʼakal?

¹¹ Li kʼusi laj yal Jeovae te ta jtatik li ta kapitulo 38 kʼalal ta 41 yuʼun li slivroal Jobe. Li ta kapituloetik taje muʼyuk bu chal mi la xchapbe smelolal ti kʼu yuʼun chil svokol li Jobe. Yuʼun taje maʼuk li kʼusi mas tsots skʼoplale xchiʼuk ti jechuk la spas li Jeovae xkoʼolaj ti laj yal ta jamal ti maʼuk chakʼ li vokolile. Li kʼusi oy ta yoʼontone jaʼ ti skolta ta yaʼibel smelolal Job ti jaʼ toj bikʼit li stuke, ti jaʼ echʼem smukʼulal li Jeovae. Xchiʼuk laj yakʼbe yaʼi ti oy to kʼusi mas tsots skʼoplale (kʼelo Job 38:18-21). Koliyal ti jech koltaat li Jobe, la sjel li kʼusi toʼox tsnope.

¹² Li Jobe yiloj xa ox tajek svokol, jaʼ yuʼun, ¿mi xuʼ van xkaltik ti muʼyuk laj yakʼ ta ilel xkʼuxul yoʼonton Jeova ti jech tsots la skʼopone? Moʼoj, xchiʼuk li Jobe mu jechuk laj yil ek. Yuʼun kʼalal echʼem xa ox skotol li svokole, lik yaʼibe smelolal kʼusi ti mas tsots skʼoplale. Jaʼ yuʼun, xi laj yale: «Ta jsutes coʼnton ta atojol; liʼ ta xcacʼ jba ta pucuctic, ta tantic». Jech oxal, li kʼusi albat yuʼun Jeovae la stabe sbalil xchiʼuk patbat tajek yoʼonton (Job 42:1-6). Pe oy jun kerem ti Eliú sbie ayem xa onoʼox sventa tstukʼibtas li Jobe (Job 32:5-10). Li Jeovae toj lek laj yil ti la xchʼam li kʼusi albate, jaʼ yuʼun laj yal ti tukʼ yoʼonton li Jobe (Job 42:7, 8).

13. ¿Kʼuxi koltaat-o Job li kʼusi albat yuʼun Jeova kʼalal echʼem xa ox li svokole?

¹³ Kʼalal echʼem xa ox svokol li Jobe jech-o la stabe sbalil li kʼusi albat yuʼun Jeovae. Melel onoʼox ti «xjelov jech yepal iʼacʼbat bendición yuʼun Mucʼul Dios jech chac cʼu chaʼal ta sliquebe». Pe li bendisionetik taje maʼuk ta anil la sta, echʼ onoʼox kʼuk sjalil sventa x-ayan «vucub squeremetic, xchiʼuc oxib stsebetic» (Job 42:12-14). Xuʼ van li Jobe la snaʼ tajek li xnichʼnabtak ti chamemik xa ox ta skoj li Satanase. Jech xtok, xuʼ van oy kʼuuk sjalil jech-o chvul ta sjol skotol li svokol la snuptane. Maʼuk noʼox, yuʼun ti mi laj yaʼibe smelolal kʼu yuʼun ti laj yil svokole, xuʼ van xi la sjakʼbe sba xtoke: «Pe, ¿kʼu yuʼun ti persa ep tajek laj kil jvokole?». Akʼo mi jech, xuʼ snopbe lek smelolal li kʼusi albat yuʼun li Diose. Taje jaʼ chkoltaat sventa mu xchʼay ta yoʼonton li kʼusi mas tsots skʼoplale xchiʼuk jaʼ chpatbat-o yoʼonton (Sal. 94:19).

14. ¿Kʼusi chakʼ jchantik li kʼusi kʼot ta stojolal Jobe?

¹⁴ Li sloʼilal Jobe xuʼ me skoltautik sventa mu xchʼay-o ta koʼontontik li kʼusi mas tsots skʼoplale xchiʼuk chakʼ spatobil koʼontontik. Jaʼ yuʼun, li Jeovae te tsʼibabil laj yikta «sventa jchanubtaseltik, sventa oyuk spatobil koʼontontik ta skoj ti chkuch kuʼuntik xchiʼuk ti tspat koʼontontik li Tsʼibetike» (Rom. 15:4). Li kʼusi mas tsots skʼoplal chakʼ jchantik liʼe, jaʼ ti mu jaʼuk xbat ta koʼontontik li vokoliletik ta jnuptantike, vaʼun ti jaʼ xchʼay ta koʼontontik li kʼusi mas tsots skʼoplale: li spakbel skʼoplal li mukʼul pasmantal yuʼun Jeovae. Teuk me ta joltik ti jaʼ te chkakʼtik ta ilel ti ta jkoltatik ajvalilal yuʼun Jeova mi tukʼ chkakʼ jbatik akʼo mi ep vokolil ta jnuptantik jech kʼu chaʼal li Jobe.

15. ¿Kʼusi lek chkʼot ta pasel mi tukʼ laj kakʼ jbatike?

¹⁵ ¿Kʼu yuʼun tstsatsubtas koʼontontik kʼalal ta jnopbetik smelolal ti tsots tajek skʼoplal ti tukʼuk-o xkakʼ jbatike? Yuʼun jaʼ tsvules ta joltik ti mu jecheʼuk noʼox ti chkil jvokoltike. Li vokoliletik ta jnuptantike maʼuk skʼan xal ti ilinem ta jtojolaltik li Diose, moʼoj, yuʼun jaʼ xuʼ te chkakʼtik ta ilel ti ta jkʼantik akʼo sventainutike (Prov. 27:11). Mi kuch kuʼuntike jaʼ me jech lek chkil jbatik xchiʼuk li Jeovae xchiʼuk mas to me ta jchʼuntik ti chkʼot ta pasel li spatobil koʼontontike (kʼelo Romanos 5:3-5). Li sloʼil xkuxlejal Jobe jaʼ chakʼ ta aʼiel «ti toj echʼ xa noʼox kʼuxutik ta yoʼonton li Jeovae xchiʼuk ti chkʼuxubinutike» (Sant. 5:11). Jaʼ yuʼun, xuʼ jchʼuntik ta melel ti chakʼbutik sbendision mi ta jkolta jbatik ta spakbel skʼoplal li mukʼul pasmantal yuʼune. Kʼalal chkaʼibetik smelolal taje, jaʼ me tskoltautik sventa stsʼik kuʼuntik skotol li kʼusi ta jnuptantike xchiʼuk ti ta muyubajeluk noʼox x-echʼ kuʼuntike (Kol. 1:11).

MU ME XCHʼAY TA KOʼONTONTIK TI TOJ TSOTS SKʼOPLAL LI MUKʼUL PASMANTAL YUʼUN JEOVAE

16. ¿Kʼu yuʼun lek tajek ti jvulesbe jba ta joltik ti tsots tajek skʼoplal ti xichʼ pakbel skʼoplal li mukʼul pasmantal yuʼun Jeovae?

¹⁶ Melel onoʼox ti mu kʼunuk chkaʼitik ti teuk-o ta joltik li spakbel skʼoplal li mukʼul pasmantal yuʼun Jeovae, mas to kʼalal ta jnuptantik tsatsal vokoliletike. Akʼo mi muʼyuk mas tsots li jvokoltik xtoke, xuʼ me jaʼ xbat ta koʼontontik mi te xijnopnun-o jchiʼuktike. Jaʼ yuʼun, lek me ti nopolik noʼox jvulesbe jba ta joltik ti tsots tajek skʼoplal ti jkoltatik li mukʼul pasmantal yuʼun Jeova kʼalal oy tsots jvokoltike.

17. ¿Kʼuxi tskoltautik mi jaʼ kakʼoj ta koʼontontik li spasbel yabtel Jeovae?

¹⁷ Mi jaʼ kakʼoj ta koʼontontik ta spasbel yabtel li Jeovae, jaʼ me tskoltautik yoʼ mu xchʼay ta koʼontontik ti toj tsots skʼoplal li mukʼul pasmantal yuʼun Jeovae. Kalbetik skʼoplal jun ermana ti Renee sbie. Akʼbat derrame cerebral, ta skoj taje julikel noʼox chkʼuxub li sjole, xchiʼuk ip ta kanser xtok. Kʼalal jaʼo te oy ta ospitale chcholbe mantal li buchʼutik te ch-abtejike, li yan jchameletike xchiʼuk li buchʼutik chkʼot vulaʼanatuke. Jun veltae 80 ora la xchol mantal kʼalal chib xemana xchiʼuk j-oʼlol te kom ta ospitale. Kʼuchaʼal chkiltike muʼyuk la xchʼay ta yoʼonton li mukʼul pasmantal yuʼun Jeovae, mi jaʼuk kʼalal jutuk xa ox mu chame. Ti jech la spas taje jaʼ koltae sventa junuk noʼox yoʼonton.

18. ¿Kʼusi sbalil ta jtatik mi la jkoltatik li mukʼul pasmantal yuʼun Jeova jech kʼuchaʼal la spas li jun ermanae?

¹⁸ Oy onoʼox kʼusitik ta jnuptantik jujun kʼakʼal ti mu toj tsotsuke. Kʼalal ta jnuptantik taje, skʼan onoʼox me teuk ta koʼontontik xtok li mukʼul pasmantal yuʼun Jeovae. Kalbetik junuk skʼelobil. Kʼalal jaʼo bat ta sna jun ermana ti Jennifer sbie, jal la smala ta aeropuerto sventa xlokʼ batel li avion ti jaʼ ch-ikʼat batel snae. Pe mu xlokʼ-o batel li avione, jaʼ yuʼun, ¡te la smala oxib kʼakʼal li ta aeropuertoe! Ta skoj ti stuk laj yaʼi sbae xchiʼuk ti lubem xae, lik svul tajek yoʼonton ti jechuke. Pe mu jechuk la spas. Vaʼun la skʼanbe Jeova ti akʼo xbeiltasat sventa skolta ta mantal li yan krixchanoetik ti te tsmalaik xlokʼ batel li avion eke xchiʼuk ti batsʼi mu xa junuk yoʼontonike. ¿Kʼusi la spas? La xcholbe mantal li krixchanoetike xchiʼuk ep laj yikta vunetik. Xi chal li Jennifere: «Akʼo mi tsots laj kaʼi, pe li Jeovae laj yakʼbun bendision xchiʼuk laj yakʼbun kipal sventa lekuk xkalbe bal smelolal li sbie». Kʼuchaʼal chkiltike, li ermanae muʼyuk la xchʼay ta yoʼonton li kʼusi tskʼan tspas li Jeovae.

19. ¿Kʼusi yaʼiojbeik smelolal li steklumal Jeovae xchiʼuk kʼusi spasojik talel?

¹⁹ Li steklumal Jeovae yaʼiojbe onoʼox talel smelolal ti tsots tajek skʼoplal li mukʼul pasmantal yuʼun Diose xchiʼuk jech-o skoltaoj talel. Taje jaʼ jelelik-o li ta jecheʼ relijionetike. Ta jujuntalutik skʼan jechuk jpastik ek, yuʼun jaʼ jech ta jkoltatik li melel relijione.

20. ¿Kʼu yelan chil Jeova ti ta jkoltatik li mukʼul pasmantal yuʼune?

²⁰ Xuʼ jchʼuntik ta melel ti toj ep sbalil chil Jeova kʼalal chkuch kuʼuntik xchiʼuk ti tukʼ chkakʼ jbatik ta stojolale, yuʼun jaʼ jech ta jkoltatik li mukʼul pasmantal yuʼune (Sal. 18:25). Li ta yan xchanobil chtale, chkalbetik to mas smelolal ti kʼu yuʼun sta-o ti jkoltatik li mukʼul pasmantal yuʼun Jeovae xchiʼuk ti kʼuxi chkakʼtik ta ilele.